M̧weo: Jikin Ekkatak eo kōn Mour

Jen Elder Enrique R. Falabella

Jen Jiljilimjuonnn̄oul eo

Katak ko rej katak kaki ilo m̧weo―jikin eo me emaron̄ erom juon m̧ōttan lan̄ ijin ioon laļ.

Jet jinen im jemān rej jekpen kōn bōd ko rekar kōm̧m̧ani ilo m̧weo, kwaļo̧k bwe unin an waļo̧k men in ej bwe ejjeļo̧k juon jikuuļ ijo kom maron̄ bōk kūlaaj ko kōn ekōjkan erom jinen im jemān ro rem̧m̧an.

Ilo m̧ool, ewōr jikin jikuuļ in kain ekkatak rot in im emaron̄ erom jikin ekkatak eo em̧m̧antata iaan aolep. Jikin ekkatak in ņaetan m̧weo.

Ilo Aō ememļo̧kjeņ kōn iien ko m̧o̧kta ilo mour e aō, Ij keememej tōren lem̧ōņōņō ko Ikar iminene kaki ippān kōrā eo ippa. Ilo Aō kwaļo̧k ememļo̧kjeņ kein ippāmi, kom maron̄ keememej ko ami make—iminene ko me remaron̄ kam̧ōņōņō ak kabūrom̧ōjm̧ōj; jej ekkatak jen aolepāer.

1. Tampeļ Ej Jikin Eo

Ke Iaar jepļaak jen mijen eo aō, Iaar ioon juon jiron̄ edeo̧, koļaan bōran ekilmej im aitok etōpar ipin. Mejen eaiboojoj im kilep kōļarier āinwōt anii im an ettōn̄dikdik ekōm̧m̧an bwe ro jet ren ettōn̄ n̄e rej loe. E eaar kareel eō jen iien eo iaar loe.

Kōrā eo pāleeō ar kōm̧m̧ane kōttōpar eo n̄an m̧are ilo tampeļ eo ar epaaktata men̄e ebōk juon tūreep eo eļapļo̧k jen 4,000 m̧ail ko (6,400 km).

M̧are eo am ilo kien ekar jim̧or kam̧ōņōņō im kabūrom̧ōjm̧ōj, kōnke kōm ar m̧are wōt n̄an mour in. Opija eo ekar kwaļo̧k naan ko “Im kiiō Ij ņa etam̧ leo im lio pālele,” ak ejjab etto, eaar ba, m̧ae mej kom̧ij jepel.”

Kōn lukkuun ujlepļo̧k kōm ar kakkoņ jāān n̄an wiaik juon tikōt n̄an kelo̧kļo̧k wōt n̄an Mesa Arizona Temple.

Ilo tampeļ, bukelōlō ilo lokatok, juon rijerbal kōmālimi ar kwaļo̧k naan ko iaar kōņaan ron̄, eo kar ņaetam̧ leo im lio pālele n̄an kiiō im n̄an indeeo.

Juon m̧ōtta ekar bōk kōm n̄an Jabōt Jikuuļ. Ilo kweilo̧k eo, eaar jutak im kwaļo̧k kadkadim n̄an kūlaaj eo. Ilo an dedeļo̧k kweilo̧k eo, juon brother ekar jipadōktok n̄a im idik peiū, likūt 20 dala ņa ie. Tokālik, bar juon brother eaar kajipadōktok eō barāinwōt, n̄an bwilōn̄ eo aō, eaar barāinwōt likūt juon jāān ilo peiū. Ikar m̧ōkaj im pukōt kōrā eo ippa, eo ar ettoļo̧k jen ruum̧ eo, im kar lam̧ōj, “Blanquy, idik pein aolep!”

Ālkin an bwe jāān eo kōm kar aini n̄an jepļaak n̄an Guatemala.

N̄an pād ijo eutiej tata;

Jej aikuj deļo̧n̄e bujen ekāāl im ejjeļo̧k jem̧ļo̧kin an m̧are.¹

2. N̄an Bōke, Kwoj Aikuji Ruo Armej

Juon iaan matto ko an lio pāleeō “N̄an bōke, kwoj aikuji ruo armej im iban juon iaer.”

Irooj eaar alikkar an kōmeļeļik kadkad ko me raikuj tōl kōm̧m̧an ko ad n̄an ro jet. Kareel kein reppen, aitok kitien en̄taan, aenōm̧m̧an ineem̧m̧an, im iakwe jab kine.²

Jerbal in kōmetak ilowaan baam̧le ej juon kaminene me edik an waļo̧k ilo jet jukjukinpād ko, im jej m̧ōņōņō ilo menin. Ijowōtke, jej ettoļo̧k wōt jen joļo̧k en̄jake ej kōmetak. Jorrāān eo kar waļo̧k jen kain kōmetak in enaaj pād wōt ilo ememļo̧kjeņ eo ad ium̧win juon iien eaitōk, ej kakinejnej jekjekid, ej kwaļo̧k kōjdāt ilo būruwōd, ej kadikļo̧k ad kilen kauteij, im ej kobrak kōj kōn mijak.

Bōk kuņaad ilo iien m̧are an celestial ejjab bwe, Jej barāinwōt aikuj mour juon mour in celestial.

3. Juon Ajri Eo ej Al Ej juon Ajri Elem̧ōņōņō

Menin ej bar juon mato an kōrā eo ippā emakijkij an kwaļo̧k e.

Rilo̧mo̧o̧r emeļeļe aorōkin al kwojarjar. Jeje ko rekwojarjar rej kwaļo̧k, “Im ke em̧ōj aer al, rej diwōj im ilo̧k n̄an toļ Olivet.”³

Im kōnono kōn Rikanaan Joseph Smith, Eaar ba; Irooj ar ba Ej lan̄lōn̄ ilo juon al an bōro, im bwe al eo an mour wānōk ej juon jar n̄an E, im renaaj jeram̧m̧an kake.⁴

Ekam̧ōņōņō n̄an ron̄ an juon ajri edik al eo jinen im jemān raar katakini n̄an al, “N̄a Nejin Anij.”⁵

4. Ij Aikuji Eok n̄an atōbakwoj Eō

Naan ko, “Ij Iakwe Eok,” “Komool Tata,” im “Jeorļo̧k Bōd” rej āinwōt kein kemour n̄an jetōb. Remaron̄ kōm̧m̧an bwe ro raar būrom̧ōj ren m̧ōņōņō. Rej letok aenōm̧m̧an n̄an jetōb ko rejorrāān, im rej kapenļo̧k en̄jake in iakwe eo ilo būruwōd. Āinwōt menin eddōk ko men̄e ejjabwe dān, ād iakwe ej waļo̧k im kōņaan ilo ad likūt naan ko jet im m̧akūtkūt in iakwe ko.

Ij keememej raan ko kōm kijon̄ ijjilōkļo̧k leta in iakiakwe ilo jikin letok letak meel ak kōjkan am kijon̄ aini jet jāān ko n̄an ko̧o̧ļe ro rejitenbōro jen juon talpoon ak kōjkan am jin̄a ak jeiki poem ko ilo peba ko ejjeļo̧k koppaer.

Rainin aolepān ainikien kein rej āinwōt jikin kaloojoj!

Kein jerbal ko rainin im iiō in rekōm̧m̧an bwe jen bwilōn̄. Jon̄an an pidodo jilkinļo̧k juon ennaan an iakwe ak kam̧m̧oolol. Jodikdik ro rej kōm̧ane aolep iien. Ej ļo̧kjenaō eļan̄n̄e menin im kōmālmel ko jet raiboojoj rej wōnm̧aanļo̧k eļan̄n̄e moko im̧ōd rej dedeļo̧k. Juon iaan ennaan ko rekāāl iaar bōke jen kōrā eo ippa ej riit āinwōt in: “Juon atōbakwoj āinwōt lan̄, juon mejenma āinwōt al, im juon joten āinwōt allon̄. Raan em̧m̧an, Ij iakwe eok.”

Ij jab maron̄ kaarmejete en̄jake in āinwōt ij pād lan̄ eļan̄n̄e ij bōk ennaan rōt in.

Jemed ilo Ilan̄ ej juon waanjon̄ak eweppen n̄an kwaļo̧k iakwe. Āinwōt An kar letok Nejin, Eaar kōjerbal naan ko “En̄in ej Nejū jitōn bōro, Ij m̧ōņōņō kake.”⁶

5. Ij Iakwe Bok in Mormon im Aō Rilo̧mo̧or, Jisōs Kraist.

Iaar obrak kōn en̄jake ke ikar lo an kōrā eo ippa riiti Bok in Mormon eo aolep raan. Ilo an kōm̧m̧an āindein, Imaron̄ en̄jake naan in kam̧ool eo an baj lo lan̄lōn̄ ilo paotokin āinwōt an riiti elōn̄ kōttan peij ko me rej kam̧ool kōn mijen eo an Rilo̧mo̧or eo.

Jon̄an mālōtlōt rej naan ko an ad Rilo̧mo̧o̧r: “Kom̧ij pukōt ilo Jeje ko; bwe ilo er kom̧ij ļōmņak ami mour indeeo; im kein rej kōnnaan kōn Eō.”⁷

Im̧we kōn menin, Ij jiron̄ jibū Raquel, eo ej kab jeļā riit, “Ta eo komaron̄ ba kōn kōm̧m̧ane juon kōttōpar n̄an riit Bok in Mormon?”

Uwaak eo an ekar “Ak Lajimma, elukkuun pen. Ej juon bok ekilep.”

Innām iaar kajjitōk ippān n̄an riiti juon peij n̄an n̄a. Ikar kwaļo̧k juon waj im kawawaiki. Iaar ba; “Jilu wōt am minit, im Bok in Mormon eo ej jeje ilo kajin Spanish ewōr 642 peij ko ie, kōn menin kwoj aikuji 1,926 minit.”

Menin emaron̄ kar ļapļo̧k an kamijake, kōn menin ikar ajije nōmba eo kōn 60 minit im jiron̄ e bwe eaikuji wōt 32 awa n̄an riit—dikļo̧k jen juon raan im jimmōtan!

Innām eaar ba n̄an eō, “Elukkuun pidodo, Jimma.”

Ilo jem̧ļo̧kin, Raquel, brother eo an Esteban, im ajri ro jet jibūm raar bōk eļap iien jen menin kōnke bok in aikuj riiti kōn jetōb an jar im kōlmenļo̧kjeņ.

Kōn iien, ilo ad katak n̄an lan̄lōn̄ ilo jeje ko rekwojarjar, jej aikuj kwaļo̧k āinwōt Sam ko: “E nan̄in tōn̄al naan ko Am̧ n̄e Ij edjon̄i, aet re tōn̄al jān hōnni ilo lo̧n̄iō!”⁸

6. Ejjab Bwe n̄an Jeļā Jeje ko Rekwojarjar; Jej Aikuj Mour Kaki

Ij keememej ke iaar jepļaak jen mijen eo aō, im kar aikuj niknik pukōt jeje ko rekwojarjar, ikar ļōmņak ijeļā aolepāer. Ilo iien kōmij jerā wōt, Blanquy im N̄a kijon̄ katak jeje ko rekwojarjar ippān doon. Ikar kōjerbal elōn̄ iaan kakeememej ko aō im eoon in kam̧ool ko n̄an kwaļo̧k jeļā eo aō kōn ko̧jpeļ eo ippān. Ālkin am̧ m̧are iaar jino kile eļap āinwōt aō kar katak juon katak em̧m̧an jen e. Imaron̄ kar kajion̄ katakini kōn ko̧jpeļ eo, bōtaab eaar katakin e ko̧jpeļ eo, ak eaar katakin eō ekōjkan mour kake.

Ke Rilo̧mo̧or eo eaar kōjem̧ļo̧k Katak eo an Ioon Toļ eo, Eaar ļeļo̧k naan in rōjan̄ in: “Innām jabdewōt eo ej ron̄jake naan kein Aō, im kōm̧anm̧ani, naaj kajjion̄e er āinwōt armej eo ejeļāļo̧kjeņ, im ej kalōk m̧weo im̧ōn ioon bar.”⁹

Ro me rej mour kōn katak ko an celestial loi ilo jeje ko rekwojarjar rej letok aenōm̧m̧an n̄an ro rej en̄taan. Rej bōktok lan̄lōn̄ n̄an ro rej inepata, tōl n̄an ro rejebwābwe, aenōm̧m̧an n̄an ro rej būrom̧ōj, im juon tōl em̧ool n̄an ro rej pukōt m̧ool eo.

Ilo tukaduin:

Tampeļ ej Jikin eo.
N̄an bōke, kwoj aikuji ruo armej.
Juon ajri eo ej al ej ajri eo elem̧ōņōņō
Ij aikuji eok n̄an atōbakwoj eō.
Ij iakwe Bok in Mormon im aō Rilo̧mo̧o̧r, Jisōs Kraist.
Ejjab bwe n̄an jeļā jeje ko rekwojarjar; jej aikuj mour kaki.

Men kein im elōn̄ bar jet katak ko katak kaki ilo m̧weo—jikin eo me āinwōt lan̄ ijin ioon laļ in.¹⁰ Ij kam̧ool bwe ko̧jpeļ eo an Jisōs Kraist im karōk eo an Jemedwōj Ilan̄ ej letok juon tōl em̧ool ilo mour in im kallim̧ur kōn mour indeeo, ilo etan Jisos Kraist, amen.