Itok, Aolep Ļaddik ro Nejin Anij
Jen Būreejtōn Thomas S. Monson
Kōm̧m̧an bwe kōj kajjojo en etali jeje ko rekwojarjar kōn tiljek, būļāāne mour eo ami kōn kōttōpar, katakin m̧ool eo kōn naan in kam̧ool, im jerbal n̄an Irooj kōn iakwe.
Ruo alen ilo kajjojo iiō Im̧ōn Kweilo̧k in eaiboojoj ej āinwōt ba n̄an kōj, kōn ainikien karelel eo an, “Itok, aolep ļaddik ro nejin Anij me em̧oj aer kar bōk priesthood eo.”1 Ewōr juon m̧wil eo ejeno̧lo̧k me ej ajeded ilo aolepān kweilo̧k eo eļap an priesthood eo an Kabun̄ in.
Joten in ewōr taujin ro uwaad aolepān laļ in me rej jerbal n̄an Irooj āinwōt mijenede ro An. Āinwōt aō kar kwaļo̧k ilo ennaan eo aō kiiō jibbon̄, ewōr ad kiiō elōn̄ļo̧k jān 65,000 mijenede ro ilo jikin jerbal, kōn elōn̄ļo̧k taujin ro rej kōttar n̄an deļo̧n̄e jikin kaminene eo an mijenede ak ro peba ko aer rej kiiō kōm̧m̧ani. Kōmij iakwe im nōbar rein me rej kōņaan im kijooror n̄an jerbal.
Jeje ko rekwojarjar ejjeļo̧k ie naan in kean̄ eo eļapļo̧k an jejjet, ejjeļo̧k eddo eļapļo̧k an menin aikuj, ejjeļo̧k naan in kōmeļeļe eļapļo̧k an kajju jān kien eo kar letok jān jerkakpeje Irooj ke Eaar waļo̧k ilo Galilee n̄an rikaļoor ro jon̄ouljuon. Eaar ba:
“Innām kom̧in ilo̧k, im kōm̧m̧an ri aelōn̄ ko otemjej bwe ren ri kaļora, im peptaij er ilo etan Jema im Nejin im Jetōb Kwojarjar;
“Im katakin er bwe ren pokake naan ko otemjej I ar jiron̄ kom̧. Im lo, Ij pād ippemi iien otemjej, n̄an jem̧ļo̧kōn laļ.”2
Kakien in ekwojarjar, koba ippān kallim̧ur aiboojoj eo an, ej juon unin tōl n̄an jerbal rainin āinwōt eaar ilo tōre eo an Jisōs ke eaar pād ioon laļ in. Jerbal in mijenede ej juon kōkaļļe an Kabun̄ eo an Jisōs Kraist im Armej ro Rekwojarjar ilo Raan-ko Āliktata. Eaar iien otemjej āindein; enaaj iien otemjej āindein. Āinwōt an Rikanaan Joseph Smith kar kwaļo̧k, “Ālkin kar ba men otemjeļo̧k, jerbal eo eļaptata im aorōk tata ej n̄an kwaļo̧k ko̧jpeļ eo.”3
Ilowaan ruo iiō ko rekkadu, aolep mijenede ro rej jerbal aolep raan rej kiiō jerbal ilo jarin tariņae in utiej an Anij naaj kadedeļo̧k jerbal ko aer im naaj ro̧o̧l n̄an kapijuknen ko aer im ippān ro rejitōnbōro. N̄an elder ro, ro rej bōk jikier rej loi joten in ibwilijin Priesthood eo an Aaronic an Kabun̄ in. Likao ro, kom̧ij ke pojak n̄an uwaak? Kom̧ij ke m̧ōņōņō in jerbal? Kom̧ij ke pojak n̄an jerbal?
Ilo jekjek eo em̧m̧an tata lale, jerbal in mijenede emenin aikuj eo eļap n̄an ukukōt n̄an jon̄an in mour an juon. Ej aikuji awa ko raitok im wujlepļo̧k eļap, jerbal in jab ļōmņak kōn e make im kije ilo jar. Āinwōt tōprak, wujlepļo̧k an jerbal in mijenede ewōr an menin nōbar an lan̄lōn̄ eļap, eo ļapļo̧k n̄an mour jab wabanban im n̄an indeeo.
Idajon̄jon̄ eo ad ej n̄an ļapļo̧k ad ro rikarejeran eļap aer jeram̧m̧an ilo vineyard eo an Irooj. Menin ej jerbal n̄an aolepādwōj, jekdo̧o̧ņ ewi rūtto̧o̧d, im jab wōt n̄an ro me rej m̧aanjappopo n̄an jerbal āinwōt mijenede ro rej jerbal aolep raan, n̄an kōj kajjojo ej itok kakien eo n̄an kwaļo̧k ko̧jpeļ eo an Kraist.
Imaron̄ ke elmakote juon iiōk me enaaj kapen wejepedik eo ad: m̧oktata, etali jeje ko rekwojarjar kōn niknik; ruo, būļāāne mour eo ami kōn kōttōpar (im, imaron̄ ke kakobaba, karōk mour eo am̧ jekdo̧o̧n ewi dettam̧); jilu, katakin m̧ool eo kōn naan in kam̧ool; im emen, jerbal n̄an Irooj kōn iakwe.
Jen ļōmņak kōn kajjojo m̧ōttan ko emen an m̧ōņakjen in.
M̧oktata, etali jeje ko rekwojarjar kōn niknik.
The scriptures testify of God and contain the words of eternal life. They become the foundation of our message.4Jeje ko rekwojarjar rej kam̧ool kōn Anij im epād ie naan ko an mour indeeo. Rej erom pedped eo an ennaan eo ad.
Aorōk eo an jekjek in laajrak in kein katakin eo ej jeje ko rekwojarjar, ejaki im kōjeikiki kōn kijejeto an kobaik ippān doon. Ej kōketak kōj, barāinwōt, n̄an ekkatak jeje ko rekwojarjar kajjojo raan jim̧or kajjojo armej im ippān baam̧le ko ad.
Inaaj lewaj juon wōt eoon in jipan̄ me eaar m̧ōkaj an jerbal n̄an mour ko ad. Ilo Bok in Mormon, jepta 17th in Alma, jej riiti bwebwenato eo an lan̄lōn̄ eo an Alma ke eaar bar juon alen lo ro nejin Mosaia im kile dim eo aer ilo ko̧jpeļ eo. Ļo̧o̧k eo ej jiron̄ kōj bwe “raar kanooj kajoorļo̧k ilo jeļā m̧o̧o̧l eo; bwe raar armej in jeļāļo̧kjeņ ejim̧we im raar lin̄ōri jeje ko rekwojarjar ilo niknik, bwe ren maron̄ jeļā naan an Anij.
“Ak ejjab aolepān in; raar leļo̧k er n̄an eļap jar, im jitlo̧k; kōn menin ippāer eaar wōr jitōbōn kanaan, im jitōbōn revelsōn, im ke raar katakin, raar katakin kōn kajoor im maron̄ an Anij.” 4
Em̧m̧aan ro, etali jeje ko rekwojarjar kōn niknik.
Ruo, ilo m̧ōņakjen eo ad: Būļāāne mour eo ami kōn kōttōpar.
Bōlen ejjeļo̧k epepen an jodikdik ro eaar jelm̧ae kain ļap in jokālet ko āinwōt jodikdik ro rainin. M̧aanjabpopo eo ej aikuj kōm̧m̧an n̄an jikuuļ, mijen, im m̧are. N̄an jet, jerbal in tariņae enaaj koba.
M̧aanjappopo eo n̄an juon mijen em̧ōkaj an ijjino. Ilo kakobaba n̄an m̧aanjappopo eo ilo jetōb elo̧ļe jinen ak jemen naaj letok men ko me juon nejin ļaddik n̄an ijjino jāān eo an make n̄an mijen. Em̧aron̄ jejjet an kōketak āinwōt an iiō ko eļļāļo̧k kōn ekkatak kajin an laļ ko jet bwe en, eļan̄n̄e emenin aikuj, kapel ko an kajin eo an en maron̄ kōjerbale. Āliktata ej itok raan eo eaiboojoj n̄e bisop eo im stake būreejtōn eo rej kūrļo̧k eo n̄an lo er. Erreo ej kwaļo̧k; juon peba an mijenede ededeļo̧k.
Ejjeļo̧k bar juon iien aolepān baam̧ļe eo ej kanooj in kijooror lale im kōttar ribbōkļo̧k mail eo im leta eo me ej pād atreej eo 47 East South Temple, Salt Lake City, , Utah. Leta eo ej jikrōkļo̧k; kijooror eo etōr jān jon̄an; kūr ej riit. Emakijkij an jikin jerbal eo ettoļo̧k jān kapijuknen eo. Jekdo̧o̧n jikin eo, mekarta, uwaak eo n̄an kōppopo im pokake an mijenede eo ejjab oktak: “Inaaj jerbal.”
M̧aanjappopo eo n̄an em̧m̧akūt ejinoe. Likao ro, ij kōjatdikdik kom̧ij kam̧oolol kōn karmejete ko me ro jinemi im jememi rekanoj m̧ōņōņō in kōm̧m̧ani bwe kom̧in jerbal. Jerbal ko aer renaaj rejtake kom̧, tōmak eo aer ej kōketak kom̧, im jar ko aer rej dāpij kom̧. Juon mijen ej m̧akūtkūt an juon baam̧le. Men̄e kom̧ maron̄ jepeļļo̧k jān doon kōn laļ ko ak m̧aļo ko, bōro ko rej juon wōt.
Em̧m̧aan ro, ilo ami būlāāne mour eo ami kōn kōttōpar, kememej bwe iien ko ami rem̧m̧an kōn mijenede rejjab mo n̄an tōre eo an juon kūr. N̄an kom̧ ro me rej jerbal ilo jarin tariņae, kain iien in emaron̄ im aikuj in jeram̧m̧an. kajjojo iiō likao ro ad ilo jarin tariņae rej bōktok elōn̄ jetōb ko n̄an aelōn̄ in kiin̄ eo an Anij kōn kautiej priesthood eo aer, mour kōn kien ko an Anij, im katakin n̄an ro jet naan eo an Irooj ekwojarjar.
Jab bōk bōram̧ jān iien eo em̧m̧an n̄an erom mijenede ro ilo ami pukōt jeļāļo̧kjeņ eo ami. Waanjon̄ak ko ami āinwōt Armej ro Rekwojarjar ilo Raan-ko Āliktata naaj kalimjōki, ekajeti, im jet iien ko jiāiki.
Em̧m̧aan ro, jekdo̧o̧n ta iiō eo ami, jekdo̧o̧n ta jekjek eo ami, ij kōketak kom̧ n̄an būļāāne mour eo ami kōn kōttōpar.
Kiiō n̄an men eo kein kajilu ilo iiōk eo ad: katakin m̧ool eo kōn naan in kam̧ool.
Pokake kapilōk eo an Rijilōk Piter, eo eaar akweļap, “Kom̧win pojak iien otemjej bwe kom̧win uwaak n̄an jabdewōt armej ej kajjitōk ippemi kōn unin kōjatdikdik eo ej ilowami.” 5 Kotak ainikiemi im kam̧ool n̄an lukkuun m̧ool in piktok eo an Doulul in Anij. Kwaļo̧k kam̧ool eo ami ikkijien Bok in Mormon. Kajeeded aiboojoj im em̧m̧an eo an m̧ool ko repād ilo karōk in lo̧mo̧o̧r eo.
Ke iaar jerbal āinwōt juon mijen būreejtōn ilo Canada elōn̄ļo̧k jān 50 iiō ko remootļo̧k, juon mijenede edik eo eaar itok jān juon jukjuk in pād jab inam̧kaņ, edik, kar bwilōn̄ kōn dettan Toronto. Eaar kadu ilo ānbwiin ak aitok ilo naan in kam̧ool. Ejjab to ālkin an jikrōktok, koba ippān eo m̧ōttan, eaar loļo̧k kapijuknen eo an Elmer Pollar ilo Oshawa, Ontario, Canada. En̄jake būrom̧ōj kōn likao ro me, ilo iien ļan̄ eo eļap an jiņo, raar etal jān em̧ n̄an em̧, Mr. Pollard eaar karuwaineneik mijenede ro n̄an m̧weo im̧ōn. Raar kwaļo̧k n̄an e ennaan eo aer. Eaar jab en̄jake jetōb eo. Ilo tōre eo eaar kajjitōk ippāer n̄an ilo̧k im jab jar ro̧o̧l. Naan ko an āliktata n̄an elder ro ke rej em̧m̧akūt im̧aan kōjām eo an raar kōnono ilo lāj: “Kom̧ro ejjab maron̄ lukkuun jiron̄ eō kom̧ro ej tōmak Joseph Smith eaar juon rikanaan an Anij”
Kōjām eo eaar kilōk. Elder ro raar etetal laļ ļo̧k ilo iaļ eo. Ļaddik eo nejid eaar kōnono n̄an eo m̧ōttan: “Elder, jaar jab uwaake Mr. Pollard. Eaar ba jejjab tōmak Joseph Smith eaar juon rikanaan. Jān bar ro̧o̧l im kwaļo̧k naan in kam̧ool ko ad n̄an e.” Ilo jino in mijenede eo eļapļo̧k an iminene eaar pere bōtaab āliktata errā n̄an etal ippān eo m̧ōttan. Ilo mijak raar jibadōkļo̧k kōjām eo me ej kab m̧ōj kar kadiwōjļo̧k er jāne. Raar kōļaļļaļ, jelm̧ae Mr. Pollard, kar kōttar ilo juon iien ekōmettak, innām kōn kajoor kar leļo̧k n̄an e jān Jetōb eo, mijenede eo ad ejjab ļap an jeļā eaar ekōnono: “ Mr. Pollard, kwar ba kōmro ejjab lukkuun tōmak Joseph Smith eaar juon rikanaan an Anij. Ij kam̧ool n̄an kwe bwe Joseph eaar juon rikanaan. Eaar ukōt Bok in Mormon. Eaar lo Anij Jemen im Jisōs Nejin. Ijeļā kake.”
Jet iien tok ālik, Mr. Pollard, kiiō Būratōr Pollard, kar jutak ilo juon kweilo̧k an priesthood im kwaļo̧k: “Joten eo iaar jab maron̄ kiki. Jan̄ ilo lo̧jilin̄ū iaar ron̄ naan ko: ‘Joseph Smith eaar juon rikanaan an Anij. Ijeļā kake. Ijeļā kake. Ijeļā kake.’ Raan eo juon iaar kūr ļo̧k mijenede ro im kar kajjitōk ippāer n̄an bar ro̧o̧l ļo̧k. Ennaan eo aer, koba ippān naan in kam̧ool ko aer, ukōt mour eo aō im mour ko an baam̧le eo aō.” Em̧m̧aan ro, katakin m̧ool eo kōn naan in kam̧ool.
Men eo āliktata ilo m̧ōņōkjen eo ad ej n̄an jerbal n̄an Irooj kōn iakwe. Ejjeļo̧k men ej bōk jikin iakwe. Mijenede ro rewejepedik rej iakwe ro m̧ōttaer, ritōl ro aer ilo mijen, im armej ro raorōk me rej katakin er. Ilo section emen in Doctrine and Covenants, Irooj eaar ejaake men ko aikuji n̄an jerbal ko an kwaļo̧k: Jān ļōmņak kōn jet ennaan ko.
Ilo an mijenede ro ilo̧k ilo jerbal in jipan̄ an Anij, rej aikuj lale bwe rej jerbal n̄an E kōn aolepān būruwier, maron̄, ļōmņak, im kajoor, bwe ren maron̄ jutak jab lipijinjin im̧aan Anij ilo raan eo āliktata.
Tōmak, kōjatdikdik, iakwe eo erreo, im iakwe, kōn kalimjōkļo̧k wōt aiboojoj eo an Anij, kōkarbōb er n̄an jerbal eo.
Rej aikuj kememej tōmak, wānōk, jeļāļo̧kjeņ, kōmmaanwa, kijenmej, jouj, em̧m̧an, iakwe erreo, ettā, niknik. 6
Kōn un em̧m̧an kajjojo iaami emaron̄ ron̄ ainikiō kajjitōk ippān make kajjitōk eo “Rainin, em̧ōj ke aō ļapļo̧k ilo tōmak, ilo wānōk, ilo jeļāļo̧kjeņ, im em̧m̧an, ilo iakwe?”
Kōn kijejeto ilo wujlepļo̧k eo ami ilo kapijuknen ak ettoļo̧k, jetōb ko me kom̧ij jipan̄ n̄an lo̧mo̧o̧ren maron̄ ro me kom̧ij iakwe er eļap.
Elōn̄ iiō ko remootļo̧k ro m̧ōtta rejitōnbōro, Craig Sudbury im jinen, Pear, raar itok n̄an opij eo aō m̧okta jān an Craig kar em̧m̧akūt n̄an Australia Melbourne Mijen. Fred Sudbury, jemen Craig, eaar jako. Jon̄oul-ļalem iiō ko m̧oktaļo̧k, jinen Craig eaar m̧akeik Fred, eo eaar jab kwaļo̧k an iakwe n̄an Kabun̄ in im, ilo m̧ool, eaar jab juon uwaan.
Craig eaar kwaļo̧k n̄an n̄a iakwe eo an em̧wilaļ im eļap n̄an ro jinen im jemen im kōjatdikdik eo an bwe juon wāween, ilo Kraist. Iaar jar kōn im̧we ikkijen ekōjkan an kain ikdelel in maron̄ kar kūrm̧ool. Im̧we eo eaar itok, im iaar ba n̄an Craig, “Jerbal n̄an Irooj kōn aolepān būruwōm̧. Kwon pokake n̄an kūr eo am ekwojarjar. Kajjojo wiik je juon leta n̄an ro jinōm im jemam̧, im ilo jet iien, jeje n̄an Jem̧am̧ make, im kwaļo̧k n̄an e ewi jon̄an am̧ iakwe e, im jiron̄ e etke kwoj kam̧oolol bwe kwoj juon nejin.” Eaar kam̧oolol n̄a im, ippān jinen, raar em̧m̧akūt jān opij eo.
Ijjan̄in kar lo jinen Craig ium̧win 18 allōn̄ ko, ke eaar itok n̄an opij eo aō im, ke eaar jan̄, eaar ba n̄an n̄a, “Enan̄in de ruo iiō kiiō jān ke Craig eaar etal n̄an mijen eo an. Ejjan̄in n̄an jidik likjab in jeje tok leta n̄an kōm kajjojo wiik. Jem̧aanļo̧k, ļeo ippa, Fred,eaar jutak kein kajuon ilo juon kweilo̧k in kwaļo̧k naan in kam̧ool im eaar kabwilōn̄ eō im aolep ro raar pād ijo bwe eaar kōm̧m̧ane juon an kālet bwe en juon membōr in Kabun̄ in. Eaar kwaļo̧k bwe e im n̄a naaj etal n̄an Australia n̄an ioon Graig ilo jem̧ļo̧kin ļo̧k mijen eo an bwe Fred en armej eo Graig en paptaiji ilo mijen eo an āinwōt juon mijenede ej jerbal aolep raan.”
Ejjeļo̧k mijenede eaar ļapļo̧k an utiej būruwōn n̄an kōm̧m̧ane peptaij eo jān Craig Sudbury tōre eo, ilo jikin ettoļo̧k Australia, eaar jipan̄ jemen n̄an dān in epād lukier im, kajutak tuambwijmaron̄, kar āliji naan ro rekwojarjar: “Frederick Charles Sudbury, bwe em̧ōj kōmālim eō kōn Jisōs Kraist, ij peptaij eok ilo etan Jemen, im Nejin, im Jetōb Kwojarjar.”
Iakwe eaar anjo ioon. Jerbal n̄an Irooj kōn iakwe.
Em̧m̧aan ro, kōm̧m̧an bwe kōj kajjojo en etali jeje ko rekwojarjar kōn tiljek, būļāāne mour eo ami kōn kōttōpar, katakin m̧ool eo kōn naan in kam̧ool, im jerbal n̄an Irooj kōn iakwe.
Shepherd eo eweppān an jetōb ko, mijenede eo eaar lo̧mo̧o̧ren aolep armej, kar letok kam̧ool eo An ekwojarjar:
Eļan̄n̄e jej jerbal aolepān raan ko ad ilo kwaļo̧k ukweļo̧k n̄an armej in im bōktok juon jetōb n̄an Anij, lan̄lōn̄ eo ad enaaj ļap im bwe armej eo ilo aelōn̄ in kiin̄ eo an Jemen.
Im eļan̄n̄e lan̄lōn̄ eo ad enaaj ļap kōn juon jetōb me jej bōktok n̄an Rilo̧mo̧o̧r eo ilo aelōn̄ in kiin̄ eo an Jemen, ewi ļap in naaj lan̄lōn̄ eo ad eļan̄n̄e jej bōktok elōn̄ jetōb ko n̄an E! 7
Kōn E eo eaar kōnono naan kein, ij kwaļo̧k kam̧ool eo aō: E ej nejin Anij, ad Ripinmuur, im ad Rilo̧mo̧o̧r.
Ij jar bwe jān maron̄ indeeo uwaak n̄an kūr eo An ejouj, “Kwōn ļoor Eō.” 8 Ilo Etan ekwojarjar—em̧ool etan Jisōs Kraist Irooj eo—amen.