“Nobōm̧ba 30–Tijemba 6. Moronai 1–6: ‘N̄an Kōjparok Er ilo Wāween Ejim̧we,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Nobōm̧ba 30–Tijemba 6. Moronai 1–6,” Itok, Ļoor Eō—N̄an Kajjojo Armej im Baam̧le ko: 2020
Minerva Teichert (1888–1976), Alma ej Peptaij ilo Dān ko an Mormon, 1949–1951, oil ioon masonite eo, 35⅞ x 48 inches. Brigham Young University Museum of Art, 1969
Nobōm̧ba 30–Tijemba 6
Moronai 1–6
“N̄an Kōjparok Er ilo Wāween Ejim̧we”
Moronai eaar je ta eo eaar kōjatdikdik enaaj kar “aorōk … ilo jet raan tokālik” (Moronai 1:4). Ta eo kwoj loe ilo Moronai 1–6 me ej aorōk n̄ak kwe? Je ta eo kwoj loe, im ļōmņak in kwaļo̧ke ippān juon eo me emaron̄ barāinwōt lo an aorōk.
Je En̄jake ko Rej Im̧we Eok
Ālkin kadedeļo̧k ļo̧o̧k eo an jemen kōn RiNipai ro im kōkaduik ļo̧o̧k eo an RiJared ro, Moronai eaar ļōmņak ilo jino in bwe jerbal in kōjparok ļo̧o̧k eo eaar jem̧ļo̧k (lale Moronai 1:1). Ta eo eaar ļapļo̧k n̄an ba kōn ruo laļ ko me raar kanooj jorrāān? Bōtaab Moronai eaar lo tōre ko ad (lale Mormon 8:35), im eaar im̧we n̄an “jeje bar jet men ko, me bōlen remaron̄ in aorōk … ilo jet raan tokālik” (Moronai 1:4). Eaar jeļā bwe ajeded in bun̄ jān tōmak eo eaar itok, bōktok ippān tok tarpok eo kōn kain̄i ko an priesthood eo im kabun̄ eļaptata. Menin emaron̄ etke eaar letok tipdik in meļeļe ko ralikkar kōn kwojkwoj eo, peptaij eo, leļo̧k menin letok eo an Jetōb Kwojarjar eo, im kōjeraam̧m̧an ko an koba ippān ritōmak ro m̧ōttad n̄an “kōjparok [doon] ilo wāween ejim̧we, … atartar make ioon em̧m̧an ko an Kraist, eo ej rijeje im rikadedeļo̧k an tōmak eo [ad] tōmak” (Moronai 6:4). Ļōmņak ko raorōk āinwōt kein rej letok n̄an un eo n̄an kam̧m̧oolol bwe Irooj eaar kōjparok mour eo an Moronai bwe en maron̄ “jeje bar jet men ko” (Moronai 1:4).
Ļōmņak ko n̄an Ekkatak Jeje ko Rekwojarjar Ippam̧ Make
Rikaļoor ro an Jisōs Kraist rej pād wōt ilo tiljek kejekdo̧o̧n jum̧ae.
N̄an jet armej, epidodoļo̧k n̄an tiljek ilo iien ko repidodo im kaenōm̧m̧an. Bōtaab āinwōt rikaļoor ro an Jisōs Kraist, jej aikuj tiljek wōt jekdo̧o̧n n̄e jej jelm̧ae māllijon̄ ko im jum̧ae. Ilo am̧ riiti Moronai 1, ta eo ej im̧we eok kōn tiljek eo an Moronai n̄an Irooj im n̄an kūr eo an? Ekōjkan am̧ maron̄ ļoor waanjon̄ak eo an?
Kain̄i ko an Priesthood eo raikuj in kōm̧m̧an āinwōt an Irooj kakien.
Ilo tōre in jerbal in karejar eo An ilo mour in, Rilo̧mo̧o̧r eaar bōk im kōm̧m̧ani kain̄i ko rekwojarjar, ko āinwōt peptaij (lale Matu 3:13–17; Josep Smith Ukook, Jon 4:1–3 [ilo Bible appendix eo]), kain̄i an priesthood (lale Mark 3:13–19), im kwojkwoj eo (lale Matu 26:26–28). Mekarta, kōnke kōn Bun̄ Jān Tōmak Eļap, elōn̄ armej rainin rej pok wōt kōn ekōjkan an kain̄i ko aikuj in kōm̧m̧an—im jekdo̧o̧n eļan̄n̄e rej aikuji n̄an jidik. Ilo Moronai 2–6, Moronai eaar letok tipdik in meļeļe ko raorōk kōn jet kain̄i ko an priesthood eo me remaron̄ jipan̄ kalikkarļo̧k jet iaan tarpok ko. Ta kareel ko rej itok ilo am̧ ekkatak kōn kain̄i ko ilo jepta kein? Men kein rej jet iaan kajjitōk ko komaron̄ kajjitōk n̄an jipan̄ eok ekkatak:
-
Kapene (Moronai 2; 6:4).Ta naan in kōmeļeļe eo an Rilo̧mo̧o̧r ilo Moronai 2:2 ej katakin eok kōn kain̄ eo an kapene? Ta eo kwoj ļōmņak ej meļeļe in n̄an “karreoik er jān kajoor eo an Jetōb Kwōjarjar”? (Moronai 6:4).
-
Ekkapit an priesthood (Moronai 3).Ta eo kwoj loe ilo jebta in me emaron̄ jipan̄ juon m̧aanjabpopo n̄an ekkapit n̄an priesthood eo? Ta eo kwoj loe me enaaj jipan̄ juon kōm̧m̧ane ekkapit eo?
-
Kwojkwoj eo (Moronai 4–5; 6:6).Je kallim̧ur ko ilo jar in kwojkwoj eo (lale Moronai 4:3; 5:2), im kejekļo̧kjeņ kōn ta eo kwoj kōm̧m̧ane n̄an kōjparok kallim̧ur ko am̧. Ta eo komaron̄ kōm̧m̧ane n̄an karuwaineneiktok eļapļo̧k kajoor in kareel eo an Jetōb ilo am̧ bōk kuņaam̧ ilo kwojkwoj eo?
-
Peptaij (Moronai 6:1–3).Ta eo komaron̄ kōm̧m̧ane n̄an wōnm̧aanļo̧k wōt n̄an tōpar men ko aikuji n̄an peptaij kar litok ilo eoon kein, jekdo̧o̧n ālkin am peptaij? Ta eo eoon kein rej elmakoti n̄an eok kōn ta meļeļein n̄an erom juon membōr in Kabun̄ eo an Jisōs Kraist?
Pedped ioon ta eo kwar ekaktak, ekōjkan am̧ naaj ukōt wāween ko kwoj ļōmņak, bōk kūņaam̧ ie, ak kōpooj ro jet n̄an kain̄i kein? Etke eaorōk bwe kain̄ kein ren “kōjeraam̧m̧an … ekkar n̄an naan in jiron̄ ko an Kraist”? (Moronai 4:1).
Lale barāinwōt “Ordinances,” Gospel Topics, topics.ChurchofJesusChrist.org.
Jisōs eaar katakin ekōjkan an kain̄i ko aikuj kōm̧m̧an.
Rikaļoor ro an Jisōs Kraist rej bōk eddo in lale jeraam̧m̧an an doon jetōb.
Ilo an m̧ool bwe jej aolep “jerbale lo̧mo̧o̧r eo [ad] make” (Mormon 9:27), Moronai eaar barāinwōt katakin bwe “kwei[lo̧k] emmakijkij” ippān ritōmak ro m̧ōttad emaron̄ jipan̄ dāpij kōj “ilo wāween ejim̧we” (Moronai 6:4–5). Ilo am̧ riiti Moronai 6:4–9, kejekļo̧kjeņ kōn kōjeraam̧m̧an ko me rej itok jān “bōnbōn ilubwiljin armej ro an kabun̄ eo an Kraist” (Moronai 6:4). Ekōjkan am̧ maron̄ jipan̄ kōm̧m̧an bwe en̄jake ko kwe im ro jet ewōr ippāer ilo kabun̄ eo ren ļapļo̧k āinwōt juon eo kōmeļeļeik jān Moronai, eļan̄n̄e kwoj juon ritōl ak juon ribōk kuņaan?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.
Moronai 1; Moronai 6:3
Ta meļeļein n̄an “kaarmejjete Kraist”? (Moronai 1:2–3). Ekōjkan ad maron̄ kwaļo̧k ad “kōttōpar n̄an jerbal n̄an e n̄an jem̧ļo̧kin”? (Moronai 6:3). Kwaļo̧k waanjon̄ak ko an armej ro kwojeļā me eaar wōr kōttōbar in n̄an jerbal n̄an E.
Moronai 4:3; Moronai 5:2
Riiti jar in kwojkwoj eo āinwōt juon baam̧le emaron̄ tōlļo̧k n̄an juon ekōnono kōn kautiej kwojkwoj eo kōn eļapļo̧k kautiej. Bōlen ro uwaan baam̧le eo remaron̄ ekōnono kōn naan ko jān jar kein me eļaptata an ļap meļeļe in n̄an er. Remaron̄ barāinwōt je ļōmņak ko aer kōn naan kein ak jin̄aik juon pija me ej jipan̄ er ļōmņak kōn Rilo̧mo̧o̧r eo. Remaron̄ bōktok ta eo raar je ak jin̄aik n̄an kweilo̧k in kwojkwoj eo n̄an jipan̄ er likūt ļōmņak ko aer ilo E. Jiron̄ baam̧le eo am̧ ekōjkan am̧ en̄jake kōn kwojkwoj eo im en̄taan eo an Rilo̧mo̧o̧r.
Moronai 6:1–4
Ta meļeļein n̄an wōr juon “bōro eo erup im jetōb ettā”? (Moronai 6:2). Ekōjkan an menin jipan̄ kōj m̧aanjabpopo n̄an peptaij? Ekōjkan maron̄ jipan̄ kōj ālkin ad peptaij?
Moronai 6:4–9
Ekkar n̄an eoon kein, ta jet iaan kōjeraam̧m̧an ko me rej itok jān “bōnbōn ilubwiljin armej ro an kabun̄ eo an Kraist”? (Moronai 6:4). Etke jej aikuji Kabun̄ eo?
Moronai 6:8
Ta eo eoon in en katakin kōn ukweļo̧k? Ta meļeļe in n̄an pukōt jeorļo̧k bōd kōn “jibadbad em̧ool”? (Moronai 6:8). Ļōmņak in al juon al kōn jeorļo̧k bōd, eo āinwōt “Help Me, Dear Father” (Children’s Songbook, 99).
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkm̧anm̧anļo̧k Am̧ Ekkatak Ippam̧ Make
Pukōt kein kam̧ool eo kōn iakwe eo an Anij. Būreejtōn M. Russell Ballard eaar katakin, “Gospel [eo] ej juon gospel in iakwe—iakwe n̄an Anij im iakwe n̄an doon” (“God’s Love for His Children,” Ensign, Māe 1988, 59). Ilo am̧ riiti jeje ko rekwojarjar, ļōmņak in je ak kakōļļeik kein kam̧ool ko kōn iakwe eo an Anij n̄an kwe im aolep ajri ro Nejin.
Moronai ilo Ron̄ eo, jān Jorge Cocco