Bōk Ko̧jpeļ eo n̄an Aolepān Ļal
Jen Elder John B. Dickson
Jen Jiljilimjuon̄oul eo
Kabun̄ in ar m̧ōkaj an emmakūt peļaakin laļ in jen laļ n̄an laļ, m̧anit n̄an m̧anit, armej n̄an armej im ilo kōlenta eo an Irooj im ilo An iien.
Kwaļo̧k eo an Rilo̧mo̧o̧r eo ilo laļ in eaar dedeļo̧k. An en̄taan ilo Gethsemane im ioon debwāāl ekar jem̧ļo̧k. Jej katak jen Jerbal jepta juon bwe: E ar kwaļo̧k ium̧win 40 raan ko ālkin An Jerkakpeje, “kwaļok E n̄an er” Rijilōk ro im “im kōnono … men ko an aelōn̄ in Anij.” (Jerbal 1:3).
Eaar jiron̄ er bwe “naaj bōk maron̄ n̄e em̧ōj an Jetōb Kwōjarjar itok iomi: im kom̧ naaj Aō ri kōnnaan ilo Jerusalem, im i aolepen Judia, im i Sameria, im n̄an āne eo ettoļo̧k tata ilaļ”. (Jerbal 1:8).
Jidik iien tokālik, “ar bōklōn̄ļo̧k E; im juon kōdo̧ ej bōk E jān mejeir.
“Im ke rej kanooj ejjed im kallimjeki i lan̄ ke Ej waan lōn̄ļo̧k, ruo armej rej jutak itureir, e mouj nuknuk ko aer;
“Im re ba; “Kom̧, armej in Galili, etke kom̧ij jutak im reiļo̧k wōt n̄an lan̄? Jisōs in, Eo em̧ōj bōklōn̄ļo̧k jān kom̧ n̄an lān̄, Enaaj itok āinwōt, ilo wāween de in ami lo An ilo̧k n̄an lan̄” (Jerbal 1:9–11).
Ilo m̧ool, Rilo̧mo̧or enaaj bar itok juon alen ilo Itok eo An Kein Karuo, ak ilo iien in, ko̧jpeļ eo an Jisōs Kraist eaikuj etal n̄an “aolep m̧ōttan ko an laļ.”
Jān Matu jej katak kōn juon kean̄ n̄an Rijilōk ro n̄an bōk ko̧jpeļ eo n̄an aolepān laļ:
“Im Jisōs ej itōk kōnono n̄an er im ba, “Em̧ōj letok n̄an Eō kajoor otemjej ilan̄ im ilaļ.
“Innām kom̧win ilo̧k, im kōm̧m̧an ri aelōn̄ ko otemjej bwe ren ri kalora, im peptaij er ilo etan Jema im Nejin im Jetōb Kwōjarjar” (Matu 28:18–19).
Ilo raan ko m̧okta ilo Kabun̄ in, lo juon iien eaitok, kar bōkļo̧k ko̧jpeļ eo n̄an im̧ōn Israel wōt; innām revelesōn ekar itok n̄an Piter, Rijilōk eo erūtto, bwe etōreen bōk ko̧jpeļ eo itulikin Israel im n̄an riAelōn̄ ko. Jepta jon̄oul im jon̄oul juon ilo Jerbal ej jipan̄ kōj meļeļe kōn an jerbal im jon̄ok eo ijo ej menin aikuj n̄an kōļapļo̧k Kabun̄ eo n̄an ajri ro nejin Anij rellōn̄ eo kar kwaļo̧ke n̄an opiija ro rej tōl im aolep membōr ro.
Kōjerbal Cornelius, eo kar juon riAelōn̄ juon jepan an laļ, juon em̧m̧aan em̧m̧an, Irooj ekar jipan̄ Piter meļeļe bwe ko̧jpeļ eo ej aikuj etal n̄an riAelōn̄ ro, juon ļōmņak eļap im ekāāl n̄an ro Rekwojarjar ilo raan eo. Revelesōn eo ar kōm̧m̧an oktak ilo jerbal ko an Kabun̄ eo kar itok n̄an Piter, Rijilōk eo erūtto. Jejeļā bwe ko̧jpeļ eo ekar jab jem̧ļo̧k an iļo̧k n̄an laļ ko an riAelōn̄ ko.
Juon waanjon̄ak in an depakpakļo̧k Kabun̄ eo ej ilo iien eo Paul ekar oktaktok, eo ekar erom Rijilōk eo eļap n̄an riAelōn̄ ro. Ekar wōr juon an ettōņak ilo iaļ eo an ļo̧k n̄an Damascus, ijo ekar lo juon meram im ron̄ juon ainikien, ar ukweļo̧k jen jerawiwi ko an, im kar kūr jen Anij (lale Jerbal 22:6–18) innām kar erom kareel ekajoor ilo kajeededļo̧k ko̧jpeļ eo an Jisōs Kraist.
Kiiō kōtļo̧k bwe jen emmakūt 1,800 iiō maanwaj n̄an Jepļaaktok eo an Ko̧jpeļ eo, ak iien karōk men otemjej an Anij n̄an Itok eo Kein Karuo. Ij kam̧ool bwe kōn Rikanaan Joseph Smith Kabun̄ eo em̧ōj an bar jepļaaktok im wōnm̧aanļo̧k wōt ium̧win tōl eo an Būreejtōnji eo Kein Kajuon im Doulul eo an Jon̄oulruo Rijilōk ro. Aer kean̄ n̄an bōk ko̧jpeļ eo n̄an laļ in ejja āinwōt n̄an kar Rijilōk ro etto.
Jān iien ejaak eo an Kabun̄ eo an Jisōs Kraist im Armej ro Rekwojarjar ilo Raan ko Āliktata ilo 1830, Kabun̄ eo ar m̧ōkaj an ajedeed imejen laļ jān bukwōn n̄an bukwōn, m̧anit n̄an m̧anit, armej n̄an armej ekkar n̄an iien an Irooj.
Innām ilo 1978, jen jon̄ok eo ar ejaak an revelesōn kōn Rijilōk eo erūtto, kiiō Būreejtōn Spencer W. Kimball, ar itok revelesōn kōn priesthood eo eaar kōtļo̧k aolep em̧m̧aan ro rewānōk imejen laļ in n̄an bōk priesthood im aolepān kōjeram̧m̧an ko an ko̧jpeļ eo eaar jepļaaktok. Kiiō, ejjab lōn̄ wōt ak aolep ajri ro Nejin Jemedwōj Ilan̄ peļaakin laļ in remaron̄ bōk aolepān kōjeram̧m̧an ko an ko̧jpeļ eo. Menin ej wāween eo ejejjet an aelōn̄ in Anij ioon laļ ilo raan ko me rej kepaaktok Itok eo an Kraist Kein Karuo.
Inaaj kiiō kwaļok ekōjkan an menin itok n̄an eō make, em̧ōj kar kūr eō āinwōt juon mijen būreejtōn im Sister Dickson im N̄a kar pojak n̄an bōk baam̧le eo am n̄an Mexico ke Richard G. Scott, ilo tōrein ekar juon membōr in Jiljilimjuonn̄oul eo, kar jiron̄ eō kōn itok eo an revelesōn in eaorōk. Ij keememej an kar dānin kōmjalaal eaar to̧o̧rļo̧k jen meja ke ej kwaļo̧k ta eo ekar waļok. Ikar m̧ōņōņō eļap jen ba āinwōt Aō jeļā bwe ejim̧we im etōreen n̄an an aolep armej deļo̧n̄ e kain̄i ko, im bujen ko im kōjerm̧man ko an ko̧jpel.
Emootļo̧k de 34 iiō, im ilo iien eo ikar jab kile bwe imaron kar joļo̧k jet iiō in aō katakin ilo Jiljilimjuonn̄oul ilo Eria eo Iturilik in Africa an Kabun̄ in, ilubwilijin armej ro rej tōmak, m̧ool ro mour ko aer rekar maron̄ jelōt kōn 1978 revelesōn eo an priesthood. Sister Dickson im N̄a kar jokwe ijeņ ium̧win emen iiō, im en̄jake ekar lukkuun aiboojoj im kar ukōt mour ko am.
N̄e kōlmenļo̧kjeņ āinwōt juon kumi in armej, riAfrica ro ilo West (rilik) rej tōmak ilo Anij, lukkuun ejjeļo̧k jook ilo kwaļo̧k im kajeeded e tōmak eo aer ippān ro jet, im wōr kilen tōl eļap im kajoor. Rej jino im elukkuun m̧ōkaj aer oktaktok n̄an Kabun̄ in im aolep wiik jet ward im branch ko rej ejaak ijoko jet ilo Africa West Area kōn, enan̄in aolepen ritōl ro an priesthood riAfrica im ritōl ro an radik ko.
Ikōņaan bwe kom̧in kobaļo̧k ippān ro Rekwojarjar ilo tampeļ eo ilo Aba, Nigeria, ak Accra, Ghana, ijo kom̧ maron̄ en̄jake wujlepļo̧k eo an ro Rekwojarjar im itok n̄an jeļā kajien tampeļ ko an aolep riAfrica būreejtōnji ko ak kwaļo̧k kajjeim̧i n̄an African Area Seventy, ro raar kobatok ippām ilo Conference Center rainin im rej lawyer ro, professor ro, im business manager ro, ak em̧ōj ke ami jino imminene kōn stake an riAfrica im ritōl ro an ward im baam̧le ko aer.
N̄an kobaļo̧k ilo juon Jabōt Jikuuļ, radik, ak kūlaaj an priesthood ej juon en̄jake ekwojarjar ijo laajrak in katak an Kabun̄ in ej pād ie im ewōr meļeļe eļap kōn ko̧jpeļ, katakin im ekkatak kōn Jetōb eo.
Ko̧jpeļ eo ilo Africa ej iļo̧k n̄an armej ro relem̧ōņōņō, im rejjab āinwōt nūrbōktak kōn piktokier itulik me ejelōt elōn̄ mour ilo Western Hemisphere. Rejjab inepata kōn an jabwe kein jerbal ko ippāer.
Em̧ōj ba kōn riAfrica bwe “ejabwe ippāer kōn ta eo ejej tokjen im eļap kōn ta eo eļaptata tokjen.” Ewōr wōt jidik aer itoklimo ilo em̧ ko reļļap im wa ko rem̧m̧antata bōtaab eļap itoklimo ilo jeļā bwe Jemedwōj Ilan̄ im Nejin Jisōs Kraist, im en wōr baam̧le ko indeeo. Āinwōt juon tōprak in aer tōmak, Irooj ej ļōn̄aj er ilo wāween ko ewōr tokjāer.
Jeļā kōn er āinwōt kōm, ejjab juon menin bwilōn̄ me remaron̄ erom juon m̧ōttan eaorōk an kōļapļo̧k Kabun̄ eo an Jisōs Kraist ilo raan ko āliktata. Ke Daniel, rikanaan eo ilo Kallim̧ur M̧okta, ekar ettōņak kōn aelōn̄ in kiin̄ an Anij ilo raan ko āliktata kōdabwil ļo̧k n̄an jem̧ļo̧k ko an laļ, āinwōt juon dekā jeke jān juon toļ kōn ejjeļo̧k pā naaj kōdabwil m̧aanļo̧k m̧ae iien em̧ōj an kobrak laļ. (lale D&C 65:2), elukkuun jejjet bwe riAfrica ro jeim̧ im jatūm̧ remaron̄ erom juon m̧ōttan eo eaorōk an kakūrmool kanaan eo im bwe revelesōn ko ren kōm̧m̧an ainwōt im naaj ļoor jon̄ok ko Irooj ar ejaaki.
Ij kam̧ool bwe Jemedwōj Ilan̄ ej iakwe aolep ajri ro Nejin, bwe Jisōs ej Kraist eo, im bwe ko̧jpeļ eo epeļļo̧k n̄an aolep, jim̧or ro mour im remej, ilo ekwojarjar etan Jisōs Kraist, amen.