Emen Taitōļ ko
Jen Būreejtōn Dieter F. Uchtdorf
Rikakpilōklōk eo Kein Karuo ilo Būreejtōnji eo Kein Kajuon
Ikōņaan elmakote tok emen taitōk ko … ke emaron̄ jipan̄ kōj kile jerbal ko ad ilo karōk indeeo eo an Anij im aorōkiid āinwōt rikabwijer priesthood ro.
Em̧m̧aan ro jeiū im jatū raorōk im ro m̧ōtta rejitenbōro,, ekobrak būruō kōn kammoolol im lan̄lōn̄ n̄an pād ippāmi. Ij nōbar kom̧ baba im jim̧m̧a ro raar bōktok ļaddik ro nejūmi im jibūmi. Ij kōjeram̧m̧an kom̧ likao raņ ro kar kālet n̄an pād ijin rainin in. En̄in ej jikin eo ejim̧we n̄an ami pād. Ij kōtmāne bwe kom̧ maron̄ en̄jake jem̧doon in an em̧m̧aan me ej kobaik kōj, im Ij jar bwe ijin, ilubwilijimi brother raņ kom̧ naaj lo jikimi, jipan̄, im jem̧jerā.
Jet iien kōj em̧m̧aan ro rej kwaļo̧k kadkadiid kōn taitōļ ko. Elōn̄ iaad rej kabwij elōn̄ļo̧k taitōļ ko, im kajjojo taitōļ ej kwaļo̧k juon men eo eaorōk kōn kadkadid. N̄an waanjon̄ak, jet taitōl rej kwaļo̧k jerbal ko ad ilo baam̧le ko, āinwōt nejin ļaddik, jein im jatin em̧m̧aan, leo pālele, im jemen. Taitōl ko jet rej kwaļo̧k kadkadin jerbal ko ad ilo laļ in, āinwōt taktō, ritariņae, ak rijin̄a. Im jet rej kwaļo̧k kadkadin kūr ko ad ilo Kabun̄ in.
Rainin ikōņaan elmakote tok emen taitōļ ko me Ij tōmak rej n̄an aolep rikabwijer priesthood ro peļaakin laļin—taitōl ko me remaron̄ jipan̄ kōj kile jerbal ko ad kajjojo ilo karōk indeeo eo an Anij im ad em̧m̧an āinwōt rikabwijer priesthood ro ilo Kabun̄ eo an Jisōs Kraist im Armej ro Rekwojarjar ilo Raan ko Āliktata.
Nejin Jemedwōj Ilan̄
Juon taitōl ej kōmeļeļeik kōj aolep ilo wāween eo eaorōktata ej ļaddik eo Nejin Jemedwōj Ilan̄. Mekarta kain jekjek rot kōj ak kain rot jej kōm̧m̧ani, jejjab aikuj meļo̧kļo̧k bwe jej lukkuun ajri in jetōb ro nejin Anij. Jekar ajri ro Nejin m̧okta jen ad kar itok n̄an laļ, im jenaaj ajri ro Nejin n̄an indeeo. Pedped in m̧ool in eukōt wāween ad kōlmenļo̧kjeņ kōn kōj make, brother im sister ro jeid im jatid, im wāween ad kejokļo̧kjeņ kōn mour.
Mekarta, ejjeļo̧k iaad ej mour ilo dipio in ekkar kōn men otemjej ko me taitōļ in ej letok, “otemjej raar jero̧wiwi im rej likjab jān aiboojoj an Anij.”1
Emaron̄ jab kōketak ilo iien ko n̄an jeļā ta meļeļein n̄an erom juon ļaddik nejin Anij im likjab n̄an kakūrm̧ool aorōkid āinwōt juon ļaddik nejin Anij. Kōjdāt ekōņaan bōk jikin en̄jake kein. Setan eo enaaj kōm̧m̧an bwe kwōn kwaļo̧k kadkadim make ekkar n̄an jerawiwi ko am̧ ijjeļo̧kin aorōk eo am̧ ekwojarjar. Em̧m̧aan ro jitōnbōro jab ron̄jake e.
Em̧ōj ad aolep lo juon nin̄nin̄ eo ej ekkatak etetaļ. Ej bōk juon bun̄tōn nee edik im mōjņo̧. Ej tippo̧k. Jej ke kauwe kain kajjion̄ rōt in? Jaab. Ta eo jemān enaaj kaje juon nin̄nin̄ kōn an okjak? Jej kōketak, jej kappokpok, im jej nōbar, kōnke kōn aolep bun̄tōn nee edik, ajri eo eļapļo̧k an erom āinwōt ro jinen im jemān.
Kiiō em̧m̧aan ro jeiū im jatū, keidi n̄an weppen eo an Anij, kōj armej eļapļo̧k ad ainwōt nin̄nin̄ eo ej m̧akūt likļo̧k im m̧aanļo̧k. Ak Jemedwōj Ilan̄ ekōņaan bwe jen ļapļo̧k ad erom āinwōt E, im em̧m̧aan ro rejitenbōro, menin eaikuj erom ad kōttōpar indeeo barāinwōt. Anij emeļeļe bwe ejjab m̧ōkaj ad erom āinwōt E, ak ijjeļo̧kin kōn bōk juon peran juon bun̄tōn nee ilo juon iien.
Ijjab tōmak ilo juon Anij eo me enaaj kōm̧m̧ane kakien im kien ko n̄an kōttar wōt ad wōtlo̧k kōn menin En maron̄ kaje kōj. Ij tōmak ilo Jemedwōj Ilan̄ eo ej iakwe im kea im eo ej lan̄lōn̄ ilo aolep kijejeto ko ad n̄an jutak kankan im kajipadōkļo̧k E. Men̄e jej okjak. Ej lipjōrjōr kōj n̄an ad bōk peran—jamin jab ebbweer ak kajion̄ eddo ko ad.
Jemed ilo Lan̄ ej katakin ajri ro Nejin im emakijkij an jilikinļo̧k jipan̄ ko jab loi jen lan̄ n̄an ro me reikdelel n̄an ļoor Rilo̧mo̧o̧r eo.
Rikaļoor an Jisōs Kraist
Im ej tōl kōj n̄an taitōl eo juon me kōj aolep ewōr ippad: aolep ro mej rej kōņaan ļoor Kraist rej ņaetaer Rikaļoor ro An. Men̄e jej kūle bwe ejjeļo̧k jej eweppen, jejjab kōjerbal m̧ool eo āinwōt juon jekpen n̄an do̧o̧rlaļļo̧k kōtmāne ko ad, jab kōmjāje kōn kam̧m̧oolol ko jekar loi n̄an karum̧wijļo̧k raan in ad peptaij, ak m̧akoko n̄an erom em̧m̧anļo̧k, weppenļo̧k, erom rikaloor ro rem̧m̧anļo̧k an ad Maajta.
Keememej bwe Kabun̄ in an Jisōs Kraist im Armej ro Rekwojarjar ilo Raan ko Āliktata ekar jab ejaak, n̄an em̧m̧aan im kōrā ro me rewāppen ak jab jelōt er kōn kapo ko an mour,bōtaab, kar ejaake n̄an armej āinwōt kwe im ņa. Im ej ejaake ioon dekā eo an ad Ripinmuur, Irooj Jisōs Kraist,2 eo an Pinmuur jemaron̄ erreo im erom “citizen … ippān ro rem̧m̧an, im kom̧ nukun Anij.”3
N̄e en kar jab Pinmuur eo an Jisōs Kraist, mour en kar ejjeļo̧k tokjen kōn ejjeļo̧k kōjatdikdik ak jekļaj. Kōn Pinmuur eo, mour ej juon tūreep eo ej im̧we an eddōkļo̧k im wōnm̧aanļo̧k eo ej tōl ļo̧k n̄an mour indeeo im̧aan mejān Jemed.
Ak iien in Pinmuur ej n̄an jipan̄ kōj aolep erom āinwōt Kraist, ejjab meļeļe n̄an kōm̧m̧an bwe kōj aolep jen āinwōt juon. Jet iien jej bōd im ļōmņak bwe kadkad ko me reoktak jen ko ad rej waļo̧k ko an jerawiwi. Jej maron̄ barāinwōt kōm̧m̧an bōd ļōmņak bwe kōnke ro jet reoktak jen kōj, eaikuj meļeļein rejjab kam̧ōņōņōik Anij. Kōlmenļo̧kjeņ rōt kein rekōm̧m̧an bwe jet armej ren ļōmņak bwe Kabun̄ in ekōņaan kōm̧m̧an bwe aolep membōr ro an ren erom āinwōt juon—bwe kajjojo membōr reitokier, en̄jake, ļōmņak, im m̧wil ko aer raikuj āinwōt membōr ro jet. Menin enaaj erom jum̧ae mālōtlōt eo an Anij, eo ekar kōm̧anm̧an aolep armej bwe ren oktak jen m̧aan eo jein im jatin, aolep nejin ļaddik oktak jen jemen. Men̄e po ro rejjab juon wōt ilo kadkad ko aer im kadkad ko an jetōb.
Ej barāinwōt jum̧ae jibadbad eo im kōttōpar eo an Kabun̄ eo an Jisōs Kraist, eo ej kile im kōjparok anemkwoj an m̧wil em̧m̧an—kōn aolep jekjek ko repen tōpari—an kajjojo im aolepen ajri ro Nejin Anij. Āinwōt rikaļoor ro an Jisōs Kraist, jej ippān doon ilo naan in kam̧ool eo ad kōn jepļaaktok eo an ko̧jpeļ im ad kallim̧ur n̄an kōjparok kien ko an Anij. Ak kōj eoktak wāweid ilo ekkāleel ko ad ilo manit, jukjukinpād, im kien.
Kabun̄ in ej kajoorļo̧k n̄e jej bōk em̧m̧an eo an oktak in im kōketak kajjojo n̄an eddōkļo̧k im kōjerbal talōn ko ad n̄an kōperan im kōkajoorļo̧k rikaļoor ro ad.
Em̧m̧aan raņ, rikaļooran ej juon ito itak juon mour edipio n̄an ļoor Rilo̧mo̧o̧r eo ad. Rikaļooran ilo juon tūreep turājet in Kraist jen Bethlehem n̄an Golgotha, jenaaj bōk elōn̄ iien ko rem̧m̧an n̄an mour juon mour an rikaļooran. Jet iien enej alikkar bwe mour epenļo̧k jen ad kōtmāne. Bōtaab ilo jerbal ko ad an priesthood, jej aikuj bōk peran n̄an ļoor ad Rilo̧mo̧or, barāinwōt n̄e mālijjon̄ ko ad im men ko reppen ilo mour relukkuun baj pen n̄an jelm̧ai.
Kōn aolep bun̄tōn nee jej būki n̄an ļoor Nejin Anij, jemaron̄ keememej bwe jejjan̄in weppen. Bōtaab jej aikuj erom ro rikaļooran redim im pen. Jejjab aikuj ebbweer. Jej aikuj m̧ool n̄an bujen ko ad. Jej aikuj iien otemjej kalimjōk ad Rilo̧mo̧or ilo ad jipadōkļo̧k E, juon bun̄tōn nee eo ejjab weppen ālkin eo tok juon.
Rikōmour Jetōb ko
Em̧m̧aan ro jitōn bōro, eļān̄n̄e jej m̧ool n̄an ļoor ad Irooj Jisōs Kraist, jej aikuj lukkuun bōk taitōl kein kajilu: rikōmour jetōb ko. Kōj ro raar ekkapit n̄an priesthood eo Anij rej kūr n̄an “kemour ro jet ”.4
Ej ad jerbal n̄an kalek, kōkāāl, kōkajoor, kōketak, im kōm̧m̧ane likio in. Ad jerbal ej n̄an ļoor waanjon̄ak an Rilo̧mo̧o̧r eo im jipan̄ ro rej en̄taan. Jej “m̧ōņōņō in jan̄ ippān ro rej jan̄, aaet im kaenōm̧m̧an ro rej pād ilo aikuj in kaenōm̧m̧an”5 Jej kori kinjen ko an rien̄taan ro. Jej “dāpij lōn̄ļo̧k pā ko rej toto im bukwien ko rem̧ōjņo̧.”6
Āinwōt rūkaki in lo̧ļo̧k m̧oko, jej rikōmour ro. Āinwōt ritōl ro an priesthood, jej kemour ro. Āinwōt ro jemen, ļaddik ro, m̧aan ro jein im jatin lōma ro pālele, jej aikuj kallim̧ur n̄an leļo̧k kemour ko. Jej bōktok bōktak ilo juon pā juon ninne an oil kwojarjar n̄an kōjeram̧m̧an rinan̄inmej; ilo pā eo juon jej bōktok bōktak juon pilawe n̄an naajdik ro rej kwole; im ilo būruwōd jej bōktok bōktak aenōm̧m̧an in naan an Anij, “eo ej kemour jetōb ekinejnej.”7
En̄in ej eddo eo ad m̧okta im aorōktata āinwōt rikabwijer priesthood ro—im ej n̄an jim̧or rikabwijer Priesthood eo an Aaron im Priesthood eo an Melkisedek. Jepļaaktok eo an ko̧jpeļ eo an Jisōs Kraist ej kōjeram̧man mour ejjab baj wōt n̄e jej tōmak e—ak eļapļo̧k n̄e jej mour kake. Kajjojo rej ketak im baam̧ļe ko rej kajoorļo̧k eļān̄n̄e rej mour kōn pedped ko an ko̧jpeļ. Ej ad jeram̧m̧an im eddo n̄an jab baj ba men ko rejim̧we, bōtaab barāinwōt n̄an kōm̧m̧ane men ko rejim̧we.
Rilo̧mo̧or ej rijerbal an menin bwilōn̄ ko. Ej Rikōmour eo eļap. Ej ad waanjon̄ak, ad meram, men̄e ilo iien ko remaroktata, im Ej kwaļo̧k n̄an kōj iaļ eo ejim̧we.
Jej aikuj ļoor E. Jej aikuj kakūrm̧ool jerbal eo ad āinwōt rikabwijer priesthood ro kōn jerbal n̄an Anij im ro jeid im jatid.
Rijolōt Mour Indeeo
Taitōl eo kein kemen jej aolep kwaļo̧k kōro̧o̧l kōj n̄an taitōl eo m̧okta ilo ļaajrak eo ad. AĀinwōt ļaddik ro nejin Jemedwōj Ilan̄, kōj jej rijolōt ro n̄an aolepen men ko An.
“Jetōb ej make kōnnaan n̄an ad bwe kōj ro Nejin Anij:
“Im eļān̄n̄e ro nejin, innām ri jolōt, rijolōt an Anij, im rijolōt ippān Kraist, eļan̄n̄e jej en̄taan Ippān, bwe jen barāinwōt aiboojoj Ippān.”8
Lōmņak kōn menin, em̧m̧aan ro jeiū im jatū jitenbōro. Kōj jej rijolōt ro ippān Kraist‼
Innām emeļeļe ke bwe elōn̄ iaad rej barāinwōt joļo̧k iien ko ad raorōk, ļōmņak ko, im jāān im kajoor ko ilo kajion̄ pukōt m̧weie ak n̄an kam̧ōņōņō kōn kein jerbal ko rekāāl im em̧m̧antata?
Irooj eaar do̧o̧r im̧aan mejed kallim̧ur eo ekwojarjar bwe jabdewōt eo ej lukkuun tōmak m̧ae iien bōke priesthood kein ruo kōm̧m̧ane kūr ko aer, [naaj] bōk Irooj. Im armej eo ej bōk E bōk Jemen, kōn menin aolep men ko an Jemen naaj leļo̧k n̄ane.9
Ijjab maron̄ antooneļo̧k aolep men ko me rekitbuuj kallim̧ur in. Bōtaab ijeļā bwe eaiboojoj ekwojarjar, ej indeeo, im ej tokjen kijejeto ko ad aolep ilo mour.
Jeļā menin, ekōjkan ad jab kōņaan im m̧ōņōņō in pād ilo jerbal an Irooj im em̧m̧aan ro m̧ōttad im kadedeļo̧k eddo ko ad ilo priesdhood an Anij?
Men in ej juon jerbal eo euteij me enaaj idajon̄jon̄e aolep ad m̧akūtkūt im kapen aolep kajoor ko ad. Jej ke kōņaan n̄an en̄jake kōjeramm̧an ko im tōl jen lan̄ im kam̧ool unoojdikdik an Jetōb Kwojarjar an kwaļo̧k iaļ n̄an kōj? Innām jej aikuj jino jerbal im do̧o̧r kijejeto ko ad n̄an juon jerbal em̧m̧an, eo eļapļo̧k jen kōj!
Jerbal n̄an Anij im em̧m̧aan ro m̧ōttad naaj idajon̄jon̄e kōj im ukōt kōj n̄an jet men ko rem̧m̧anļo̧k me jekar ļōmņak en kar jab.
Bōlen kom̧ij lōmņak bwe jab aikuji kom̧,bwe jab kōņaan kom̧, bwe kom̧ij jab aorōk.
Ij lukkuun jeorļo̧k aō bōd eļan̄n̄e jabdewōt rikabwijer priesthood ej en̄jake wāween in. Ilo m̧ool Jemedwōj Ilan̄ eaikuj im ekōņaan kom̧. Im Ij jiron̄ kom̧ kōn juon kam̧ool bwe Kabun̄ eo eaikuji kom̧.
Kom̧ ij jab jeļa ke bwe “Anij ear kāalōt men in bwebwe ko an laļ bwe en kajook ro rimālōtlōt; im Anij ear kāālōt men in m̧ōjņo̧ ko an laļ bwe En kajook men ko reppen”?10
Bōlen em̧ool bwe kōj jem̧ōjņo̧. Bōlen jejjab mālōtlōt ak kajoor. Bōtaab eļan̄n̄e Anij ej jerbal ilo kōj, ejjeļo̧k armej im ejjeļo̧k men emaron̄ jum̧ae kōj.11
En̄in ej unin aikuji kom̧. Ewōr kuņami make n̄an kōm̧m̧an, im Anij emaron̄ kōm̧m̧ane ilo juon wāween eo ekajoor. Ami kajoor n̄an leļo̧k kuņaami ejjab pedped wōt ilo kūr ko ami ilo Kabun̄ in. Ejjeļo̧k jon̄an iien ko ami rem̧man n̄an jerbal. Eļan̄n̄e kom̧ij jab bōk kuņaami ilo jerbal an Anij, Ij kōketak kom̧ n̄an jino bōk kuņaami ilo jerbal an Anij.
Jab kōttar n̄an juon kūr m̧okta am lukkuuun pād ilo kalek aelōn̄ in Kiin̄ an Anij. Āinwōt juon rikabwijer priesthood, em̧ōj kadede kūr kom̧ n̄an jerbal. Katak naan an Anij aolep iien, jar n̄an Jemedwōj Ilan̄ aolep raan, mour ekkar n̄an pedped ko an ko̧jpeļ leļo̧k kam̧m̧oolol n̄an Anij, im kajjitōk kōn An tōl. Innām mour kōn ta eo kom̧ ar ekkatak, m̧okta ilo baam̧le eo am̧ make ak barāinwōt ilo aolepen jekjek ko ilo mour eo am̧.
Ilo ejaak al em̧m̧an, ewōr kuņaami make n̄an kōjan̄e—ami make noot n̄an al. Men̄e kom̧ij likjab n̄an kōjan̄i aln̄irn̄ir in an al enaaj wōnm̧aanļo̧k wōt n̄an kōm̧m̧an. Ak n̄e kom̧ij jerbal im kobaļo̧k ilo kumi in al im kōtļo̧k bwe kajoor an Anij en jerbal ilo kom̧, kom̧ naaj lo “wūntō ko an lan̄” peļļo̧k, im Enaaj “lutōkļo̧k jeraam̧m̧an n̄an kom̧ m̧ae iien enaaj ejjeļo̧k aikuj.”12 Kakūrm̧ool aorōk eo am̧i em̧ool āinwōt juon ļaddik nejin Anij, im kom̧ maron̄ erom kareel em̧m̧an ilo baam̧le ko am̧i m̧oko m̧ōmi, jukjukinpād, laļ eo am̧i, im ilo m̧ool laļ in.
Im ilo jerbal in, ilo am “mour [jako]” ilo jipan̄ ro jet,13 kom̧ naaj eddōkļo̧k im wōnm̧aanļo̧k m̧ae iien kom̧ij tōpar “n̄an jon̄an rūtton an Kraist obrak”14 Innām kom̧ naaj pojak n̄an jolōte, ippān Kraist, aolepen men ko an Jememi.
Kom̧ij Aorōk n̄an Anij
Em̧m̧aan ro jitōn bōro, kom̧ aorōk. Kōmij iakwe kom̧. Kōm̧ij aikuji kom̧. Jerbal in em̧ool. Priesthood eo kom̧ij jeram̧m̧an kake n̄an kabwijer ej lukkuun an Anij.
Ij jar bwe ilo ami kappukōt elōn̄ taitōl ko an rikabwijer priesthood eo ewānōk, kom̧ naaj lo bwe ewōr ami jipan̄ kwojarjar, iien otemjej jipan̄ kom̧ n̄an wōnm̧aanļo̧k, kajipadōkļo̧k jolōt eo eļap Jemedwōj Ilan̄ ar kakoņe n̄an kom̧. Ij likūt ippāmi kōjeram̧m̧an in im aō naan in kam̧ool ilo etan Jisōs Kraist, amen.