Baaj ko waan Rijared ro ilo lom̧aļo̧

Inaaj Bar Bōklōn̄tak Kom̧ Jān Mwilaļ ko in Lo̧jet, jen Jonathan Arthur Clarke

“No̧bōm̧ba 16–22

Ether 6-11

“Bwe Nana En Maron̄ Jako”

Ļōmņak ko ilo laajrak in rejjab kōmeļeļe ko kwoj aikuj ļoori. Rej n̄an kōkm̧anm̧anļo̧k am̧ keppopo n̄an im̧we.

Je En̄jake ko Rej Im̧we Eok

pija ej bōk jikin kwaļo̧k

Kajjitōk bwe ren Kwaļo̧k

Kōjerbal pija an wiik in im laajrak eo an wiik eo ļo̧k ilo Itok, Ļoor Eō—N̄an Kajjojo Armej im Baam̧le ko n̄an jipan̄ ajri ro etale ta eo raar ekkatak kōn an Rijared ro kijoone lo̧jet. Kōm̧m̧an bwe ren bōk kūņaer kwaļo̧k ta eo rejeļā.

pija ej bōk jikin katakin

Katakin Katak ko: Ajri ro Reddikļo̧k

Ether 6:2–12

Jemedwōj Ilan̄ emaron̄ kaenōm̧m̧an eō n̄e ij mijak.

Imaron̄ kar mijak kōn an kar Rijared ro kar “kejeplik er ioon ņo ko in lo̧jet im̧aan kōto eo” (Ether 6:5). Ak Irooj eaar kōjparok er im kar jipan̄ er. Ewi wāween am̧ maron̄ jipan̄ ajri ro oktakļo̧k n̄an Irooj n̄e rej mijak?

Makūtkūt ko Maron̄ Kōm̧m̧ani

• Kōjerbal naan kein jān Ether 6:2–12, kōmeļeļeik n̄an ajri ro kōn jerakrōk eo an Rijared ro ioon lo̧jet. Kajjitōk ippān ajri ro n̄an antoone aer tallōn̄ ioon baaj ko im antoone enwōt wōt n̄e baaj eo waaer ej em̧akūt im pinjak kōn ņo ko. Ewi wāween en̄jake n̄an lukkuun in pād ilowaan joun baaj ilo an nana lo̧jet? Ta eo jemaron̄ kōm̧m̧ane n̄e jej mijak? Riit ippān doon eoon 7 im 9 n̄an lale ta eo Rijared ro raar kōm̧m̧ane ke raar mijak.

• Kwaļo̧k juon tōre me kwaar mijak im Jemedwōj Ilan̄ eaar kaenōm̧m̧an eok. Kwaļo̧k n̄an ajri ro juon al me emaron̄ jipan̄ kwe “thank and praise the Lord” (Ether 6:9) n̄an jipan̄. Kōm̧m̧an bwe ajri ro ren kwaļo̧k al in Būraimere eo em̧m̧an ippāer, im al jet iaer ippān doon.

• Kōjerbal peij in m̧akūtkūt eo an wiik in n̄an jipan̄ ajri kōm̧m̧an make waer baaj. Kōmeļeļeik bwe baaj ko raar jipan̄ Rijared ro pād ilo kōjparok men̄e raar jepooļ kōn dān (lale Ether 6:7, 10). Ta eo Jemedwōj Ilan̄ eaar letok n̄an kōj n̄an kōjparok kōj ilo iaļ in ad ļo̧k n̄an Ippān?

Ether 6:9, 12, 30; 7:27; 10:2

Imaron̄ in m̧ōņōņō.

Ālkin aer tōkeākļo̧k ilo jokne ilo ānen kallim̧ur, Rijared ro raar lukkuun kam̧m̧ool bwe raar “jan̄ kōn m̧ōņōņō” (Ether 12:6). Ewi wāween am̧ maron̄ kotak juon jetōb in kam̧m̧oolol ippān ajri ro kwoj katakin?

M̧akūtkūt ko Maron̄ Kōm̧m̧ani

• Riit n̄an ajri ro naan ko jān Ether 6:9 im 12 n̄an katakin er ewi wāween an kar Rijared ro kwaļo̧k aer kam̧m̧oolol n̄an Irooj kōn jipan̄ er tōpar ānen kallim̧ur. Kajjitōk ippān ajri ro n̄an kwaļo̧k jet men rej kam̧m̧oolol kake. Al ippān doon, āinwōt Rijared ro, juon al in kam̧m̧oolol, āinwōt “I Thank Thee, Dear Father” (Children’s Songbook,7).

• Riit n̄an ajri ro Ether 10:2 n̄an kwaļo̧k bwe men̄e elōn̄ iiō ko, Rijared ro raar keememej wāween an Iroj kar jipan̄ ro jibwieer im jim̧m̧aer kijoon lo̧m̧aļo̧. Jipan̄ ajri ro ļōmņak kōn wāween ko me Irooj eaar kōjeraam̧m̧an er. Innām kōm̧m̧an bwe ajri ro ren jin̄aik pija ko n̄an kakeememej er make kōn kōjeraam̧m̧an kein (ak jipan̄ er kālet jān jet pija ko kwar būkitok, bōlen jān juon māākjiin an Kabun̄).

Ether 7:24–27

Ij jeraam̧m̧an n̄e ij ļoor rikanaan eo.

Bok in Ether ealikkar an kwaļo̧k bwe Rijared ro raar ļoor rikanaan ro, raar jeraam̧m̧an, im ke raar kowaan rikanaan ro, mour ko aer eaar pen. Ļōmņake wāween ko kwomaron̄ jipan̄ ajri ro lo bwe menin ebar m̧ool n̄an kōj.

M̧akūtkūt ko Maron̄ Kōm̧m̧ani

• Kwaļo̧k juon pija in rikanaan eo emour, im kajjitōk ippān ajri ro n̄an kwaļo̧k juon men rejeļā kōn e. Ta eo rikanaan eo ej kōm̧m̧ane? Kōmeļeļeik bwe Rijared ro eaar wōr aer bar rikanaan, im n̄e rej ļoor rikanaan eo, rej jeraam̧m̧an im m̧ōņōņō (lale Ether 7:24–27). Ekōjkan ad maron̄ ļoor rikanaan eo?

• Al ippān doon kōn juon al kōn kein ko, eo āinwōt “Follow the Prophet” (Children’s Songbook, 110–11; bar lale Gospel Art Book, nos. 4–27, 67–87). Kōnono n̄an ajri ro kōn men ko rikanaan ro raar katakin kōj n̄an kōm̧m̧ani (n̄an waanjon̄ok, riiti jeje ko ad rekwojarjar kajjojo raan, kōjparok raan in Jabōt im kokwojarjare, ak jerbal n̄an ro jet), im kajjitōk ippāer n̄an mour kake n̄an pokake kapilōk eo n̄e kwoj ba “Follow the prophet!”

pija ej bōk jikin katakin

Katakin Katak ko: Ajri ro Rerūttoļo̧k

Ether 6:2–12

Imaron̄ leke Jemedwōj Ilan̄ n̄an tōl eō n̄an mour indeeo.

Bwebwenato eo in jerak eo an Rijared ro ioon dān maron̄ keidi n̄an ito-itak eo ad ilo mour in. Ito-itak kein jim̧or rej jet iien kauwōtata im ebōk tōmak bwe Iroon enaaj jipan̄ kōj im kōjparok kōj.

M̧akūtkūt ko Maron̄ Kōm̧m̧ani

• Riit ippān doon Ether 6:2–12, bōjrak jidik bwe ajri ro ren maron̄ jin̄aik pija in ta eo rej riiti. Ewi wāween an ito-tak eo an Rijared ro āinwōt mour ko ad? Jipan̄ ajri ro kalikkar im kwaļo̧k ta m̧ōttan ko reoktak ilo jin̄a ko aer me rej pinej jenkwan mour ko ad. N̄an waanjon̄ok, Rijared ro remaron̄ pinej jenkwad. Baaj ko remaron̄ pinej jenkwan m̧ōko im̧ōd, Kabun̄ in, ak gospel in. Ta ko remaron̄ pinej jenkwan kōto, dān, im dekā ko, im ānen kallim̧ur ?

• Jipan̄ ajri ro pukot naan ko ak eoon ko ilo Ether 6:2–12 me ej kwaļo̧k wāween an kar Rijared ro leke Anij. Kwaļo̧k waanjon̄ok ko wāween pedped ioon Anij ekar jipan̄ kwe ilo iien ko reppen ilo mour eo am̧. Rōjan̄ ajri ro n̄an kwaļo̧k ejja en̄jake ko aer.

  Rijared ro raar ito-itak ippān menin mour ko aer.

  Journey of the Jaredites across Asia, jen Minerva Teichert

Ether 6:30; 7:27; 10:2

Keememej ta eo Irooj eaar kōm̧m̧ane n̄an eō ebōktok aenōm̧m̧an.

Juon iaan oktak in jim̧we eo an kiin̄ ro an Rijared jān ro renana ej bwe kiin̄ ro rejim̧we “raar keememej men ko reļļap Irooj eaar kōm̧m̧ani” n̄an er (Ether 7:27). Ewi wāween am̧ maron̄ im̧we ajri ro n̄an keememej ta eo Irooj eaar kōm̧m̧ane n̄an er?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti Ether 6:30; 7:27; im 10:2 kajjojo ak ilo kurup im lale men ko me eoon kein rej juon wōt kake. Kwaļo̧k en̄jake ko am̧ kōn ta eo Irooj eaar kōm̧m̧ane n̄an kwe, im kajjitōk ippān ajri ro n̄an kōm̧m̧an āinwōt.

• Kwaļo̧k n̄an ajri ro ewi wāween am̧ kajjieotn̄ keememej wāween ko Irooj eaar kōjeraam̧m̧an kwe im baam̧le eo am̧. Jipan̄ ajri ro ļōmņake wāween ko remaron̄ kakeememej er make ta eo Irooj eaar kōm̧m̧ane n̄an er. Leļo̧k n̄an er jidik pepa, im kajjitōk ippāer n̄an kōļmenļo̧kjeņ kaki im je jet men me Eaar kōm̧m̧an n̄an er. Kwaļo̧k bwe remaron̄ kōm̧m̧ane juon imminene in je kōjeraam̧m̧an ko rej loi jān Irooj (lale “O Remember, Remember” [video, ChurchofJesusChrist.org]).

Ether 9:28–35; 11:5–8

Irooj ej tiriam̧o n̄e ij ukweļo̧k.

Men̄e Rijared ro ekkā aer kowaan rikanaan ro im nana, Irooj eaar jeorļo̧k aer bōd aolep iien n̄e rej kōttāik er make im ukweļo̧k.

M̧akūtkūt ko Maron̄ Kōm̧m̧ani

• Riit ippān doon Ether 9:28–35, im jipan̄ ajri ro ļōmņake jilu ak emān jentōj ko rekadu n̄an kakeememej ta eo eaar waļo̧k ilo eoon kein. Innām riiti Ether 11:5–8, im jipan̄ ajri ro kile oktak ko ilo bwebwenato kein ruo. Ta eo jej katak jān bwebwenato kein?

• Kajjitōk ippān ajri ro n̄an ļōmņake armej ro jet ilo Bok in Mormon ro raar kōttāik er make im kar jeo̧rļo̧k aer bōd. Kōjerbal pija kein ilo Gospel Art Book ak Itok, Ļoor Eō—N̄an Kajjojo Armej im Baam̧le ko n̄an jipan̄ er keememeje. Kwaļo̧k am̧ naan in kam̧ool bwe Irooj ej jeo̧rļo̧k ad bōd n̄e jej lukkuun in ukweļo̧k.

pija ej bōk jikin ekkatak

Kōketak Ekkatak ilo Mweo

Kajjitōk ippān ajri ro n̄an kwaļo̧k n̄an baam̧le ko aer jet me Jemedwōj Ilan̄ eaar kōm̧m̧ane n̄an er me rej kam̧m̧oolol kake.

Kōkōm̧anm̧anļo̧k Ad Katakin

Kōm̧m̧an bwe ajri ro ren kapeel “Ilo am̧ katakin ajri ro, kōtļo̧k bwe ren ekkal, jin̄a, kōļar, jeje, im ejaak. Men kein rej eļapļo̧k jān makūtkūt in kam̧ōņōņō ko—rej aorōk n̄an katak” (Teaching in the Savior’s Way,25).

peij im m̧akūtkūt: Jemedwōj Ilan̄ ekar jipan̄ Rijared ro jek baaj ko