Ej juon Kabwilōn̄lōn̄
Jen Elder Neil L. Andersen
Jen Doulul eo an Jon̄oulruo Rijilōk ro
Eļan̄n̄e kwoj juon mijenede ej jerbal aolep raan ippān juon bāāj bini ilo kobā eo am̧, kiiō ej iien n̄an jeje kōn inik ilo būruem—kar jeje, āinwōt Paul eaar ba, “jab jeje kōn inik, ak kōn Jetōb an Anij e mour.”
Mour eo an Jisōs Kraist eaar obrak kōn kabwilōn̄lōn̄ ko: Mary jinen, juon iju ekāāl, enjeļ ro raar waļo̧k n̄an seperd ro, armej ro raar jab loļo̧kjeņ, armej ro raar maron̄ etetal, enjeļ ro ilo Gethsemane im ilo lōb eo, im kabwilōn̄lōn̄ eo eļaptata iaer ej—Jerkakpeje eo An aiboojoj.
Komaron̄ ļōmņak kōn jon̄ouljuon Rijilōk ro ilo to̧l eo epaake Galilee, ke jerkakpeje Irooj ar itok n̄an ippāer im ba n̄an er: “Innām kom̧win ilo̧k, im kōm̧m̧an ri aelōn̄ ko otemjej bwe ren ri kaļora, im peptaij er ilo etan Jema im Nejin im Jetōb Kwojarjar”?1 “Kom̧win ilo̧k n̄an aolepen laļ, im kwaļo̧k gospel n̄an armej otemjejļo̧k.”2
“Aolep āne?” “Aolep laļ?” “Aolep armej otemjeļo̧k”? En ke jerbal? Men̄e Jisōs ar kam̧wier er, raar kōļmemļo̧kjeņ eļan̄n̄e kabwilōn̄lōn̄ ko rej lukkuun m̧ool n̄an jipan̄ er leto-letak ko̧jepeļ eo.3
Tōmak eaar kajoor jen pere im Piter eaar kotak ainikien, im ba:
“Kom̧, armej in Israel, kom̧win ron̄jake naan kein aō: …
“Jisōs ri Nazeret, … [eo] eaar ketak, im kōn armej re nana kom̧ ar debwāāl im m̧an E: …
“Anij ear kejerkakpeje … Jisōs in, … [im] kōm̧ otemjej ri kōnnaan kake.”4
Eaar wōr juon jetōb eo ealikar ar lutōkleplep ilo raan eo, im 3,000 in jetōb ko raar peptaij. Ilo an Jisōs kar kallim̧ur, kōkkaļļe ko im kabwilōn̄lōn̄ ko raar waļo̧k kōn tōmak an ritōmak ro.
Ke, Kabun̄ eo an Jisōs Kraist ar jepļaaktok n̄an laļ in 183 iiō rem̧ootļo̧k, Irooj ar kakien kurup in rijilōk ro An n̄an āliji ta E ar ba m̧oktaļo̧k, ba bwe ainikien kakkōļ naaj etal n̄an aolep armej. 5 Kōnke ainikien ko̧jpeļ en etal n̄an aolep laļ, im n̄an m̧ōttan ko an laļ in.6
“Aolep armej”? “Aolep laļ”? “Aolep m̧ōttan ko an laļ in”? En ke jerbal?
Rilo̧mo̧o̧r eo ar kainōm̧m̧an Armej ro Rekwojarjar ilo Raan-ko Āliktata, 7 bwe ren lo im tōpar ke jem̧ļo̧k eo an jerbal in ekabwilōn̄lōn̄? Rej aikuj kōļmenļo̧kjeņ eļan̄n̄e kabwilōn̄lōn̄ ko rej lukkuun m̧ool n̄an jipan̄ er leto-letak ko̧jpeļ eo.
Bar juon alen, tōmak eaar eļļā ioon pere, im taujin raar peptaij. Ilo England, Elder Wilford Woodruff eaar loe juon jikin ar kōttar itok eo An. Jetōb in Irooj ar pād ioon, im eaar peptaiji 45 rikwaļo̧k ro im jimjuon bukwi membōr ro ilo allōn̄ eo m̧oktata an ilo Benbow farm.8
Ejja in wōt ilo tōre in ad. Ke Elder David A. Bednar im n̄a kar mijenede emaron̄ 40 iiō ko rem̧ootļo̧k (im n̄a imaron̄ kam̧ool n̄an eok bwe ko̧m̧ij jab rūttoon mijenede ro raar ro̧o̧l im rej jijet ilo jia būrōrō kein), Einwōt an Būreejtōn Thomas S. Monson ripooote: emaron̄ wōr 16,000 mijenede ro. Kiiō ewōr 65,000—elōn̄ ļo̧k jān kar m̧okta. Innām ar wōr 562 stake ko. Rainin elōn̄ ļo̧k jen 3,000. Ilo tōre eo, ward ko im branch ko ad raar pād ilo 59 laļ ko. Rainin ewōr ad im̧ōn jar ko ilo 189 in 224 lal ko im turtur ko an laļ in. Kōj membōr in Kabun̄ in edik uwaad ilo bōnbōn, āinwōt an Nipai kar jiron̄.9 Bōtaab ilo ejja tōre in wōt, kwe im n̄a kar kakūrm̧ool kanaan eo an Daniel kōn: “jeke juon dekā jab kōn pā [ej kūrm̧ool] ilo aolepen laļ in.”10
Rainin ej juon iien ekabwilōn̄lōn̄ kōn kabwilōn̄lōn̄ ko. Jiljino allōn̄ rem̧ootļo̧k ilo an Būreejtōn Monson kar kōjjeļāik oktak in iiō in jerbal in mijendede an likao im jiron̄ ro reitok limo n̄an jerbal e mijen ko, jetōbin Irooj ar lutōkleplep ioon aolep membōr ro. Tōmak eaar eļļā ioon pere, im likao im jiron̄ raar em̧akūt m̧aanļo̧k. Taije eo ālkin kweilo̧k eo, kar jitōn̄ eō n̄an kōmālim kūr ko an mijenede ro n̄an Būreejtōnji eo Kein Kajuon, Iaar bwilōn̄ in lo peba ko an iiō ko-18 im iiō ko 19 an likao im jiron̄ ro repojak in kōm̧m̧ani kōttōpar ko aer, loļo̧k taktō ro, intōrpiu jen bisop ro aer im stake būreejtōn ro, im jilkinļo̧k peba in mijen ko aer—aolepāer ilowaan baj lalem raan ko. Taujin ro em̧ōj aer kobatok ippāer kiiō. Ej juon kabwilōn̄lōn̄.
Jej kam̧oolol kōn kajoor in tōmak eo an sister ro, kōn oraņ lōn̄ļo̧k in mijenede ro jān peļaakin laļ in, im oraņ lapļo̧k in ripālele ro repojak in jerbal. Lemn̄oul ralitōk mijen ko rekāāl emōj an waļo̧k, im bar juon m̧ōttan jikin kaminene an mijenede (missionary training center) ilo Provo em̧ōj jino an jerbal ilo Mexico City.
Būreejtōn Thomas S. Monson ar ba: “Jej lukkuun bōk kakien eo an Rilo̧mo̧o̧r …, ‘Innām kom̧win ilo̧k, Innām kom̧win ilo̧k, im kōm̧m̧an ri aelōn̄ ko otemjej bwe ren ri kaļora, im peptaij er ilo etan Jema im Nejin im Jetōb Kwojarjar.’”11 “Kōn un in … ekōm̧m̧an an … naaj wōnm̧aanļo̧k wōt, ukōt im kōjeram̧m̧an mour ko. … Ejjeļo̧k kajoor ilo aolepān laļ in emaron̄ kabōjrak jerbal eo an Anij.”12
Jej rikam̧ool an kabwilōn̄lōn̄ ko an Irooj ilo ad kwaļo̧k ko̧jpeļ eo An ipeļaakin laļ in.
Ro jeiū im jatū, āinwōt an Irooj im̧we eļapļo̧k mijenede ro n̄an jerbal, Ej barāinwōt karuj kōļmenļo̧kjeņ ko im kōpeļļo̧k bōro ko an aolep em̧m̧aan im armej ro rem̧ool n̄an bōk mijenede ro An. Kom̧ kadede jeļā er im naaj jeļā er. Rej pād ilo baam̧le eo am im rej mour ilo jukjukinpād eo ami. Rej etal eļļāļo̧k jen eok ilo kābonin iaļ ko, jijet itūrūmi ilo jikuul, im m̧ad ippām̧ ilo intōrnet. Kom̧ij barāinwōt mōttan eo eaorōk ilo kabwilōn̄llōn̄ in ej ejaak.
Eļan̄n̄e kwoj jab juon mijenede eo ej jerbal aolep raan kōn juon bāāj ej alitoto ilo nuknuk eo am, kiiō etōreen n̄an kalitotoki juon ilo būruwōm̧—jeki āinwōt an kar Paul ba, “jab jeje kōn inik, a kōn Jetōb an Anij e mour.”13 Im mijenede ro rej ro̧o̧l, pukot mijenede tāāk eo am em̧ōr. Jab kōņake, ak likūti ijo komaron̄ loe. Irooj ej aikuji eok eļapļo̧k kiiō jen kar m̧okta n̄an juon kein jerbal ilo Pā ko Pein. Kwoj juon kein wūjlepļo̧k n̄an jerbale ilo kabwilōn̄lōn̄ in.
Kajjojo membōr ro rewānōk an Kabun̄ in kar ļōmņak kōn wāween kwaļo̧k ko̧jpeļ in. Jet rej kwaļo̧k ko̧jpeļ in, im jemaron̄ ekkatak jān er.14 Jet iaad repen auia im kōļmenļo̧kjeņ ekōjkan kōm̧m̧an em̧m̧anļo̧k, kōtmene bwe en̄jake eo enana jet iien jej en̄jake enaaj ilo̧k.
Ad ikdele n̄an kwaļo̧k ko̧jpel eo ekōm̧m̧an bwe jen aolep jar, im eaikuj, kōnke jej aikuji jipan̄ eo an Irooj.
Būreejtōn Monson eaar ba bwe jen jar kōn “eria ko ijo im̧we eo eaar jab bwe im ijo jejjab maron̄ kwaļo̧k ko̧jpeļ in ie.”15 Ilo ad kijōrjōr im radik doon e jerbal in an Jemed ilo Lan̄, Irooj enaaj kōpeļļo̧k kōjem ko n̄an kōj.
Jej barāinwōt jar kōn iien ko ad make rem̧m̧an n̄an kwaļo̧k ko̧jpeļ in. Rijilōk Paul eaar ba, “Kom̧win pojak iien otemjej bwe kom̧win uwaak n̄an jabdewōt armej ej kajjitōk ippemi … [kōn] unin kōjatdikdik eo ej ilowami.”16
Kōn pok 17 im limotak18 eo rainin ilaļ in, ej jab kabwilōn̄lōn̄ ke bwe jet wōt armej ro rej etal n̄an jar jikin kabun̄jar ko aer. Men̄e elōn̄ armej rekōņaan in epaakeļo̧k Anij im wōr ippāer juon meļeļe em̧m̧anļo̧k kōn jibadbad eutiej an mour, raar jan̄in uwaaki kajjitōk ko. Elōn̄ bōro ko raar peļļo̧k n̄an pukōt m̧ool eo, ak āinwōt an rikanaan Amos kōmeļeļeiki, “renaaj ito-itak in pukot Naan in Jeova, ak re ban loe.”19 Komaron̄ jipan̄ uwaake kajjitōk ko aer. Ilo bwebwenato ko aolep raan komaron̄ “kobaik n̄an” tōmak eo aer ilo Kraist.20
Rilo̧mo̧o̧r ar ba: “Kotak ami meram bwe en maron̄ kōmeramļo̧k laļ. Lo N̄a ij meram eo kom̧ naaj kotak lōn̄ļo̧k.”21
Ij kalim̧m̧uri kom̧, ilo ami jar n̄an jeļā wōn eo n̄an kōnono ippān, etan im mejān enaaj itok ilo ami ļōmņak. Naan ko n̄an kōnono naaj lewaj ilo aolep iien kwoj aikuji.22 Iien em̧m̧an ko renaaj peļļo̧k n̄an kom̧. Tōmak enaaj eļļā ioon pere, im Irooj enaaj kōjeram̧m̧an kom̧ kōn am make kabwilōn̄lōn̄ ko.
Rilo̧mo̧o̧r ar katakin kōj ekōjkan kwaļo̧k ko̧jpeļ eo. Em̧m̧an ippa bwebwenato eo an Andrew, eo ar kajjitōk, “Rabbai, Kwoj pād ia?”23 Jisōs emaron̄ kar uwaak kōn ijo Ej pād ie. Ak ijoke Eaar ba n̄an Andrew, “Itok im kom̧ naaj loe.”24 Ikōņaan ļōmņak bwe Rilo̧mo̧o̧r eaar ba, “Itok im jab loe wōt ijo ij pād ie ak ekōjkan ijo ij pād ie. Itok im lo wōn N̄a. Itok im en̄jake Jetōb.” Jejjab jeļā aolep men kōn tōre eo, ak jejeļā bwe ke Andrew ar lo eo jein Simon, eaar ba, “kōm̧ ar lo Messaia eo.”25
N̄an ro rej kwaļo̧k juon itok limo ilo bwebwenato ko ad, jemaron̄ ļoor waanjon̄ak eo an Rilo̧mo̧o̧r n̄an kūr tok er “itok im lale.” Jet remaron̄ bōk kūr in ad, im ro jet reban. Jej aolep jeļā bwe juon emaron̄ bōk iien n̄an bōk kūr in n̄an “itok im lale.” Jen barāinwōt lōmņak kōn ro raar pād ippād m̧oktaļo̧k ak kiiō jejjab lo er, bar kūr er n̄an ro̧o̧ltok im bar lale.
Jej kautiej kālet im iien an kajjojo armej. Irooj ar ba bwe kajjojo armej eaikuj kālet n̄an e make.26 Juon armej eo ejjeļo̧k an itok limo ejjab aikuj kadikļo̧k jem̧doon im iakwe eo an ilo m̧ōttan im iakwe. Men̄e ak karuwainene eo jab bōk e ilo am kūr ro jet “itok im lale,” kwonaaj en̄jake kōmālim eo an Irooj. Im kōn kōmālim in, juon kakkobaba ej jon̄e tōmak n̄an kwaļo̧k ami tōmak bar juon alen.
N̄an ro rej kōjerbal intōrnet im mobile phone ko, ewōr wāween ko n̄an karuwainene ro jet n̄an “itok im lale.” Jen kwaļo̧k tōmak in ad āinwōt juon m̧ōttan ilo kajjojo raan in ad mour. LDS.org.Mormon.org.Facebook.Twitter—aolepāer rej letok iien ko rem̧m̧an.
N̄an kwaļo̧k ko̧jpeļ eo, membōr ro reddik ilo Boston kar jino jet blog ko.27 Ro raar kobatok ilo Kabun̄ eo kar jino ekkatak ko aer online, ālkin kōnono ippān mijenede ro. Juon iaer eaar ba: “Ejjab jerbal in mijenede. Ej limo in mijenede.”28
Jej aolep ippān doon ilo jerbal in. Ippān ro uwaan ward eo im mijenede ro, jej kōllaajrak im jar im jipan̄ doon. Lōmņak kake im jar kōn mijenede ro rej jerbal aolep raan. Leke er ippān baam̧le eo im ro m̧ōttad. Irooj ej leke er im ar kūr er n̄an katakin im kōjeram̧m̧an eo rej pukot E.
Būreejtōn Paulo Kretly ilo Mozambique Moputo Mission ar kwaļo̧k en̄jake in: “Ej juon iminene ilo Mozambique [n̄an] ripālele ro rej jokwe ippān doon [ilo aer jab m̧are kōnke] ejelet m̧anit an Ri Africa [ro] juon menin leļo̧k jen eo ej m̧are, juon menin leļo̧k enan̄in aolep ripālele rejjab maron̄ loe.”29
Membōr im mijenede ro raar ļōmņak im jar kōn kilen jipan̄.
Uwaak eo n̄an jar ko aer ar bwe rej aikuj in kwaļo̧k kōn kien erreeo im aorōk eo an m̧are im baam̧le ko indeeo. Im jipan̄ ripālele ro n̄an ukwelo̧k im jino m̧are, raar katakin er bwe m̧ōņōņō ej itok wōt kōn ļoor Jisōs Kraist.
En̄in ej juon pijain ripālele ro jān ruo jikin ko reoktak ilo Mozambique. Kar m̧are ilo Bōļaide, raar peptaij ippān ruo iaan ajri ro nejier ilo Jadede.30 Ro m̧ōttāer im baam̧le eo raar ruwainene in “itok im lale,” im bukwi raar “itok im lale.”
Ālkin peptaij eo, juon sister ar ba, “Jej aikuj in kālet eļan̄n̄e jej ļoor m̧anit ko an ro jim̧m̧ad ak n̄an ļoor Jisōs Kraist. Jej kālet n̄an ļoor Kraist.”31
Komaron̄ in jab jokwe ilo Mozambique, ak ilo karōk eo am make, ilo m̧anit eo am make, komaron̄ kwaļo̧k ko̧jpeļ eo em̧ōj an jepļaaktok an Jisōs Kraist.
Jar n̄an Jemedwōj Ilan̄. En̄in ej jerbal eo An ekwojarjar. Enaaj tōl kom̧ n̄an kōm̧m̧ane ta eo. Enaaj kōpeļļok kōjem ko, Enaaj lewaj iien ko rem̧m̧an im kōm̧akūt men ko reppen. Irooj eaar ba bwe ainikien kakkōļ enaaj etal n̄an aolep armej jen ainikien rikaļoor ro An, im ejjeļo̧k juon enaaj kabōjrak er.32
Ij kam̧ool bwe ainikien Irooj ej n̄an aolepān laļ in, bwe aolep armej ren ron̄ kake ren maron̄ ron̄.” 33 Ej juon kabwilōn̄lōn̄. Ej juon kabwilōn̄lōn̄. Ilo etan Jisōs Kraist, amen.