Baaj ko waan RiJared ro ioon lojet

Inaaj Bar Bōklōn̄tak Kom̧ Jān M̧wilaļ ko, jān Jonathan Arthur Clarke

Nobōm̧ba 16–22

Ether 6–11

“Bwe Nana Ej Maron̄ Jako”

Kōnono kōn ļo̧o̧k eo an RiJared ro, Mormon eaar ba bwe “emennin aikuj bwe aolep armej ren jeļā men ko kar jei ilo bwebwenato in” (Mosaia 28:19). Likūt wōt menin ilo kōļmenļo̧kjeņ ilo am̧ riiti Ether 6–11. Etke men kein remenin aikuj—ak ejeraam̧m̧an—n̄an kwe im ro kwoj iakwe er?

Je En̄jake ko Rej Im̧we Eok

Buki iiō ko ālkin an RiJared ro kar kakkure, RiNipai ro raar lo im̧ōko rejorrāān an jukjuk in pād eo aer etto. Ilubwilijin im̧ōko kakkuri eaar juon ļo̧o̧k ettūņo—piliej ko kōn “lukkuun gold” me raar “obrak kōn m̧wijm̧wij ko” (Mosaia 8:9). Kiin̄ in RiNipa eo, Limai, ekar maron̄ lo bwe ļo̧o̧k in eaar aorōk: “Ejjeļo̧k pere juon mennin ittino eļap ej pād ilo ļo̧o̧k kein,” eaar ba (Mosaia 8:19). Rainin ewōr ippam̧ juon tukadu in ļo̧o̧k in, kar ukōte n̄an kajin eo am̧, im ej ņa etan bok in Ether. Eaar itok jān ejja ļo̧o̧k eo wōt me RiNipai ro “ raar kōņaan eļap jān maron̄” n̄an riiti, im ke raar riiti, “būrom̧ōj otem būrom̧ōj, aaet, raar obrak kōn liaajlo̧ļ; mekarta eaar leļo̧k n̄an er eļap jeļā, eo kōnke e raar m̧ōņōņō” (Mosaia 28:12, 18). Ilo am̧ riit kōn walōn̄tak eo im kakkure eo ekabūrom̧ōjm̧ōj an RiJared eo, kwonaaj lo elōn̄ iien ko rekabūrom̧ōjm̧ōj. Bōtaab jab likjab in lo lan̄lōn̄ eo kōn ekkatak katak ko jān bwebwenato in. Ālkin men otemjej, “ej ļoļātāt ilo Anij bwe men kein ren waļo̧k n̄an kom̧” (Ether 8:23), bwe eļan̄n̄e jemaron̄ ekkatak jān likjab ko im jeraam̧m̧an ko an Rijared ro, “bwe naan ej maron̄ jako, im … bwe iien eo en maron̄ itok bwe Setan en ejjeļo̧k an maron̄ ioon būruōn ro nejin armej” (Ether 8:26).

pija ej bōk jikin ekkatak ippam̧ make

Ļōmņak ko n̄an Ekkatak Jeje ko Rekwojarjar Ippam̧ Make

Ether 6:1–12

Irooje enaaj tōl eō m̧aanļo̧k n̄an ānen kallim̧ur eo āneō.

Komaron̄ lo kōļmenļo̧kjeņ ko ilo jetōb eļan̄n̄e kwoj keidi waan ko waan Rijared ro rej kijoon lom̧aļo eo n̄an em̧m̧akūt eo am̧ ilo mour wabanban in. N̄an waanjon̄ak, ta eo Irooj eaar letok me ej kōmeramļo̧k iaļ eo am̧ āinwōt dekā ko ilo baaj ko waan RiJared eo? Ta eo baaj ko remaron̄ in jutak kake, ak kōto ko me rej “uukļo̧k n̄an āneen kallim̧ur”? (Ether 6:8). Ta eo kwoj ekkatak jān m̧akūtkūt ko an RiJared ro m̧okta, ilo tōre eo, im ālikin tūrep eo? Ekōjkan an Irooj tōlļo̧k eok n̄an ānen kallim̧ur eo āneōm̧?

RiJared ro rej bōk ippāer menin mour ko

Iaļ eo an RiJared ro ilo Aiseia ļo̧k jān Minerva Teichert

Ether 6:5–18, 30; 9:28–35; 10:1–2

Irooj ej kōjeraam̧m̧an eō n̄e ij ettā.

Jekdo̧o̧n uteij bōro im nana eaar āinwōt ļan an waļo̧k ilo bwebwnato eo an Rijared ro, ebarāinwōt wōr waanjon̄ak ko kōn ettā ilo jebta kein—eļap tata ilo Ether 6:5–18, 30; 9:28–35; im 10:1–2. Kejōkļo̧kjeņ kōn kajjitōk kein emaron̄ jipan̄ eok ekkatak jān waanjon̄ak kein: Etke RiJared ro raar kōttāik er make ilo jekjek kein? Ta eo raar kōm̧m̧ane n̄an kwaļo̧k ettā eo aer? Ekōjkan aer kar jeraam̧m̧an āinwōt juon tōprak? Kile bwe ilo jet jekjek, armej ro kar kipel er jān jekjek ko aer n̄an aer erom ettā. Ļōmņak kōn ta eo komaron̄ kōm̧m̧ane n̄an m̧ōņōņō in “etetal ettā im̧aan Irooj” (Ether 6:17) ijello̧kin n̄an kipel n̄an ettā (lale Mosaia 4:11–12; Alma 32:14–18).

Lale barāinwōt “Humility,” Gospel Topics, topics.ChurchofJesusChrist.org.

Ether 7–11

Ritōl ro rejim̧we rej kōjeraam̧m̧an armej ro rej tōl er.

Jebta 7–11 in Ether ej kitbuuj enan̄in 28 epepen ko. Men̄e ejjab kanooj ļap meļeļe maron̄ kar litok ilo juon iien edik, juon jon̄ak em̧ōkaj an waļotkok: ritōl ro rejim̧we rej tōlļo̧k n̄an kōjeraam̧m̧an ko im m̧weie, ilo an ritōl ro renana tōlļo̧k n̄an kōm̧akoko im kakkure.

Itulal rej jet iaan kiin̄ ro kar kōnono kaki ilo jebta kein. Riiti eoon ko reiokļo̧k, im lale ta eo komaron̄ ekkatak jān waanjon̄ak ko aer—em̧m̧an im nana—kōn tōl. Ilo am̧ kōm̧m̧ane, ļōmņak kōn iien ko rem̧m̧an emaron̄ wōt am̧ n̄an tōl ak kareel ro jet ilo m̧weo im̧ōm̧, jukjuk in pād eo am̧, kūr eo an ilo Kabun̄, im ko jet.

• Oraia—Ether 6:30–7:1

• Shule—Ether 7:23–27

• Jared—Ether 8:1–7, 11–15

• Emer im Koriantōm—Ether 9:21–23

• Het—Ether 9:26–30

• Sez—Ether 10:1–2

• Riplakis—Ether 10:5–8

• Moriantōn—Ether 10:10–11

• Lib—Ether 10:19–28

• Etem—Ether 11:11–13

Ether 8:7–26

Ta in kumi ittiņo eo?

N̄e ruo ak lōn̄ļo̧k armej ro rej kōm̧m̧an karōk ko rettiņo n̄an dāpij jerbal nana ko aer ilo ittiņo̧, rej bōk kuņaer ilo juon kumi ittiņo. Ekka aer ellowetak jān ikdeelel eo kōn kajoor ak m̧weie. N̄an kakobaba n̄an kumi ittiņo eo kar kōmeļeļeik ilo Ether 8:7–18, waanjon̄ak ko jet maron̄ loi ilo Hilamōn 1:9–12; 2:2–11; 6:16–30, im Moses 5:29–33. Ilo Ether 8:18–26, Moronai ej kōmeļeļeik kaje ko kōn kumi ittiņo ko (lale barāinwōt Ether 9:4–12) im kakkōl kōj n̄an jab rejtaki.

pija ej bōk jikin ekkatak an baam̧le

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.

Ether 6:2–12

Baam̧le eo am̧ enaaj ke m̧ōņōņō in ikkure kōn tūrep eo an RiJared ro n̄an ānen kallim̧ur? Bōlen komaron̄ kōjerbal juon ruum̧ emarok āinwōt juon baaj im teen̄ki ko n̄an bōk jikin dekā ko rebbōl. Komaron̄ kōnono kōn ekōjkan an RiJared ro kar kwaļo̧k tōmak eo aer ilo Irooj kōn deļo̧n̄ ilo baaj ko, jekdo̧o̧n jeļā bwe renaaj kar “kallib ilo m̧wilaļ ko in lo̧meto” (Ether 6:6). Ālkin riiti eoon 9, ro uwaan baam̧le remaron̄ kwaļo̧k al in nōbar ko rem̧m̧an tata ippāer im al kaki ippān doon. Ekōjkan an im̧ōko im̧ōd maron̄ keidik n̄an baaj ko waan RiJared ro? Ta eo āne in kallim̧ur eo Irooj ej tōlļo̧k baam̧le eo ad n̄an e?

Ether 6:22–23

Ilo aolepān wiik in, baam̧le eo am̧ emaron̄ lale kōn ekōjkan an kanaan in kakkōl eo an ļeo jatin Jared kōn kōm̧akoko eo kar kūrm̧ool. Ta kakkōl ko ritōl ro ad ilo Kabun̄ in em̧ōj aer kar litok n̄an kōj? Ilo wāween ta kowaan kapilōk eo aer ej bōkļo̧k n̄an kōm̧akoko?

Ether 8:23–26

Ekkar n̄an eoon kein, ekte Moronai eaar kakien n̄an je “men kein” kōn kumi ittiņo ko? (Ether 8:23). Ta eo em̧ōj ad kar ekkatak jān bok in Ether me emaron̄ jipan̄ kōj bōk kōjeraam̧m̧an ko kar kōmeļeļeik ilo eoon 26?

Ether 9:11

Ekōjkan an ikdeelel ko ad jelet kāālet ko ad? Ta eo jemaron̄ kōm̧m̧an āinwōt juon baam̧le n̄an lale bwe jej ikdeelel kōn men ko an Anij?

Ether 11:8

N̄an ekkatak eļapļo̧k kōn tūriam̧o eo an Irooj n̄an ro me rej ukweļo̧k, komaron̄ riiti Mosaia 26:29–30; 29:18–20; Alma 34:14–16; ak Moronai 6:8. Bōlen ro uwaan baam̧le eo remaron̄ kwaļo̧k waanjon̄ak kōn rūtūriam̧o an Anij jān jeje ko rekwojarjar ak jān mour ko aer make.

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkōm̧anm̧anļo̧k Am̧ Ekkatak Ippam̧ Make

Jerbale Ta eo kwoj ekkatak. Ekkatak gospel eo ekoba eļapļo̧k jān riit im kejekļo̧kjeņ. Emakijkij ad ekkatak eļap tata jān jerbale m̧ool ko ilo jeje ko rekwojarjar (lale Jon 7:17). Ta eo kwonaaj kōm̧m̧ane n̄an kōjerbal ta eo kwoj riiti ilo Ether 6–11?

Baaj ko waan RiJared ro ioon lojet

Baaj ko Waan RiJared, jān Gary Ernest Smith