Men Kein Ijeļā
Jen Būreejtōn Boyd K. Packer
Būreejtōn eo an Doulul eo an Jon̄oulruo Rijilōk ro
Iaan aolep me iaar riiti im katakin im ekatak, juon eo eļaptata an aorōk im m̧ool kwojarjar me ij aikuj in kwaļo̧k ej kam̧ool eo aō ejeno̧lo̧k kōn Rilo̧mo̧o̧r Jisōs Kraist.
Ilo 1992 eo, ālkin jerbal ium̧win ratimjuon iiō ko āinwōt juon Rijipan̄ n̄an Jon̄oulruo ro im 22 iiō ko āinwōt juon membōr in Jon̄oulruo ro, Iaar tōpar 68 iiō. Iaar en̄jake m̧ōņōņō in jino je jet men me Iaar ņa etan “jerbal eo ejjan̄in dedeļo̧k.” M̧ōttan eo m̧oktata an jerbal eo ej āinwōt in:
Eaar wōr juon aō ļōmņak bon̄on eo juon,
Juon ļōmņak eļap im em̧wilaļ.
Eaar itok ke Iaar lukkun m̧ōjņo̧,
Lukkuun kar m̧ōk n̄an etal in kiki.
Eaar juon raan eo iaar poub
Im kar ļōmņak kōn jem̧ļo̧k eo aō.
Ļōmņak eo eaar āindein:
Ke Iaar dik, Iaar jab 68!
Imaron̄ kar etetal kōn jab ajikuukuk;
Eaar ejjeļo̧k metak aera.
Imaron̄ kar riiti juon jentōj ruo alen
Im bar kouti.
Imaron̄ kar jerbal elōn̄ awa ko
Im jeja bōjrak n̄an bōk kūtuwō.
Im men ko me kiiō ijjab maron̄ kōm̧m̧ani
Iaar lukkuun m̧ōkade ke Iaar dik.
Eļan̄n̄e Imaron̄ kar bar kōro̧o̧l iiō ko likļo̧k.
Eļan̄n̄e en kar wōr aō maron̄ n̄an kālet n̄an kōm̧m̧ane āindein,
Iban kar oktak jān rūtto n̄an bar dik,
Elōn̄ men ko n̄an jerwani.
Ebwe aō m̧ōņōņō in wōmņaaņļo̧k,
N̄an jerwane jodikdik eo aō, jekdo̧o̧n ewi jon̄an an kar em̧m̧an.
Men eo in kar jerwane eļan̄n̄e iaar bar ro̧o̧l likļo̧k
Ej ta eo imeļeļe kake.
Jon̄oul iiō tokālik, iaar jokālet n̄an kobaik jet bar eoon ko n̄an poem̧ eo:
Jon̄oul iiō ko eaar m̧ōkaj aer eļļāļo̧k
Im ilo iiō ko iaar luuji elōn̄ petak.
Juon matōļ iipū eaar joļo̧k ajukuukuk eo aō;
Ebwe an jim̧we aō bar etetal.
Bar juon matōļ kar kōļaake ej dāpij dii in kōnwa ko—
Matōļ eo ej juon kōm̧anm̧an eaiboojoj!
Eaar jipan̄ eō bwe in jab bōk polio;
Em̧ōj aō koba ippān epepen eo ekijin̄en̄e konwaan.
Kōkaļļe ko an rūttoļo̧k maron̄ loi.
Men kein rej jamin em̧m̧anļo̧k.
M̧ōttan eo de eo ekajoor an eddōkļo̧k
Ej maron̄ eo n̄an meļo̧kļo̧k.
Kwoj kajjitōk, “Ij ke kememej eok?”
Aaet, kwojjab lukkuun oktak jān ke iaar lo eok āliktata.
Kiiō lukkuun illu.
Eļan̄n̄e Iban kememej etam.
Inaaj kar errā iaar katak jet men ko
Ijjab kōņaan jeļā,
Bōtaab bwij wōļā eaar bōk m̧ool ko raorōk
Ekōm̧m̧an bwe Jetōb en eddōk.
Jen aolep kōjeram̧m̧an ko me raar itok,
Men eo em̧m̧an tata ilo mour eo aō
Ej jem̧jerā eo im kainōm̧m̧an eo
Iaar bōk jān lio pāleō ejitenbōro.
Aolep ajri ro nejūm̧ em̧ōj aer m̧are,
Kōn baam̧le ko aer m̧ake,
Kōn ajri ro nejier im jibūm̧,
Relukkuun rūtto m̧ōkaj.
Ijjan̄in kar ukōt jidik ļōmņak e aō
Kōn bar ro̧o̧l n̄an jodikdik
Jej aikuj in kar rūttoļo̧k, kōnke ilo ad aindein
Ej itok n̄an kōj juon jeļāļo̧kjeņ kōn m̧ool eo.
Kwoj kajjitōk, “Ta eo ilju im jekļaj enaaj bōktok?
Baj ta naaj jem̧ļo̧k eo aō?”
Inaaj etal im jab jekpen ņae.
Kajjitōk n̄aat ij 88!
Im iiō eo lo̧k Iaar kobaik eoon kein:
Im kiiō kwoj lo aō 88.
Iiō ko em̧ōkaj aaer eļļāļo̧k.
Ilo jino in em̧m̧an aō etetal, kiiō iajukuukuk, Ij jibwe juon jokwōņ
Im kiiō, āliktata ij iuwe ilo wiiļjea.
Ij wune meja kiiō im kiin ļo̧,
Bōtaab kajoor eo an priesthood ejjab oktak.
Ak kōn aolep men ko ilo ānbwin ejabwe ippa
Em̧ōj aō eddōk eļap ilo jetōb.
Em̧ōj aō ito itak aolepān laļ in
Elōn̄ļo̧k jān jilu milien kilometer ko.
Im kōn kadiwōjļo̧k ko ilo satellites,
Aenikiō ej etal wōt n̄an aolepen peļaakin laļ in.
Imaron̄ kii ba kōn aolep lōke
Bwe Ijeļā im iakwe Irooj.
Imaron̄ kam̧ool ippān ro etto
Ilo aō kwaļo̧k naan eo An ekwojarjar.
Ijeļā ta eo Eaar en̄jake ilo Gethsemane
Ekanooj in ļap n̄an keidi.
Ijeļā Eaar kōm̧m̧ane men otemjej n̄an kōj;
Ejjeļo̧k juon M̧ōttad eo em̧m̧anļo̧k.
Ijeļā bwe E enaaj bar itok
Kōn kajoor im ilo aiboojoj.
Ijeļā inaaj bar juon alen lo E
Ilo jem̧ļo̧k in mour eo aō.
Inaaj būkwelōlō im̧aan kinejnej ko Neen;
Inaaj en̄jake aiboojoj eo An.
Ainikiō eo emera, eudiddid naaj ba,
“Aō Irooj, aō Anij, Ijeļā.” 1
Im ijeļā!
Wūntō ko ilo likin m̧weo im̧ōm rej jitļo̧k n̄an juon jikin kallib wūt edik im wōjke ko rej pād iturin dān. Dāpdep eo juon an m̧weo epaake turin jikin kallib eo im ekanooj kalibubu kōn English ivy. Aolep iiō ivy in eaar eel n̄an bao jiddik ko. Eel ko ilo wōjke ko rej ineem̧m̧an jān fox im raccoon ko im kuuj ko me rej itok itak in bon̄
Juon raan eaar wōr juon poktak ilo ivy eo. Ainikien in inepata ko jān bao jiddik ko ilo ivy eo eaar kōm̧m̧an bwe 8 ak 10 bao ko jān wōjke ko jet n̄an koba ippāer ilo ainikien jan̄ eo. Ejjab to iaar lo un eo an poktak eo. Juon jineek eaar tabōlļo̧k jimettan laļ ļo̧k jān ivy eo im etoto im̧aan wintō eo ebwe an ļap an walaļtak n̄an aō kanōke. Ioļapļap in m̧ōttan ānbwiin eo an snake eo eaar wōr ruo ebbōj—eaar alikkar bwe ej kab m̧ōj an kar wōran̄ļo̧k ruo bao jiddik jān eel eo. Ejjan̄in kar wōr ium̧win 50 iiō ko kōm kar jokwe ilo m̧weo im̧ōm kar lo jabdewōt men āinwōt in. Eaar juon men jeļā kake juon-kōttan-ilo mour—ak āindein am kar ļōmņak.
Jet raan tokālik eaar bar wōr juon poktak, iien in wōjke ko raar kalbubuik ijo kidu ko rej pād ie. Kōm̧ ar bar ron̄ ejja jan̄ ko wōt im lo ejja iaio an bao ko reddik me rej pād ilo eel ko repaak. Kōm̧ ar jeļā ta eo ej kakkure. Ļaddik eo jibū eaar tallōn̄ ioon bōro̧o̧j eo im ettōr im kar bar kanōk juon jineek me eaar kedepdep n̄an jinen bao eo eaar pād ioon eel eo kar m̧ane.
Iaar ba n̄an eō make, “Ta in ewaļo̧k? Jikin Kallib Eden ebar m̧ōj kakkure ke?”
Eaar itok kakkōļ n̄an ļōmņak eo aō ko kar kōnono jen rikanaan ro. Jej jamin naaj aolep iien jokne jān im̧we eo an eo enana, men̄e ilo kapijuknen ko ad. Jej aikuj in kōjparok ajri ro nejid redik.
Jej mour ilo juon laļ eo ekauwōtata me ej kamijak men ko an jetōb. Baam̧le, doulul eo eaorōk tata kiiō im indeeo, ej lukwarkware jān kajoor ko loi im jab loi. Rikapo eo ejjab pād. Jibadbad eo an ej n̄an kōm̧m̧an kakkure. Eļan̄n̄e emaron̄ kōm̧ōjņo̧ik im kakkure baam̧le, enaaj anjo.
Armej ro Rekwojarjar ilo Raan-ko Āliktata rej kile aorōk eo eļap an baam̧le im kajieon̄ mour ilo juon jekjek me rikapo eo ejjab maron̄ nee mera n̄an lowaan m̧ōko im̧ōd. Jej lo ineem̧m̧an im kōjparok n̄an kōj make im ajri ro nejid kōn kautiej bujen ko ad jaar kōm̧m̧ani im kōm̧m̧ani jerbal ko rōļemwaan an pokake emenin aikuj jān rikaļoor ro an Kraist.
Aiseia ar ba, “Im jerbal in wānōk enaaj aenōm̧m̧an; im tōprak in wānōk, tōt im lōke n̄an indeeo.” 2
Bwe aenōm̧m̧an eaar barāinwōt kallim̧ur kake ilo revelesōn ko me Irooj ej kwaļo̧ki bwe eļan̄n̄e jenaaj pojak jej jamin naaj mijak.” 3
Kajoor eo eļaptata an priesthood eo kar letok n̄an kōjparok kapijuknen eo im armej ro ie. Baba eo ewōr an mālim im eddo n̄an katakin ajri ro nejin im n̄an kōjeram̧m̧an im leļo̧k jān kain̄i ko an ko̧jpeļ eo im kajjojo kōjparok eo an priesthood eo rej aikuji. Ej aikuj kwaļo̧k iakwe im ettā im kautiej n̄an jinier bwe ajri ro ren lo iakwe eo.
Em̧ōj aō jeļā bwe tōmak ej juon m̧ool in kajoor ejjab baj juon en̄jake ak tōmak. Ewōr jet men ko eļapļo̧k aer kajoor jān jar ko retiljek an juon jinen eo ejim̧we.
Katakin kom̧ make im katakin baam̧le ko ami kōn menin letok eo an Jetōb Kwojarjar im Pinmuur eo an Jisōs Kraist. Kom̧ij jamin naaj kōm̧m̧an jerbal indeeo eļapļo̧k jān jerbal ko ilowaan kapijuknen eo ami make.
Jej jeļā bwe jej ajri in jetōb ro nejin jined im jemed ilan̄, bwe ilo ad pād ioon laļ in jej bōk kanniōk im idajon̄jon̄ e kōj. 4 Kōj ro jaar bōk kanniōk in ewōr kajoor ioon armej ro rejjab. Jej anemkwoj n̄an kālet ta jenaaj im n̄an bōk im kālet jerbal ko ad, ak jejjab anemkwoj n̄an kālet jem̧ļo̧k. Jem̧ļo̧k ko rejamin oktak.
Anemkwoj eo ej kōmeļeļe ilo jeje ko rekwojarjar āinwōt juon anemkwoj an mour in, meļeļein bwe jemaron̄ kālet kōtaan em̧m̧an im nana. Rikapo eo ej pukōt n̄an kapok kōj n̄an kabōd kōjerbal anemkwoj eo ad.
Jeje ko rekwojarjar rej katakin kōj bwe kajjojo armej maron̄ m̧akūtkūt ilo katak im pedped eo ekkar n̄an ilju im jeklaj, ekkar n̄an anemkwoj eo an mour in eo Irooj ar leļo̧k n̄an e, āindein kajjojo maron̄ jeļā kōn jerawiwi ko an make ilo raan in ekajet eo.5
Alma ar kwaļo̧k bwe “Irooj ejamin kalimjek jerawiwi jiddik otem jiddik.” 6 N̄an meļeļe menin, jej aikuj kōjeno̧ļo̧k jerawiwi jān rijerawiwi.
N̄an waanjon̄ak, ke raar bōktok kōrā eo ar kijon̄ im̧aan Rilo̧mo̧o̧r, aaet lukkuun jerawiwi Eaar joļo̧k keij eo kōn ļalem naan ko: “Etal, im jab bar jerawiwi.” 7 En̄in ej jekjek in jerbal in kwaļo̧k eo An.
Kijenmej ej wānōk, ak, āinwōt aolep wānōk, n̄e tōre jān jon̄an ej ukōt e make n̄an juon nana. Jej aikuj mejmejkaruo jān “aujiid” bwe jān jab po ie. Kijenmej eo letok jān kōm̧ōjņo̧ikļo̧k kien ko an āne eo n̄an kōtļo̧k bwe kōmālim jerbal ko an mour ettoon rej bōk jikier ejjab kadikļo̧k kaje ko ilo jetōb reļļap me ej tōprak eo jān kakkure kien erreo eo an Anij.
Aolep armej rej lo̧tak kōn meram in Kraist, juon tōl eim̧we eo ej kōm̧m̧an bwe kajjojo armej ren kile jim̧we jān bōd. Ta eo jej kōm̧m̧ane bwe meram eo im ekōjkan ad uwaake im̧we ko n̄an mour jim̧we ej m̧ōttan idajon̄jon̄ eo an mour wabanban.
“Bwe lo, Jetōb in Kraist em̧ōj leļo̧k e n̄an aolep armej, bwe en maron̄ jeļā em̧m̧an jān nana; kōn menin, ij kwaļo̧k wāween eo n̄an ekajet; bwe men otemjeļo̧k ej karuwainene n̄an kōm̧m̧an em̧m̧an, im n̄an kareel n̄an tōmak ilo Kraist, kar jilkintok e jān kajoor eo im menin leļo̧k eo an Kraist; kōn menin kom̧ maron̄ jeļā kōn juon jeļāļo̧kjeņ eweppān e ej jān Anij.”8
Kajjojo iaad eaikuj m̧aanjabpopo n̄an bōk unojdikdik im im̧we ko an Jetōb Kwojarjar. Irooj ewōr an lam̧ in letok jeļāļo̧kjeņ eo erreeo n̄an ļōmņak ko ad n̄an im̧we kōj, n̄an tōl kōj, n̄an katakin kōj, n̄an kakkōļ kōj. Kajjojo rej likao im jiron̄ ro nejin Anij remaron̄ jeļā men ko rej aikuji n̄an jeļā. Katak n̄an bōk im jerbale ioon unojdikdik im revelesōn.
Iaan aolep men iaar riiti im katakin im katak, juon eo eļaptata an aorōk im m̧ool kwojarjar me ij aikuj in kwaļo̧k ej kam̧ool eo ao ejeno̧lo̧k kōn Rilo̧mo̧o̧r Jisōs Kraist. Ej mour. Ijeļā Ej mour. Ij An rikam̧ool. Kōn E imaron̄ im kam̧ool. Ej ad Rilo̧mo̧o̧r, ad Ripinmuur, Jān menin ij m̧ool. Jen menin ij kwaļo̧k kam̧ool ilo etan Jisōs Kraist, amen.