Meram in Paotokin Eaar Romaak ilo Er, jān Gary L. Kapp

Jeptōm̧ba 28–Oktoba 11

3 Nipai 17–19

“Lo, Aō Lan̄lōn̄ Eobrak”

Am̧ m̧aanjabpopo n̄an katakin ej aikuj in ijjino kōn ekkatak eo am̧ make jān jeje ko rekwojarjar. Itok, Ļoor Eō—N̄an Kajjojo Armej im Baam̧le ko emaron̄ jipan̄ eok katak, im laajrak in emaron̄ in barāinwōt lewaj n̄an eok ļōmņak ko n̄an jipan̄ eo kōppopo.

Je En̄jake ko Rej Im̧we Eok

Kajjitōk bwe ren Kwaļo̧k

Ilo 3 Nipai 17:1–3, Rilo̧mo̧o̧r eo ekar kajjitōk ippān armej ro bwe ren jepļaak n̄an im̧ōko im̧ōer im “kōpooj [būruweer]” m̧okta jān aer ro̧o̧ltok im bar ekkatak. Komaron̄ kajjitōk ippān rijikuuļ ro am̧ kōn wāween aer kar pojak n̄an ekōnono eo an rainin im ta eo rekar kejōkļo̧kjeņ kake.

Katakin Katak ko

3 Nipai 17; 18:24–25, 28–32

Rilo̧mo̧o̧r eo ej waanjon̄ak eo ad eweppān kōn jerbal in karejar.

• Kōj aolep ewōr ad iien ko rem̧m̧an n̄an jerbal in karejar n̄an ro jet, im jemaron̄ erom̧ ro rem̧m̧anļo̧k ilo menin. Juon wāween n̄an ekkatak jān waanjon̄an eo an Rilo̧mo̧o̧r eo kōn jerbal in karejar ej n̄an baj riiti 3 Nipai 17 āinwōt juon kūlaaj im karuwaineneik ro uwaan kūlaaj eo n̄an kajjitōk jabdewōt iien rej loe juon me ej katakin er kōn jerbal in karejar. Ta eo jej ekkatak kōn m̧wil eo an Rilo̧mo̧o̧r eo me ekar kōm̧m̧an An juon waanjon̄ak eo em̧m̧an an jerbal in karejar? Ta m̧ool ko jej ekkatak kōn jerbal in karejar jān waanjon̄ak eo an Rilo̧mo̧o̧r eo? Komaron̄ in barāinwōt lale ļōmņak ko jet ilo 3 Nipai 18:24–25 im 28–32. Innām ro uwaan kūlaaj eo remaron̄ ekōnono kōn kajjojo men ko rej en̄jake ke rekar im̧we er n̄an ļoor waanjon̄ak eo an Rilo̧mo̧o̧r eo kōn jerbal in karejar.

  

  Lo Lale ro Reddik Nejimi, jān Gary L. Kapp

3 Nipai 17:13–22; 18:15–25; 19:6–9, 15–36

Rilo̧mo̧o̧r eo eaar katakin kōj kilen jar.

• N̄an jipan̄ ro uwaan kūlaaj eo ekkatak jān waanjon̄ak ko rellōn̄ an im katak ko kōn jar ilo 3 Nipai 17–19, komaron̄ je ioon boot eo Wōn? Ekōjkan? N̄āāt? im Etke? im kajjitōk ippān ro uwaan kūlaaj eo n̄an pukoti uwaak ko n̄an kajjitōk kein ilo aer keidi n̄an jar ilo laajrak in eoon kein: 3 Nipai 17:13–22; 18:15–25; im 19:6–9, 15–36. Ta en̄jake ko jet ro uwaan kūlaaj eo remaron̄ būki ilo aer riiti eoon kein? Ennaan eo jān Elder Richard G. Scott ilo “Kein Jipan̄ ko Jet” maron̄ kobaiki ilo ekōnono eo. Komaron̄ barāinwōt kajjitōk ippān ro uwaan kūlaaj eo n̄an kwaļo̧k ta eo rej kōm̧m̧ane n̄an kōm̧m̧an bwe jar ko aer ippāer make im an baam̧le ren ļapļo̧k aorōkier (lale 3 Nipai 18:18–21).

• Unin Tōl eo an wiik in ilo Itok, Ļoor Eō—N̄an Kajjojo Armej im Baam̧le ko kajjitōk ko elmakoti n̄an kejōkļo̧kjeņ kaki kōn jar n̄e riiti eoon kein. Komaron̄ kajjitōk ippān ro uwaan kūlaaj eo n̄an kwaļo̧k jabdewōt ļōmņak ko ewōr ippāer kōn kajjitōk kein. Ak komaron̄ in kajjitōk ippān jet iaan ro uwaan kūlaaj eo n̄an itok n̄an kūlaaj ilo aer pojak in ekōnono kōn jet men ko me rekar ekkatak kōn jar jān 3 Nipai 17–19. Ta eo ekar im̧we er bwe ren kōm̧m̧an bwe jar ko aer en ļapļo̧k an aorōk?

• Jisōs ekar katakin etke jej aikuj in jar iien otemjej (lale 3 Nipai 18:15–18). Juon mennin katak emaron̄ jipan̄ ro kūlaaj eo am̧ meļeļe ta eo Ekar katakin. N̄an waanjon̄ak, komaron̄ in teen̄ juon nine kōn dān n̄an bōk jikin kareel an Stean. Likūt juon nabkōn (eo ej bōk jikid) lukkuun kapene itulaļ in juon kab (eo ej bōk jikin jar aolep iien). Kabdoe kab eo bwe en jitlaļļo̧k, im iuun laļļo̧k n̄an lowaan nien dān eo. Nabkōn eo enej pād wōt ilo an mōrā ilo kapin kab eo, mekarta ej jepooļ kōn dān. Ta eo mennin katak in im 3 Nipai 18:15–18 rej katakin kōj kōn jar? (lale barāinwōt KB 10:5). Ta meļeļein “jar iien otemjej”? Ewi wāween an jar jipan̄ kōj jum̧we kareel eo an Setan? Ļōmņak in kōtļo̧k jidik iien an ro uwaan kūlaaj eo je ta eo rej en̄jake n̄an kōkōm̧anm̧anļo̧k jar ko aer.

3 Nipai 18:1–12

Jemaron̄ obrak kōn jetōb ilo ad bōk m̧ōttan kwojkwoj eo.

• N̄an jino juon ekōnono kōn katak ko an Rilo̧mo̧o̧r eo kōn kwojkwoj eo ilo 3 Nipai 18, komaron̄ ajije kūlaaj eo am̧ n̄an kumi ko im im leļo̧k n̄an kajjojo kumi juon iaan laajrak in eoon kein n̄an riit im ekōnono kaki: Matu 26:26–28; 3 Nipai 18:1–12; im Katak im Bujen ko 20:75–79; 27:1–4. Ālkin riiti eoon ko kar liļo̧k, kajjojo kumi emaron̄ ļōmņak kōn juon kajjitōk ak ruo kōn kwojkwoj eo me ekar uwaak ilo eoon ko raar riiti im je kajjitōk ko aer ioon boot eo. Innām aolepān kūlaaj eo remaron̄ etale jeje ko rekwojarjar n̄an uwaak ko n̄an kajjitōk ko. Ro uwaan kūlaaj eo remaron̄ barāinwōt kōnono kōn wāween aer maron̄ bōk elōn̄ļo̧k en̄jake ko rem̧m̧an ilo bōk m̧ōttan kwojkwoj eo.

• Ta meļeļein n̄an “obrak” ilo ad bōk m̧ōttan kwojkwoj eo? (lale 3 Nipai 18:4–5, 9; 20:9). Ļōmņak in kajjitōk ippān ro uwaan kūlaaj eo n̄an ekōnono kōn kajjitōk in ruo iaan ruo ilo aer riiti 3 Nipai 18:1–12 ippān doon. Komaron̄ barāinwōt kajjitōk ippān ro uwaan kūlaaj eo n̄an kejōkļo̧kjeņ kōn iien eo āliktata im rekar en̄jake aer “obrak” ke rekar bōk m̧ōttan kwojkwoj eo. Bōlen remaron̄ ekōnono kōn men ko me remaron̄ kar bōbrae ak kōm̧ad kōj jān erom “obrak” kōn kwojkwoj eo im kwaļo̧k ļōmņak ko kōn ekōjkan anjo̧ ioon kabbōjrak ko.

3 Nipai 19:9–15, 20–22

Rikaļoor ro an Jisōs Kraist rej pukōt menin letok eo an Jetōb Kwojarjar.

• Ļōmņak in kajjitōk ippān ro uwaan kūlaaj eo n̄an ļōmņak kōn juon men eo relukkuun in kōņaan. Ta eo rej m̧ōņōņō in kōm̧m̧ane n̄an bōke? Menin emaron̄ tōlļo̧k n̄an juon ekōnono kōn ta eo rikaļoor ro jon̄oulruo rekar “kanooj kōņaan,” āinwōt an kōmeļeļeik ilo 3 Nipai 19:9–15 im 20–22. Etke menin ekar lukkuun aorōk n̄an er? Etke eaorōk n̄an kōj? Ekkar n̄an eoon kein, ewi wāween ad maron̄ tiljek pukot jem̧jerā eo an Jetōb Kwojarjar eo?

Kōketak Ekkatak ilo Mweo

Irooj ekar ba, “Reļļap naan ko an Aiseia” (3 Nipai 23:1). N̄an kōketak ro uwaan kūlaaj eo n̄an riiti 3 Nipai 20–26, komaron̄ ba n̄an er bwe ilo jebta kein, Jisōs ekar kōmeļeļeiki jet iaan naan ko “reļļap” an Aiseia. Kajjitōk ippān ro uwaan kūlaaj eo n̄an kejōkļo̧kjeņ kaki etke naan ko an Aiseia reļļap. Rōjan̄ er bwe ren pojak ilo aer itok Jabōt eo juon n̄an kwaļo̧k ta eo rekar ekkatak.

Kein Jipan̄ ko jet

Aorōk eo an jar.

Elder Richard G. Scott ekar kam̧ool kōn aorōk eo an jar:

“Jej jar n̄an Jemedwōj Ilan̄ ilo āt eo ekwojarjar etan Nejin Ejitōn Bōro, Jisōs Kraist. Jar ej ļap tata an wejepedik n̄e jej kajjion̄ erom erreo im pokake, kōn ellowetak ko rōwānōk, im m̧ōņōņō n̄an kōm̧m̧ane ta eo Ej kajjitōk kake. Ettā bōro, ļōke ilo jar ej bōktok tōl im aenōm̧m̧an.

“Jab inepata kōn en̄jake kūļame ko am̧ kar waļo̧k. Baj kōnono n̄an Jemam̧ eo etenkwadik, emeļeļe. Kwoj juon Nejin eaorōk me E ej iakwe ilo weppāān im ekōņan jipan̄. Ilo am̧ jar, kile bwe Jemed ilo Lan̄ Ej epaake eok im Ej ron̄jake eok.

“Juon wāween n̄an kōkōm̧anm̧anļo̧k jar ej n̄an ekkatak n̄an kajjitōk kajjitōk ko rejim̧we. Ļōmņak in oktak jān kajjitōk kōn men ko kwoj kōņaan n̄an m̧ool ilo kappukōt ta eo Ej kōņaan n̄an kwe. Innām ilo am katak Ankilan, jar bwe naaj tōl eok n̄an wōr kajoor eo n̄an kakūrm̧oole.

“Elan̄n̄e kwonan̄in kar en̄jake ettoļo̧k jān Jemed, emaron̄ in kōn elōn̄ un ko. Jekdo̧o̧n ta un eo, ilo am̧ wōnm̧aanļo̧k wōt n̄an akweļap kōn jipan̄, Enaaj tōl eok n̄an kōm̧m̧ane ta eo enaaj kōro̧o̧lwaj lōke eo am̧ bwe E ej epaake eok. Jar jekdo̧o̧n n̄e ejjeļo̧k am̧ ikdeelel n̄an jar. Jet iien, āinwōt juon ajri, komaron̄ in bōd im en̄jake am jab maron̄ kepaak Jemam̧ kōn juon iepata. En̄in ej iien eo eļap tata am̧ aikuj in jar. Jab ļōmņak bwe kwoj jab erreo n̄an jar.

“Ij ļo̧kjeņaō eļan̄n̄e jemaron̄ lukkuun meļeļe kajoor eo eļap an jar m̧ae iien jej ioon juon jorrāān eo etōr jān jon̄an, emenin ekairir im kile bwe ejjeļo̧k ad kajoor n̄an ņa mejļan. Innām jenaaj oktakļo̧k n̄an Jemed ilo ettā kile ad lukkuun aikuj pedped wōt Ioon. Ejipan̄ n̄an pukōt juon jikin ettiņo ijo en̄jake ko ad maron̄ ilo kōnono kaki kwaļok aitokan wōt im kajoor in wōt an menin aikuj” (“Using the Supernal Gift of Prayer,” Ensign ak Liahona, May 2007, 8).

Kōkōm̧anm̧anļo̧k Ad Katakin

Kajjieon̄ bōk iakwe eo an Kraist. Eļan̄n̄e ewōr juon uwaan kūlaaj eo am̧ eaikuj jemjerā, ļōmņak kōn wāween am̧ maron̄ jipan̄ e,en̄jake an m̧ōttan wōt kūlaaj eo. N̄an waanjon̄ak, komaron̄ kajjitōk ippān bar juon uwaan kūlaaj eo n̄an jijet iturin armej in im m̧ōttāiki.