“Oktoba 19–25. 3 Nipai 27–4 Nipai: ‘Eaar Ejjeļo̧k Bar Armej Rem̧ōņōņōļo̧k,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Oktoba 19–25. 3 Nipai 27–4 Nipai,” Itok Ļoor Eō—N̄an Kajjojo Armej im Baam̧le ko: 2020
Jar eo an Kraist, jān Derek Hegsted
Oktoba 19–25
3 Nipai 27–4 Nipai
“Eaar Ejjeļo̧k Bar Armej Rem̧ōņōņōļo̧k”
Irooj eaar kakien rikaļoor ro An n̄an je men ko raar en̄jaki (lale 3 Nipai 27:23–24). Ilo am̧ ekkatak, je en̄jake ko ewōr am̧ ilo jetōb.
Je En̄jake ko Rej Im̧we Eok
Katak ko an Jisōs Kraist ejjab bajjōk juon tōmak eaiboojoj n̄an kejekļo̧kjeņ. Ekanooj ļapļo̧k jān men jab in—rej meļeļein n̄an ukōt mour ko ad. Bok in 4 Nipai ej letok juon waanjon̄ak ekabwilōn̄lōn̄ kōn menin, kwaļo̧k ekōjkan an dipio gospel eo an Rilo̧mo̧o̧r maron̄ ukōt juon armej. Ļoor jerbal in karejar eo ekadu an Jisōs, buki iiō ko in aitwerōk ko ikōtaan RiNipai ro im RiLeman ro raar itok n̄an juon jem̧ļo̧k. Ruo laļ ko kar jeļā kaki kōn jum̧ae im uteij bōro rekar erom “juon, ro nejin Kraist,” (4 Nipai 1:17), im renaaj jino bōk “men otemjej ilo ejjeļo̧k kalijekļo̧k” (4 Nipai 1:3). “Iakwe eo an Anij … eaar pād ilo būruōn armej ro,” im “teaar ejjeļo̧k bar armej rem̧ōņōņōļo̧k ilubwiljin armej ro otemjej kar ejaak jān pein Anij” (4 Nipai 1:15–16). En̄in ej wāween an katak ko an Rilo̧mo̧o̧r kar ukōt RiNipai ro im RiLeman ro. Ekōjkan aer ukōt eok?
Ļōmņak ko n̄an Ekkatak Jeje ko Rekwojarjar Ippam̧ Make
Kabun̄ eo an Jisōs Kraist ej etōņake Etan.
Ke rikaļoor ro an Rilo̧mo̧o̧r rekar jino kajutak Kabun̄ eo An ioon aolepān āne eo, juon kajjitōk eaar walōn̄tak me, n̄an jet, emaron̄ in kar āinwōt juon men ejjab ļap—ta āt eo ej aikuj in kar etan Kabun̄ eo? (lale 3 Nipaii 27:1–3). Ta eo kwoj ekkatak kōn aorōk eo kōn āt in jān uwaak eo an Rilo̧mo̧o̧r ilo 3 Nipai 27:4–12? Ilo 1838 eo, Irooj eaar kwaļo̧k etan Kabun̄ eo An rainin (lale DC 115:4). Kejekļo̧kjeņ kōn kajjojo naan ilo āt eo. Ekōjkan an naan kein jipan̄ kōj jeļā wōn kōj, ta eo jej tōmake, im ekōjkan ad aikuj kōm̧m̧ane?
Lale barāinwōt Russell. M. Nelson, “Jim̧we in Etan Kabun̄ eo,” Ensign ak Liaona, Nob. 2018, 87–80; M. Russell Ballard, “The Importance of a Name,” Ensign ak Liahona, Nob. 2011, 79–82.
Ilo aō karreoik ikdeelel ko aō, ij erom juon rikaļoor etiljekļo̧k.
Ta eo kwonaaj kar ba eļan̄n̄e Rilo̧mo̧o̧r en kar kajjitōk ippam̧, āinwōt An kar kajjitōk ippān rikaļoor ro An, “Ta eo kom̧ij kōņaan jān eō?” (3 Nipai 28:1). Ļōmņak kōn menin ilo am̧ riit kōn en̄jake eo an rikaļoor ro an Rilo̧mo̧o̧r ilo 3 Nipai 28:1–11. Ta eo kwoj ekkatak kōn ikdeelel in bōro ko an rikaļoor ro jān uwaak ko aer n̄an kajjitōk eo An? Būreejtōn Dallin H. Oaks eaar katakin: “N̄an bōk mejān kajjik eo ad indeeo, jenaaj ikdeelel im jerbal kōn m̧wil ko remenin aikuj n̄an erom juon armej indeeo. … Jenaaj ikdeelel n̄an erom āinwōt [Jisōs Kraist]” (“Desire,” Ensign ak Liahona, Māe 2011, 44–45). Ta eo jemaron̄ kōm̧m̧ane bwe ikdeelel ko an būruwōd en ļapļo̧k an wānōk? (Kōn elōn̄ļo̧k meļeļe kōn “juon oktak jerbale ioon ānbwinnier” an rikaļoor ro jilu, lale 3 Nipaii 28:37 im “Armej ro Ukōte Er,” Unin Tōl Eo N̄an Jeje Ko Rekwōjarjar, scriptures.ChurchofJesusChrist.org.)
Oktak n̄an Jisōs Kraist im gospel eo An rej tōlļo̧k n̄an ippān doon im lem̧ōņōņō.
Komaron̄ ke pijaikļo̧k enaaj kar kōjkan n̄an mour ilo iiō ko ālkin loļo̧k eo an Rilo̧mo̧o̧r? Ekōjkan an armej ro kar dāpij wōt aenōm̧m̧an eo ekwojarjar ium̧win juon iien ekanooj aitok—epaakeļo̧k 200 iiō ko? Ilo am̧ ekkatak kōn 4 Nipai 1:1–18, ļōmņak in kakōļļeik ak je kāālet ko me armej ro raar kōm̧m̧ani n̄an aer maron̄ en̄jake mour jeraam̧m̧an in.
Kejekļo̧kjeņ kōn ta eo komaron̄ kar kōm̧m̧ane n̄an jipan̄ baam̧le eo am̧, ward eo, ak jukjuk in pād eo mour ilo juon ippān doon eļapļo̧k im elem̧ōņōņōļo̧k, āinwōt armej ro ilo 4 Nipai raar kōm̧m̧ane āindein. Ta katak ko an Jisōs Kraist me emaron̄ ļapļo̧k am̧ mour kaki n̄an maron̄ kadedeļo̧k kōttōpar in? Ta eo komaron̄ kōm̧m̧ane n̄an jipan̄ ro jet meļeļe im mour kōn katak kein?
Nana ej tōlļo̧k n̄an jepeļļo̧k im būrom̧ōj.
Ejerata, jukjuk in pād an Zaion kar kōmeļeļeik ilo 4 Nipai (lale barāinwōt Moses 7:18) āliktata kar jeepepļo̧k. Ilo am̧ riiti 4 Nipai 1:19–49, kappukōt piktok ko im m̧wil ko me raar kōm̧m̧an bwe jukjuk in pād in en jeepepļo̧k. Kwoj ke lo jabdewōt kakōļļe in piktok kein ak m̧wil kein ilo kwe make?
Lale barāinwōt “Chapter 18: Beware of Pride,” Teachings of Presidents of the Church: Ezra Taft Benson (2014), 229–40.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.
3 Nipai 27:13–21
Eoon kein remaron̄ jipan̄ ro uwaan baam̧le eo em̧m̧anļo̧k aer meļeļe ta kar meļeļe eo an Rilo̧mo̧o̧r ke Eaar ba “gospel eo aō.” Ālkin riiti im ekōnono kōn eoon kein, komaron̄ kajjitōk ippān kajjojo uwaan baam̧le n̄an ba ilo tukadu in ta eo gospel eo ilo juon jāntōj.
3 Nipai 27:23–26
Ekōjkan ad kōm̧m̧ane ilo je men ko em̧ōj ad kar “loi im ron̄”—kajjojo armej ak āinwōt juon baam̧le. Etke eaorōk n̄an kōjparok juon ļo̧o̧k in men ko ilo jetōb?
3 Nipai 27:30–31
N̄an jipan̄ ro uwaan baam̧le meļeļe lan̄lōn̄ eo Rilo̧mo̧o̧r eaar kōmeļeļeik ilo eoon kein, komaron̄ kōm̧m̧ane juon ikkure eo me ro uwaan baam̧le rej em̧ooj im bar juon uwaan baam̧le eo kajjion̄ pukōt er. Menin emaron̄ tōlļo̧k n̄an juon ekōnono kōn etke eaorōk n̄an pukōt aolep uwaan baam̧le eo bwe en “ejjeļo̧k iaer en jebwābwe.” Ekōjkan ad maron̄ jipan̄ ro uwaan baam̧le eo ad kajoor wōt ilo gospel eo ak bar ro̧o̧ltok eļan̄n̄e raar etal?
3 Nipai 28:17–18, 36–40
Ta eo jemaron̄ ekkatak jān waanjon̄ak eo an Mormon ke eaar jab meļeļe aolep men kōn oktak eo me eaar waļo̧k n̄an RiNipai rikaļoor ro jilu? Ta eo jemaron̄ kōm̧m̧ane n̄e jejjab meļeļe aolep men kōn juon pedped in katak an gospel eo? Būreejtōn Dieter F. Uchtdorf eaar katakin: “Anij ej kea kake kom̧. Enaaj ron̄jake, im Enaaj uwaaki kajjitōk ko ami make. Uwaak in jar eo ami enaaj itok ilo wāween eo An make im ilo iien eo An make, im kōn menin, kom̧ij aikuj in ekatak n̄an ron̄jake Ainikien” (“Bōk juon Naan in Kam̧ool kōn Meram im M̧ool,” Ensign ak Kweilo̧k eo Eļap, Nob. 2014, 21).
4 Nipai 1:15
N̄an kadikļo̧k aitwerōk ilo m̧weo im̧ōm, bōlen ro uwaan baam̧le eo remaron̄ kōm̧m̧ane juon kōttōpar n̄an kōļapļo̧k aer iakwe doon wiik in. Ālkin an wiik eo jem̧ļo̧k, etale wōnm̧aanļo̧k eo am̧ ippān doon im ekōnono kōn ekōjkan an kwaļo̧k eļapļo̧k iakwe kar jelet baam̧le eo am̧.
Kōn elōn̄ļo̧k ļōmņak ko kōn katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Am̧ Ekkatak Ippam̧ Make
Pukōt revelesōn aolep raan. Emakijkij an revelesōn itok “lain im bar lain” (2 Nipai 28:30). Ilo am̧ kejekļo̧kjeņ kōn eoon kein kwoj ekkatak, ļōmņak ko im im̧we ko remaron̄ itok n̄an kwe ilo aolepān raan eo. Jab ļōmņak kōn ekkatak gospel eo āinwōt juon men kwoj “kōm̧m̧an iien n̄ane” bōtaab āinwōt juon men kwoj aolep iien kōm̧m̧ane (lale Teaching in the Savior’s Way, 12).
Kraist ippān RiNipai Rikaļoor ro Jilu, jān Gary L. Kapp