“Tijem̧ba 7–13. Moronai 7–9: ‘A Kraist En Lōn̄aj Eok,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Tijem̧ba 7–13. Moronai 7–9,” Itok, Ļoor Eō—N̄an Kajjojo Armej im Baam̧le ko: 2020
Minerva Teichert (1888–1976), Moronai: RiNipai Eo Āliktata, 1949–1951, oil ioon masonite eo, 34¾ x 47 inches. Brigham Young University Museum of Art, 1969
Tijem̧ba 7–13
Moronai 7–9
“A Kraist En Lōn̄aj Eok”
Ilo am̧ ekkatak kōn Moronai 7–9, ron̄jake im̧we ko an Jetōb Kwojarjar, im le enaan ko An n̄an kwe. Emaron̄ katakin eok jim̧or ta eo kwoj aikuj in jeļā im ta eo kwoj aikuj in kōm̧m̧ane.
Je En̄jake ko Rej Im̧we Eok
M̧okta an Moronai kar kadedeļo̧k ļo̧o̧k eo jejeļā kake rainin āinwōt Bok in Mormon kōn naan ko an āliktata make, eaar kwaļo̧k jilu ennaan ko jān eo jemen, Mormon, juon ekōnono n̄an “rikaļoor ro an Kraist reineem̧m̧an” (Moronai 7:3) im leta ko ruo me Mormon eaar je n̄an Moronai. Bōlen Moronai eaar kobaik enaan kein ilo Bok in Mormon kōnke eaar lo ejja āinwōt ko ikōtaan kauwōtata ko ilo raan ko an im ko ad. Ke naan kein raar jeje, armej in RiNipai ro āinwōt juon jarlepju raar m̧ōkaj aer wōtlo̧k n̄an bun̄ jān tōmak. Elōn̄ iaer eaar “jako iakwe eo aer, juon n̄an bar juon” im laudin̄din̄ ilo “men otemjej ijello̧kun men eo em̧m̧an” (Moronai 9:5, 19). Im aaet Moronai eaar lo wōt un eo kōn kōjatdikdik—katakin kōj bwe kōjatdikdik ejjab meļeļe in kowaan ak tōmak kōn jorrāān ko an laļ, ej meļeļe in wōt tōmak ilo Jemedwōj Ilan̄ im Jisōs Kraist, eo kajoor eo aer eļapļo̧k im eļapļo̧k an indeeo jān jorrāān kein. Ej meļeļein “ekkei[jel] pen ioon men otemjej em̧m̧an” (Moronai 7:19). Ej meļeļein kōtļo̧k an Pinmuur eo an Jisōs Kraist “ im kōjatdikdik in An aiboojoj im mour indeeo, ren pād ilo ļōmņak eo am̧ indeeo” (Moronai 9:25). Im m̧ae iien eo raan eo aiboojoj an Itok eo Kein Karuo an Kraist, ej meļeļe in jamin bōjrak “jerbal [jej aikuj] kōm̧m̧ane … [n̄an] anjo̧ ioon rikōjdat in aolep weeppān” (Moronai 9:6).
Ļōmņak ko n̄an Ekkatak Jeje ko Rekwojarjar Ippam̧ Make
Meram eo an Kraist ej jipan̄ eō ekajete kōtaan em̧m̧an im nana.
Laļ in rainin ej obrak kōn ennaan in kareel ko; ekōjkan ad maron̄ ba ewi wōt eo ejim̧we im ewi wōt eo ebōd? Naan ko an Mormon ilo Moronai 7 ej letok n̄an kōj jet pedped in katak ko jemaron̄ kōjerbali n̄an joļo̧k “ekaj[et] ilo bōd” (Moronai 7:18). Ilo am̧ ekkaak kōn Moronai 7:12–20, kappukōt m̧ool ko me remaron̄ jipan̄ eok jeļā ta eo enaaj kepaakeļo̧k eok n̄an Anij im ta eo eban. Komaron̄ kōjerbal m̧ool kein n̄an jipan̄ eok etale ennaan ko kwoj iooni im en̄jake ko ewōr ippam̧ ilo wiik in im jokāālet eo eļan̄n̄e ak jaab rej kūr im m̧oņe eok n̄an kōm̧m̧an em̧m̧an (lale Moronai 7:13).
Lale barāinwōt “Judging Others,” Gospel Topics, topics.ChurchofJesusChrist.org; Bible Dictionary, “Light of Christ.”
Kōn tōmak ilo Kraist, imaron̄ “ekkeijel pen ioon men otemjej em̧m̧an.”
Ālkin katakin kōn ekōjkan kile kōtaan em̧m̧an im nana, Mormon eaar kajjitōk juon kajjitōk me āinwōt ekkar n̄an rainin: “ekōjkan an maron̄ bwe kom̧in maron̄ [n̄an] kūkki im dāpdep ioon men otemjej em̧m̧an?”—eļap tata n̄en kapo ko an rijum̧ae eo rekanooj in kapopo (Moronai 7:20). Uwaak eo an Moronai maron̄ loe ilo aolepān jebta 7. Ilo am̧ riiti eoon 20–48, pukōt m̧ool ko me rej jipan̄ eok kile “men otemjej em̧m̧an” ewōr ippam̧ kōnke kōn Jisōs Kraist. Ekōjkan an wōr tōmak ilo E jipan̄ eok kappukōt men ko me rem̧m̧an? Ekōjkan am̧ maron̄ “ekkeijel pen” ioon men ko eļapļo̧k aer em̧m̧an?
Lale barāinwōt Laajrak in Tōmak 1:13.
“Iakwe-em̧ool ej iakwe eo erreo an Kraist.”
Būreejtōn Dallin H. Oaks ear kwaļo̧k: “Un eo unin an iakwe em̧ool eban likjab im un eo iakwe em̧ool eļapļo̧k jān jekdo̧o̧n jerbal ko rem̧m̧an eļap aer aorōk … ej bwe iakwe em̧ool, ‘iakwe eo erreo an Kraist’ (Moro. 7:47), ejjab juon jerbal bōtaab juon jekjek ak ļamļam eo kōn. … Iakwe em̧ool ej juon men juon ej erom” (“The Challenge to Become,” Ensign, Nob. 2000, 34). Ilo am̧ riiti Moronai 7:44–48, ļōmņak kōn kōmeļeļe eo an Moronai kōn iakwe em̧ool, im ron̄jake n̄an im̧we ko jān Jetōb Kwojarjar; E emaron̄ jipan̄ eok lo wāween ko komaron̄ kōkm̧anm̧anļo̧k. Etke jej aikuj tōmak im kōjatdikdik n̄an bōk mennin letok eo an iakwe em̧ool?
Mour erreo eo im wānōk eo aō maron̄ ke bōk jān n̄a?
Kōmeļeļe eo an Mormon kōn jerawiwi ko renana tata an RiNipai ro kar tōlļo̧k jet n̄an tōpar jem̧ļo̧k eo ebōd me ro kar kakkure er kōn kakkure an m̧ōm̧ an kanniōk ak kakkure kar rupe kien erreo. Mekarta, Elder Richard G. Scott eaar kalikkar bwe menin ejjab jekjek eo. Eaar katakin, “Ij kallim̧ur ilo kam̧ool bwe n̄e jerbal in kakkure an ro jet, ukōt, ak jerbal an m̧ōm̧ an kanniōk ej kanooj kōmetak eok, ņae ankilam̧, kwojjab eddo kake im kwoj aikuj jab en̄jake bōd” (“Healing the Tragic Scars of Abuse,” Ensign, Māe 1992, 32).
Emaron̄ wōr aō kōjatdikdik ilo Krasit jekdo̧o̧n jekjek ko aō.
Ālkin kōmeļeļeik nana eo eaar loe, Mormon eaar jiron̄ ļeo nejin n̄an jab būrom̧ōj. Ta eo ej kabwilōn̄ eok kōn ennaan eo an Mormon kōn kōjatdikdik? Ta meļeļe in n̄an kwe n̄an bwe Kraist en “ļōn̄ak [eok] lōn̄ļo̧k”? Ta m̧wil ko an Kraist im pedped in katak ko an gospel eo An “ren pād ilo ļōmņak eo am̧” im lewaj n̄an eok kōjatdikdik? (Moronai 9:25).
Lale barāinwōt Dieter F. Uchtdorf, “Kōjatdikdik eo an Meram an Anij,” Ensign ak Kweilo̧k eo Eļap, Māe 2013, 70, 75–77.
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.
Moronai 7:5–11
Ekkar n̄an Moronai 7:5–11, etke ej aorōk n̄an kōm̧m̧ane men ko rejim̧we kōn un ko rejim̧we? Ekōjkan ad maron̄ jeļā eļan̄n̄e jej jar im pokake kien ko an Anij kōn “lukkuun būruōn”? (eoon 6).
Moronai 7:12–19
Ekōjkan an kapilōk eo an Mormon maron̄ jipan̄ kōj kōm̧m̧ani kāālet ko rem̧m̧an kōn ekōjkan ad joļo̧k iien eo ad im wōn eo jej joļo̧k ippān? Komaron̄ kūr ro uwaan baam̧le eo n̄an etale m̧weo im̧ōmi im “ekkejel pen ioon” (Moronai 7:19), ak kōdāpdep ioon, men ko me kūr er “ kōm̧m̧an em̧m̧an, im n̄an iakwe Anij, im n̄an jerbal n̄an e” (Moronai 7:13). Nōbar er kōn men ko rem̧m̧an rej loi.
Moronai 7:29
Ālkin riiti eoon in, ro uwaan baam̧le eo remaron̄ kōnono kōn kabwilōn̄lōn̄ ko em̧ōj aer kam̧ooli ak wāween ko jet em̧ōj aer lo pein Anij ilo mour ko aer.
Moronai 8:5–26
Ta eo RiNipai ro me raar peptiaji ajri ro reddik ekar likjab aer meļeļe kake kōn Pinmuur eo an Jisōs Kraist? Ta eo jej ekkatak kōn Pinmuur eo jān katak ko an Mormon?
Moronai 8:16–17
Ta meļeļe in n̄an wōr “iakwe eweppān”? Ekōjkan an jipan̄ kōj anjo̧ ioon mijak? Ekōjkan an jipan̄ kōj katakin m̧ool eo kōn peran? Ekōjkan ad kōļapļo̧k?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkm̧anm̧anļo̧k Ad Katakin
Kōjerbal al n̄an kūrtok Jetōb eo im katakin katak eo. “Al ejjeļo̧k jon̄an kajoor ko an n̄an kōm̧akūt [kōj] m̧aanļo̧k n̄an eļapļo̧k kwojarjar” (“First Presidency Preface,” Hymns, x). Juon al kōn iakwe, eo āinwōt “Love One Another” (Hymns, no. 308), emaron̄ kōkm̧anm̧anļo̧k juon ekōnono an baam̧le eo kōn iakwe em̧ool ilo Moronai 7:44–48.
Pija in Kraist Rilo̧mo̧o̧r, jān Heinrich Hofmann