“Nobōm̧ba 23–29. Ether 12–15: ‘Kōn Tōmak Men Otemjeļo̧k Renaaj Kūrm̧ool,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Nobōm̧ba 23–29. Ether 12–15,” Itok, Ļoor Eō—N̄an Kajjojo Armej im Baam̧le ko: 2020
Ether ej Tileekek ilo juon Ron̄ in juon Dekā, jān Gary Ernest Smith
Nobōm̧ba 23–29
Ether 12–15
“Kōn Tōmak Men Otemjeļo̧k Renaaj Kūrm̧ool”
Je im̧we ko emaron̄ bōktok elōn̄ļo̧k revelesōn im kōkajoorļo̧k naan in kam̧ool eo am̧. Ebarāinwōt jipan̄ eok keememej im̧we ko am̧ im kwaļo̧ki ippān ro jet ilo ilju im jekļaj.
Je En̄jake ko Rej Im̧we Eok
Kanaan ko an Ether n̄an RiJared ro raar “men ko reļļap im kabwilōn̄lōn̄” (Ether 12:5). Eaar “kanooj ba n̄an er kōn men ko otemjeļo̧k, jān jino in armej ro Rekwōjarjar” (Ether 13:2). Eaar lo “raan ko an Kraist” im Jerusalem Ekāāl ilo Raan-ko Ālikatata (Ether 13:4). Im eaar ekōnono kōn “kōjatdikdik ilo m̧ool kōn laļ eo em̧m̧anļo̧k, aaet, em̧ool jikin eo ianbwijmaron̄ in pein Anij” (Ether 12:4). Bōtaab RiJared ro raar joļo̧k naan ko an, kōn ejja un eo wōt armej ro emakijkij aer joļo̧k naan in kanaan ko an ro rikarejeran Anij rainin—“kōnke raar jab [loi]” (Ether 12:5). Ebōk tōmak n̄an tōmak ilo kallim̧ur ko ak kakkōl ko kōn men ko jejjab maron̄ loi, ejja āinwōt eaar bōk tōmak n̄an Ether n̄an kanaan kōn “men ko reļļap im kabwilōn̄lōn̄” n̄an armej ro jab tōmak. Eaar bōk tōmak n̄an Moronai n̄an lōke bwe Irooj emaron̄ bōk an “m̧ōjņo̧ ilo jeje” im ukōte n̄an kajoor (lale Ether 12:23–27). Ej kain tōmak eo me ej kōm̧m̧an bwe jen “pen im dim, iien otemjej baptoa ilo jerbal ko rem̧m̧an, in kar tōl n̄an kaiboojoj Anij” (Ether 12:4). Im ej kain tōmak eo me “men otemjeļo̧k renaaj kūrm̧ool” (Ether 12:3).
Ļōmņak ko n̄an Ekkatak Jeje ko Rekwojarjar Ippam̧ Make
Tōmak ilo Jisōs Kraist emaron̄ tōlļo̧k n̄an kabwilōn̄lōn̄ ko rekajoor.
Elōn̄ armej ro rainin, āinwōt RiJared ro ilo tōre eo an Ether, kōņaan lo kein kam̧ool ko m̧okta jān aer naaj tōmak ilo Anij im An kajoor. Ijo wōt ke, Moronai eaar katakin bwe “tōmak ej men ko kōjatdikdik kaki im jab loi; kōn menin, jab jum̧ae kōnke kom̧ij jab lo, bwe kom̧ij bōk ejjeļo̧k kam̧ool m̧ae ālikin mālejjon̄ in ami tōmak” (Ether 12:6).
Kile kajjoo iien kwoj lo naan eo “tōmak” ilo Ether 12, im je ta eo kwoj ekkatak kōn tōmak. Pukōt uwaak ko n̄an kajjitōk ko āinwōt kein: Ta in tōmak? Ta jeraam̧m̧an ko an juon mour eobrak kōn tōmak? Komaron̄ barāinwōt je ļōmņak ko am̧ kōn kam̧ool ko kwar būki “ālikin mālejjon̄ in ami tōmak” (Ether 12:6).
Jisōs Kraist ej letok n̄an kōj “juon kōjatdikdik eļapļo̧k an em̧m̧an.”
N̄an kakobaba n̄an meļeļe ko rem̧wilaļ kōn tōmak, Ether 12 barāinwōt eļap ijo n̄an ba kōn kōjatdikdik—bōlen komaron̄ je kajjojo iien naan eo “kōjatdikdik” ej waļo̧k. Ta meļeļe in kōjatdikdik n̄an kwe? Ta kar un ko me Ether eaar wōr ippān n̄an “kōjatdikdik ilo m̧ool kōn laļ eo em̧m̧anļo̧k”? (lalee Ether 12:2–5). Ekōjkan an gospel eo Jisōs Kraist kar lewaj n̄an kwe “juon kōjatdikdik em̧m̧anļo̧k”? (Ether 12:32).
Lale barāinwōt Moronai 7:40–41; Dieter F. Uchtdorf, “The Infinite Power of Hope,” Ensign ak Liahona, Nob. 2008, 21–24; Preach My Gospel, 117.
Jisōs Kraist emaron̄ kōm̧m̧ani men ko rem̧ōjņo̧ ren kajoor.
N̄e jej riiti jeje ko an Moronai, epidodo n̄an meļo̧kļo̧k bwe eaar inepata kōn “m̧ōjņo̧ ilo jeje” eo an im kar mijak bwe armej ro renaaj kar kajirere kōn naan ko an (lale Ether 12:23–25). Bōtaab Anij eaar kallim̧ur bwe Enaaj kar “kōm̧m̧an mennin m̧ōjņo̧ ko ren erom kajoor” kōn ettā (eoon 27), im kajoor ilo jetōb eo ilo jeje ko an Moronai ej kein kam̧ool in kareel bwe Irooj eaar kakūrm̧ool kallm̧ur in.
Ālkin riiti Ether 12:23–29, kejekļo̧kjeņ kōn iien ko me Anij eaar jipan̄ eok kile m̧ōjņo̧ ko am̧ im kar kōm̧m̧ane bwe kwoj kajoor jekdo̧o̧n kōn er. Bōlen en̄in ej barāinwōt iien eo n̄an kōnono kōn m̧ōjņo ko kwoj kiiō kakkōt ippāer. Ta eo kwoj en̄jake kwoj aikuj in kōm̧m̧ane n̄an kōttāik eok make im̧aan Irooj im kwaļo̧k tōmak ilo E n̄an maron̄ in bōk An kallim̧ur n̄an “mennin m̧ōjņo̧ ko ren erom kajoor n̄an er.”? (Ether 12:27).
Ilo am̧ kejekļo̧kjen kōn eoon kein, kōļmenļo̧kjeņ kein jān Elder Neal A. Maxwell remaron̄ in jipan̄: “N̄e jej riiti ilo jeje ko rekwojarjar kōn ‘m̧ōjņo̧ ko’ an armej, naan in ekoba … m̧ōjņo̧ eo ippān kōnke kōj armej me kanniōk ewōr kilaan ejjab jem̧ļo̧k ioon jetōb eo ad (lale Ether 12:28–29). M̧ōjņo̧ āinļo̧k wōt ekoba, mekarta, ko ad, m̧ōjņo̧ ko an kajjojo armej, eo jej kōtmene n̄an anjo̧ (lale Katak im Bujen ko 66:3; Jekab 4:7)” (Lord, Increase Our Faith [1994], 84).
Lale barāinwōt “Grace,” Gospel Topics, topics.ChurchofJesusChrist.org.
Kowaan rikanaan ro ej bōktok kauwōtata ilo jetōb.
Āinwōt juon kiin̄ an RiJared ro eaar, ilo bwebwenato, juon jerbal ekauwōtata. Menin eaar eļap tata m̧ool n̄an Koriantumur, lōn̄ in wōt “ em̧m̧aan ekajoor … kappukot n̄an ko̧kkure e” (Ether 13:15–16). Ilo Ether 13:15–22, kile ta eo Koriantumur eaar kōm̧m̧ane n̄an kōjparok e make im ta eo rikanaan Ether eaar kapilōk e n̄an kōm̧m̧ane ijello̧kin. Ilo am̧ riiti aolepān bok in Ether, kejōkļo̧kjeņ kōn kaje ko kōn kowaan rikanaan ro. Ta eo ej waļo̧k n̄an armej ro ke “Jetōb eo an Irooj [ej] bōjrak an m̧akūtkūt ippāer”? (Ether 15:19).
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
Ether 12:7–22
Ilo am̧ riiti eoon kein ippān doon, komaron̄ bar etale jet iaan waanjon̄ak ko reim̧we kōn tōmak kwar riit kaki ilo Bok in Mormon. Menin emaron̄ tōlļo̧k n̄an juon ekōnono kōn waanjon̄ak ko an tōmak ilo bwebwenato an baam̧le eo am̧ ak eo mour eo am̧ make—ļōmņak in je en̄jake kein eļan̄n̄e kwojjan̄in de kar je.
Ether 12:27
Etke Irooj eaar letok n̄an kōj m̧ōjņo̧? Ta ijo kuņaad ilo kōm̧m̧ani “mennin m̧ōjņo̧ ko ren erom kajoor”? Ta ijo kuņaan Rilo̧mo̧o̧r eo?
Ether 12:41
Ewōr ke juon wāween ekam̧ōņōņō komaron̄ katakin ajri ro nejūm̧ n̄an “pukōt … Jisōs”? Juon wāween emaron̄ in ņooj juon pija in Jisōs im kūr ro uwaan baam̧le eo n̄an “pukōt” im kappukōt pija eo. Ekōjkan ad pukōt Jisōs, im ekōjkan ad jeraam̧m̧an n̄e jej lo E?
Ether 13:13–14; 15:19, 33–34
Emaron̄ in kaitoktok limo n̄an ro uwaan baam̧le eo am̧ n̄an keidi en̄jake ko an Ether ippān en̄jake ko an Mormon im Moronai (lale Mormon 6; 8:1–10). Ewi wāween aer āierļo̧k wōt juon? Ekōjkan an iaļ eo an RiNipai ro n̄an kakkure ainļo̧k wōt iaļ eo an RiJared ro? (keidi Ether 15:19 ippān Moroni 8:28). Ta m̧ool ko jej ekkatak emaron̄ jipan̄ kōj joļo̧k ta eo eaar waļo̧k n̄an er?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in Ilo Itok, Ļoor Eō—N̄an Būraimere.
Kōkm̧anm̧anļo̧k Ad Katakin
Kōketak n̄an kajjitōk. Ajri ro ekkar aer itok limo. Jet iien komaron̄ lo kajjitōk ko aer āinwōt juon kōm̧ad jān ta eo kwoj kajjion̄ n̄an katakin. Ijello̧kin, lale kajjitōk ko āinwōt iien ko rem̧m̧an. Rej āinwōt juon kakōļļe bwe ajri ro rej pojak n̄an ekkatak—rej lewaj n̄an eok juon kōļmenļo̧kjeņ eo n̄an n̄ūrbōktak ko an ajri ro nejūm̧ im ekōjkan aer en̄jake kōn ta eo rej ekkatak (lale Teaching in the Savior’s Way, 25–26).
Naan in Kanaan ko an Ether Raar Kabwilōn̄lōn̄, jān Walter Rane