M̧are: Mije im Katak
Jen Elder L. Whitney Clayton
Jen Būreejtōnji eo an Jiljilimjuonn̄oul eo
Kallim̧ur ko an Irooj rej ilo̧k n̄an aolep ro me rej ļoor jon̄ak eo an mour me ej kalōk m̧ōņōņō, kadkad in m̧are ko rekwojarjar.
Juon joteen jet iiō ko remootļo̧k, lio pāleō im n̄a kar loļo̧k m̧weo im̧ōn juon iaan ļaddik ro nejim im lio pāleen im ajri ro nejier n̄an kōjota. Eaar juon iien ejej uwaan n̄an juon baam̧ļe ewōr ajri ro reddik: eaar kanooj ļap ekeroro im aaet eļap m̧ōņōņō. Ejjab to ālkin kōjota eo, leddik eo jibūm emen-iiō dettan, Anna, im n̄a kar jijet wōt ilo tebōļ eo. Kile bwe iaar kanooj in m̧ad ippān, eaar kajju jutak ioon jea eo im lukkuun in kalimjōk n̄a. Ke eaar jeļā bwe iaar reilo̧k n̄an e, eaar jiron̄ eō n̄an “mije im katak.” Innām eaar eb im al juon al n̄an n̄a.
Aolep iien ij kememej kōmeļeļe eo an Anna n̄an “mije im katak” menin māletlet kar jān lo̧n̄iin juon ajri. Jej maron̄ katak eļap jān mije innām ļōmņak kōn ta eo jaar loe im en̄jake. Likūt wōt ilo ļōm̧ņak, in kwaļo̧k ippāmi jet pedped ko iaar katak jān mije im katak jān m̧are ko rem̧m̧an, retiljek. Pedped kein rej kalōk m̧are ko rekajoor, ju bōro kaki me rej jokkun wōt juon ippān pedped ko an lan̄. Ij karuwaineneik kom̧ n̄an mije im katak ippa.
M̧oktata, iaar katak bwe ilo m̧are ko rem̧ōņōņō tata jim̧o̧r ļeo im lio pālele rej ļōmņak kōn kadkad eo aer āinwōt juon bōōr eo eļap wōņāān, juon menin aorōk eļap wōņāān. Rej jim̧or ilo̧k jān jemeer im jineer im ilo̧k n̄an kalōk juon m̧are eo me enaaj jeram̧m̧an n̄an indeeo. Rej meļeļe bwe rej etetal ilo juon iaļ ekwojarjar kar kapiti. Rejeļā bwe ejjeļo̧k bar kadkad an jabdewōt emaron̄ bōktok eļap lan̄lōn̄; ej keotak eļap em̧m̧an, ak kwaļo̧k eļap eddōkļo̧k an juon make. Mije im katak: rim̧are ro rem̧m̧an tata ikkijen m̧are ko aer āinwōt ejjeļo̧k wōņāān.
Eo tok juon, tōmak. M̧are ko rem̧m̧an rej ekkal ioon pedped an tōmak ilo Irooj Jisōs Kraist im pokake katak ko An.1 Iaar katak bwe ripālele ro me raar kōm̧m̧ane m̧are ko aer bwe ren iminene eo ejjeļo̧k wōņaer jon̄ok ko rekwojarjar an tōmak: rej etal n̄an kwojkwoj im kweilo̧k ko jet aolep wiik, kōm̧m̧an nokon in jota an baam̧le, jar im ekkatak jeje ko rekwojarjar ippān doon im āinwōt kajjojo armej, im kōļļā juon m̧ōttan jon̄oul em̧ool. Jibadbad eo aer jim̧or ej n̄an erom pokake im em̧m̧an. Rejjab ļōmņak kōn kein ko āinwōt juon jikin m̧ōn̄ā me rej maron̄ bōk im kālet wōt men eo enno tata.
Tōmak ej pedped eo an aolep wānōk me ej kōkajoorļo̧k m̧are. Kōkajoorļo̧k tōmak ej kōkajoorļo̧k m̧are im kōn menin kōm̧m̧an āinwōt jokkuun wōt eo juon im lan̄lōn̄ eo ilo m̧are eo aer. Kōn menin, kōjparok kien ko ej pedped eo n̄an ejaake m̧are ko rekajoor. Mije im katak: tōmak ilo Irooj Jisōs Kraist ej pedped eo an m̧are ko indeeo rem̧ōņōņō.
Kein kajilu, ukweļo̧k. Iaar katak bwe m̧are ko rem̧ōņōņō rej pedped ioon menin letok eo an ukweļo̧k. ej juon men eaorōk ilo aolep kadkad in m̧are ko rem̧m̧an. Ļeo im lio pālele me iien otemjeļo̧k rej kōm̧m̧an etale eo an make em̧ool im m̧ōkaj an bōk bun̄ten ko remenin aikuj n̄an ukweļo̧k im kōkōm̧anm̧anļo̧k en̄jake in m̧are ko rājemourur. Ukweļo̧k ej jipan̄ kōjepļaaktok im dāpij jokkun wōt juon im aenōm̧m̧an.
Ettā bōro ej m̧ōttan eo eaorōk tata an ukweļo̧k. Juon eo ettā būruwōn ej karmejete, ejjab ļōmņak kōn e make. Ejjab kōņaan wāween ko an make ak kōnono āinwōt eļan̄n̄e rem̧m̧anļo̧k jān jet. Ijello̧kin, ettā bōro ej uwaak ilo mera2 im ron̄jake ilo jouj n̄an meļeļe, jab kōn kam̧ool. Ettā bōro ej kile bwe ejjeļo̧k juon emaron̄ ukōt jabdewōt, bōtaab kōn tōmak, kijejeto, im jipan̄ an Anij, jej maron̄ en̄jakeoktak in bōro eo ekajoor ad make.3 En̄jake oktak in bōro eo ekajoor ej kōm̧m̧an bwe jān kōm̧m̧an n̄an ro jet, eļaptata ro pāleed, kōn ettā.4 Ettā ej meļeļe in bwe jim̧or ļōm̧aro im lim̧aro pālele rej pukōt n̄an kōjeram̧m̧an, jipan̄, im ļōn̄aj doon, likūt ro jet m̧okta im̧aan ilo aolep jekjek. Mije im katak: ukweļo̧k im ettā bōro ej kalōk m̧are ko rem̧ōņōņō.
Men eo kein kemen Iaar jeļā ej kōn, kautiej. Iaar katak bwe ilo m̧are ko rem̧m̧an, kam̧ōņōņō, ļōm̧aro im lim̧aro pālele rej kōm̧m̧an em̧m̧an n̄an doon āinwōt m̧ōttā ro reier wōt juon . Iminene ko jān jabdewōt jikin ak jabdewōt iien me ļōm̧aro pālele raar kajoor jān lim̧aro pālele ak kōm̧m̧an n̄an er ilo jabdewōt wāween āinwōt ro m̧ōttaer rettā ilo m̧are rejjab kōjparok kien eo ekwojarjar im aikuj in bōk jikin kōn pedped ko im jon̄ak ko rejim̧we an m̧wil.
Ļōm̧aro im lim̧aro pālele ilo m̧are ko rem̧m̧an rej kōm̧m̧ani jokālet ko ilo kajoor, ippān kajjojo iaer āinwōt aer bōk kuņaer aolep im ewōr aer jim̧we n̄an ekōnono kōn ļōmņak ko aer.5 Rej kalimjōk wōt m̧oktata kapijuknen eo im jipan̄ doon kōn eddo ko aer.6 M̧are eo aer rej pedped ioon ippān doon, jab pepe. Awa in kōjota eo aer im iien an baam̧le me ej itok ālkin rej erom men eo aorōk tata ilo raan eo aer ej men eo ej kōjeram̧m̧an elōn̄ ilo kijejeto ko aer. Rej kune electronic ko aer im joļo̧k kaitoktok limo eo aer make n̄an maron̄ jipan̄ kōn jerbal ko an m̧weo. N̄an jon̄an eo emaron̄, rej riit ippān ajri ro nejier aolep bon̄ im bōk kuņaer jim̧or ilo jipan̄ kakiki ro reddik. Rej kakkije ippān doon. Ilo an jerbal ko aer im jekjek ko aer kōtļo̧k, ļōm̧aro im lim̧aro pālele rej jerbal ikōtaan doon ilo kōm̧m̧ane jerbal eo eaorōk tata ej—jerbal eo jej kōm̧m̧ane ilo kapijuknen ko ad make.
Ijo ewōr kautiej, ewōr barāinwōt men ko rej waļo̧k n̄an ro riturumi, eo ej juon kii an m̧are ko rem̧ōņōņō. Ejjeļo̧k ittiņo̧ ko kōn men ko reiookļo̧k men ko ilo m̧are ko rej pedped ioon kautiej an doon im aolep men rej waļo̧k. Ļōm̧aro im lim̧aro pālele rej kōm̧m̧ani aolep jokālet ko kōn jāān ko ippān doon, im erro jim̧o̧r rej bōk aolep meļeļe.
Tiljek ej juon jekjek in kautiej. Rikanaan ro rej katakin bwe rim̧are ripālele ro rem̧m̧an rej “kije ilo tiljek” n̄an doon.7 Rej kanooj lale n̄an erreo wōt ilo jabdewōt wāween ilo aer alooji pija ko. Rej kōtļo̧k bwe en ejjeļo̧k ņojak an Internet ko. Rej kwaļo̧k ippān doon password ko aer ilo internet ko. Rejjab lale online profile ko an jabdewōt ilo jabdewōt wāween me emaron̄ kakkure ļōke eo ekwojarjar an ro pāleer. Rejjab kōm̧m̧an ak ba jabdewōt men rej kaiookļo̧k paotok eo an men ko renana, jim̧o̧r ilo wānōk ak ānbwiin. Mije im katak: m̧are ko rem̧m̧an rej kautiej ilo dipieo, alikkar, im tiljek.
Men eo kein kaļalem ej iakwe. M̧are ko rem̧ōņōņō iaar loi raar kwaļo̧k pokake n̄an juon iaan kien ko rekam̧ōņōņō tata—bwe jej mour ippān doon ilo iakwe.8 Ekōnono n̄an ļōm̧aro pālele, Irooj eaar kakien bwe juon em̧m̧aan ej aikuj iakwe lio pāleen kōn aolepān būruwōn im aikuj eddepļo̧k n̄an e im ejjeļo̧k bar juon.9 Bok in Bōk Meļeļe eo ej katakin: “Naan eo eddāp ej meļeļe in n̄an wujlepļo̧k aolepen im tiljek n̄an juon. Ripālele ro raar m̧are rej ekkeijel n̄an Anij im n̄an doon ilo jerbal im iakwe doon im ilo kejparok bujen ko ilo tiljek epolel n̄an doom im n̄an Anij. Jim̧or ļeo im lio pālele “rej joļo̧k mour in make iaan eo aer im ejaake m̧are eo aer kōttōpar eo jino in tata ilo mour ko aer. … Rejjab kōtļo̧k bwe armej ro jet ak itoklimo n̄an kōttōpar eo eļaptata ilo mour ko aer … jān kejparok bujen ko raar kōm̧m̧ani ippān Anij ippān doon.” 10 Mije im katak: ripālele ro rem̧m̧an rej iakwe doon kōn wujlepļo̧k edipieo.
Ewōr jet armej ro me m̧are ko aer rejjab m̧ōņōņō in wōt aer kōņaan, ro me rejjan̄in kar m̧are, ak jepel, ak ro jinen ak jemen remake wōt, ak n̄an elōn̄ un ko rejjab ilo juon jekjek n̄an m̧are. Jekjek kein remaron̄ obrak kōn apan̄ im bōro erup, bōtaab rej aikuj jab erom indeeo. N̄an kom̧ ro ilo kain jekjek rōt in me mekarta rej m̧ōņōņō n̄an kōm̧m̧an aolep men ko me rej pād ilo kajoor eo ami11 n̄an kōjparok, lan̄ ej kōjeram̧m̧an kom̧. Pukōt jekjek ko rem̧m̧an an m̧are indeeo, ekoba kajieon̄ ak m̧aanjappopo n̄an erom ripālele erreo. Kōjparok kien ko, im lōke Irooj im iakwe eo An n̄an kom̧ eweppān. Juon raan aolep kōjeram̧m̧an ko kar kallim̧ur kaki ikkijien m̧are naaj ami.12
Juon iaan eoon ko rem̧m̧an tata ilo Bok in Mormon ej kwaļo̧k ilo ejej uwaan, “Im raar m̧are, im leļo̧k ilo m̧are, im kar jeram̧m̧an ekkar n̄an jarlepju ilo kallim̧ur ko Irooj eaar kōm̧m̧an n̄an er.” 13 Kallim̧ur ko an Irooj rej ilo̧k n̄an aolep ro me rej ļoor jon̄ak eo an mour me ej kalōk m̧ōņōņō, kadkad in m̧are ko rekwojarjar. Kōjeram̧m̧an rōt kein rej itok āinwōt aorōk ko rōlaudin̄din̄, bōklōkōt ko an mour tiljek kōn ko̧jpeļ eo an Jisōs Kraist.
Ij kam̧oolol kōn kōrā eo ippa eaiboojoj, Kathy, eo ej iakwe eo an mour eo aō.
M̧are ej juon menin letok jān Anij n̄an kōj; em̧m̧an eo an m̧are ko ad ej juon menin letok jān kōj n̄an E. Ij kwaļo̧k naan in kam̧ool kōn kabwilōn̄lōn̄ eo an karōk eo an Jemedwōj Ilan̄ eo ej iakwe, eo ej letok iien eo em̧m̧an n̄an indeeo, m̧are eo em̧m̧an. ilo etan Jisōs Kraist, amen.