Moronai ej Jeje ioon Pileij Kooļ ko, jen Dale Kilborn

Nobōm̧ba 2–8

Mormon 7–9

“Ij kōnono n̄an Kom̧ āinwōt N̄e Kom̧ Ar Pād”

Ilo am̧ riiti Mormon 7–9, ļōmņake ta eo kwoj ikideleel eļap kake n̄an ajri ro kwoj katakin. Kōm̧m̧ane karōk ko n̄an katakin m̧ool ko kwoj en̄jaki ke renaaj kōjeraam̧m̧an mour ko aer.

Je En̄jake ko Rej Im̧we Eok

Kajjitōk bwe ren Kwaļo̧k

Leto-letak juon kape in Bok in Mormon. Kajjitōk ippān ajri ro, n̄e enaaj aer iien n̄an kotak bok eo, n̄an kwaļo̧k juon men me raar ekkatak jāne. Eļan̄n̄e reaikuj jipan̄, kakeememej er kōn men ko raar ekkatak jet iien ko remootļo̧k ilo kūlaaj

Katakin Katak ko: Ajri ro Reddikļo̧k

Mormon 7:8–10

Bok in Mormon im Baibōļ eo rej jim̧oor kam̧ool kōn Jisōs Kraist.

Mormon eaar kwaļo̧k bwe Bok in Mormon ekar jeje n̄an jipan̄ kōj tōmak Baibōļ eo im bwe ro rej tōmak Baibōļ eo renaaj bar tōmak Bok in Mormon.

Makūtkūt ko Maron̄ Kōm̧m̧ani

• Kwaļo̧k n̄an ajri ro taitōļ peij eo an Bok in Mormon, im kalikkar naan ko ilo taitōļ eo kwoj riiti, kwaļo̧k naan eo bar juon. Jipan̄ ajri ro ļōmņake bok in jeje ko rekwojarjar jet me rej katakin kōj kōn Jisōs. Kwaļo̧k n̄an er bwe Baibōļ epād ie Kallim̧ur Mokta im Kallim̧ur Ekāāl. Jipan̄ ajri ro ba “Kallim̧ur Mokta, Kallim̧ur Ekāāl” n̄e kwoj kwaļo̧k Baibōļ eo im “Bar juon Kallim̧ur“ n̄e kwoj kwaļo̧k Bok in Mormon.

• Kwaļo̧k juon m̧aāb inlaļin ak peij in m̧akūtkūt eo an laajrak in, ippān ļo̧k juon Baibōļ im juon Bok in Mormon. Kōjerbal men kein n̄an katakin ajri ro bwe Baibōļ eo ej juon ļo̧o̧k in katak ko an Jisōs ilo Jerusalem im Bok in Mormon ej juon ļo̧o̧k in katakin ko An ilo Amedka kan.

• Kālet jet iien im m̧ool ko me jim̧or Baibōļ im Bok in Mormon rej kam̧ool kake, āinwōt lo̧tak eo an Jisōs, mej, im Jerkakpeje eo. Kwaļo̧k pija jān Gospel Art Book me ej kalikkar makūtkūt ko im m̧ool ko. Kajjitōk ippān ajri ro n̄an kōmeļeļeik ta eo rej loe ilo pija ko, im ba n̄an er bwe jim̧or Baibōļ eo im Bok in Mormon rej kwaļo̧k kōn men kein.

Mormon 8:3

Imaron̄ kālet jim̧we eo men̄e ij make iaō.

Moronai eaar Rinipai eo āliktata ejim̧we, ak eaar m̧ool wōt kōn naan in kam̧ool eo an. Jipan̄ ajri ro katak jān waanjon̄ok eo an.

Makūtkūt ko Maron̄ Kōm̧m̧ani

• Riiti Mormon 8:3, kalikkar ke Moronai eaar ajimakeke, ak eaar kōjparok wōt kien ko, ekoba kien eo n̄an kadedeļo̧k Bok in Mormon. Kwaļo̧k juon tōre kwaar tiljek men̄e kwoj ajimakeke.

• Ālkin kōnono kōn waanjon̄ok eo an Moronai, kwaļo̧k jet jekjek ko me ajri eo emaron̄ kālete ak jab kālet jim̧we eo, men̄e ejjeļo̧k juon ej reiļo̧k. Ta eo Moronai emaron̄ kar kōm̧m̧ane?

• Al ippān ajri ro juon al kōn kālet jim̧we eo, āinwōt “Stand for the Right” (Children’s Songbook, 159). Etke eaorōk n̄an kālet jim̧we aolep iien, men̄e kwoj ajimakeke?

Mormon 9:7–21

Anij ej “juon Anij in kabwilōn̄lōn̄ ko.”

Jipan̄ ajri ro meļeļe bwe kabwilōn̄lōn̄ ko raorōk ilo jerbal eo an Anij im bwe Anij enaaj kwaļo̧k kabwilōn̄lōn̄ ko n̄e armej ro An rej tōmak.

Makūtkūt ko Maron̄ Kōm̧m̧ani

• Kōmeļeļeik bwe kabwilōn̄lōn̄ ej juon men eo Anij ej kōm̧m̧ane n̄an kwaļo̧k An kajoor n̄an kōjeraam̧m̧an mour ko ad (lale Bible Dictionary, “Miracles”). Riiti naan im eoon ko jān Mormon 9:11–13, 17 me rekōmeļeļeik jet iaan kabwilōn̄lōn̄ ko an Anij. Jipan̄ ajri ro ļōmņake kabwilōn̄lōn̄ ko jet loi ilo jeje ko rekwojarjar (pija ko jān Gospel Art Book, āinwōt nos. 26, 40, 41, im83, emaron̄ jipan̄). Kam̧ool bwe Anij eaar jerbali kabwilōn̄lōn̄ ko ilo iien ko etto im Ej jerbali wōt kabwilōn̄lōn̄ ko rainin.

• Kwaļo̧k juon en̄jake kōn iien eo kwaar lo kabwilōn̄lōn̄ ilo Kabun̄ in rainin ak ilo mour eo am̧. Kwaļo̧k am̧ naan in kam̧ool bwe Anij ej “juon Anij in kabwilōn̄lōn̄ ko.” (Mormon 9:11).

Katakin Katak ko: Ajri ro Rerūttoļo̧k

Mormon 7:8–10

Bok in Mormon im Baibōļ eo rej jim̧oor kam̧ool kōn Jisōs Kraist.

Mormon eaar kwaļo̧k bwe “gospel eo an Kraist … enaaj itok [im̧aad]” jim̧or ilo Baibōļ eo im Bok in Mormon. Ļōmņake wāween eo kwonaaj katakin ajri ro bwe bok kein jim̧or rej kwojarjar im aorōk n̄an kōj

Makūtkūt ko Maron̄ Kōm̧m̧ani

• Je Mormon 7:9 ioon bo̧o̧t eo, bōtaab jab kanne ļain ko kōn naan kein en̄in im uweeo. Bar je ioon bo̧o̧t eo en̄in = Bok in Mormon im bwe = Baibōļ. Kajjitōk ippān ajri ro n̄an riiti Mormon 7:9 ilo eļaaj im kōjerbal naan ko ioon bo̧o̧t eo n̄an kanne ļain ko. Ta eo jej ekkatak jen Baibōļ eo im Bok in Mormon jen eoon in?

• Kwaļo̧k juon Bok in Mormon im juon Baibōļ. Kwaļo̧k jidik bwebwenato ko jān kajjojo bok, kwaļo̧k pija ko n̄e ekkar (lale Gospel Art Book). Kajitōk ippān ajri ro n̄an kalikkar bok ta eo bwebwenato eo ej itok jene. Etke jej aikuji bok kein jim̧or?

• Je kajjojo naan ko rualitōk jān laajrak in tōmak ko ioon jet peba jidik. Leļo̧k juon ak ruo naan n̄an kajjojo ajri, im kajjitōk ippān ajri ro n̄an jerbal ippān doon n̄an likūt naan ko ilo laajrak eo aer ejim̧we. Innām kajjitōk ippāer n̄an āliji laajrak in tōmak ko elōn̄ alen. Ta eo ej katakin kōj?

  

  Bok in Mormon eo ej kam̧ool kōn Jisōs Kraist.

Mormon 8:1–7

Imaron̄ kālet jim̧we eo men̄e ij ajimakeke.

Kijejeto eo an Moronai n̄an “kakūrm̧ool kien eo [an] jemen,” men̄e jemen eaar mej, emaron̄ im̧we ajri ro n̄an pokake kien ko an Anij.

Makūtkūt ko

• Riiti Mormon 8:1–7 ippān ajri ro, im kajjitōk ippāer n̄an kwaļo̧k ewi wāween aer kar en̄jake eļan̄n̄e en kar er Moronai. Kajjitōk ippāer n̄an bar lale eoon 1, 3, im 4 n̄an lale ta eo kar kakien Moronai n̄an kōm̧m̧ane. Ewi wāween an kar Moronai “kakūrm̧ool kien eo [an] jemen”? Elmen ad maron̄ āinwōt Moronai?

• Kajjitōk ippān ajri ro n̄an je juonjekjek eo me rekar kōm̧m̧ane juon kālet ikōtaan em̧m̧an im nana n̄e ejjeļo̧k en ej loe. Likūt ļōmņak ko aer ilo juon nine, im kōm̧m̧ane bwe ajri ro ren bōk kūņaer bōk juon jekjek im kwaļo̧ke ta eo ren kar kōm̧m̧ane āinwōt Moronai.

Mormon 8:24–26; 9:7–26

Anij ej “juon Anij in kabwilōn̄lōn̄ ko.”

Elōn̄ armej ro rainin ro me rejjab tōmak bwe kabwilōn̄lōn̄ ko rej waļo̧k wōt. Kōjerbal katak ko an Moronai ilo eoon kein n̄an katakin ajri ro bwe n̄e ewōr ad tōmak, jemaron̄ lo jerbal in kabwilōn̄lōn̄ ko an Anij ilo mour ko ad.

Makūtkūt ko Maron̄ Kōm̧m̧ani

• Kwaļo̧k juon iiōk. Ta eo enaaj waļo̧k n̄e ejako kein iiōk eo eaorōk? Kajjitōk bwe ajri ro ren pukote Mormon 8:24 im 9:20–21 n̄an pukot “iiōk” eo ekkar me jej aikuj in bōke m̧okta jen an Anij jerbale kabwilōn̄lōn̄ ko. Kwaļo̧k waanjon̄ok ko an kabwilōn̄lōn̄—reļļap ak reddik—me kwaar lo ilo Kabun̄ in ak ilo mour eo am̧. Kajjitōk ippāer n̄an kwaļo̧k waanjon̄ok eo aer make.

• Ajije ajri ro n̄an ruo̧ kumi. Kajjitōk ippān kajjojo tiim n̄an pukot waanjon̄ok ko an kabwilōn̄lōn̄ ilo jet ak aolepen eoon kein: Mormon 8:24; 9:11–13, 16–18, 21–25. Ta eo jemaron̄ ba n̄an ro jet ro rej ļōmņak bwe kabwilōn̄lōn̄ ko ejako aer bar waļo̧k? (lale Mormon 9:9, 15–21).

Kōketak Ekkatak ilo Mweo

Kajjitōk ippān ajri ro n̄an kajjitōk ippān juon uwaan baam̧le eo n̄an kōmeļeļeik juon kabwilōn̄lōn̄ me eaar kōkajoor naan in kam̧ool eo an.

Kōkōm̧anm̧anļo̧k Ad Katakin

Ajri ro remaron̄ kile im̧we eo an Jetōb. Katakin ajri ro bwe en̄jake in aenōm̧m̧an, iakwe, im okmāneen me rej en̄jake ilo aer kōnono ak al kōn Jisōs Kraist im gospel eo An ej itok jān Jetōb Kwojarjar (lale Teaching in the Savior’s Way, 11).