Juon Raan, Juon Bon̄, im Juon Raan, jān Jorge Cocco

Jeptōm̧ba 7–13

3 Nipai 1–7

“Kwōn Kotak Bōram im Kwōn M̧ōņōņō”

Jetōb Kwojarjar eo emaron̄ im̧we eok n̄an am̧ kalimjōk wōt jet pedped in katak ko jān 3 Nipai 1–7 ilo kūlaaj. Ko me remaron̄ baj pedped in katak ko wōt me renaaj kōjeraam̧m̧an juon ej pād ilo aikuj.

Je En̄jake ko Rej Im̧we Eok

Kajjitōk bwe ren Kwaļo̧k

N̄an ro uwaan kūlaaj eo kwaļo̧k ta eo rej ekkatak ilo m̧weo, kajjitōk ippāer n̄an je ioon jet m̧ōttan peba ko jet m̧ool ko rej loi ilo 3 Nipai 1–7 im eoon in jipan̄ ko kōn m̧ool ko. Likūti m̧ōttan peba ko ilowaan juon nine, innām kanōk jejjo iaer jān nine eo im ekōnono kaki āinwōt juon kūlaaj. Āinwōt an ro uwaan kūlaaj eo kwaļo̧k, ļōmņak eļan̄n̄e elōn̄ ļōmņak ko jet rejelet ko ilo laajrak eo me remaron̄ kam̧wilaļļo̧k ekōnono eo im an ro jet uwaan kūlaaj eo bōk koņaer.

Katakin Katak ko

3 Nipai 1–7

Oktak eo ej juon jekjek me ej aikuj kijejeto ko niknik.

• 3 Nipai 1–7 ej kōmeļeļeiki an armej ro rekar oktaktok n̄an Jisōs Kraist im gospel eo An im ro jet rekar jab. N̄an jipan̄ ro uwaan kūlaaj eo am̧ kalikkari ta eo ekar kōm̧m̧an oktak ikōtaan kumi ko, komaron̄ ejaake juon jaat ioon boot eo kōn naan ko: Tōmak ko im m̧akūtkūt ko me rej kōm̧ōjņo̧ikļo̧k oktaktok eo im Tōmak ko im m̧akūtkūt ko rej kōkajoorļo̧k oktaktok eo. Ajije laajrak in eoon in jipan̄ kein ilubwilijin ro uwaan kūlaaj eo, im kajjitōk ippāer n̄an kobrake ilo jaat eo kōn ta eo rej loe (waanjon̄ak ko kar litok ilo eoon in jipan̄ eo kein kajuon.)

  • 3 Nipai 1:4–23, 29–30: Kōmōjņo̧ikļo̧k oktaktok eo: jab tōmak naan ko an rikanaan ro im kōm̧m̧an kōjak kōn armej ro rewāppen (eoon 5–6). Kōkajoorļo̧k oktaktok eo: wōr tōmak ilo naan ko an rikanaan ro im jar kōn jipan̄ (eoon 8, 11).

  • 3 Nipai 2:1–3

  • 3 Nipai 3:12–16

  • 3 Nipai 4:8–10, 30–33

  • 3 Nipai 6:13–18

  • 3 Nipai 7:15–22

  Ewi wāween ad maron̄ kōjparok oktaktok eo ad ekajoor men̄e jum̧ae?

• Kūlaaj eo am̧ emaron̄ in itok limo ilo etale wāween n̄an kōkajoorļo̧k ta eo 3 Nipai 1:27–30 ej ņaetan “diktak in epepen eo.” Komaron̄ kajjitōk ippān ro uwaan kūlaaj eo n̄an pukot un ko ilo eoon kein etke Rinipai ro reddik im Rileman ro rekar jab maron̄ in bōbrae nana eo ipeļaakier. Menin emaron̄ tōlļo̧k n̄an juon ekōnono kōn jet iaan apan̄ ko im jelm̧ai rainin an diktak in epepen eo im wāween ko rem̧m̧an n̄an jipan̄ er ejaake tōmak ilo Kraist. Jet elmakot ko maron̄ loi ilo “Kein Jipan̄ ko Jet.”

3 Nipai 1:4–21; 5:1–3

Irooj enaaj kakūrm̧ool aolep naan ko An.

• Riiti bwebwenato ko ilo 3 Nipai 1:4–21 im 5:1–3 emaron̄ kōkajoorļo̧k ro uwaan kūlaaj eo am̧ tōmak ilo kallim̧ur ko an Irooj. Bōlen ro uwaan kūlaaj eo remaron̄ riiti 3 Nipai 1:4–7 im kōllaajrake ioon boot eo wāween aer maron̄ en̄jake eļan̄n̄e rekar ritōmak ro eoon kein rej kōmeļeļeik er. Remaron̄ barāinwōt ļōmņak kōn ejja jekjek kein remaron̄ jelm̧ai rainin. Ta eo jej ekkatak jān 3 Nipai 1:8–21 im 5:1–3 kōn Irooj im kallim̧ur ko An? N̄an kōdōbakbakļo̧k ekōnono in, komaron̄ etale juon al kōn lōke Anij, āinwōt “When Faith Endures” (Hymns, no. 128). Ro uwaan kūlaaj eo remaron̄ in kwaļo̧k en̄jake ko ke tōmak eo aer im aer lōke ilo Anij kar maron̄ anjo̧, men̄e jum̧ae ko.

3 Nipai 1:4–15; 5:12–26; 6:10–15; 7:15–26

Jej rikaļoor ro an Jisōs Kraist.

• Mormon Ekar kwaļo̧k, “Lo, n̄aij rikaļooran Jisōs Kraist” (3 Nipai 5:13). N̄an lale ippān ro uwaan kūlaaj eo ta meļeļein erom̧ juon rikaļoor, komaron̄ kajjitōk ippān ro uwaan kūlaaj eo n̄an etale 3 Nipai 1:4–15; 5:12–26; 6:10–15; im 7:15–26, pukoti bōnjen ko, tōmak ko, im m̧akūtkūt ko an rikaļoor ro an Kraist. Ļōmņak im leļo̧k n̄an ro uwaan kūlaaj eo jejjo minit ko n̄an kejōkļo̧kjeņ im je jet men ko remaron̄ kōm̧m̧an aer erom̧ juon rikaļoor eo em̧m̧anļo̧k an Jisōs Kraist.

3 Nipai 2:11–12; 3:12–26; 5:24–26

N̄e ro rewānōk rej aiintok doon, Irooj emaron̄ kōkajoorļo̧k im kōjparok er.

• M̧ōttan un ko bwe RiNipai ro ren maron̄ kar kaluuji riko̧o̧t ro an Kadiantōn ekar bwe rekar koba ippān doon ippān rioktak RiLeman ro im ļoor naan in tōl eo an Lakoneus n̄an “ainļo̧k doon ippān doon” ilo Zaraemla (3 Nipai 3:22). Ta katak ko maron̄ kōm̧m̧ani n̄an ro uwaan kūlaaj eo am̧? Komaron̄ in kajjitōk ippāer n̄an kwaļo̧k en̄jake ko n̄e rekar bōk kōkajoorļo̧k jān armej ro rewānōk ipeļaakier. Komaron̄ in kajjitōk ippān ro uwaan kūlaaj eo n̄an etale 3 Nipai 3:12–26, pukot un ko unin an Rinipai ro rekar ainļo̧k doon im kōjeraam̧m̧an ko rekar iooni. Ewi wāween ad en̄jake ejja kain kōjeraam̧m̧an kein n̄e jej aiintok doon ippān ro uwaan baam̧le ko ad ak branch ko im ward ko? Ta eo eļapļo̧k jemaron̄ ekkatak jāne kōn ainļo̧k doon in jān 3 Nipai 5:24–26?

• Riiti 3 Nipai 3 emaron̄ erom̧ juon iien em̧m̧an n̄an jipan̄ ro uwaan kūlaaj eo lo ewi jon̄an kajoorļo̧k eo n̄an kōj n̄e jej aiintok doon ilo wāppen. Bōlen komaron̄ ļōmņak kōn juon men ak m̧weiūk komaron̄ kōjerbale n̄an katakin eo im ej kwaļo̧k wāween an juon men eo emōjņo̧ erom̧ juon men eo ekajoor n̄e ej kobaļo̧k ippān men ko jet. Kajjitōk ippān ro uwaan kūlaaj eo n̄an pijaik ilo kōļmenļo̧kjeņ n̄e ren kar kajjitōk ippāer n̄an katōmak RiNipai ro kōn jeraam̧m̧an eo an aiintok doon, āinwōt an kōmeļeļe ilo eoon 12–26. Bōlen remaron̄ jerbal ilo kūrub ko n̄an ekōnono kōn wāween aer kōm̧m̧ane menin, pedped wōt ioon ta eo rej riiti ilo eoon kein. Kōtļo̧k bwe ren kwaļo̧k ļōmņak ko aer. Āinwōt juon kūlaaj, komaron̄ in ekōnono kōn kajjitōk kein āinwōt: Ta apan̄ ko jej jelm̧ai ko me remaron̄ āinwōt riko̧o̧t ro an Kadiantōn? Ewi wāween ad maron̄ kōm̧m̧an bwe m̧ōko imōd im ward ko ad ren jikin kone?

3 Nipai 3:1–13

Jej jab aikuj mijak Setan.

• Bwebwenato kar jeje jān Kidkidonai, ritōl eo an riko̧o̧t ro an Kadiantōn, ekar juon tōre in kajjieon̄ n̄an kaam̧jak im moņe RiNipai ro. Bōlen ro uwaan kūlaaj eo remaron̄ etale naan ko an loi ilo 3 Nipai 3:2–10 im keidi er n̄an wāween ko Setan emaron̄ in kajjieon̄ moņe kōj rainin. Ta eo jej ekkatak jān paktokin Lakoneus, riekajet eo eutiej an RiNipai ro?

Kōketak Ekkatak ilo Mweo

N̄an im̧we ro uwaan kūlaaj eo am̧ n̄an riiti 3 Nipai 8–11 n̄an kūlaaj eo wiik eo juon, ba n̄an er bwe 3 Nipai 11 ej kitbuuj “men eo eļaptata” an Bok in Mormon eo—jerbal in karejar eo an Jisōs Kraist make ilubwiljin Rinipai ro (lale Kadkad in Bok in Mormon).

Kein Jipan̄ ko jet

Jipan̄ kalōk tōmak ilo diktak in epepen ko.

Elder Valeri V. Cordón jān Jiljilimjuonn̄oul eo ekar elmakote jilu wāween ko n̄an jipan̄ diktak in epepen eo n̄an m̧ool wōt n̄an gospel eo:

1. “Ļapļo̧k Ad Tiljekļo̧k im Kea ilo M̧weo. … Kajoor ilo katakin ej kanooj aorōk n̄an kōjparok gospel eo ilo baam̧le ko ad, im ej aikuj tiljek im kijejeto. Em̧ōj kar kūr kōj elōn̄ alen n̄an an baam̧le eo im juon make riiti jeje ko rekwojarjar. Elōn̄ baam̧le ko me rej kōm̧m̧ane menin im rej jeraam̧m̧an kajjojo raan kōn eļap ippān doon im epaakeļo̧k Irooj.”

2. “Karōk ko Rekajoor ilo M̧weo. … Ejjab bwe n̄an baj kōnono n̄an ajri ro nejid kōn aorōk eo an m̧are ilo tampeļ, jitlo̧k, ak kōjparok raan in Jabōt im kokwojarjare. Rej aikuj lo ad kōm̧m̧an jikieer ilo jikejuuļ ko ad n̄an etal n̄an tam̧peļ emakijkij jon̄an ad maron̄. Rej aikuj lo ad wujļepļo̧k n̄an jitlo̧k aolep iien im kōjparok aolepān raan in Jabōt im kokwojarjare.”

3. “Imminene ko. … Āinwōt baam̧le ko, jej aikuj julo̧k jabdewōt iminene me naaj bōbrae kōj jān kōjparok im kōkwojarjar raan in Jabōt ak kōmakijkij ekkatak jeje ko rekwojarjar im jar ilo m̧weo. Jej aikuj kune jabdewōt kein alooj ko ilo m̧weeo im̧ōd jān pija ko renana im aolep an̄juwiwi ko an nana otemjeļo̧k. N̄an tariņaiki imminene ko an laļ in an raan kein ad, jej aikuj in kōjerbal jeje ko rekwojarjar im ainikien rikanaan ro raan kein n̄an katakin ajri ro nejid kadkad eo aer ekwojarjar, jibadbad eo aer ilo mour in, im mijen eo ekwojarjar an Jisōs Kraist” (“The Language of the Gospel,” Ensign ak Liahona, Māe 2017, 56–57; italic naan ko kar kobaiktok).

Kōkōm̧anm̧anļo̧k Ad Katakin

Kobaik ro rej en̄taan ilo kajjieon̄. Jet iien ro uwaan kūlaaj eo im rej en̄taan ilo kajjieon̄ rej aikuj in kobaik er n̄an aer en̄jake iakwe eo jān ro jet. Ļōmņak in kajjitōk ippāer n̄an kōm̧m̧ane juon ikkure ilo katak eo tok juon ak lukkuun lale bwe en wōr juon iaļer n̄an mōnjar eo. Jab ebbeer eļan̄n̄e rej jab uwaake kijejeto ko am̧ ilo jinoin. (Lale Teaching in the Savior’s Way, 8–9.)