Rilo̧mo̧or Ekōņaan Jeorļo̧k bōd

Jen Elder Craig A. Cardon

Jen Jiljilimjuonn̄oul eo

Irooj ej iakwe kōj im ekōņaan jeorļo̧k ad bōd n̄an meļeļe An kilaan n̄an jeorļo̧k bōd.

Ilo tōreen kwaļo̧k eo an Rilo̧mo̧or eo ad, elōn̄ raar ļoor E, ekoba skraib ro im Parisi ro “jān jikin kweilo̧k otemjej i Galili, … im Judia, im Jerusalem.”¹ Juon em̧m̧aan ejaje makūtkūt ioon kinen ar kōņaan bōk ājmour kar bōkļo̧k n̄an juon jarlepju, ak eaar jab maron̄ kepaak Rilo̧mo̧o̧r eo, ro m̧ōttan raar bōk n̄an ioon bōro̧o̧j in m̧weo ijo Rilo̧mo̧o̧r eo ar pād ie im lelaļļo̧k e. Lo kijejeto in an tōmak, kōn eļap kōttōpar jan̄in karon̄ riron̄jak ro An, Rilo̧mo̧or eaar kwaļo̧k, “Armej, ejako jero̧wiwi ko am̧.”²

Menin emaron̄ kar kabwilōn̄ em̧m̧aan eo—im men̄e jeje ko rekwojarjar rejjab ba jabdewōt kōn an m̧akūtkūt, emaron̄ kar bwilōn̄ eļan̄n̄e Rilo̧mo̧o̧r eaar elukkuun meļeļe etke eaar itok.

Rilo̧mo̧or ejeļā bwe elōn̄ armej rej ļoor E kōn menin bwilōn̄ ko An rekajoor. Ededeļo̧k An kar ukōt dān n̄an wain,³ kajutakļo̧k jetōb ettoon,⁴ kemour ļaddik eo nejin juon Irooj,⁵ kemour juon lōba,⁶ kemour kōrā eo jinen lio pāleen Piter,⁷ im bar jet armej.⁸

Ak ippān em̧m̧aan in ejaje m̧akūtkūt, Irooj eaar kālet n̄an leļo̧k kam̧ool jim̧or n̄an ro karijeran im ro rejjab tōmak kōn jerbal eo An ejenolo̧k āinwōt Rilo̧mo̧o̧r an laļ in. Ron̄jake naan ko an Rilo̧mo̧or eo, skraib im Parisi ro rekar jino n̄an pukōt ilubwilijier, kajejtokjen im kōnono blaspim ilo aer kajeōm̧ļo̧k e bwe Anij wōt emaron̄ jeorļo̧k bōd. Karrelo̧k e kōmenļo̧kjeņ ko aer, Rilo̧mo̧o̧r eaar kōnono n̄an er im ba:

“Ta eo kom̧ij ļōmņak nana ilo būruemi?

“Bwe iaer e pidodo in ba, Em̧ōj jeorļo̧k jero̧wiwi ko am̧, ak, Kwōn jerkak im etal?”⁹

Jab kōttar uwaak eo aer, Rilo̧mo̧or eaar wōnm̧aanļo̧k wōt, “A bwe kom̧win jeļā bwe Nejin Armej E maron̄ in juļo̧k jero̧wiwi ko an laļ, [E ba n̄an eo eaar nan̄inmej kōn akā,] Ij ba n̄an eok, kwōn jerkak, im bōk kiniōm̧, im etal n̄an m̧weo im̧ōm̧.”¹⁰Im eaar etal!

Kōn kemour in ilo ānbwin ekabwilōn̄lōn̄, Rilo̧mo̧or eo eaar kapen n̄an kōj aolep kajoor in eļapļo̧k an m̧ool ilo jetōb: Nejin Armej ej jeorļo̧k jerawiwi ko!

Ilo tōreen me m̧ool in eaar pojak in errā ippān aolep ritōmak ro, eaar jab pidodo kile bwe ej m̧ōttan eo eaorōk kōn m̧ool. Rilo̧mo̧or eaar jeorļo̧k jerawiwi ko “ioon laļ” jab baj wōt ilo Ekajet eo Āliktata. Ejjab kōroļo̧k kōj ilo jerawiwi ko ad.¹¹ Ejjab allo̧ke ad jepļaak n̄an jerawiwi ko jem̧aan. ¹² Bōtaab n̄e jej ukweļo̧k im pokake An ko̧jpeļ, Ej jeorļo̧k jerawiwi ko ad.¹³

Ilo jeorļok jerawiwi in jej lo kōmaron̄ im kajoor in lo̧mo̧o̧r eo an Pinmuur ejokkin wōt juon im jouj kōjerbali. Eļan̄n̄e jej kamineneik tōmak ilo Irooj Jisōs Kraist, kajoor in kōmaron̄ eo An kōn Pinmuur eo An ej kōkajoorļo̧k kōj ilo iien ad aikuj,¹⁴ im An kajoor in lo̧mo̧o̧ren ej karreoik kōj ilo ad “utikļo̧k armej ilo lukkuun pikitokin.”¹⁵Menin ej bōktok kōjatdikdik n̄an aolep, eļaptata n̄an ro rej en̄jake bwe bōk m̧ōjņo̧ an armej eļe jen ikdelel an Rilo̧mo̧or n̄an jipan̄ im n̄an lo̧mo̧or.

Kōpooj juon iien eo em̧m̧an n̄an Rilo̧mo̧o̧r eo n̄an kōmeramļo̧k ad meļeļe,¹⁶ Peter juon iien ar antooneļo̧k jete alen an aikuj jeorļo̧k an jein bōd innām kar kajjitok “N̄an jiljilimjuon ke?” Em̧ool enaaj ļapļo̧k jen bwe. Bōtaab uwaak eo an Rilo̧mo̧o̧r ar kōppeļļo̧k juon iaļ n̄an kōj n̄an meļeļe būruōn tiriamo eo An “Ij ba n̄an eok jiljilimjuon alen, a n̄an jiljilimjuonn̄oul alen jiljilimjuon.”¹⁷

Irooj ej iakwe kōj im ekōņaan bwe jen meļeļeļe kōn An m̧ōņōņō n̄an jeorļo̧k bōd. Elōn̄ļo̧k jen 20 iien kōnono ko ilo Doctrine and Covenants, Irooj ej jiron̄ ro Ej eaar kōnono kake er, bwe jerawiwi ko ami rej jako jen kom̧, ak ilo naan ko eierļo̧k wōt.¹⁸ Enan̄in jimōttan in iien kein, naan ko an Irooj rekar kajju n̄an rikanaan Joseph Smith, jet iien rj kōnono n̄an emake, jet iien ippān ro jet.¹⁹ Eo mokta an men kein kar jeje ilo 1830, eo āliktata ilo 1843. Mekarta, elōn̄ iiō ko, Irooj eaar jiron̄ Joseph Smith ilo āliji, bwe jerawiwi ko am̧ raar jako jen eok.

Ilo an ejjeļo̧k ruōn Joseph kōn jabdewōt jerawiwi ko reļļap,²⁰ enaaj em̧m̧an n̄an kōj n̄an keememej bwe kōn jejjo wōt jokālet ko, jiljilimjuonn̄oul alen jiljilimjuon eo an Irooj ejjab kwaļo̧k jon̄an jeorļo̧k bōd ekkar n̄an kauwōtata in jerawiwi eo.

Ilo tōre eo eaar kōnono n̄an elder ro raar kukippān doon ilo Kirtland, Irooj eaar ba bwe Ekōņaan bwe ren anjo̧ jen laļ; kōn menin enaaj wōr Aō tiriam̧o ioomi.²¹ Irooj ejeļā kōn m̧ōjņo̧ ko ad im bōd ko indeeo an “laļ in” ioon em̧m̧aan im kōrā ro rejjab weppeen.²² Naan eo kōn menin ilo eoon in ej An kam̧ool bwe kōn wōt wānōk in An tiriam̧o bwe jen maron̄ eļaptata anjo̧ jen laļ in. Ekōjkan an tiriamo in waļo̧k? N̄an ejja elder ro ilo Kirtland E eaar ba E kar jeorļo̧k jerawiwi ko aer.²³Rilo̧mo̧or ekōņaan jeorļo̧k bōd.

Ejjeļo̧k juon aikuj antooneļo̧k bwe jeorļo̧k bōd in ej itok kōn jab ukweļo̧k. Ilo m̧ool Irooj ar kwaļo̧k bwe E ej jeorļo̧k jerawiwi an ro rej kwaļo̧k jerawiwi ko aer im̧aan Mejān im kajjitōk kōn jeorļok bōd innām kobaiktok eo ekkar, kajjitōk ippāer wōn ro raar jab jerawiwi m̧ae mej . ²⁴ Ilo an Irooj jab kalimjōk jerawiwi eo kōn jon̄an dikin”²⁵ men̄e E ej lale oktan im eddoin jet jerawiwi. Ej kallim̧ur bwe ejjeļo̧k jeorļo̧k bōd n̄an ro rej blaspim ņae Jetōb Kwojarjar.²⁶ E ar kwaļo̧k jon̄an kauwōtata an m̧anm̧an ²⁷ im kōmeļeļeik kauwōtata in jerawiwi an m̧ōm̧ an kanniōk āinwōt lōn̄.²⁸ Kōn ālij im bar ālij kauwōtata in jerawiwi an m̧ōm̧ an kanniōk, Eaar karon̄ im kapenļo̧k kilen bōk An jeorļo̧k bōd. ²⁹ Im Eaar ba bwe armej ro rej jerawiwi ņae meram eo eļapļo̧k naaj bōk eļapļo̧k kaje.³⁰ Ilo An tiriam̧o, Eaar kōtļo̧k eļap iien n̄an kōkm̧anm̧an ijjeļo̧kin an kōņaan weppen eo em̧ōkaj kitien. Men̄e kōn lōn̄ļo̧k in jerawiwi ko āinwōt juon tōprak in m̧ōjņo̧ an mour wabanban, āinwōt an emmakijkij ad ukweļo̧k im pukōt An jeorļo̧k bōd, E ej jeorļo̧k bōd, juon alen im bar juon alen.³¹

Kōn menin, aolepādwōj, ekoba ro rej en̄taan n̄an anjo̧ jen iminene in an̄urlep ko āinwōt m̧anm̧an ak alooj pija nana im armej ro repāākeļo̧k er maron̄ jeļā bwe Irooj enaaj kile kijejeto ko ad rejim̧we im naaj m̧ōņōņō in jeorļo̧k bōd n̄e ukweļo̧k ej dedeļo̧k, “mae jiljilimjuonn̄oul alen jiljilimjuon.” Ak menin ejjab meļeļein bwe juon emaron̄ m̧ōņōņō n̄an jepļaak n̄an jerawiwi ilo an jab bōk kaje.³²

Irooj iien otemjej ej itoklimoin kōn būruōd,³³ im elmakote juon tōmak ebōd ejjab kam̧ōņōņōik jerawiwi ³⁴ Ilo epepen in Irooj eaar kakkōl e juon iaan ro Rikarijeran ņae kain elmakot in kōn kwaļo̧k bwe eaikuj jook kōn Rinicolaitan ro im aolepān men in jōjō ko aer rettiņo.³⁵ Rinicolaitan ro rekar uwaan juon kabun̄ eo etto me rej ba ewōr aer mālim n̄an kōm̧m̧an jerawiwi an m̧ōm̧ an kanniōk kōn mālim in tiriam̧o an Irooj.³⁶ Menin ekar jab kam̧ōņōņōik Irooj ³⁷ An tiriam̧o im jouj rejjab lo̧mo̧ren kōj n̄e būruwōd ejjab aenōm̧m̧an im jejjab pokake m̧ool eo, ak jej m̧ōņōņō kōn men ko rejjab jim̧we.³⁸ Ijjeļo̧kin, ālkin kōm̧m̧ane aolep men ko jemaron̄i, ³⁹ An tiriam̧o im jouj rej tokjen ko kōn menin ilo iien jerbal⁴⁰ jej anjo̧ jen laļ in kōn kajoor in kōmaron̄ eo an Pinmuur eo. Ilo ad ettā pukōt menin letok in eaiboojoj men ko rem̧ōjņo̧ naaj erom kajoor n̄an kōj, men ko rem̧ōjņo̧, m̧ōjņo̧ ko ad,⁴¹ im kōn An kajoor, jekar ejaak n̄an kōm̧m̧ane menin eo me jejjamin kōm̧m̧ane kōn kōjmake.

Irooj ej kalimjek meram eo jekar bōke,⁴² kōņaan ko ilo būruōd,⁴⁴ im m̧akūtkūt ko ad,⁴³ im n̄e jej ukweļo̧k im pukōt An jeorļo̧k bōd, Ej jeorļo̧k bōd. Āinwōt ad kōlmenļo̧kjeņ kōn mour ko ad make im mour ko an ro rejitenbōro ippād im imminene ko, jej aikuj jokkin wōt juon ilo juon ikdelel n̄an jeorļo̧k bōd ko ad make im ko an ro jet.⁴⁵

Preach My Gospel ej kōnono kōn pen ilo anjo̧ jen mantin an̄urlep im rōjan̄ ritōl ro an priesthood im membōr ro n̄an “jab bwilōn̄ ak jab ebbeer” eļan̄n̄e rikkatak ro ak membōr ro rekāāl rej wōnm̧aanļo̧k n̄an en̄taan kōn kain jorrāān kein. Ijjeļo̧kin kōm̧ij ko̧o̧njeļ n̄an “kwaļo̧k leke eo ilo kajjojo im jab ekajet … [kōm̧m̧an] n̄ane āinwōt juon jerbal in ukoktak eo ekadu kitien im meļeļe kake.”⁴⁶ Jemaron̄ ke kōm̧m̧an jidik ippān ajri ro nejid make ak ro uwaan baam̧le ro rej en̄taan kōn ejja kain apan̄ kein wōt, ettoļo̧k jidik jen iaļ an mour jim̧we? Ilo m̧ool er raikuji ad pen im dim, kijenmej, im iakwe―im aaet, ad jeorļo̧k bōd.

Ilo kweilo̧k eo eļap ilo Oktoba eo ļo̧k, Būreejtōn Monson eaar kōkapilōklōk:

“Jej aikuj kememej bwe armej remaron̄ oktak. Remaron̄ doori itulikier iminene ko renana. Remaron̄ ukweļo̧k jān bōd ko aer. …

“… Jemaron̄ jipan̄ er n̄an anjo ioon jabwenōk ko aer. Jej aikuj kōļapļo̧k maron̄ eo n̄an loe em̧m̧aan ro ejjab āinwōt aer pād kiiō ak ilo aer maron̄ erom n̄e.”⁴⁷

Ilo juon kweiļok ilo kar tōre ko jinotata an Kabun̄, einļo̧k wōt kweilo̧k in, Irooj eaar jiron̄ membōr ro:

“Lo, Ij ba n̄an kom, kom ar erreo akō ejjab aolep; …

“Kōnke aolep kanniōk rejorrāān im̧aan meja. …

Bwe lo jet iaer kar ņa ruweer im̧aan meja, bōtaab Inaaj erom tiriam̧o ioon ami m̧ōjņo̧.⁴⁸

An ennaan ejja āinwōt in rainin.

Jemedwōj Ilan̄ ejeļā ta eo jej jelm̧āe, bwe jej aolep jerawiwi im “rej likjab jen aiboojoj eo an Anij”⁴⁹ alen juon im bar alen juon. Eaar jilkintok Nejin, eo Ejeļā m̧ōjņo̧ ko an armej im ekōjkan n̄an kōjeram̧m̧an ro rej kapoik er.⁵⁰ Ej katakin kōj n̄an ekil im jar bwe [jen] jab deļo̧n̄ ilowaan kaponot Em̧ōj jiron̄ kōj n̄an.⁵¹ Kar jiron̄ kōj n̄an “kūr n̄an [Anij] kōn tiriam̧o bwe E ekajoor n̄an lo̧mo̧ren.”⁵² Rilo̧mo̧o̧r eo ej kean̄ kōj n̄an ukweļo̧k ⁵³ im n̄an jeorļo̧k bōd⁵⁴ Im men̄e ukweļo̧k ejjab pidodo, ilo ad kate kōj kōn aolepān būruwōd n̄an pokake ko̧jpeļ eo An, Rilo̧mo̧o̧r eo eaar letok kalim̧m̧ur in: Eaar ba n̄an kōj, men̄e jerawiwi ko ad, Ļo̧jeen eobrak kōn tiriamo̧ n̄an kōj Ej jamin naaj joļo̧k kōj:ilo raan in kakkure eo, Enaaj keememej tiriam̧o.”⁵⁵ Rilo̧mo̧or eo ekōņaan jeorļo̧k bōd.

Kajjojo wiik ilo Mormon Tabernacle kumi in al eo ej jino kadiwōjļo̧k eo imejatoto eim̧we kōn naan in kōketak ko an William W. Phelps al eo imminene kake “Gently Raise the Sacred Strain.” Jab āinwōt imminene kake rej naan in kaenōm̧m̧an ko an eoon emen:

Irooj ej Kwojarjar.

Naan ko an raiboojoj: …

Ukweļo̧k im mour;

Men̄e jerawiwi ko ami rebōrōrō āinwōt kūrimjōn,

O, ukweļo̧k, im Enaaj jeorļo̧k bōd.⁵⁶

Ij karuwaineneik kom n̄an keememej im tōmak naan ko an Irooj im n̄an kamineneik tōmak ilo E n̄an ukweļo̧k.⁵⁷ Rilo̧mo̧or ej iakwe kom. Ekōņaan jeorļo̧k bōd. Ij lukkuun kam̧ool ilo etan ekwojarjar Jisōs Kraist, amen.

Kakeememej ko

1. Luk 5:17; bar lale Mark 2:2.

2. Luk 5:20; bar lale Matu 9:2; Mark 2:5.

3. Lale Jon 2:1–11.

4. Lale Mark 1:21–28; Luk 4:33–37.

5. Lale Jon 4:46–54.

6. Lale Matu 8:1–4; Mark 1:40–45; Luk 5:12–15.

7. LaleMatthew 8:14–15; Mark 1:29–31; Luk 4:38–39.

8. Lale Matu 8:16–17; Mark 1:32–34; Luk 4:40–41.

9. Luk 5:22–23; bar lale Matu 9:3–5; Mark 2:6–9.

10. Luk 5:24; meļeļe ko bar kobaik; bar lale Matu 9:6–7; Mark 2:10–12.

11. Lale 1 Korint 6:9–10; Alma 11:34, 37; Hilamōn 5:10–11.

12. Lale 2 Pita 2:20; Jemes 2:10; Doctrine and Covenants 82:7.

13. Lale Aiseia 1:18; Jeremeia 31:34; Luk 7:36–50; Enos 1:5; Alma 24:10; Moronai 6:8; Doctrine and Covenants 1:32; 58:42–43.

14. Lale Jekob 4:7; Alma 14:26; Moronai 10:7.

15. Mosaia 3:19; bar lale 2 Nipai 10:24–25.

16. Lale Alma 32:28, 34.

17. Matu 18:21–22; meļeļe eo kobaiktok; bar lale Luk 17:1–4.

18. LaleDoctrine and Covenants 20:5–7; 25:3; 29:3; 31:5; 36:1; 50:36; 60:6–7; 61:2; 62:3; 64:1–4, 5–7, 15–17; 75:6–8; 82:1; 84:60–61; 90:1, 6; 108:1; 110:5; 112:3; 124:74–76, 78; 132:50.

19. Lale Doctrine and Covenants 20:5–7; 29:3; 60:6–7; 61:2; 62:3; 64:5–7; 84:60–61; 90:1; 110:5; 132:50.

20. Joseph Smith—History 1:28.

21. Doctrine and Covenants 64:2; meļeļe eo bar kobaiktok.

22. Lale 1 Nephi 20:9–11; Doctrine and Covenants 24:2; 50:41; 63:47; 108:1–8.

23. Doctrine and Covenants 64:3.

24. Doctrine and Covenants 64:7.

25. Doctrine and Covenants 1:31; bar lale eoon ko 32–33; Alma 45:16.

26. Doctrine and Covenants 132:27; bar lale Matu 12:31; Luk 12:10.

27. Lale Exodus 20:13; Mosaia 13:21; Doctrine and Covenants 132:19; Moses 5:31–36.

28. Lale Alma 39:5; Doctrine and Covenants 42:24–26.

29. Lale Doctrine and Covenants 42:22–26, 75–78, 80–82; 63:13–17; 76:103.

30. Doctrine and Covenants 82:3; see also Jon 15:22.

31. Lale Moronai 6:8.

32. Lale Mosaia 15:26.

33. Lale 1 Samuel 16:7; Sam ko 24:3–4; Jabōn Kōnnaan Ko 23:7; Matu 15:18–20; Mark 7:20–23; Hibru 3:12; 3 Nipai 12:19; Doctrine and Covenants 59:8; 64:34.

34. Lale Doctrine and Covenants 20:29–30; 121:37.

35. Doctrine and Covenants 117:11.

36. Lale Bible Dictionary, “Nicolaitans.”

37. LaleRevelesōn 2:6, 15.

38. Doctrine andCovenants 56:15.

39. Lale 2 Nipai 25:23; Doctrine and Covenants 138:4.

40. Moses 7:21.

41. Ether 12:27.

42. Lale Jon 15:22; Doctrine and Covenants 1:33; 82:3.

43. Lale Alma 41:5–6; 3 Nipai 9:20; Doctrine and Covenants 137:9.

44. Lale1 Nipai 15:33; Alma 41:3–4; Doctrine and Covenants 137:9.

45. Lale Matu 6:14–15; Doctrine and Covenants 64:8–10; 98:39–48.

46. Preach My Gospel: A Guide to Missionary Service (2004), 189.

47. Thomas S. Monson, “Lo Ro Jet Āinwōt Remaron̄ Erom,” Ensign ak Liaona, Nob. 2012, 68, 69; meļeļe eo kobaiktok.

48. Doctrine and Covenants 38:10–11, 14; meļeļe eo kobaiktok.

49. Rom 3:23.

50. Doctrine and Covenants 62:1; bar lale Alma 7:12.

51. Doctrine and Covenants 61:39; meļeļe eo kobaiktok.

52. Alma 34:18; meļeļe eo kobaiktok; bar lale 2 Nipai 31:19; Alma 7:14.

53. Lale Hilamōn 13:11; Doctrine and Covenants 19:4, 13–21.

54. Lale Doctrine and Covenants 64:8–10.

55. Doctrine and Covenants 101:9; meļeļe eo kobaiktok; bar lale Doctrine and Covenants 82:1–7.

56. “Gently Raise the Sacred Strain,” Hymns, no. 146.

57. Lale Alma 34:15–17.