Jerbal eo Am̧ Ekwojarjar n̄an Kwaļo̧k
Jen David L. Beck
Būreejtōn eo Eutiej an Doulul eo an Likao ro
Kwar bōk kajoor eo, maron̄ eo, im jerbal eo ekwojarjar n̄an kwaļo̧k ilo iien eo kwar ekkapit n̄an priesthood eo.
Lan̄lōn̄ eo an Kwaļo̧k
Likao ro an Priesthood eo an Aaronic, kom̧ij ļaddik ro jitōnbōro nejin Anij, im ewōr juon An jerbal eļap n̄an kom̧ n̄an kōm̧m̧ane. N̄an kadedeļo̧k jerbal in, kom̧ij aikuj kakūrm̧ool jerbal eo ami ekwojarjar n̄an kwaļo̧k n̄an ro jet. 1
Kom̧ jeļā ke ta meļeļe in kwaļo̧k? Ļōmņak kōn kajjitōk in ilo aō jiron̄ kom̧ kōn juon leddik kar etan Chy Johnson.
Ke Chy eaar jino iiō eo an āliktata ilo high school, eaar erom juon rijorrāān jān kakkure ekanooj nana im lāj. Liin eaar nana kōm̧m̧an n̄an e, iuuni, im kajirere kake ilo an kar etal n̄an kūlaj—jet rijikuuļ em̧ool raar kade kōn kopej. Bōlen em̧ōj ami kar lo an armej kōm̧m̧an nana n̄an er āinwōt in ilo jikuuļ ko ami.
Ekanooj lōn̄ armej ro, iiō in jodikdik rej juon iien ajimakeke im mijak. Ejjab aikuj in ilo jekjek in. Jeram̧m̧an n̄an Chy, eaar wōr likao ro ilo jikuuļ eo an raar meļeļe ta meļeļe in kwaļo̧k.
Jinen Chy eaar kajjitōk ippān rūkaki ro ilo jikuuļ eo n̄an jipan̄ kabōjrak kakkure eo, bōtaab eaar wōnm̧aanļo̧k wōt. Innān liin eaar kūr ļo̧k Carson Jones, juon rikabwijer Priesthood eo an Aaronic im rikkure quarterback an kumi in football eo. Liin eaar kajjitōk ippān n̄an jipan̄ e pukōt wōn eo ej kōm̧m̧ane kakkur eo.
Carson eaar errā n̄an jipan̄, bōtaab ilo būruwōn eaar en̄jake ejjab maron̄ in ļap an jipan̄ ijello̧k in lo kakkure ko. Jetōb eaar unoojdikdik n̄an e bwe eaar aikuj in jipan̄ Chy en̄jake iakwe.
Carson eaar kajjitōk ippān jet iaan rikkure ro m̧ōttan n̄an koba ippān ilo jerbal in kwaļo̧k n̄an Chy. Raar karuwaineneik e n̄an jijet ippāer ilo iien kōraelep eo. Raar etetal ļo̧k ippān n̄an kūļaj eo an n̄an lale bwe eaar ineem̧m̧an. Jab kailbōkbōk, ippān rikkure football ro āinwōt ro m̧ōttan repaake, ejjeļo̧k juon eaar kakkure Chy n̄an jidik.
Eaar juon un ekaitoktok limo n̄an kumi in football eo. bōtaab em̧ool kōn laudin̄din̄ eo an juon iien ikkure kar jab luuj ie, likao rein raar jab meļo̧kļo̧k Chy. Raar karuwaineneik e n̄an koba ippān kumi eo ilo meļaaj eo ālkin ikkure ko. Chy eaar en̄ake iakwe im kam̧oolol. Eaar en̄jake ineem̧m̧an. Eaar m̧ōņōņō.
Kumi in football eo raar wōnm̧aanļo̧k wōt n̄an wiini state championship eo. Bōtaab juon men eaar ļapļo̧k an aorōk jān football championship eo kar kōm̧m̧an ilo jikuuļ eo aer. Waanjon̄ak eo an likao rein eaar kōm̧weiur rijikuuļ ro jet n̄an bōk eļapļo̧k, ļapļo̧k aer em̧m̧an. Rej kiiō kōm̧m̧an em̧m̧an n̄an doon kōn eļapļo̧k jouj im kautiej.
Jikin kōm̧m̧an nuuj ko reļļap kar lo ta eo likao rein raar kōm̧m̧ane im kwaļo̧k bwebwenato eo aer aolepān laļ eo. Ta eo kar ijjino āinwōt juon kijejeto n̄an kwaļo̧k n̄an juon ej im̧we taujin ro jet n̄an kōm̧m̧an ejja āinwōt in.
Jinen Chy ej ņa etan likao rein “enjeļ rej kōjakilkile er.” Carson im ro m̧ōttan em̧ōj aer ba bwe Chy eaar kōjeram̧m̧an mour ko aer eļapļo̧k jān aer kōjeram̧m̧an mour eo an. Ej ta eo ej waļo̧k n̄e kwoj ajeļo̧k eok make ilo jerbal n̄an ro jet—kwoj bōk eok make. 2 Kwoj oktak im eddōkļo̧k ilo wāween ko me rejjab maron̄ in kar. Likao rein eaar wōr aer en̄jake lan̄lōn̄ in jerbal in kwaļo̧k eo im wōnm̧aanļo̧k wōt n̄an pukōt iien ko rem̧m̧an n̄an kōjeram̧m̧an ro jet. Raar kijooror n̄an kōļapļo̧k jerbal in kwaļo̧k ko aer ilo allōn̄ ko rej itok wōt n̄e rej jerbal āinwōt mijenede ro rej jerbal aolep raan.3
Juon Aikuj im juon Jerbal
Ewōr taujin Chy Johnson ko ilo aolepān laļ in—armej ro me rej aikuj n̄an en̄jake iakwe eo an Jemed Ilan̄. Rej pād ilo jikuuļ ko ami, ilo doulul ko ami, im em̧ool ilo baam̧le eo ami. Jet em̧ōkaj aer waļo̧k il ļōmņak eo aō. Jet em̧ōkaj aer jiktok ilo ļōmņak. Ro jet ewōr aer aikuj ko edik aer alikkar. Enan̄in aolep kom̧ jeļā emaron̄ in kōjeram̧m̧an ilo jet wāween kōn jerbal in kwaļo̧k eo ami. Irooj ej kōjatdikdik ilo kom̧ n̄an pukōtļo̧k er.
Kwojjab aikuj in juon rikkure em̧ōkade n̄an kwaļo̧k n̄an ro jet. Kwar bōk kajoor, maron̄, im jerbal eo ekwojarjar n̄an kwaļo̧k ilo iien eo kwar ekkapit n̄an priesthood eo. Būreejtōn James E. Faust eaar katakin, “Priesthood eo ej mālim eo kar leļo̧k n̄an em̧m̧aan n̄an kwaļo̧k ilo etan Anij.” 4 Priesthood eo an Aaronic ej kabwijer kii ko an kwaļo̧k eo an enjeļ ro.5
Ilo am̧ iakwe ajri ro Nejin, Jemedwōj Ilan̄ enaaj tōl eok im enjeļ ro renaaj jipan̄ eok.6 Naaj lewaj n̄an eok kajoor n̄an kōjeram̧m̧an mour ko im lo̧mo̧o̧ren jetōb ko.
Jisōs Kraist ej waanjon̄ak eo am̧. E “ear jab itok bwe armej ren jerbal n̄an E, a bwe En jerbal n̄an er.” 7 N̄an kwaļo̧k ej meļeļe in n̄an iakwe im kea kōn ro jet. Ej meļeļe in n̄an lali aikuj ko aer ilo kanniōk im jetōb. Likut, ej meļeļe in kōm̧m̧ane ta eo Rilo̧mo̧o̧r enaaj kar kōm̧m̧an eļan̄n̄e Eaar pād ijin.
Baam̧le eo Am̧
Jino ilo kapijuknen eo am̧ make. En̄in ej ijo komaron̄ kōm̧m̧ane jerbal in kwaļo̧k eo am̧ eaorōk tata.8
Kwoj kōņaan ke kajjion̄e juon ekkatak ekaitoktoklimo? Iien eo tok juon jinōm̧ ej kajjitōk kōn jipan̄ eo am̧ ipeļaakin m̧weo, āinwōt ba “Kom̧ool kōn am̧ kajjitōk, m̧am̧a. Ij m̧ōņōņō in jipan̄.” Innām lale mejatoto eo an. Jet iami remaron̄ kōņaan lale ta eo kwojeļā kōn first aid m̧okta jāņ am̧ kajieon̄e menin, kōnke komaron̄ in kailbōke. Ālkin am̧ bōke, kwonaaj lo juon em̧m̧anļo̧k ilo jemjerā eo am̧ ippān im juon ļapļo̧k an Jetōb eo ilo kapijuknen eo am̧.
Ej juon wāween n̄an kwaļo̧k n̄an baam̧le eo am̧; ebar lōn̄ ko jet. Kwoj kwaļo̧k n̄e kwoj kōnono naan ko rejouj n̄an ro uwaan baam̧le eo. Kwoj kwaļo̧k n̄e kwoj kōm̧m̧an em̧m̧an n̄an ro jeiū im jatūm̧ āinwōt ro m̧ōttam̧.
Bōlen men eo eaorōk tata, kwoj kwaļo̧k n̄e kwoj jipan̄ jemam̧ ilo jerbal ko an āinwōt ritōl ilo jetōb ilo kapijuknen eo am̧. Leļo̧k aolepān am̧ rejtak im kōketak n̄an nokon in jota an baam̧le, jar an baam̧le, im ekkatak jeje ko rekwojarjar an baam̧ļe. Kōm̧m̧ane ijo kuņaam̧ n̄an lale bwe Jetōb eo ej pād ilo kapijuknen eo am̧. Menin enaaj kōkajoor jem̧am̧ ilo jerbal eo an im kōpooj eok n̄an erom juon baba juon raan. Eļan̄n̄e ejjeļo̧k jemam̧ ilo kapijuknen eo am̧, eddo eo am̧ n̄an kwaļo̧k n̄an baam̧ļe eo am̧ em̧ool eļapļo̧k aikuji.
Doulul eo Am̧
Ewōr am̧ barāinwōt juon jerbal n̄an kwaļo̧k ilo doulul eo am̧.
Priesthood eo ej eddōkļo̧k ilo aolepān laļ in. Elōn̄ iaami rej ļoor kūr eo n̄an lo̧mo̧o̧r an Būreejtōn Monson. Elōn̄ļo̧k rikabwijer Priesthood eo an Aaronic reniknik rainin jān m̧okta ilo bwebwenato an Kabun̄ in. Aaet ewōr wōt ro me rejjab niknik im ro rej aikuji kom̧.
Juun eo ļo̧k, ke juon branch eaar ejaak ilo Bangalore, India, likao eo de eo ilo kweilo̧k eo an priesthood eo eaar juon tikōn eo ej kab m̧ōj kapiti etan kar Gladwin.
Gladwin, ippān ļo̧k būreejtōn eo an Doulul eo an Likao ro im branch būreejtōn eo, kar jino kūr likao ro rejeiknik im loļo̧k er ilo m̧ōko im̧weer. Ejjab to likao eo kein karuo, Samuel, eaar jino itok n̄an jar bar juon alen.
Kajjojo wiik Gladwin im Samuel kar kūr ro me raar jab pād ilo kweilo̧k eo an doulul eo im kar kwaļo̧k ta eo raar katak. Raar barāinwōt kūr ak loļo̧k er ilo raan in ļotak ko aer. Juon illo̧k juon, likao ro rejeniknik raar erom ro m̧ōttāer im kar jino bōk kūr ko aer n̄an itok n̄an m̧akūtkūt ko an doulul eo, n̄an pād ilo kweilo̧k ko an doulul eo, im āliktata n̄an kōm̧m̧ane jerbal in kwaļo̧k eo aer make. Rainin, aolep likao ro ilo branch eo rej niknik ilo Kabun̄ in.
Jeje ko rekwojarjar rej katakin bwe doulul ko an Priesthood eo an Aaronic rej jijet ilo ko̧o̧njeļ im katakin doon—ak kalōk im kōkajoor—doon. 9Kwoj kalōk ilo am̧ katakin m̧ool ko an ko̧jpeļ eo, kwaļo̧k en̄jake ko ilo jetōb, im kwaļo̧k naan in kam̧ool. Laajrak in kein katakin eo an jodikdik ro ej kōketak kain iia iio rōt kein ilo kweilo̧k ko an doulul eo, bōtaab menin emaron̄ waļo̧k wōt n̄e aolep ro uwaan doulul eo ej en̄jake iakwe im kautiej. Kajirere im kōm̧m̧an kōjak ejjeļo̧k jikin ilo kweilo̧k an doulul eo—eļaptata n̄e en̄jake ko rej kwaļo̧ki. Būreejtōnji ko an doulul eo rej aikuj tōl ilo lale bwe kweilo̧k ko an doulul eo rej juon jikin einem̧m̧an n̄an aolep ro rej bōk kuņaer.
Rijilōk Paul eaar kakkōļ, “Ejjeļo̧k naan ettoon en waļo̧ktok jāņ lo̧n̄emi, a jabdewōt eo em̧m̧an im naan in kalōk ekkar n̄an aikuj, bwe en leļo̧k jouj n̄an eo ej ron̄jkae.”10
Rikabwijer ro an priesthood eo rejjab n̄an jidik kōjerbal naan ettoon ak nana. Rejjab n̄an jidik kakkure ak kōmetak ro jet. Rej iien otemjeļo̧k kalōk im kōkajoor ro jet. Menin elem waan bōtaab wāween eo ekajoor n̄an kwaļo̧k.
Ilo Aolep Iien
Jerbal in kwaļo̧k eo ejjab aikuj wōr jon̄an n̄an kain̄i ko ak loļo̧k ko an katakin m̧ōko ak jet iien jerbal in jipan̄ ko. Jej iien otemjeļo̧k em̧m̧aan ro an priesthood—ejjab ilo Jabōt wōt im ejjab wōt n̄e jej kōņak jōōt mouj ko im tie ko. Ewōr juon ad jerbal n̄an kwaļo̧k jabdewōt jikin jej jutak ie. Jeral in kwaļo̧k ejjab juon men jej kōm̧m̧ane—ej kwaļo̧k wōn kōj.
Kwaļo̧k aolep raan. Iien ko rem̧m̧an rej pād ipeļaakimi. Pukōti. Kajjitōk ippān Irooj n̄an jipan̄ eok kili. Kwonaaj lo elōn̄ iaer men ko reddik, jerbal ko rem̧ool me rej jipan̄ ro jet erom rikaļoor ro an Jisōs Kraist.11
Ilo am̧ kajieon̄ in erom erreo n̄an Jetōb eo, kom̧ kile ļōmņak ko im en̄ajke ko rej im̧we eok n̄an kwaļo̧k. Ilo am̧i jerbali im̧we kein, enaaj ļapļo̧k am̧i būki, im iien ko rem̧m̧an am̧i im maron̄ eo n̄an kwaļo̧k naaj eddōkļo̧k im ļapļo̧k.
Likao ro jatū, ij kam̧o̧ol bwe em̧ōj lewaj n̄an kom̧ mālim eo im kajoor eo an kwaļo̧k eo an Priesthood eo an Aaronic eļap ilo etan Anij.
Ij kam̧ool bwe ilo ami kōm̧m̧ane, kom̧ naaj juon kein jerbal in pā ko pein Anij n̄an jipan̄ ro jet. Mour eo ami enaaj jeram̧m̧anļo̧k im ļapļo̧k meļeļe in. Kom̧ naaj lo eļapļo̧k kajoor n̄an jum̧ae nana. Kom̧ naaj lo m̧ōņōņō eo em̧ool—kain eo me jeļā kake jen wōt rikaļoor ro rem̧ool an Jisōs Kraist.
Kōm̧m̧an bwe kom̧in en̄jake lan̄lōn̄ eo an kakūrm̧ool jerbal ekwojarjar eo ami n̄an kwaļo̧k, ij jar ilo etan Jisōs Kraist, amen.