Jab M̧akūtkūt!
Jen Elaine S. Dalton
Būreejtōn eo Eutiej an Doulul eo an Jiron̄ Ro
Kom̧in pen. Kom̧in dim. Jutak kōn m̧ool im jim̧we. Jutak āinwōt juon rikam̧ool. Juon jon̄ak n̄an laļ in. Jutak ilo jikin ko rekwojarjar
Jotenin Ij jutak ilo juon jikin ekwojarjar āinwōt aō jutak ilo lo̧katok in, im̧aan mejen rikanaan ro, rilolo ro, im rikkwaļo̧k revelesōn ro im jiron̄. Ej juon tōre em̧m̧an n̄an pād ioon laļ in im erom juon jiron̄. Kom̧ij jiron̄ ro nejin Jemed ilo Lan̄ em̧ōj kālet er. Ij kōjatdikdik bwe kom̧ij en̄jake kadkadimi ewi jon̄an iakwe eo ami ippān Jemed ilo Lan̄. Ej iakwe kom̧ kajjojo, im barāinwōt n̄a.
Ilo tabōļ eo ilo opiij eo aō, ewōr juon annan̄ em̧ōņakņak in juon jiron̄ eo etan Kristina. M̧ool in annan̄in Kristina ej pād ilo Copenhagen, Denmark, jitļo̧k bwe en maron̄ reilok ioon lojet n̄an lo Zion. Kālet eo an n̄an kobatok ilo Kabun̄ in im likūt kapijuknen eo an ar jab juon wāween eo epidodo, kom̧ maron̄ in lo bwe kōto in jum̧ae rej ejopeļpeļ ņae e. Eaar jutak pen, kōm̧m̧ane men eo emaron̄e ak eaar jeļā ke ejim̧we. Bwij ko an kar likūt annan̄in ijo āinwōt juon kautiej n̄an Kristina, kōn kālet eo an raan eo eaar indeeo eaorōk n̄an epepen ko.
N̄an eō annan̄ in an Kristina ebōk jikimi wōj kajjojo. Āinwōt Kristina, kom̧ij ioon elōn̄ kālet ko raorōk im kālet ko kōm̧m̧ani kajjojo raan, jet iaan kālet ko repen, kālet ko rejjab naaj ukōt wōt ilju im jeklaj eo am ak jem̧ļo̧k in epepen ko. Kom̧ij barāinwōt ioon apan̄ ko an kōto in jum̧ae, kapo, edodo, im etoon an kanniōk. Im kōn men in kwon jutak pen im mour kake ko̧jpeļ in n̄an en̄jaki apan̄ kein ilo jukjukinpād in ad. Āinwōt Kristina, kom̧ij tōl kōn Jetōb Kwojarjar. Kom̧ij kōm̧m̧ani kālet ko rejim̧we. Kom̧in tiljek im kom̧in utiej.
Ijjab maron̄ lōmņak kōn eļapļo̧k kapilōk jān juon Jemedwōj Ilan̄ eo eiakwe innām kōņaan eo An n̄an kajjojo iami ej n̄an jutak ilo jikin ko rekwojarjar im jab m̧akūtkūt. 1 Eaar ba: Kom̧in pen. Kom̧in dim.2 Jutak kōn m̧ool im jim̧we.3 Jutak āinwōt juon rikam̧ool.4 Juon jon̄ak n̄an laļ in. Jutak ilo jikin ko rekwojarjar. Im āindein ej juon aō ennaan n̄an kajjojo iami: Jab m̧akūtkūt.
M̧oktata, jab m̧akūkūt ilo kālet jim̧we. Ilo raan kein āliktata, ejjeļo̧k kālet ko reddik. Kālet ko kom̧ij kōm̧m̧ani kiiō relukkuun in wōr tokjeer. Anemkwoj in kālet, ak maron̄ eo n̄an kālet, ej juon iaan menin letok eo eļaptata an Anij n̄an ajri ro Nejin. Ej m̧ōttan karōk in m̧ōņōņō eo kwe im n̄a kar kālete im kar jurake ilo mour eo ad m̧okta. Kōjparok mour ko ami ilo juon wāween me kom̧ maron̄ ron̄jake im pokake Jetōb Kwojarjar im Enaaj jipan̄ eok kōm̧m̧ani kālet ko rejim̧we. Enaaj jiron̄ kom̧ “aolep men ko komij aikuj kōm̧m̧an.”5
Jet wiik rem̧ootļo̧k Iaar jepļaakļo̧k n̄an kar high school eo aō ej kab kein kajuon ilo iiō ko. Iaar loļo̧k juon kweilo̧k eo eļap an stake eo im ar kōm̧m̧an ilo imon ikkure eo an school eo. Iaar etetal ilaļ in ettōn̄aak ko, ememļo̧kjeņ ko raar jino deļo̧n̄ tok ilo kōļmenļo̧kjeņ eo aō. Iaar en̄jake ejja en̄jake eo wōt ke Iaar pād ie āinwōt juon jiron̄—ekolkol, jaleke eō make, lōmņak kōn eō make, im āindein, āindein ikdelel ko rieoktok. Iaar etal n̄an im̧ōn ikkure an jikuuļ. Innām juon ipeb in ememeļo̧kjeņ eaar itok n̄an ļōmņak eo aō. Iaar jeļā aolepān im̧ōn ikkure eo. Juon wōt men ar oktak ej—n̄a.
Raan eo eaar wōr aō iien em̧m̧an im jutak im̧aan āinwōt aō kar kōm̧m̧ane ilo high school elōn̄ alen āinwōt kar juon opija. Iaar barāinwōt lo jet iaar kar rijikuul ro m̧ōtta ilo jarlepju eo—jet iaar jerā ippāer! Ak tōre in, ijelo̧kin kōjeikiik juon kweilo̧k, eaar wōr aō iien em̧m̧an—ijo ilo high school eo aō—n̄an “jutak āinwōt juon ri kam̧ool”6 im kwaļo̧k aō naan in kam̧ool kōn ad Rilo̧mo̧o̧r, Jisōs Kraist.
Jiron̄ raņ, lale bwe jem̧jerā ko am ippān ro jet ren āinwōt 40 iiō jān kiiō, kom̧ jamin naaj jook kake. Ejjeļo̧k jonan kabo, jab ruwainene, ejjeļo̧k juon bun̄bun̄ eaorōk. Paoktok eo am ippān likao ro naaj jipan̄ er pād wōt ilo erreo kōn priesthood kajoor eo ilo er, kōn bujen ko an tampeļ im jerbal in mijenede. Im bōlen? En̄oul iiō jān kiiō, emaron̄ in wōr juon eo ej iwōj ippam̧, ijo ilo high school eo am, im kam̧oolol eok kōn am kar jipan̄ er pād wōt ilo erreo n̄an kōm̧m̧ani jerbal eo aer ilo priesthood n̄an jerbal juon mijen eutiej. Im wōn ejeļā? Komaron̄ in bōk juon leta jān juon eo pāleen bar juon likao, kam̧oolol eok kōn paoktok eo ewōr ippam̧ kōn ļeo pāleen im baam̧le eo aer ilju im jeklaj, ekalikar tōre in high school eo am. Kālet ko am ewōr tokjeer. Kālet ko am kiiō rejjab wōt jelet eok, ak rejelet bar ro jet. Rej men ko an indeeo raorōk. Jutak ilo jikin ko rekwojarjar. Im jab m̧akūtkūt!
Kein karuo, Jab m̧akūtkūt ilo ikdelel im pokake eo am n̄an pād wōt ilo wānōk im erreeo eo am ilo kanniōk. Kautiej wānōk. Erreeo eo am make ej juon iaan menin letok ko relap n̄an am kajoor. Ke kwar itok n̄an laļ in kar lewaj juon menin letok eo eaorōk an ānbwiin. Rikanaan Joseph Smith ar ba: “Jaar itok n̄an laļ in bwe jen maron̄ bōk juon ānbwiin im jepļaak kōn juon ānbwiin eo erreeo n̄an im̧aan Mejen ilo aelōn̄ eo eutiej tata. Pedped in m̧ōņōņō eo eļap ekitbuuj bōk juon ānbwiin. Devil ejjeļo̧k ānbwiinin.”11 Ānbwiinūm̧ ej tōl kōn lōmņak eo am̧ im juon menin letok eo ekwojarjar n̄an kōjerbal anemkwoj in kālet eo am. En̄in ej juon menin letok me Satan eaar kariab e. Im lo ej kajieon̄ aolep an jerbal n̄an kōjerbal ānbwinimi. Ekōņaan bwe kom̧in jowan, bōd in kōjerbal, im kōmetak ānbwiinum̧i. Jab erreeo, pija ettoon, m̧ōm̧ an kanniōk, eoo im dede ko, uno ko rekajoor, im aolep kain an̄ūrlep ko rej jerbal ko rekōmetak n̄an bōk jikin menin letok in eaorōk ak n̄an kōm̧m̧an kabweer n̄an am kōjerbal anemkwoj in kālet. Paul ej kajjitōk, “Kom̧ jab jeļā bwe kom̧ tempel an Anij, im Jetōb eo an Anij ej jokwe ilo kom̧?”7
Ānbwiinūm̧ ej juon tampeļ. Etke? Kōnke ej āinwōt juon em̧ ejjab wōt n̄an jetōb eo am ak ebarāinwōt jetōb ko an ro jet ro renaaj itok n̄an laļ in āinwōt m̧ōttan baam̧le eo am indeeo. Elder Dallin H. Oaks ar kwaļo̧k, “Kajoor eo n̄an ejaak mour in kanniek ej [juon] kajoor ejjeļo̧k jem̧ļo̧kin.”8 Jerbal eo am ej juon jerbal ejjeļo̧k jem̧ļo̧kin. Anij ar lewaj n̄an eok juon leke ekwojarjar! Kom̧ij m̧aanjebpopo n̄an jinen epepen ko rej itok. Dāpij erreeo im wānōk eo am make, im kōjparok ta eo ej “aorōk ilōn̄in men otemjeļo̧k”—erreo im wānōk.9 Ilo jerbal eo am āinwōt jiron̄ ro Nejin Jemedwōj Ilan̄ em̧ōj kālete, naan in kōkpilōklōk eo An em̧m̧an n̄an eok make ej n̄an etetal ilo iaļ ko an wānōk im̧aō.10
Wānōk ej men eo eaorōktata ilo tampeļ eo. Kein kajilu, Kōn menin jab m̧akūtkūt ilo menin erreeo n̄e kwoj kōm̧m̧an im kōjparok bujen ko rekwojarjar. Bujen eo kwoj kōm̧m̧ane ilo iien am peptaij enaaj tōl ļo̧k eok n̄an iaļ in wānōk im m̧ōņōņō ilo am kōkāāl bujen peptaij eo am kajjojo wiik ilo bōk m̧ōttan kwojkwoj eo. Ilo am kōjparok bujen peptaij ko ami, kwonaaj oktak, am nuknuk enaaj oktak, am makūtkūt enaaj oktak jān laļ in. Kōjparok bujen in enaaj kōm̧m̧an bwe tōl kōn Jetōb Kwojarjar. Jutak ilo jikin ko rekwojarjar, im jab etal iturin jikin ak kōjan̄jan̄, pija, ak iiaio ko remaron̄ kōm̧m̧an am luuji jemjerā eo an Jetōb Kwojarjar.11 Im ilo am kōjparok bujen ko, kwonaaj erreeo wōt im pojak n̄an deļo̧n̄e tampeļ ko rekwojarjar an Irooj.
Āliktata, jab m̧akūtkūt jen kile eo am kōn Pinmuur eo an Rilo̧mo̧o̧r. Pinmuur eo ej n̄an kwe im n̄a. Ej juon maron̄ im juon lo̧mo̧o̧ren ekajoor. Eļan̄n̄e kwoj en̄jake kwojjab erreeo n̄an jutak ilo jikin ko rekwojarjar, jab ineek eddodo in juon raan aitokļo̧k. Ilo mour wabanban in, jej aolep kōm̧m̧an bōd. Kwon jeļā bwe Irooj ej lukkuun iakwe eok bwe E ar kōm̧m̧an men otemjej n̄an am oktak im n̄an ukwelo̧k eļan̄n̄e kwoj kōm̧m̧an bōd. Satan ejjab kōņaan bwe kwon lōmņak in oktak.12 Enaaj kajieon̄ in kapo eok bwe ejjeļo̧k kōjatdikdik. Eriab menin. Komaron̄ in bar oktak. Komaron̄ in ukwelo̧k. Komaron̄ in bar ereeo im kwojarjar kōnke Pinmuur eo an Rilo̧mo̧o̧r.
Kiiō kōtļo̧k bwe In kiil kōn juon bwebwenato eo eļap an em̧m̧an ippa. Komaron̄ in ba, “Ta tokjeņ bwebwenato in em̧m̧an n̄an kōm̧m̧ane n̄an jutak ilo jikin ko rekwojarjar? Ewōr tokjeņ aolep men n̄an kōm̧m̧ane n̄an jutak ilo jikin ko rekwojarjar. En̄in ej juon bwebwenato in juon jiron̄ etan Rebeka.13
Ilo bwebwenato in ej jiron̄ kōj kōn, Abraham ar leļo̧k eddo n̄an eo ri karejeran n̄an pukot juon kōrā eo erreeo n̄an pāleek Aisak ļaddik eo nejin. Ej aikuj in juon eo ekōrbab n̄an juon bujen m̧are—wānōk, im ereeo im jim̧we. Im jilkinļo̧k ri karejeran eo an ilo juon iaļ ekauwōtata n̄an juon jikin etan Haran. Unin an aikuj etal ealikar—em̧m̧aan eo ekwojarjar eaikuj i kōrā eo ekwojarjar n̄an rie im jipan̄ doon. Ke eo ri karejeran ar epaak e jikin eo an Haran, ar bōjrak ilo juon aebōj laļ n̄an keidak e kāmōl ko an im eaar jar bwe en tōl n̄an jiron̄ eo ejim̧we im bwe enaaj kile e ilo an leļo̧k lem̧ōn dān im kāmōl ko an jon̄oul. Kiiō, iaar iuwe ioon juon kāmōl, im menin ijeļā—kāmōl eļap aer idaak dān!
Ilo Jenesis jej riit bwe Rebeka eaar jab etal wōt n̄an aebōj laļ eo n̄an ebōk dān, ak eaar “kaiur” 14 ak ekaiuriir n̄an kadedeļo̧k jerbal in. Innām ri karejeran eo ar likūt pāān̄kōl im gold ilo pein Rebeka im kajjitōk ewōr ke jikin ilo im̧ōn jemen bwe en kiki ie. Ijeļā bwe gold eo ar jipan̄! Eoon ko rej riit āinwōt in, “Im jiron̄ eo ar ettōr, im kōnnaanōk ro ilo im̧ōn jinen ekkar n̄an naan kein.”15 Rebeka emaron̄ kar juon rittōr!
Rijerbal eo eaar jiron̄ baam̧le eo an Rebeka unleplep in iaļ eo an im Rebeka ar errā n̄an pāleek Aisak. Ri karejeran eo ar kōņaan etal raan eo juon ippān Rebeka, ak baam̧le eo an raar akweļap bwe en bar pād jet raan ipāer en jab dikļo̧k jen 10 raan ko. Innam raar kajjitōkin Rebeka ta eo ar kōņaan kōm̧m̧ane, im uwaak eo an ar ba “Inaaj ilo̧k.”16 Uwaak in ealikar ke n̄an uwaak eo an taujin ro me lukkuun in uwaak, “Inaaj ilo̧k, Inaaj kōm̧m̧an”17 ke rikanaan eo ad, Būreejtōn Thomas S. Monson, kōjeļāiki iien em̧m̧an eo n̄an likao ro im jiron̄ ro remaron̄ jerbal e mijen ko ilo iiō ko redikļo̧k?
Kiiō jon̄ak im jem̧ļo̧k eo an bwebwenato in em̧m̧an. Rebeka ar pojak im erreeo n̄an kōm̧m̧an im kōjparok bujen ko rekwojarjar im n̄an erom juon bujen lieo pāleen Aisak. Eaar jab kōņaan kōttar im kepooj e make. M̧okta jen em̧akūt eo an jān baam̧le eo an, eaar letok juon kōjeram̧m̧an, im naan in kainōm̧m̧an n̄an eō, bwe eaar kallim̧ur bwe enaaj erom “jinen to̧ujin raņ in milien raņ.” 18 Bōtaab m̧ōttan eo em̧m̧antata ilo bwebwenato in ej ke Rebeka im Aisak raar jino lo doon. Ejjab ba ilo Baibōļ in, ak ij lōmņak ar iakwe eo jino ilo aero lo doon! Kōnke wānōk ej iakwe wānōk im meram ej pukot meram.19 Ke Aisak eaar ilo̧k n̄an ioon caravan, Rebeka “ej to jān kāmel [eo] “20 Im ej ba, “Im ļeo ej yokwe e.”21 En̄in ej ijo Ij loe!
N̄an jim̧or Rebekah im Kristina, rej jutak ilo jikin ko rekwojarjar ar jab pidodo. Jutak pen ar jab pidodo. Kōto ko rekajoor, dān jān aebōj laļ eo ar eddo, im ilo̧k jān kapijuknen im mour ko aer ar jab pidodo. Ak raar kōm̧m̧ani kālet ko rejim̧we. Raar tōl kōn Jetōb Kwojarjar. Raar wānōk, im raar kōpooj er make n̄an kōm̧m̧ani bujen ko rekwojarjar. Rilo̧mo̧o̧r ar itok jān bwij eo an Rebeka. Rebeka ar ke jeļā bwe enaaj kar eindein? Jaab! Kālet ko am kiiō ewōr ke tokjāer? Aaet!
Jiron̄ ran, epepen ko rej pedped wōt ioom̧i kōn kālet ko ami rem̧m̧an, ami erreo, im ami mour jim̧we. Jab m̧akūtkūt. Ewōr juon ami jibadbad eļap im̧aami. En̄in ej tōre eo ami! Ij lukkuun tōmak bwe juon jiron̄ eo ewānōk, ej tol jen Jetōb, emaron̄ ukōt laļ in!
Ij kam̧ool bwe Rilo̧mo̧o̧r emour! E enaaj pād ippāmi. E enaaj jipan̄ kom̧. Im ilo iien ko reppen, Enjel ro An renaaj jepool kōj, n̄an lōn̄aj kom̧.22 Ilo etan Jisōs Kraist, amen.