“Jeptōm̧ba 28–Oktoba 11. 3 Nipai 17–19: ‘Lo, Aō Lan̄lōn̄ Eobrak,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Jeptōm̧ba 28–Oktoba 11. 3 Nipai 17–19,” Itok, Ļoor Eō—N̄an Kajjojo Armej im Baam̧le ko: 2020
Meram in Paotokin Eaar Romaak Ioer, jān Gary L. Kapp
Jeptōm̧ba 28–Oktoba 11
3 Nipai 17–19
“Lo, Aō Lan̄lōn̄ Eobrak”
Ilo an jepta ko ļo̧k im̧aan in 3 Nipai pedped eļap tata ioon naan ko an Rilo̧mo̧or, jebta 17–19 kōmeļeļeik jerbal in karejar eo im katak ko An ibwilijin armej ro. Ilo am̧ riiti jebta kein, ta eo Jetōb eo ej katakin eok kōn Rilo̧mo̧o̧r?
Je En̄jake ko Rej Im̧we Eok
Jisōs Kraist ej kab m̧ōj an kar joļo̧k juon raan n̄an kōm̧m̧ane jerbal in karejar eo an ilo āne in Bun̄-peļo̧k, katakin gospel eo An, leļo̧k n̄an armej ro iien n̄an lo im en̄jake jeno̧k ko ilo ānbwin eo Ānbwinin kar ālkin jerkakpeje, im kam̧ool bwe E eo kar Rilo̧mo̧o̧r eo me rekar kallim̧ur kake. Im kiiō eaar iien n̄an An ilo̧k. Eaar aikuj in jepļaak n̄an ippān Jemen, im Eaar jeļā bwe armej ro raar aikuj iien n̄an kejekļo̧kjeņ kōn ta eo Eaar katakin. Kōn menin kar kallim̧ur n̄an bar jepļaaktok raan eo tok juon, Eaar jilkinļo̧k jarlepju eo n̄an im̧ōko im̧weer. Bōtaab ejjeļo̧k juon eaar ilo̧k. Raar jab ba ta eo raar en̄jake, bōtaab Jisōs emaron̄ kar loe: raar kōjatdikdik Enaaj kar “pād wōt aetokļo̧k ippāer” (3 Nipai 17:5). Ebar wōr jet men ko raorōk n̄an An kōm̧m̧ani, bōtaab iien eo em̧m̧an n̄an kwaļo̧k meanwōd eaar jab iien otemjej itok ilo juon iien em̧m̧an, kōn menin Jisōs eaar pād aitokļo̧k jidik ippān armej ro. Ta eo eaar waļo̧ktok ālkin eaar bōlen waanjon̄ak eo ejouj tata kōn jerbal in karejar me em̧ōj kar je ilo jeje ko rekwojarjar. Ro raar pād remaron̄ in kar ba wōt bwe eaar pen kōmeļeļeik (lale 3 Nipai 17:16–17). Jisōs E make eaar ba ilo tukadu in jiōbtok in imwe ilo jetōb eo kōn naan kein reļam waan: “Kiiō lo, Aō lan̄lōn̄ eobrak.” (3 Nipai 17:20).
Ļōmņak ko n̄an Ekkatak Jeje ko Rekwojarjar Ippam̧ Make
Rilo̧mo̧o̧r eo ej waanjon̄ak eo ad eweppān kōn jerbal in karejar.
Jejeļā bwe eaar wōr enan̄in in 2,500 armej ro (lale 3 Nipai 17:25) ro raar lo loļo̧k eo jinion tata an Kraist, āinwōt kar je ilo 3 Nipai 11–18. Kōn menin Rilo̧mo̧o̧r eaar lo juon wāween n̄an jerbal in karejar n̄an er juon ilo̧k juon. Ta eo kwoj ekkatak kōn jerbal in karejar jān waanjon̄ak eo an Rilo̧mo̧o̧r ilo jebta in? Ta aikuj ko Eaar jerbal in karejar n̄ani? Kejōkļo̧kjeņ kōn ekōjkan an waanjon̄ak eo An jipan̄ eok jerbal in karejar n̄an ro jet.
Kom̧in Lale ro Reddik Nejimi, jān Gary L. Kapp
3 Nipai 17:13–22; 18:15–25; 19:6–9, 15–36
Rilo̧mo̧o̧r eaar katakin kōj kilen jar.
Pijaikļo̧k enaaj kar ekōjkan n̄e kwoj ron̄ an Rilo̧mo̧o̧r jar kōn kwe. Ta eo Emaron̄ ba ilo etam̧? Katak ko im jar ko An ilo jebta kein remaron̄ lewaj n̄an eok juon ļōmņak. Ilo am̧ ekkatak, ta eo kwoj katak jān waanjon̄ak eo an Kraist me emaron̄ kōm̧m̧an bwe jar ko am̧ make ren ļapļo̧k meļeļeier. Ta kōjeraam̧m̧an ko jān jar em̧ōj am̧ loi ilo mour eo am̧?
Imaron̄ in mat ilo jetōb ilo aō bōk m̧ōttan kwojkwoj eo.
Ilo am̧ riiti 3 Nipai 18:1–12, kejōkļo̧kjeņ kōn ekōjkan an bōk kwojkwoj maron̄ jipan̄ eok “mat” ilo jetōb (3 Nipai 18:3–5, 9; lale barāinwōt 3 Nipai 20:1–9). N̄an waanjon̄ak, komaron̄ kōm̧m̧ane juon laajrak in kajjitōk ko n̄an im̧we kejōkļo̧kjeņ an juon make n̄e kwoj bōk kwojkwoj eo, ko āinwōt “Ekōjkan aō en̄jake kōn Rilo̧mo̧o̧r im en̄taan eo An kōn eō?” “Ekōjkan an en̄taan eo An kareel mour eo aō raan otemjej?” ak “Ta eo ij kōm̧m̧ane āinwōt juon rikaļoor, im ta eo imaron̄ kōkōm̧anm̧anļo̧k?”
Naan kein jān Būreejtōn Henry B. Eyring remaron̄ jipan̄ eok kejekļo̧kjeņ kōn juon wāween kwojkwoj eo me emaron̄ jipan̄ eok mat ilo jetōb: “Ilo am̧ ļōmņak kōn mour eo am̧ ilo iien kain̄i eo an kwojkwoj eo, ij kōjatdikdik ļōmņak ko am̧ rej pedped ioon ejjab ilo men ko wōt kwar kōm̧m̧ani rebōd ak barāinwōt ioon men ko rejim̧we kwar kōm̧m̧ani—iien ko ke kwar en̄jake bwe Jemedwōj Ilan̄ im Rilo̧mo̧o̧r raar kam̧ōņōņōik eok. Em̧ool komaron̄ bōk jidik iien ilo iien kwojkwoj eo n̄an kajjitōk ippān Anij n̄an jipan̄ eok loe men kein. … N̄e em̧ōj aō kōm̧m̧ane men in, Jetōb enaaj kalikkar n̄an n̄a bwe jekdo̧o̧n n̄e ij ettoļo̧k jān weppān, ij em̧m̧anļo̧k ilo rainin jān kar inne. Im menin ej letok n̄an eō lōke eo me, kōn Rilo̧mo̧o̧r, em̧ool imaron̄ in em̧m̧anļo̧k ilju” (“Always Remember Him,” Ensign, Feb. 2018, 5).
Rikaļoor ro an Jisōs Kraist rej kappukōt menin letok eo an Jetōb Kwojarjar.
Ļōmņak kōn juon jar eo kwar kōm̧m̧ane āliktata. Ta eo jar eo ej katakin eok kōn ikdeelel ko am̧ rem̧wilaļ tata? Ālkin joļo̧k juon raan ilo im̧aan mejān Rilo̧mo̧o̧r, jarlepju eo “raar jar kōn men eo raar kanooj kōņaan”—menin letok eo an Jetōb Kwojarjar (3 Nipai 19:9). Ilo am̧ riiti eoon kein, kejōkļo̧kjeņ kōn ikdeelel eo am̧ make n̄an jemjerā eo an Jetōb Kwojarjar. Ta eo kwoj ekkatak kōn kappukōt jemjerā eo an Jetōb Kwojarjar?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.
3 Nipai 17
Ilo am̧ riiti jepta in āinwōt juon baam̧le, ļōmņak in bōjrak jān iien n̄an iien n̄an kūr baam̧le eo am̧ n̄an pijaikļo̧k aer en̄jake iien kein kōn er make. N̄an waanjon̄ak, komaron̄ kajjitōk kajjitōk ko āinwōt “Ta metak ko kwonaaj kar jibwetok n̄an Rilo̧mo̧o̧r n̄an kemour?” “Ta kwonaaj kōņan bwe En jar kake ilo etam?” ak “Wōn ro kwoj iakwe er kōņaan bwe En kōjeraam̧m̧an er?” Riiti jepta in emaron̄ barāinwōt im̧we eok n̄an jar kōn ro uwaan baam̧le eo am̧, juon illo̧k juon, āinwōt an Jisōs kar kōm̧m̧ane.
3 Nipai 18:1–12
Ta meļeļe in n̄an “mat” jān bōk m̧ōttan kwojkwoj eo, im ekōjkan ad en̄jake? Ta eo jej ekkatak jān eoon 5–7 kōn etke Jisōs eaar letok n̄an kōj kain̄i eo an kwojkwoj?
3 Nipai 18:17–21
Ta eo jej ekkatak jān eoon kein kōn jibadbad eo an jar? Ekōjkan ad maron̄ kōkōm̧anm̧anļo̧k kajoor ilo jetōb in jar ko ad, jim̧or āinwōt kajjojo armej im āinwōt juon baam̧le?
3 Nipai 18:25; 19:1–3
Ta eo baam̧le eo ad eaar en̄jake kōn gospel eo me jej kōņaan bwe jabdewōt ipeļaakid en maron̄ barāinwōt en̄jake? Ekōjkan ad maron̄ ļoor waanjon̄ak eo an armej ro ilo eoon kein im “ kanooj jerbal otem jerbal” (3 Nipai 19:3) n̄an bōktok ro jet n̄an Kraist, bwe ren barāinwōt maron̄ “en̄jake im lo” (3 Nipai 18:25) ta eo em̧ōj ad loe ilo gospel eo?
Kōn eļapļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Am̧ Ekkatak Ippam̧ Make
Kōm̧m̧an bwe Jetōb eo en tōl ekkatak eo am̧. Jetōb Kwojarjar eo emaron̄ tōl eok m̧aanļo̧k n̄an men ko kwoj aikuj in ekkatak kajjojo raan. En pidodo am̧ meļeļe n̄an im̧we ko An, jekdo̧o̧n eļan̄n̄e rej āinwōt elamkote bwe kwon riiti juon unin kōnono eoktak ak ekkatak ilo juon wāween eoktak jān am̧ kijon̄ kōm̧m̧ane. N̄an waanjon̄ak, ilo am̧ riit kōn kwojkwoj eo ilo 3 Nipai 18, Jetōb emaron̄ im̧we eok n̄an joļo̧k eļapļo̧k iien ilo unin kōnono jab eo jān am̧ kar karōke.
Raar Lo an Lan̄ ko Peļļo̧k, jān Walter Rane