Bwe Kom̧in Maron̄ Jeļā, jān Gary L. Kapp

Tijem̧ba 14–20

Moronai 10

“Itok n̄an Kraist, im Weppān ilo E”

Ilo am̧ kadedeļo̧k riiti Bok in Mormon, ļōmņak in pukōt juon kam̧ool ekāāl jān Jetōb Kwojarjar eo bwe ej m̧ool. Ilo am̧ kōm̧m̧ane, je en̄jake ko kwoj būki.

Je En̄jake ko Rej Im̧we Eok

Bok in Mormon ej jino kōn kallim̧ur eo an Nipai n̄an kwaļo̧k n̄an kōj bwe “tūriam̧o an Irooj ej pād ioon aolep ro eaar kāālet, kōn aer tōmak” (1 Nipai 1:20). Bok eo ej kilōk kōn juon ennaan ejjeļo̧k oktak jān Moronai ilo an m̧aanjabpopo n̄an “sili” ļo̧o̧k ko: eaar kūr kōj n̄an “keememej ekōjkan an Irooj kar tūriam̧okake” (Moronai 10:2–3). Jekdo̧o̧n eļan̄n̄e jej ļōmņak wōt kōn elōn̄ tūriam̧o ko kar je ilo Bok in Mormoon, menin eletok n̄an kōj elōn̄ men n̄an ļōmņak kaki. Ta waanjon̄ak ko rej itok n̄an kōļmenļo̧kjeņ eo am̧? Komaron̄ kejōkļo̧kjeņ kōn wāween tūriam̧o Anij eaar tōl baam̧le eo an Liai ilo āne jem̧aden im kijoon dān ko reļļap, tūriam̧o eo em̧m̧an Eaar kwaļo̧k n̄an Enos ke an eaar kwōle kōn jeorļo̧k bōd, ak tūriam̧o̧ eo Eaar kwaļo̧k n̄an Alma, eo eaar rikejdāt an Kabun̄ eo me eaar erom juon iaan rikattōrak ro raar jab mijak n̄an jidik. Ak ļōmņak ko am̧ remaron̄ oktakļo̧k n̄an tūriam̧o eo an jerkakpeje Rilo̧mo̧o̧r eaar kwaļo̧k n̄an armej ro ke Eaar kemour rinan̄inmej ro aer im kōjeraam̧m̧an ajri ro nejier reddik. Bōlen men eo eaorōktata, aolep men kein remaron̄ kakeememej eok kōmn “keememej ekōjkan an Irooj kar tūriam̧okake” n̄an kwe, bwe juon iaan jibadbad ko reļļap an Bok in Mormon ej n̄an kūr kajjojo iaad n̄an bōk tūriam̧o an Anij—kūr n̄an kwaļo̧k naan in iak-iakwe eo an Moronai eļem waan, “itok n̄an Kraist, im weeppān ilo e” (Moronai 10:32).

Ļōmņak ko n̄an Ekkatak Jeje ko Rekwojarjar Ippam̧ Make

Moronai 10:3–7

Imaron̄ jeļā m̧ool eo kōn kajoor eo an Jetōb Kwojarjar

Kallim̧ur eo ilo Moronai 10:3–7 eaar ukōt mour ko an milien armej ro ipeļaakin laļ in. Ekōjkan an kar ukōt mour eo am̧? Men̄e kwoj pukōt n̄an bōk ak n̄an kōkajoorļo̧k naan in kam̧ool eo am̧ kōn Bok in Mormon, kūr eo an Moronai ej jerbal n̄an kwe. Ilo am̧ riiti Moronai 10:3–7, ļōmņak in kōļapļo̧k am̧ mejmejkaruo riit jān ke kwar m̧oktaļo̧k. Komaron̄ etale kajjojo naan, kajjitōk ippam̧ make kajjitōk ko āinwōt kein: Ta meļeļe in? Ekōjkan aō maron̄ kōm̧m̧ane menin em̧m̧anļo̧k? Ta en̄jake ko em̧ōj aō būki jān menin? Ekōjkan an kar Jetōb Kwojarjar eo kwaļo̧k tok m̧ool eo an Bok in Mormon n̄an eō?

Barāinwōt ļōmņak kōn juon eo me ej aikuj ron̄jake naan in kam̧ool eo am̧ kōn Bok in Mormon? Ekōjkan an naaj jipan̄ armej jab eo pukōt kam̧ool eo an make?

Moronai 10:8–25

“Jab kaarmejjete mennin letok ko an Anij.”

Ekanooj lōn̄ wāween ko juon armej emaron̄ “kaarmejjete … mennin letok ko an Anij” (Moroni 10:8). Jet armej rej kaarmejjete bwe menin letok kein rejjab waļo̧k. Ro jet remaron̄ kaarmejjete bwe ewōr ippāer mennin letok ko ilo jetōb bōtaab kūli ippān armej ro jet. Aaet ro jet rej kaarmejjete menin letok ko aer jān kowaani ak likjab in kōļapiļo̧k.

Ilo am̧ riiti Moronai 10:8–25, pukōt m̧ool ko me renaaj jipan̄ eok lo mennin letok ko ilo jetōb am̧ im kōjerbali kōn eļapļo̧k kajoor n̄an kōjeraam̧m̧an kwe make im ro jet. Pukōt kōļmenļo̧kjeņ ko kōn mennin letok ko an Anij ekar liwaj n̄an eok ak mennin letok ko Ekōņaan bwe kwon kappukōti. Etke ej aorōk n̄an “bwe mennin letok otemjej em̧m̧an ej itok jān Kraist”? (Moronai 10:18).

Ļōmņak kōn barāinwōt kapilōk in jān Elder John C. Pingree Jr.: “Kōn menin ekōjkan ad jeļā menin letok ko ad? Jemaron̄ lale patriak kōjeraam̧m̧an eo ad, kajjitōk ippān ro rejeļā tata kajied, im kile ilo kōj make ta eo em̧m̧an ad kōm̧m̧ane im m̧ōņōņō kake. Eo eaorōk tata, jemaron̄ kajjitōk ippān Anij (lale Jemes 1:5; KB 112:10). Ejeļā menin letok ko ad, kōnke Eaar litok n̄an kōj” (“Ewōr juon Jerbal Ippa n̄an Kwe,” Ensign ak Kweilo̧k eo Eļap, Nob. 2017, 33).

Lale Unin Tōl Eo N̄an Jejej Ko Rekwōjarjar, “Mennin Letok ko an Jetōb,” scriptures.ChurchofJesusChrist.org.

Moronai 10:30–33

Imaron̄ in weppān kōn meanwōd eo an Jisōs Kraist.

Kauwe eo an Moronai n̄an “itok n̄an Kraist” ekoba eļapļok jān ekkatak kōn E ak ļōmņak emakijkijļo̧k kōn E ak em̧ool buuļ kajjion̄ n̄an kōjparok kein ko An, an aorōk in wōt men kein. Ijello̧kin, en̄in ej kūr eo n̄an itok n̄an Kraist ilo jekjek eo edipio tata emaron̄ in—n̄an erom āinwōt E ej. Ilo am̧ riiti Moronai 10:30–33, kile naan ko me rej jipan̄ eok meļeļe ta meļeļein n̄an lukkuun in itok n̄an Kraist “ekkeijel wōt ioon aolep mennin letok em̧m̧an,” “kaarmejjete kom̧ make jān aolep men ko rejjab em̧m̧an,” im, aaet, “weeppān ilo e” (italic ko kar kobaiktok).

Ekōjkan an menin pidodo? Pukōt uwaak ko ilo Moronai 10:30–33. Ta eo Jetōb eo jiron̄ eok bwe kwoj aikuj kōm̧m̧an eļap ilo kadedeļo̧k n̄an “itok n̄an Kraist, im weeppān ilo e”?

Lale Omnai 1:26; Unin Tōl Eo N̄an Jeje Ko Rekwōjarjar, “Weepān,” scriptures.ChurchofJesusChrist.org.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.

Moronai 10

Riiti jepta in ippān doon, kappukōte aolep iien Moronai eaar kōjerbal naan eo kōketak. Laajrake ak kakōļļeik ta eo Moronai ej kōketak—ak kanooj kōketak—kōj n̄an kōm̧m̧ane. Ta eo jemaron̄ kōm̧m̧ane n̄an ļoor kōketak ko an?

Moronai 10:3

Ta eo jaar ekkatak kōn tūriam̧o eo an Irooj ilo ad riiti Bok in Mormon iiō in? Ekōjkan an Irooj kar tūriam̧okake baam̧le eo ad?

Moronai 10:3–5

Ālkin riiti eoon kein, komaron̄ kajjitōk ippān ro uwaan baam̧le eo n̄an kwaļo̧k ekōjkan aer kar itok n̄an jeļā bwe Bok in Mormon ej m̧ool. Ļōmņak in al ippān doon juon al kōn kappukōt m̧ool eo, eo āinwōt “Search, Ponder, and Pray” (Children’s Songbook, 109). Komaron̄ barāinwōt kūr ro uwaan baam̧le eo n̄an je naan in kam̧ool ko aer ilo juon jōnōļ an baam̧le eo.

Moronai 10:8–18

Kūrijm̧ōj ej juon iien ekkā n̄an ļōmņak kōn bōk mennin letok ko. Bōlen ro uwaan baam̧le eo remaron̄ kitim mennin leļo̧k ko n̄an doon me ej bōk jikin “mennin letok ko an Anij” kar kōnono kaki ilo Moronai 10:9–16. Mennin letok kein remaron̄ barāinwōt bōk jikin mennin letok ko jet rem̧m̧an me rej itok jān Kraist me rej lo ippāņ ro jet.

Moronai 10:27–29, 34

Ro uwaan baam̧le eo remaron̄ kwaļo̧k ta eo rej kōņaan ba n̄an Moronai n̄e rej “ioon [e] im̧aan jikin ekajet eo em̧m̧an an Jeova ļapļap eo.”

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere

Kōkm̧anm̧anļo̧k Am̧ Ekkatak Ippam̧ Make

Kappukōt Jisōs Kraist. Jibadbad eo an Bok in Mormon—im aolep jeje ko rekwojarjarj—ej n̄an kam̧ool kōn Jisōs Kraist. Ta eo kwoj ekkatak kōn Jisōs Kraist ilo Moronai 10? Ta eo kwoj en̄jake eaar im̧we eok n̄an kōm̧m̧ane n̄an itok n̄an E?

Moronai ej Kalbwin Piliej ko, jān Jon McNaughton