Kōjatdikdik eo an Meram an Anij
Jen Būreejtōn Dieter F. Uchtdorf
Rikakpilōklōk eo Kein Karuo ilo Būreejtōnji eo Kein Kajuon
Ilo ad pukōt n̄an kōļapļo̧k iakwe eo ad n̄an Anij im kajieon̄ in iakwe ro rūturid, meram eo an ko̧jpeļ eo enaaj jepooļ im ļōn̄aj kōj.
Deļo̧n̄ļo̧k eo n̄an Kōmeram
Ewōr juon aō pija ilo opij eo aō ij kaurōke me ej taitōļ in Entrance to Elightenment. Eaar kōm̧m̧an jān juon m̧ōtta, ripija in Danish John Benthin, eo eaar stake būreejtōn eo kein kajuon ilo Copenhagen, Denmark.
Pija eo ej kwaļo̧k juon ruum̧ emarok kōn juon kōjām epeļļo̧k me meram eo ej romaakļo̧k. Ekaitoktok limo n̄an n̄a bwe meram eo ej itok jān kōjām eo ejjab kōmeram aolepān ruum̧ eo—ej jikin eo wōt ilo m̧aan kōjām eo.
N̄an n̄a, marok eo im meram eo ilo pija in rej juon kōkaļļe n̄an mour. Ej juon m̧ōttan jekjek eo ad āinwōt armej ro ilo mour in n̄an jet iien en̄jake āinwōt n̄e jej jepooļ kōn marok. Emaron̄ in kar jako ro rejitōnbōro ippād; juon ajri emaron̄ kar jōbwābwe; jemaron̄ in kar bōk kakōlkōļ in nan̄inmej ko renana; jemaron̄ in kar ioon apan̄ ko im eddodo eo jān pere ko im mijak ko; ak jemaron̄ en̄jake ajimakeke ak jab iakwe.
Bōtaab men̄e jemaron̄ en̄jake jōbwābwe ilo ioļapļap in jekjek ko ad kiiō, Anij ej kallim̧ur kōn kōjatdikdik an meram eo An—E ej kallim̧ūr n̄an kōmeram iaļ eo im̧aad im kwaļo̧k n̄an kōj iaļ eo n̄an diwōjļo̧k jān marok.
Juon Ruum̧ Eobrak kōn Marok
Ikōņaan jiron̄ kom̧ kōn juon kōrā eo eaar rūttoļo̧k ilo juon ruum̧ eobrak kōn marok—Inaaj kūr e Jane.
Jān tōre eo Jane eaar jilu iiō dettan, aolep iien rej m̧ane, kajejtokjen, im kowaane. Kar kamijake im kajirere kake. Liin eaar ruj kajjojo jibbon̄ jab jeļā eļan̄n̄e enaaj kar mour m̧ae raan eo juon. Armej ro me rej aikuj kar kōjparok e raar ro raar kaen̄taan e ak kōtļo̧k bwe kakkure eo en wōnm̧aanļo̧k wōt.
N̄an kōjparok e make, Jane eaar katak n̄an kabōjrak en̄jake eo. Eaar ejjeļo̧k an kōjatdikik kōn lo̧mo̧o̧r, kōn menin eaar kapen e make ilo en̄jake n̄an kōjparok e make jāņ men nana ko eaar iooni. Eaar ejjeļo̧k meram ilo mour eo an, kōn menin eaar bōk marok. Kōn juon jab en̄jake me emaron̄ itok wōt jān jab m̧ūjkōk im jab bōjrak iaio ippān nana, eaar bōk ļōmņak eo bwe maron̄ kameje ilo jabdewōt iien.
Innām, ilo 18 iiō, Jane eaar lo Kabun̄ eo an Jisōs Kraist im Armej ro Rekwojarjar ilo Raan-ko Āliktata. Lan̄lōn̄ eo im kōjatdikdik eo an ko̧jpeļ eo kar kōjepļaaktok eaar deil būruwōn, im eaar bōk kūr eo n̄an peptaij. Kōn kein kajuon, meram eo eaar deļo̧n̄e mour eo an, im eaar lo juon iaļ eromaakļo̧k im̧aan. Liin eaar ilo̧k jān marok in mour eo an im kar jokālet n̄an pād ilo juon jikuuļ ettoļo̧k jān rikakkure eo an. Āliktata eaar en̄jake jo̧o̧r jāņ juon mejatoto an marok im nana—anemkwoj n̄an lem̧ōņōņō kōn aenōm̧m̧an eo an em̧m̧an an Rilo̧mo̧o̧r im kemour ekabwilōn̄lōn̄.
Mekarta, iiō ko tokālik, ālkin an rikakkure eo an kar mej, Jane eaar bar juon inepata kōn iien ko renanan in jodikdik eo an. Būrom̧ōj eļap im illu eaar kamijake n̄an kakkure meram eo em̧m̧an eaar loe ilo ko̧jpeļ eo. Eaar kile bwe eļan̄n̄e eaar kōtļo̧k bwe marok en bōk e, rijum̧ae eo an enaaj kar bōk anjo eo āliktata.
Eaar pukōt jipan̄ ilo kapilōk im taktō im jino kile bwe, n̄an e, iaļ eo em̧m̧an tata n̄an kemour eaar n̄an meļeļe im bōk bwe marok ej waļo̧k—bōtaab jab pād ijo. Kōnke, āinwōt an kar kiiō jeļā, meram ej barāinwōt waļo̧k—im bwe en̄in ej ijo eaar kālet n̄an jokwe ie.
Kōn men ko reppen eaar iioni m̧o̧kta, Jane emaron̄ kar pidodo an ikdelel n̄an ukōtļo̧k, obrak kōn illu im lāj, ak em̧ool nana. Bōtaab eaar jab. Eaar jum̧ae kapo eo n̄an kajeded marok eo, jab kōņaan jerbal nana kōn illu, metak, ak jab lōke m̧ool an ro jet. Ijello̧kin, eaar jutak pen n̄an kōjatdikdik eo bwe kōn jipan̄ eo an Anij liin emaron̄ kar mour. Liin eaar kālet n̄an kōtļo̧k meram eo im wujlepļo̧k mour eo an n̄an jipan̄ ro jet. Jokālet in eaar kōmaron̄ e n̄an door itulikin jem̧aan im n̄an bun̄ m̧aanļo̧k n̄an juon ilju im jekļaj eaiboojoj, emeram.
Liin eaar erom juon rūkaki in jikuuļ, im rainin, jon̄oul iiō tok ālik, iakwe eo an eaar kareel mour ko an buki ajri ro, jipan̄ er n̄an jeļā bwe ewōr tokjāer, bwe rej aorōk. Liin eaar erom juon ribōbrae ejjab m̧ōk an m̧ōjņo̧, kakkrue, im ebbwer. Ej kalōk, kōkajoorļo̧k, im im̧we jabdewōt ipeļaakin.
Jane eaar katak bwe kemour ej itok n̄e jej ettoļo̧k jān marok im etetal m̧aanļo̧k n̄an kōjatdikdik eo an meram eo emeramļo̧k. Eaar n̄e eaar kōjerbal ilo mour in tōmak eo an, kōjatdikdik, im iakwe eo erreo me liin eaar jab wōt ukōt mour eo an ak eaar kōjeram̧m̧an indeeo mour ko an elōn̄, elōn̄ ro jet.
Meram ej Eddep n̄an Meram
Jet iiami remaron̄ en̄jake bwe ļapļo̧k in maron̄ ejelet kom̧. Kom̧ maron̄ en̄jake eddo eo kōn inepata, mijak, ak pere. N̄an kom̧ im n̄an aolepādwōj, ij āliji juon m̧ool em̧m̧an im keien: meram eo an Anij ej lukkuun m̧ool in. Ej pād n̄an aolep! Ej leļo̧k mour n̄an aolep men.1 Epād kajoor eo n̄an kōmeoeoik metak eo an kinej eo em̧wilaļ tata. Emaron̄ kemour ajimakeke eo im nan̄inmej eo an jetōb ko ad. Emaron̄ letok n̄an kōj em̧ool juon jon̄an eo edik an kōjatdikdik eromaak em̧ool ilo iien ebbwer ko, emaron̄ katōk ine ko an juon kōjatdikdik eromaakļo̧k. Emaron̄ letok meram eo em̧ool ilo iien būrom̧ōj ko reļļap. Emaron̄ kōmeram iaļ eo im̧aad im tōl kōj ilo bon̄ōn eo emarok tata n̄an kallim̧ur eo an juon joraantak.
En̄in ej Jetōb eo an Jisōs Kraist, eo ej letok meram n̄an aolep armej me rej itok n̄an laļ in. 2
Mekarta, meram in jetōb ejeja an itok n̄an ro me rej jjijet jidik ilo marok kōttar n̄an an juon itok im kabbōl tōm̧a eo. Ebōk juon em̧m̧akūt an tōmak n̄an kōpeļļo̧k mejād n̄an Meram eo an Kraist. Meram in jetōb ejjab kajidedeik jān māj in kanniōk. Jisōs Kraist E make eaar katakin bwe meram eo an ej romaakļo̧k ilo marok, im marok eo ejjamin kune.3 Kōnke “A armej kōn biktokin e jab bōk men ko an Jetōb an Anij, bwe re men in bwebwe ippān; im e jab maron̄ in jeļā, bwe re meletlet kōn jetōb.” 4
Kōn menin ekōjkan ad kōpeļļo̧k mejād n̄an kōjatdikdik in meram eo an Anij?
M̧oktata, jino kiiō ilo jekjek eo am̧.
Eaiboojoj ke n̄an jeļā bwe jejjab aikuj in erom weppān n̄an en̄jake kōjeram̧m̧an ko im menin letok ko an Jemedwōj Ilan̄? Jejjb aikuj in kōttar n̄an kijoon ļain in kōjem̧ļo̧k eo n̄an bōk kōjeram̧m̧an ko an Anij. Ilo m̧ool, lan̄ ko rej jino m̧ōttan im kōjeram̧m̧an ko an lan̄ rej jino karreoik kōj kōn bun̄tōn ko im̧aan tata jej būki m̧aanļo̧k n̄an meram eo.
Jikin eo eweppān n̄an jino ej lukkuun ijo kwoj pād ie kiiō. Ejjab aorōk ewi jab karbōb eo am̧ kwoj maron̄ ļōmņake ak ewi jon̄an ļe lik eo am̧ jān ro jet komaron̄ en̄jake. Lukkuun in iien eo kwoj jino pukōt Jemam̧ Ilan̄, ilo iien eo kōjatdikdik eo an meram eo An enaaj jino karuj, kōmeramļo̧k, im kōm̧m̧an bwe jetōb eo am̧ en ļapļo̧k an bwio.5 Marok eo emaron̄ jab aolep jako ilo juon wōt iien, bōtaab meram eo enaaj itok, āinwōt an bon̄ kōjem̧ļo̧k raan tak eo, meram enaaj itok.
Karuo, ukōt būruwōm̧ m̧aanļo̧k n̄an Irooj.
Kwaļo̧k en̄jake ko am̧ rem̧wilaļ tata ilo jar im kōmeļeļeik n̄an Jemedwōj Ilan̄ ta eo kwoj en̄jake. Kile likjab ko am̧. Ujlepļo̧k būruwōm̧ im kwaļo̧k am̧ kam̧oolol. Kōm̧m̧an bwe En jeļā kōn mālijon̄ ko kwoj jelm̧ai. Akweļap Ippān ilo etan Kraist kōn kōkajoor im rejtak. Kajjitōk bwe lojiln̄ūm̧ en maron̄ peļļo̧k, bwe kwon maron̄ ron̄ Ainikien. Kajjitōk bwe mejam̧ en maron̄ peļļo̧k, bwe kwon maron̄ lo meram eo An.
Jilu, etetal ilo meram eo.
Jemedwōj Ilan̄ ejeļā bwe kwonaaj kōm̧m̧ani bōd ko. Ejeļā bwe kwonaaj tūbbo̧k—bōlen elōn̄ kōttan. Menin ekabūrom̧ōj E, bōtaab Ej iakwe eok. Ejjab kōņaan kakkure jetōb eo am̧. Ilo wāween eo juon, Ej ikdelel bwe kwon ļōn̄jak im erom armej eo kwar ejaake n̄an erom.
Kōn un in, Eaar jilkintok Nejin n̄an laļ in n̄an kalikkar iaļ eo im kwaļo̧k n̄an kōj ekōjkan ilo ineem̧m̧an kijoon kabbōjrak ko kar likūt ilo iaļ eo ad. Eaar letok n̄an kōj ko̧jpeļ eo, eo ej katakin wāween eo an rikaļoor. Ej katakin kōj men ko jej aikuj jeļā, kōm̧m̧an, im n̄an etetal ilo meram eo An, ļoor bun̄tōn nee ko an Nejin Jitōnbōro, ad Rilo̧mo̧o̧r.
Meram Ej Anjo̧ Ioon Makrok
Aaet, jenaaj kōm̧m̧an bōd ko.
Aaet, jenaaj wōtlo̧k.
Bōtaab ilo ad pukōt n̄an kōļapļo̧k iakwe eo ad n̄an Anij im kajieon̄ in iakwe ro rūturid, meram eo an ko̧jpeļ eo enaaj jepooļ im ļōn̄aj kōj. Em̧ool marok eo enaaj makunļo̧k, kōnke ejjab maron̄ pād ilo im̧aan meram eo. Ilo ad kepaakļo̧k Anij, Enaaj kepaaktok kōj.6 Im raan jān raan, kōjatdikdik eo an meram eo an Anij enaaj eddōkļo̧k itulowaad, meramļo̧k im meramļo̧k m̧ae raan eo eweppān.7
N̄an aolep ro rej en̄jake rej etetal ilo marok, ij karuwaineneik kom̧ n̄an pedped ioon m̧ool in kar kōnono kake jān Rilo̧mo̧o̧r eo an aolep armej: “N̄a, meram in laļ; eo ej ļoor Eō e jamin etal ilo marok, a enaaj an meram in mour.”8
Juon Meram ilo Africa
Jet iiō ko remootļo̧k lio pāleō, Harriet, im n̄an eaar wōr juon amro en̄jake ekememļo̧kjeņ me kōm kar lo kallim̧ūr in kar kūrm̧ool. Kōm kar pād ilo West Africa, juon m̧ōttan laļ in eaiboojoj ijo Kabun̄ in ej eddōkļo̧k im Armej ro Rekwojarjar ilo Raan-ko Āliktata raar laudin̄din̄. Mekarta, West Africa ebarāinwōt lōn̄ apan̄ ko. Eļaptata, iaar būrom̧ōj kōn jeram̧ōl eo me iaar loe. Ilo bukōn ko eļap oran ro rejjab jerbal, im baam̧le ko emakijkij aer kakkōt n̄an kake n̄an aikuj ko aer raan otemjeļo̧k im n̄an ineem̧m̧an eo aer. Ear rub būruwō n̄an jeļā bwe elōn̄ iaan membōr ro an Kabun̄ in ad rej mour ilo jerata rōt in. Bōtaab iaar barāinwōt katak bwe membōr rein rem̧m̧an rej jipan̄ doon kōmeraikļo̧k eddo ko aer rōddo.
Āliktata kōm kar jikrōkļo̧k ilo juon iaan im̧ōn kweilo̧k ko ad epaake juon bukōn eļap. Bōtaab ijello̧kin lo juon armej eddo im elokjak kōn marok, kōm kar lo armej ro relem̧ōņōņō me raar rabōlļo̧k kōn meram! M̧ōņōņō eo raar en̄jake kōn ko̧jpeļ eo eaar jelet kōm im ļōn̄aj jetōb ko am. Iakwe eo raar kwaļo̧k n̄an kōm eaar ettā. Ettōn̄ dikdik ko aer raar jouj im kōm̧m̧an bwe kōmij ettōn̄.
Ij kememej aō bwilōn̄ ilo tōre eo eļan̄n̄e emaron̄ kar wōr armej em̧ōņōņōļo̧k ioon laļ in. Men̄e Rikwojarjar rein rejitōnbōro raar jepooļ kōn apan̄ ko im malijon̄ ko, raar obrak kōn meram!
Kweilo̧k eo eaar ijjino, im iaar jino ekōnono. Bōtaab ejjab to jarom eo eaar kun ilo m̧weo, im kōm kar pād ilo marok.
Ium̧win jidik iien eaar pen aō lo jabdewōt ilo jarlepju eo, bōtaab imaron̄ kar lo im en̄jake em̧m̧an im aiboojoj in ettōn̄ dikdik ko an Rikwojarjar ro ad. O, ij lukkuun kar iakwe pād ippān armej rein em̧m̧an!
Marok eo ilo im̧ōn jar eo eaar wōnm̧aanļo̧k wōt, im kōn menin iaar jijet turin lio pāleō im kōttar n̄an an jarom bar jepļaaktok. Ke kōm kar kōttar, juon men ekabwilōn̄lōn̄ eaar waļo̧k.
Jet ainikien raar jino al juon iaan al ko an Jepļaaktok eo. Innām ro jet raar kobaļo̧k. Innām elōn̄ļo̧k. Ejjab to, juon kumi in al em̧m̧an im jejjet an ainikien ko eaar kobrak im̧ōņ jar eo.
Membōr rein an Kabun̄ in raar jab aikuj bok in al ko; raar jeļā aolep naan in aolep al ko raar al. Im raar al juon al ālkin bar juon kōn kajoor im en̄jake me eaar un̄ur aō.
Āliktata, tōm̧a ko raar bar ro̧ol to im kobrak ruum̧ eo kōn meram. Harriet im n̄a kar kalimjōk doon, jepām eaar tutu kōn kōmejaļaaļ ko.
Ilo ioļapļap in marok lep eo eļap, Rikwojarjar rein raiboojoj, em̧m̧an kar obrak kobrak m̧weo im̧ōņ Kabun̄ in im jetōb ko am kōn meram.
Eaar juon iien em̧wilaļ im ļap n̄an kōm—juon eo Harriet im n̄a jamin naaj meļo̧kļo̧ke.
Itok n̄an Meram eo
Aaet, jān iien n̄an iien mour ko ad remaron̄ āinwōt un̄ur jān, ak em̧ool kitimi ilo, marok. Jet iien bon̄ōn eo me ej jepooļ kōj enaaj waļo̧k elej, kabbwer, im kamijak.
Būruwō ej būrom̧ōj kōn elōn̄ būrom̧ōj ko jet iaami rej jelm̧ae, kōn metak eo ļap an ajimakeke im mijak ko me kam̧ōk eok me komaron̄ en̄jake.
Mekarta, ij kwaļo̧k kam̧ool bwe kōjatdikdik eo ad emour ej ilo Kraist Jisōs! E eo ej deļo̧n̄ļo̧k eo n̄an kōkōm̧anm̧anļo̧k eo ekwojarjar, E ej m̧ool, erreo.
Ij kam̧ool bwe kōn Kraist, marok eo ejjab maron̄ anjo. Marok eo ejjamin naaj anjo ioon meram eo an Kraist.
Ij kwaļo̧k kam̧ool bwe marok eo ejjab maron̄ jutak im̧aan meram eo eperan an Nejin Anij emour!
Ij kūr kom̧ kajjojo n̄an kōpeļļo̧k būruwōmi n̄an E. Pukōt E kōn ekkatak im jar. Itok n̄an Kabun̄ eo An, em̧ool Kabun̄ eo an Jisōs Kraist im Armej ro Rekwojarjar ilo Raan-ko Āliktata. katak kōn E im kōn ko̧jpeļ eo An, niknik bōk kuņami, jipan̄ doon, im lan̄lōn̄ ilo jerbal n̄an ad Anij.
Ro jeiū im jatū, em̧ool ālkin bon̄ōn eo emarok tata, Rilo̧mo̧o̧r eo an laļ enaaj tōl kom̧ n̄an jidik kōn jidik, em̧m̧an, im mirieņ ļo̧kan al me enaaj kam̧ool ļōn̄aj ilowaami.
Ilo am etetal m̧aanļo̧k n̄an kōjatdikdik eo an meram eo Anij, kwonaaj lo tenkwadik, iakwe, im em̧m̧an eo an Jemen Ilan̄ eo ej iakwe, ilo “[eo] ejjeļo̧k marok ilo E.” 9 Kōn menin ij kam̧ool ilo āt eo ekwojarjar etan Jisōs Kraist, amen.