Pokake n̄an Kien Ej Anemkwoj

Jān Elder L. Tom Perry

Jān Doulul eo an Jon̄oulruo Rijilōk ro

Em̧m̧aan ro im kōrā ro rej bōk anemkwoj eo aer āinwōt juon menin letok jān Anij, bōtaab ettā eo aer im, ilo tōprak, m̧ōņōņō eo aer indeeo ej itok jān pokake n̄an kien ko An.

Iaar bōk juon menin letok eaorōk Kūrijm̧ōj eo ļo̧k me eaar bōktok elōn̄ ememļo̧kjeņ ko. Leddik eo men̄ada eaar letok n̄an n̄a. Eaar ibwilijin men ko iaar door wōt ilo m̧weo im̧ōn baam̧ļe etto ke iaar em̧m̧akūt jāne ālkin aō kar m̧are. Menin letok in eaar bok in em̧ōņakņak edik ij jibwe ilo peiū. Ej juon bok me kar leļo̧k n̄an LDS ritariņae ro me raar deļo̧n̄e jar in tariņae koilo Pata eo an Laļ in II. N̄a, make, kar ļōmņak kōn bok eo āinwōt menin letok jān Būreejtōn Heber J. Grant im rikakpilōklōk ro an, J. Reuben Clark Jr. im David O. McKay.

Ilo im̧aan bok eo, rikanaan rein jilu an Anij kar je: “M̧akūtkūt ko an ritariņae rejjab kōtļo̧k bwe jān kōmij iien otemjej ioon kom̧, jekdo̧o̧n kajju ak rijerbal ro am. Men em̧m̧an tata am ej n̄an lewaj n̄an kom̧ m̧ōttan ko an revelesōn ko raan kein im kōmeļeļe ko an pedped ko an Ko̧jpeļ eo ro renaaj bōkwaj n̄an kom̧, jabdewōt jikin kom̧ maron̄ pād ie, bar kōkāal kōjatdikdik im tōmak, barāinwōt kaenōm̧m̧an, rejtake, im aenōm̧m̧an an jetōb.”¹

Rainin jej lo kōj make ilo bar juon pata. Menin ejjab tariņae an jarin tariņae. Ej juon tariņae in ļōmņak ko, naan ko, im jerbal ko. Ej juon pata ippān jerawiwi, im eļapļo̧k jān m̧okta aikuj kakememej kōj kōn kien ko. Dikļo̧k in kabun̄ ej erom iminene, im elōn̄ iaan tōmak ko im iminene ko rej idaptōk ippān ko me kar kwaļo̧k jān Irooj Make n̄an jeram̧m̧an ko an ajri ro Nejin.

Ilo bok m̧ōņakņak eo edik, ālkin wōt leta eo jān Būreejtōnji eo Kein Kajuon, ewōr juon ”Keppopo n̄an Em̧m̧aan ro ilo jarin Tariņae,”, taitōļ in “Pokake n̄an Kien Ej Anemkwoj.” Kakememej eo ej kōm̧m̧ane juon keidi ikōtaan kein tariņae, eo “rej em̧m̧an n̄an aolep ro rej jerbal in tariņae,” im kien an lan̄.

Ej kwaļo̧k, “Ilo laļ, barāinwōt, ijo Anij ej bōk eddo in, ewōr kien—an laļ, kien … an indeeo—kōn jet kōjeram̧m̧an ko im kaje ko rejjab oktak.”

Naan ko āliktata an kakememej eo ej pedped ioon pokake kien an Anij: “Eļan̄n̄e kwoj kōņaan bar ro̧ol n̄an ippān ro rejitōnbōro ippam̧ kōn ejjeļo̧k ajļo̧k, … eļan̄n̄e kwoj kōņaan erom juon em̧m̧aan im mour m̧ōņōņō—innām kōjparok kien an Anij. Ilo kōm̧m̧ane āindein komaron̄ kōļapļo̧k anemkwoj ko ejjeļo̧k wōņaer me kwoj bōbrai, bar juon anemkwoj me ro jet remaron̄ em̧m̧an aer bōbrae, anemkwoj jān jerawiwi; bwe em̧ool ‘pokake n̄an kien ej anemkwoj.’”²

Etke naan eo “pokake n̄an kien ej anemkwoj” ekanooj m̧ool n̄an n̄a ilo tōre eo? Etke ekanooj in aorōk n̄an aolepādwōj kiiō?

Bōlen ej kōnke ewōr ippād juon jeļāļo̧kjeņ eo kar kwaļo̧k kōn bwebwenato in mour eo ad m̧okta. Jej kile bwe ke Anij Jemen Indeeo ar kwaļo̧k karōk eo An n̄an kōj ilo jino in iien, Satan eaar kōņaan ukōtkarōk eo. Eaar ba enaaj kar lo̧mo̧o̧ren aolep armej. Ejjeļo̧k juon jetōb naaj kar jako, im Satan eaar lōke emaron̄ kar kōm̧m̧ane ilo kajjitōk eo an. Bōtaab eaar wōr juon jekjek eo jab errā kake—kakkure eo an anemkwoj eo an armej, eo eaar im ej juon menin letok kar letok jāņ Anij (lale Moses 4:1–3). Kōn menin letok in Būreejtōn Harold B. Lee eaar ba, “Epaake ļo̧k mour make, anemkwoj in kālet ej menin letok eo eļaptata an Anij n̄an armej.”³ Kōn menin, eaar jab juon men edik n̄an Satan n̄an jab tōlarōke anemkwoj eo an armej. Ilo m̧ool, eaar erom unin kōnono an pedped eo me Pata eo ilo Lan̄ eaar kōm̧m̧an. Anjo ilo Pata eo ilo Lan̄ eaar juon anjo n̄an anemkwoj an armej.

Satan, mekarta, eaar jab bōjrak. Bar juon an karōk—karōk eo eaar kōm̧m̧ane jān tōre eo an Adam im Eve—kajjieon̄ kapo em̧m̧aan ro im kōrā ro, ilo m̧ool n̄an kwaļo̧k ke jejjab aikuji menin letok eo an anemkwoj eo Anij eaar letok. Satan elōn̄ an un ko n̄an kōm̧m̧ane ta eo ej kōm̧m̧ane. Bōlen men eo ekajoor tata ej n̄an kōņaan eo an bar ukōtļo̧k, bōtaab ebarāinwōt kōņaan kōm̧m̧an bwe em̧m̧aan ro im kōrā ro rej en̄taan, āinwōt an en̄taan. Ejjeļo̧k iaad ej aikuj pere ekōjkan an Satan kōņaan wejepedik. Jerbal eo an ilo karōk indeeo an Anij ej ejaake “jum̧ae ilo men otemjej” (2 Nipai 2:11) im mālijon̄e anemkwoj eo ad. Kajjojo kālet kwe im n̄a jej kōm̧m̧ane ej juon mālijon̄ n̄an anemkwoj eo ad—men̄e jej kālet n̄an pokake ak jab pokake kien ko an Anij ej lukkuun juon kālet ikōtaan “anemkwoj im mour indeeo” ak kōm̧akoko mej.”

Pedped in katak in ealikar kar katakin ilo 2 Nipai, jepta ruo: “Kōn menin, armej rej anemkwoj ekkar n̄an kanniōk; im men otemjej kar liļo̧k n̄an er ko im rekkar n̄an armej. Im rej anemkwoj n̄an kālōt anemkwoj im mour indeeo, kōn Ri Jojomar eo an armej otemjeļo̧k, ak n̄an kālōt kōm̧akoko im kajoor eo an devil; bwe e ej pukōt bwe aolep armej ren en̄taan āinwōt e.” (2 Nipai 2:27).

Ilo elōn̄ wāween ko, laļ in eaar iien otemjej pād ilo pata. Ij tōmak ke Būreejtōnji eo Kein Kajuon eaar jilkintok n̄an n̄a bok eo aō em̧ōņakņak, eaar ļapļo̧k aer n̄ūrbōktak kōn juon pata eļapļo̧k jān Pata eo an Laļ in II. Ij barāinwōt tōmak raar kōjatdikdik bok eo enaaj kar juon kattōrak an tōmak ņae Satan im jarin tariņae ro an ilo pata in eļapļo̧k—pata eo ņae jerawiwi—im jerbal āinwōt juon kein kakememej n̄an n̄a n̄an mour kōn kien ko an Anij.

Juon wāween n̄an etale kōj make im keidi kōj n̄an epepen ko m̧oktaļo̧k ej jān juon iaan jon̄ak ko rōrūtto tata kar jeļā kaki n̄an armej—Kien ko Jon̄oul. N̄an eļap wōt iaan laļ in, eļaptata Judeo-Christian, Kien ko Jon̄oul eaar men eo eļap tata kar bōke im eaar kwaļo̧k kōtaan ko ikōtaan em̧m̧an im nana.

Ilo ekajet eo aō make, emen iaan Kien ko Jon̄oul raar bōk ilo m̧ool rainin jān m̧okta. Āinwōt juon m̧anit, jej meļo̧kļo̧k im kaje uroor, ko̧o̧t, im riab, im jej tōmak wōt ilo eddo eo an ajri ro n̄an ro jinier im jemeer.

Bōtaab āinwōt juon jukjukinpād eļapļo̧k, emakijkij ad joļo̧k kien ko jiljino:

Eļan̄n̄e men ko im̧aan tata an laļ in rej jabdewōt kōkaļļe, em̧ool ewōr ippād “anij ko jet” jej likūt im̧aan Anij eo em̧ool.
Jej kōm̧m̧ani ekōjab ko an ro rōbun̄bun̄, an jekjek in mour, an m̧weie, im aaet, jet iien pija ko kōm̧m̧ani ak meno̧kno̧k ko.
Jej kōjerbal etan Anij ilo aolep kain wāween ko renana, ekoba ennaan ko ad im ad kanejnej.
Jej kōjerbal raan in Jabōt n̄an ikkure ko ad reļļap tata, iien ikkure eo ad eļaptata, iien eo epoub tata n̄an kaikujkuj, im enan̄in aolep men ko jet ijello̧kin kabun̄jar.
Jej kōjerbal kōtaan ko an m̧ōm̧ an kanniōk itulikin m̧are āinwōt ikkure im kaitoktok limo.
Im ankoņak em̧ōj an kanooj emakijkij an erom wāween mour. (Lale Exodus 20:3–17.)

Rikanaan ro jān aolep tōre in bōk eddo ko kar jokkun wōt juon ilo kar kakkōl ņae kakkure ko kōn ruo iaan kien ko reļļap—juon ej iookļo̧k uroor im juon ļōn̄. Ij lo juon pedped eo ejokkun wōt juon n̄an kien kein ruo raorōk—tōmak eo bwe mour make ej juon jim̧we an Anij im bwe ānbwin kanniōk ko ad, tampeļ ko an mour in, rej aikuj ejaak ilowaan mo ko Anij eaar kōm̧m̧ani. N̄an an armej jāniji kien ko an n̄an kien ko an Anij ikkijien ejaake ak bōk juon mour ej waanjon̄ak eo eļaptata an kōtemene im m̧wilaļ an jerawiwi.

Wāween ko relukkuun jeleti jen m̧wil kein remakun̄ļo̧k jen kwojarjar eo an m̧are rej bōd ko n̄an baam̧le ko—kajoor eo an baam̧le ko ej jorrāan eo ilo juon jon̄an eo ekamijak. Jorrāān in ej kōm̧m̧an jorrāān eļap n̄an jukjukinpād. Ij lo un im wāween an jelet. N̄e jej kowaan kallim̧ur im jatiljek n̄an rim̧are ro ad, jej kōm̧akūtļo̧k kūļu eo ej dāpij jukjukinpād eo ad ippān doon.

Juon wāween ejipan̄ n̄an ļōmņak kake kien ko ej bwe ewōr kapilōk jouj jān Jemedwōj Ilan̄ elo̧ļe, jeļā kajien. Kōttōpar eo An ej m̧ōņōņō eo ad indeeo, im kien ko An rej tōl eo Eaar letok n̄an kōj n̄an bar ro̧o̧l n̄an E, eo ej iaļ eo dee eo jenaaj m̧ōņōņō indeeo. Ewi jon̄an an aorōk kapjuknen ko im baam̧le eo n̄an m̧ōņōņō eo ad indeeo? Ilo peij 141 ilo bok m̧ōņakņak eo aō edik, ej kwaļo̧k, “Ilo m̧ool lan̄ eo ad eļapļo̧k wōt jidik jān juon kōkaļļe an kapjuknen ko ad n̄an indeeo.”⁴

Katak eo an baam̧le im kapjuknen eo eaar jem̧aanļo̧k āliji kōn juon alikkar im kajoor ilo “Baam̧le Eo: Juon Naan in Kean̄ n̄an Laļ in.” Ej kwaļo̧k paotok eo indeeo an baam̧le ko innām kar kōmeļeļeik ekkeijel eo n̄an kabun̄-jar an tampeļ. Naan in kean̄ eo eaar barāinwōt kwaļo̧k kien eo me m̧ōņōņō indeeo an baam̧le ko ej pedped ioon, etan, “Kajoor ko rekwojarjar n̄an ejaak mour rej aikuj in kar jerbal ikōtaan wōt ļeo im lio, Em̧ōj kōmālimi āinwōt ļeo ak lio pālele.”⁵

Anij ej kwaļo̧k n̄an rikanaan ro An bwe ewōr jim̧we ko rem̧ool. Jerawiwi enaaj iien otemjeļo̧k jerawiwi. Jab pokake kien ko an Irooj naaj iien otemjeļo̧k m̧oņe kōj jan kōjeram̧m̧an ko An. Laļ in ej oktak jokkuun wōt juon im ļap, bōtaab Anij, kien ko An, im kallim̧ur ko kar kallim̧ur kaki rejjab oktak. Rej āliktata im jab oktak. Em̧m̧aan ro im kōrā ro rej bōk anemkwoj eo aer āinwōt juon menin letok jān Anij, bōtaab ettā eo aer im, ilo tōprak, m̧ōņōņō eo aer indeeo itok jān pokake n̄an kien ko An. Āinwōt an Alma kar kapilōk jerbal eo an ļaddik eo nejin Koriantōn, “Jerawiwi ejjan̄in kar mōņōņō” (Alma 41:10).

Ilo tōre in an Jepļaaktok eo an tarlep in ko̧jpeļ eo, Irooj eaar bar juon alen kwaļo̧k n̄an kōj kōjeram̧m̧an ko kar kallim̧ur kaki n̄an kōj kōn pokake n̄an kien ko An.

Ilo Doctrine and Covenants 130 jej riit:

Ewōr juon kien, jān jino in kar kakien ilo lan̄ m̧okta jān pedped ko an laļ in, eo me aolep kōjeram̧m̧an rej ejaak ioon.

N̄e jej bōk jabdewōt kōjeram̧m̧an jān Irooj, ej kōn pokake kien eo me kōjeram̧m̧an ko rej pedped ioon (Lale D&C 130:20–21).

Em̧ool ejjeļo̧k jabdewōt katak eļapļo̧k an kajoor an waļo̧k ilo jeje ko rekwojarjar jān kien ko an Irooj rejjab oktak im ekkeijel eo aer n̄an m̧ōņōņō eo ad im jeram̧m̧an eo ilo jerbal ko ad āinwōt kajjojo armej, āinwōt baam̧le ko, im āinwōt juon jukjukinpād. Ewōr m̧ool ko rejim̧we. Jab pokake n̄an kien ko an Irooj enaaj iien otemjej kōm̧akūtļo̧k kōj jān kōjeram̧m̧an ko An. Men kein rejjab oktak.

Ilo juon laļ eo ijo tōl an mour an jukjukinpād ej jab jeļā kake, jepļaaktok eo an ko̧jpeļ eo an Jisōs Kraist ej jab pereļo̧k n̄an jidik, ak aikuj stake ko im ward ko an, baam̧le ko an, ak kajjojo membōr ro an. Jej aikuj jab bōk im kālet kien ta ko jej ļōmņak rej aorōk n̄an kōjparoki bōtaab kile aolep kien ko an Anij. Jej aikuj jutak dim im pen, wōr lōke eweppān ilo jokkun wōt juon eo an Irooj im m̧ool eo eweppān ilo kallim̧ur ko An.

Kōm̧m̧an bwe jen aolep iien meram in laļ, juon waanjon̄ak ilo kōjparok kien ko, me rejjan̄in kar oktak im naaj jamin oktak. Ejja āinwōt bok in edik eaar kōketak ritariņae ro an LDS n̄an jutak pen ilo iien tariņae, kōm̧m̧an bwe jān, ilo pata in ilo raan kein āliktata, erom juon unin meram n̄an aolepān laļ im eļaptata n̄an ajri ro nejin Anij me rej pukōt kōjeram̧m̧an ko an Irooj. Kōn men kein ij kam̧ool ilo etan Jisōs Kraist, amen.