“Oktoba 26–Nobōm̧ba 1. Mormon 1–6: ‘Ikōņaan Bwe In Maron̄ Kareel Aolep … n̄an Ukweļo̧k,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Oktoba 26–Nobōm̧ba 1. Mormon 1–6,” Ļoor Eō—N̄an Kajjojo Armej im Baam̧le ko: 2020
Mormon ej Kōkaduikļo̧k Piliej ko, jān Tom Lovell
Oktoba 26–Nobōm̧ba 1.
Mormon 1–6
“Ikōņaan Bwe In Maron̄ Kareel Aolep … n̄an Ukweļo̧k”
Ilo am̧ riiti Mormon 1–6, kejekļo̧kjeņ kōn ta eo kwoj ekkatak jān waanjon̄ak eo an Mormon. Je ta eo kwoj en̄jake im̧we n̄an kōm̧m̧ane.
Je En̄jake ko Rej Im̧we Eok
Mormon eaar jab je “juon bwebwenato edipiio” kōn “ibeebjauwe in ekanooj nana” kōn nana eo im kōto̧o̧rļo̧k bōtōktōk eo me eaar lo ibwilijin RiNipai ro (Mormon 2:18; 5:8). Bōtaab ta eo eaar je ilo Mormon 1–6 ebwe n̄an kakeememej kōj ewi jon̄an an kar armej ro raar wānōk maron̄ erom nana. Ilubwilijin kain ajeeded in nana eo, emeļeļe bwe Mormon ekar jino m̧ōk im em̧ool ebweer. Mekarta jān aolep men ko me eaar loi im en̄jaki, eaar jab jerwane en̄jake eo an kōn tūriam̧o eo eļap an Anij im an lōke bwe ukweļo̧k ej iaļ eo n̄an bōke. Im men̄e armej ro an Mormon make raar joļo̧k akweļap in kūr ko an n̄an ukweļo̧k, eaar jeļā bwe ewōr juon an jarlepju eļapļo̧k n̄an kareel er. “Lo,” eaar kean̄, “ Ij jeje n̄an aolep jeban ko in laļ.” Ilo bar juon wāween ba, eaar jeje n̄an kwe (lale Mormon 3:17–20). Im ennaan eo an n̄an kwe, rainin, ej ennaan eo wōt me emaron̄ kar lo̧mo̧o̧ren RiNipai ro ilo tōre eo aer: “tōmak gospel eo an Jisōs Kraist. … Ukweļo̧k im pojak n̄an jutak im̧aan jea in ekajet an Kraist.” (Mormon 3:21–22).
Ļōmņak ko n̄an Ekkatak Jeje ko Rekwojarjar Ippam̧ Make
Imaron̄ mour wānōk jekdo̧o̧n nana eo ej jepooļ eō.
Jino ilo jebta eo im̧aan an Mormon, kwonaaj kile oktak ko reļļap ikōtaan Mormon im armej ro ipeļaakin. Ilo am̧ riiti Mormon 1, ļōmņak in keidi bōnja ko im ikdeelel ko an Mormon ippān ko an armej ro an. Kile kaje ko me raar itok n̄an e im er (kwonaaj lo juon waanjon̄ak ilo eoon 14–15). Ta eo kwoj ekkatak me ej im̧we eok n̄an mour wānōk ilo juon laļ enana?
Ilo am̧ riiti Mormon 2–6, wōnm̧aanļo̧k wōt n̄an pukōt ekōjkan an Mormon kar kwaļo̧k tōmak eo an ilo Jemedwōj Ilan̄ im Jisōs Kraist jekdo̧o̧n kareel ko renana ipeļaakin.
Tariņae, jān Jorge Cocco
Būrom̧ōj in anij ej tōlļo̧k n̄an oktak eo em̧ool im aitok kitien.
Ke Mormon eaar lo būrom̧ōj eo an armej ro ad, eaar kōjatdikdik renaaj kar ukweļo̧k. Bōtaab “aer būrom̧ōj eaar jab n̄an ukweļo̧k” (Mormon 2:13)—eaar jab kain būrom̧ōj in anij me ej tōlļo̧k n̄an lukkuun oktak (lale 2 Korint 7:8–11). Ijello̧kin, RiNipai ro raar en̄jake būrom̧ōj an laļ (lale Mormon 2:10–11). N̄an meļeļe oktak eo ikōtaan būrom̧ōj in anij im būrom̧ōj an laļ, ļōmņak in kōm̧m̧ane juon jaat ijo komaron̄ je ta eo kwoj ekkatak jān Mormon 2:10–15 kōn jekjek in būrom̧ōj kein ruo. Jaat eo am̧ emaron̄ āinwōt in:
|
Būrom̧ōj ekkar n̄an Anij |
Būrom̧ōj ekkar n̄an laļ |
|---|---|
Būrom̧ōj ekkar n̄an Anij Itok n̄an Jisōs (eoon 14) | Būrom̧ōj ekkar n̄an laļ Kanejneje Anij (eoon 14) |
Būrom̧ōj ekkar n̄an Anij | Būrom̧ōj ekkar n̄an laļ |
Būrom̧ōj ekkar n̄an Anij | Būrom̧ōj ekkar n̄an laļ |
Ilo am̧ kōļmenļo̧kjeņ kōn ta eo kwoj ekkatak, ļōmņak kōn ekōjkan an maron̄ kareel kijejeto ko am̧ n̄an anjo̧ ioon jerawiwi im erom āinwōt Jemedwōj Ilan̄ im Rilo̧mo̧o̧r eo.
Lale barāinwōt Dieter F. Uchtdorf, “Komaron̄ Kōm̧m̧ane Kiō!” Ensign ak Kweilo̧k eo Eļap, Nob. 2013, 55–57.
Ij aikuj iien otemjej kile pein Anij ilo mour eo aō.
Mormon eaar je juon m̧ōjņo eaar loe ilo Rinipai ro: raar likjab n̄an kile wāween ko Irooj eaar kōjeraam̧m̧an er. Būreejtōn Henry B. Eyring ekar kapilōk kōj “n̄an pukōt wāween ko n̄an kile im keememej jouj an Anij. … Jar im kejekļo̧kjeņ, kajjitōk kajjitōk ko: Anij eaar ke jilkintok juon ennaan me eaar baj n̄an n̄a wōt? Iaar ke lo pein ilo mour eo aō ak ilo mour ko an ajri ro nejū? … Ij kam̧ool bwe Ej iakwe kōj im ej kōjeraam̧m̧an kōj, eļapļo̧k jān elōn̄ iaad rejjan̄in de kile” (“O Keememej, Keememej,” Ensign ak Liahona, Nob. 2007, 67, 69).
Ilo am̧ riiti Mormon 3:3, 9, komaron̄ kejekļo̧kjeņ kōn ekōjkan am kile kareel an Anij ilo mour eo am̧. Ta kōjeraam̧m̧an ko rej itok n̄en kwoj kile An kareel? Ta kaje ko kōn jab kile E? (lale Mormon 2:26).
Jisōs Kraist ej jutak kōn pein epeļļo̧k n̄an bōk eō.
RiNipai ro raar joļo̧k katak ko an Mormon, bōtaab eaar wōr an kōjatdikdik bwe ļo̧o̧k eo an naaj kar kareel eok. Ilo am̧ riiti Mormon 5:8–24 im 6:16–22, Ta eo kwoj ekkatak kōn kaje ko an jerawiwi? Ta eo kwoj ekkatak jān eoon kein kōn en̄jake ko an Jemedwōj Ilan̄ im Jisōs Kraist n̄an kōj, jekdo̧o̧n n̄e kwoj jerawiwi? Ekōjkan am̧ kar en̄jake an Jisōs Kraist pukōt waj eok kōn pein epeļļo̧k? Ta eo kwoj en̄jake im ej im̧we eok n̄an kōm̧m̧an āinwōt juon tōprak in intōrpiu eo am̧?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.
Mormon 1:2
Ta meļeļe in n̄an “m̧ōkaj n̄an meļeļe”? Komaron̄ lo ļōmņak ko ilo ennaan eo an Elder David A. Bedna “Quick to Observe” (Ensign, Tij. 2006, 30–36). Ekōjkan an menin letok eo an m̧ōkaj n̄an meļeļe juon kōjeraam̧m̧an n̄an Mormon? Ekōjkan an erom juon kōjeraam̧m̧an n̄an kōj?
Mormon 1:1–6, 15; 2:1–2
Ajri ro ilo baam̧le eo am̧ rej ke meļeļe bwe remaron̄ kōļapļo̧k bōnja ko ilo jetōb rem̧m̧an im kajoor eo jekdo̧o̧n ta n̄e reddik? Waanjon̄ak eo an Mormon emaron̄ jipan̄ er. Ļōmņak in kōm̧m̧ane juon laajrak in iien an Mormon ke eaar ajri im jodikdik, kōjerbal iiō ko im iien ko kar litok ilo Mormon 1:1–6, 15 im 2:1–2. Ilo am̧ ekōnono kōn bōnja ko im en̄jake ko an Mormon, kwaļo̧k bōnja ko ajri ro nejūm̧ ewōr ippāer me ej im̧we eok im ro jet ipeļakum̧i.
Mormon 2:18–19
Ta naan ko Mormon eaar kōjerbali n̄an kōmeļeļeik laļ in eaar mour ie? Ekōjkan an kar dāpij wōt kōjatdikdik eo kōjekdo̧o̧n nana eo ipeļakin. Ekōjkan an baam̧le eo am̧ kōm̧m̧ane ejja menin wōt?
Mormon 3:12
Ekōjkan an Mormon kar en̄jake kōn armej ro ipeļakin, jekdo̧o̧n ta raar nana? Ta eo jemaron̄ kōm̧m̧ane n̄an kōļapļo̧k kain iakwe in eaar pād ippān?
Mormon 5:2
Etke jemaron̄ aipedped n̄an kajjitōk ippān Jemedwōj Ilan̄ kōn jipan̄ n̄e jej apan̄? Ta eo jemaron̄ kōm̧m̧ane n̄an pedped eļapļo̧k ioon Jemedwōj Ilan̄?
Mormon 5:16–18
N̄an jipan̄ baam̧le eo am̧ pijaik ta meļeļe in n̄an “kar kokakto-kokaktak er āinwōt kilin wūt im̧aan kōto” (eoon 16), potak juon m̧ōttan peba n̄an pukōn jiddik im kōm̧m̧an bwe ro uwaan baam̧le eo wukitok wukitak. Kōmeļeļeik n̄an er bwe kili wūt (chaff) ej kūl (husk) eo me ej itok jān juon ine, im ebwe an mera n̄an wukto wuktak. Ekōjkan an “ jaab ippān Kraist im Anij ilo laļ in” (eoon 16) āinwōt kilin wūt ilo kōto?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkm̧anm̧anļo̧k Ad Katakin
Katakin katak ko ilo alikkar im ļam waan. Gospel eo an Irooj ej aiboojoj im ļam waan (lale KB 133:57). Ijello̧kin kajjion̄ n̄an kam̧ōņōņōik baam̧le eo am̧ kōn katak ko retōr jān jon̄an, kanooj lale bwe ta eo kwoj katakin ej pedped ioon katak eo erreo im ļam waan.
Bok eo Ekabwilōn̄lōn̄ an Mormon, jān Joseph Brickey