Juon Pedped Em̧ool
Jen Bisop Dean M. Davies
Rikakpilōklōk eo Kein Karuo ilo Bisoprik eo ej Tōl
Kōtlo̧k bwe jen bōk kūr eo an Rilo̧mo̧o̧r n̄an itok n̄an Ippān. Kōtlo̧k bwe jen kalek mour ko ad ioon juon pedped epen im m̧ool.
Ilo kar Oktoba 17, 1989, iien eo ij jepļaak n̄an m̧weo ālkin jerbal, Ikar epaakeļo̧k juon lait in kabbōjrak ilo intōrjāākjen eo an Market im Beale Street ilo San Francisco, California. Ilo tōre eo Ikar en̄jake an wa eo udidiid im kar ļōmņak, “Bōlen erub neen wa eo.” Ilo an wa eo wōnm̧aanļo̧k im udidiid, Ikar kūle ļo̧k juon bus kar epaaktok n̄an eō im kar ļōmņak, “Bus en em̧ōj an dipōj eō!” Innām wa eo ekar ļapļo̧k im bar ļapļo̧k an udidiid, im ikar ļōmņak, “Bōlen erub nee ko emen an wa eo!” Ak ekar jab nee ko ak bus eo—ekar juon m̧akūtkūt in laļ ekajoor! Ke Ij bōjrak ilo lait eo ebūrōrō, Iaar lo ruo āinwōt ņoo ilowaan iaļ eo rej wanlaļtak ilo Market Street eo. Im̧aaō juon em̧ kileplep kar jotojotak, im pirōk ko raar jino wōtlo̧k jen juon em̧ em̧or n̄an tuanmiin̄ū tōre eo laļ ar wōnm̧aanļo̧k im m̧akūtkūt.
M̧akūtkūt laļ an Loma Prieta ekar kakkure San Francisco Bay Area ilo 5:04 jota raan jab eo im kōm̧m̧an bwe en lōn̄ļo̧k jen 12,000 taujin armej ren ejjeļo̧k m̧weier.
M̧akūtkūt in laļ in ar kōm̧m̧an eļap jorrāān ilo San Francisco Bay Area, eļaptata ilo bwidej eo ilo San Francisco im Oakland. Ilo San Francisco, Marina District ekar “ekkal ilo juon jikin kobej eo kar kāreik jen bok, ettoon, rubōl, … im kein jerbal ko jet me eļap jon̄an dān eo ium̧win. Jet iaan kobej ko kar rubōl ko kar jo̧kbeji ilo San Francisco Bay ālkin m̧akūtkūt in laļ eo ilo 1906 ilo San Francisco.”1
Turinļo̧k kar 1915 im̧ōn jokwe ko rekar wanlōn̄tak ioon jikin jo̧kbej eo. Ilo m̧akūtkūt an laļ ilo 1989, dān ar kāre kōn bedkat, bok, im rabōl, ko me rejjan̄in iiōki kōm̧m̧ane bwe m̧oko ren wōtlo̧k. M̧oko relem waan, rekar jab ekkal ioon juon pedped epen.
M̧akūtkūt in laļ in ilo San Francisco ekar kakkure elōn̄ mour, ekoba eo aō make. Kejokļo̧kjeņ kōn men ko rekar waļok raan eo ej kapenļo̧k ilo kōlmenļo̧kjeņ eo aō im būruwō bwe n̄an juta ņae kapo ko, m̧akūtkūt ko an laļ im ļōkapokpok ko an mour, jej aikuj ekkal ioon juon pedped em̧ool.
Rikanaan eo an RiNipai ro Hilamōn ekar leļo̧k alikkar eo jab pok kake kōn aorōk in kalek mour ko ad ioon juon pedped em̧ool, aaet ioon pedped an Jisōs Kraist: “Im kiiō ro Nejū m̧aan, kememej, kememej bwe ej ioon ejm̧aan in ad Ri Pinmuur, eo ej Kraist, eo Nejin Anij, bwe kom̧ij aikuj kalek pedped ko am̧i; bwe n̄e devil enaaj jilkintok kōto ko an rekajoor, aaet, mōdi ko an ilo aire, aaet, n̄e aolep wōt dekā im lan̄ rekkajoor an renaaj bun̄it eok, enaaj ejjeļo̧k an kajoor ioom̧ n̄an kin̄ōōr laļļo̧k eok n̄an ron̄ in būrom̧ōj im wo ejjeļo̧k jem̧ļo̧kin, kōnke ejm̧aan eo kom̧ ar ekkal ioon, eo ej pedped em̧ool, pedped eo eļān̄n̄e armej rej ekkal ioon rej jamin bun̄.”(lale Hilamōn 5:12).
Ilo jerbal in ekkal ko an tampeļ ko raan kein, tiljek ilo leļo̧k pedped n̄an ritijaiin eo, injineriin̄ eo, im kilen kōjerbal kein jerbal ko an em̧. Kōn etale bwidej ko im rimālōtlōt ej pād ijo juon tampeļ enaaj ekkal ie. Ekkatak kōn kōto, wōt, im ukoktak in mejatoto n̄an eria ko raorōk bwe tampeļ eo enaaj dedeļo̧k emaron̄ jutak ņae jab kōto wōt im mejatoto eo ejja an waļok ilo eria eo, ak tampeļ eo en ekkal im pād n̄an jutak ņae m̧ākūtkūt ko an laļ jab kōtmene kaki, taipoon, ibwijleplep, im bar jet jorrāān ko me remaron̄ waļok. Ilo elōn̄ tampeļ ko, ejoouj in jimāān ak māāl rej pād ijo em̧wilaļtata ilaļ n̄an katōt pedped eo an tampeļ eo.
Āinwōt ritijaiin ro im rikkal ro ilo iien eo ad, Jemedwōj Ilan̄ eo ejouj im iakwe im Nejin raar kōpooj karōk ko, kein jerbal ko im bar ko jet n̄an ad kōjerbal bwe jen maron̄ kalek im jipan̄ mour ko ad n̄an m̧ool im jab m̧akūtkūt. Karōk eo ej karōk in lo̧mo̧o̧r, karōk in m̧ōņōņō eļap. Karōk eo kar letok n̄an kōj juon pija ealikkar im meļeļe kōn jinoin n̄an jem̧ļo̧kin, im bun̄tōn nee ko raorōk, ekoba kain̄i ko, ko rekkar n̄an ro Nejin n̄an aer maron̄ jepļaak n̄an Ippān im pād Ippān n̄an indeeo.
Tōmak, Ukweļo̧k, peptaij im bōk menin letok an Jetōb Kwojarjar, im niknik n̄an jem̧ļokin rej m̧ōttan “pedped ko raorōk” an mour. Rej jipan̄ n̄an ļame pedped ko raorōk me renaaj katōt mour ko ad n̄an Pinmuur eo an Kraist. Jekjek im ļam kein rejipan̄ kalek mour an juon armej. Innām, baj āinwōt tampeļ ar karōk kōmeļeļe ko me rej letok meļeļe kōn ekōjkan ļamļame im kakobaik m̧ōttan ko raorōk, jar, riiti jeje ko rekwojarjar im bōk m̧ōttan kwojkwoj eo, im bōk kain̄i ko raorōk an priesthood im erom “kōmeļeļe ko” me ejipan̄ kakobaik im pooj e kadkad in mour.
Jokkin wōt juon ilo bōk kōmeļeļe ko eaorōk. N̄an waanjon̄ak, ilo kōm̧m̧an pirōk, jidik m̧ōttan bok, dekā, jimāan, im dān rej jerbal n̄an bōk jon̄an kajoor. Juon jon̄ak eo ejjab jim̧we an jabdewōt iaan men kein emaron̄ kōm̧m̧an bwe pirōk eo en m̧ōjņo̧ im jab maron̄ kōm̧m̧ane jerbal eo an eaorōk.
Ilo kain jekjek in, eļan̄n̄e jepan kōm̧m̧ane jon̄an eo ekkar ilo mour ko ad kōn aolep iien jar eo ad im kwojkwoj ioon naan eo, aolep wiik kōkajoorļo̧k jen bōk m̧ōttan kwojkwoj eo, im makijkij pād ilo kain̄i ko an priesthood āinwōt kain̄i ko an tampeļ, jej barāinwōt pād ilo kauwōtata ilo ad m̧ōjņo̧ ilo kōkajoorļo̧k jetōb eo ad.
Paul, ilo juon leta n̄an Epesōs, ar ba ilo wāween in kōn kauteij n̄an aikuj eo n̄an jon̄e im kakobaik eddōkļo̧k in kadkadidiid im jetōb eo ad: “Ilo E men in kalōk otemjej em̧m̧an aer karōk n̄an doon, rej eddek n̄an juon tempel e kwōjarjar ilo Irooj” (Epesōs 2:21).
Jar ej juon iaan katak ko reļam waan im pedped eo eaorōk an tōmak eo ad im m̧wilid. Kōn jar jej maron̄ kwaļo̧k ad kam̧m̧oolol, iakwe, im ujlepļo̧k n̄an Anij. Kōn jar jemaron̄ leļo̧k ankilaad n̄an E ilo kōro̧o̧ltok n̄an bōk kajoor n̄an kapen mour ko ad ekkar n̄an katak ko An. Jar ej juon iaļ edepakpak jemaron̄ ļoore n̄an pukōt kareel eo An ilo mour ko ad, barāinwōt revelesōn.
Alma ar katakin, “Pepe ippān Irooj ilo aolep kōm̧m̧an ko am̧, im enaaj tōl eok n̄an aenōm̧m̧an, aaet, n̄e kwōj babu ilo bon̄ kwōn babu n̄an Irooj, bwe En maron̄ oņaake eok ilo am̧ kiki, im n̄e kwōj jerkak ilo jibon̄ buruōm̧ en obrak kōn kam̧m̧oolol ko n̄an Anij, im eļan̄n̄e kwōj kōm̧m̧an men kein, naaj kotak eok ilo raan eo āliktata” (Alma 37:37).
Kwaļo̧k ļōmņak, en̄jake im kōņaan ko ad ippān Anij kōn kam̧m̧oolol im būruwōn jar eaikuj itok n̄an kōj kajjojo āinwōt an aorōk im em̧m̧an āinwōt menono im m̧ōn̄ā.
Kappukōt jeje ko rekwojarjar ilo kajjojo raan enaaj barāinwōt kōkajoorļo̧k tōmak im kadkad eo am̧. Āinwōt ad baj aikuj naajdik ānbwinid, jetōb im ļo̧ļātāt ko ad renaaj koba ippān doon kōn kwojkwoj ioon naan ko an Kraist āinwōt an pād ilo jeje ko an rikanaan ro. Nipai ar katakin, “Kwojkwoj ioon naan ko an Kraist, bwe lo, naan ko an Kraist renaaj jiron̄ kom̧ aolep men ko kom̧ij aikuj kōm̧m̧an” (2 Nipai 32:3).
Ilo an em̧m̧an riit jen jeje ko rekwojarjar, riit ej make ejjab bwe n̄an bōk tarlep in im m̧wilaļ in katak ko an Rilo̧mo̧o̧r. Kappukōt im kōlmenļo̧kjeņ, im būki naan ko an Kraist āinwōt katak kaki ilo jeje ko rekwojarjar enaaj bōktok jeļāļo̧kjeņ im mālōtlōt eo ele jen jon̄an ad meļeļe kake. Menin enaaj kōkajoorļo̧k ad kallim̧ur im bōktok jetōb in n̄an kōm̧m̧ane ijo em̧m̧antata ad ilo aolep jekjek.
Juon iaan bun̄tōn nee ko raorōk jemaron̄ būki n̄an kōkajoorļo̧k mour ko ad im pād wōt im pen n̄an pedped eo an Rilo̧mo̧o̧r ej n̄an mour wānōk n̄an bōk m̧ōttan kwojkwoj eo aolep wiik. Kain̄i in Kwojkwoj eo aolep membōr ro an Kabun̄ in kōn juon iien em̧m̧an n̄an kōlmenļo̧kjeņ kōn mour eo an ilo wōnm̧aanļo̧k, n̄an kejokļo̧kjeņ kōn jerbal ko ak jab m̧akūtkūt ko raikuj dedeļo̧k me maron̄ in ukweļo̧k jāni, innām n̄an bōk m̧ōttan pilawe im dān āinwōt kokwojarjar ilo ememej ānbwin im bōtōktōkin Jisōs Kraist, juon kam̧ool kōn Pinmuur eo An. Eļan̄n̄e ededeļo̧k kōn kam̧m̧oolool im ilo ettā, jej kōkāāl bujen ko ad indeeo, karreo im kokwojarjar e, im bōk kallim̧ur eo bwe jenaaj bōk jetōb eo An bwe en pād ippād iien otemjej. Jetōb eo ej jerbal āinwōt juon kain jimāān, juon kein dide me ejjab wōt kokwojarjar ak ej bar boktok men otemjeļo̧k n̄an ememļo̧kjeņ ko ad im kam̧ool juon alen im bar juon alen kōn Jisōs Kraist. Wānōk n̄an bōk m̧ōttan kwojkwoj eo ej kōkajoorļo̧k kōtaan eo ad make n̄an dekā in pedped, aaet eo ej an Jisōs Kraist.
Ilo iien kwaļo̧k eo An, Rilo̧mo̧o̧r ar katakin kōn iakwe im kalikkar katak ko, pedped im jerbal ko rekkar me remaron̄ kōjparok mour ko ad im kōkajoorļo̧k kadkadiid. Ilo jem̧ļo̧kin Katak eo Ioon Toļ eo, Eaar kwaļo̧k:
“Kōn menin, jabdewōt eo ej ron̄ ennaan kein Aō im kōm̧m̧ani, Inaaj keidi e n̄an juon armej emeletlet, [eo] ej kalek m̧weo im̧ōn ioon juon ejm̧aan—
“Im wōt ej wōtlo̧k, im ibwij ej itok, im kōto ko rej m̧akroro, im wōtlo̧k ioon m̧weo, im e jab bun̄, bwe eaar ekkal ioon ejm̧aan eo.
“Im jabdewōt eo ej ron̄ ennaan kein Aō im kōm̧m̧ani renaaj jab āinwōt juon armej ebwebwe, [eo] eaar kalek m̧weo im̧ōn ioon bok—
“Im wōt eaar wōtlo̧k, im ibwij eo eaar itok, im kōto rej m̧akroro, im wōtlo̧k ioon m̧weo; im eaar bun̄, im eļap kar bun̄ eo an.” (3 Nipai 14:24–27; bar lale Matu 7:24–27).
Ro jeiū im jatū, ejjeļo̧k iaad enaaj jeļā kalek m̧ōko m̧ōd, jikin jerbal ko, ak em̧ kwojarjar ko n̄an kabun̄jar ioon pok, rapōl, ak kōn ejjeļo̧k karōk im kein jerbal ko rekkar. Kōtļo̧k bwe jen bōk kūr eo an Rilo̧mo̧o̧r n̄an itok n̄an E. Kōtļo̧k bwe jen kalek mour ko ad ioon juon pedped epen im em̧o̧o̧l.
Ij kam̧ool ilo etta bwe kōn ejaake mour ko ad ioon pedped epen n̄an Jisōs Kraist im Pinmuur eo An im kōn ļoor karōk ko An n̄an ad m̧ōņōņō, ekoba jar aolep iien, katak jeje ko rekwojarjar, im bōk m̧ōttan kwojkwoj eo aolep wiik, jenaaj kajoorļok; jenaaj pojak n̄an jutak ņae lan̄ im ļōkapokpok ko an mour, jenaaj en̄jake lukkuun eddōkļo̧k an juon make im juon okta eo aitok kitien, jenaaj en̄jake lan̄lōn̄ im m̧ōņōņō ko kar kallim̧ur kaki, im jenaaj wōr leke bwe mour ko ad em̧ōj aer ekkal ioon juon pedped em̧ool—juon pedped ejjamin wōtlo̧k. Ilo ekwojarjar etan Jisōs Kraist, amen.