Iaļ eo an Irooj

Jen Elder Stanley G. Ellis

Jen Jiljilimjuonn̄oul eo

Iaļ eo an Irooj ej bwe jen eo̧ron̄ katak ko an ritōl ro ad, meļeļe pedped in katak ko rejim̧we, im kiene kōj make.

Jiljilimjuonn̄oul

Iaar jerbal āinwōt juon Jiljilimjuonn̄oul. Jiljilimjuonn̄oul eo rej ņaetaer mejenjer ro—n̄an kwaļo̧k naan eo an Irooj ilo ad būki jān rijilōk ro im rikanaan ro im jān Jetōb eo im n̄an erom rikam̧ool ro rejenolo̧k etan Kraist n̄an kwaļo̧k ko̧jpeļ eo ilo aolepān laļ in, n̄an kalōk Kabun̄ eo, im n̄an bōk eddo in m̧akūtkūt ko an (lale D&C 107:25, 34).

Ļaddik in Jikin Kallib

Iaar rūttoļo̧k ilo juon jikin kallib epaake Burley, Idaho—“juon ļaddik in jikin kallib in Idaho!” āinwōt juon ļaddik in jikin kallib iaar ekkatak.

1. N̄an jerbal—eļan̄n̄e kwoj jab ekkatak, kwoj jab bōk leen.

2. N̄an jeļā meļan jerbal—eļan̄n̄e kwoj leļo̧k dān im bwidej, kwoj totak elōn̄ ļo̧k leen ko.

3. Aorōk in iien—eļan̄n̄e kwoj jab ekkat ilo jejjet in iien, iien m̧ōļo im̧aan iiō maron̄ kakkure jikin kallib eo.

4. N̄an kōm̧m̧ane ta eo emenin aikuj ak bōk eddo n̄an kam̧ōje mekarta ta eo ej kam̧ōņōņō, kōņaan, ak jejjet—kwoj bōk jen milik in kau eo n̄e emenin aikuj n̄an bōk milik eo, jab n̄e kwo koņaan.

5. Ilo ta kwoj kōm̧m̧an im ba—menin mour in jikin kallib im kein jerbal ko kar kitbuuj, ejjab ļap am iien n̄an “bōk eļap iien im kōmeļeļeiki” ak n̄an inepata kōn wāween an jejjet. (Ilo kautiej pedped in, ilo aō kar jerbal ilo aolepān Kabun̄ in, jet iien ij kajjitōk, “Kwo kōņaan ke bwe in kōnono kajju ak ilo wāween em̧m̧an?” Armej ro rekwojarjar rekōņaan kajju!” Inaaj kajju ilo kōnono in rainin.)

6. Āliktata, āinwōt juon ļaddik in jikin kallib ilo Idaho, iaar katak n̄an pedped wōt ioon pedped ko repidodo.

Ejjeļo̧k juon men epidodo ļo̧k n̄an kōj aolep, im katak ko ad, jen m̧ool ko an laajrak in tōmak eo: “Kōm̧ij tōmak ilo Anij, Jemed Indeeo, im ilo Nejin, Jisōs Kraist, im ilo Jetōb Kwojarjar” (Lajrak in Tōmak 1:1).

Ilo kakkobaba, E ejJemedwōj Ilan̄, eo ejeļā kajeed, eo Ej iakwe kōj, im Ekōņaan bwe jen jepļaak n̄an Ippān. Jisōs ej ad Rilo̧mo̧o̧r im Ripinmuur, eo jen Pinmuur eo Eaar kōmaron̄ bwe jen anjo jen mej im bar mour im pidodo n̄an ad maron̄ wanlōn̄ļo̧k im mour indeeo. Jetōb Kwojarjar ej ad rikanōm̧m̧an, rikkwaļo̧k revelesōn, rūkaki, rikamool, im ritōl.

Kōļmenļo̧kjeņ kake, ro jeiū im jatū—jej jab jetōb ro ratemjinemjen! Jej jab make iaad.

Ta jeram̧m̧an ko jen an lōn̄ jined im jemād—ejjab ke jen an juon atemjinemjen? Jemaron̄ ekkatak jān er, jeram̧m̧an jān imminene, im kōjekdoon kauwōtata ko retiņo̧ rej kakkōļ kōj kaki, im meļeļe ļo̧k kōn ta eo rejeļā. Jej jab aikuj in jebwābwe, pok, moņ, ak janiknik. Menin elukkuun m̧ool ilo jekjek eo an Jemedwōj Ilan̄, eo Eaar katakin im kwaļo̧k n̄an kōj jab juon iaļ wōt ak iaļ eo.

Anij Epād Ippān Iaļ eo

Ilo m̧ool, Anij epād Ippān iaļ eo n̄an mour,¹ n̄an iakwe,² n̄an jipan̄,³ n̄an jar,⁴ n̄an kōnono,⁵ n̄an iiaio ippān ro jet,⁶ n̄an tōl,⁷ n̄an m̧are,⁸ n̄an kōkaajririik ajri ro,⁹ n̄an katak,¹⁰ n̄an jeļā m̧ool eo,¹¹ n̄an kwaļo̧k ko̧jpeļ eo,¹² n̄an kālet mōn̄ā ko rejim̧we n̄an kan̄i,¹³ ebar lōn̄.

Ippān tok jeje ko rekwojarjar, ewōr jipan̄ ko reļļap n̄an pukōt ial eo an Irooj ilo True to the Faith, For the Strength of Youth, im bar kein katakin ko jet an rijilōk im rikanaan ro remour.

1. N̄an waanjon̄ok, Eaar katakin koj ilo jeje ko rekwojarjar: “Bwe ļōmnak ko aō re jab ļōmņak ko ami; im iaļ ko ami re jab iaļ ko Aō, Jeova ej ba. “Bwe āinwōt lan̄ ko re utiej jān laļ, āindein iaļ ko Aō re utiej jān iaļ ko ami, im ļōmņak ko Aō jān ļōmņak ko ami.” (Aiseia 55:8–9).

2. Juon iaan men ko renana raan kein āliktata bwe aolep armej rej etetal ilo iaļ ko aer make (lale D&C 1:16). “Ilo Jabōn Kōņaan Ko ej rōjan̄ kōj n̄an” “Kwōn jab mālōtlōt wōt ilo mejōm̧ im n̄an “Kwōn jab atartar ioon jeļāļo̧kjeņ eo am̧” (laleJabōn Kōnnaan Ko 3:5–7).

3. Jaar ekkatak bwe eļan̄n̄e jej jerbali men otemjej ilo iaļ eo an Irooj. E enaaj lukkuun kōjeram̧m̧an kōj im jej kajjitōk n̄an kōjeram̧m̧an ko An; im eļan̄n̄e ejjab An iaļ, ejjeļo̧k ad kalim̧m̧ur (lale D&C 82:10).

4. Irooj ej keidi iaļ eo An ippān iaļ eo ad ilo An kamminene jen rikanaan Samuel., eo eaar jilkinļo̧k n̄an pukōt juon kiin̄: “A Jeova ear ba n̄an Samuel, “Kwon jab lale turin mejān ak aetokōn, bwe Iar joļo̧k e; bwe Jeova e jab lo āinwōt armej ej lo; bwe armej ej lale ālikin armej, a Jeova ej lale būruon.” (1 Samuel 16:7)

5. Aaet kōn kam̧oolol n̄an ikdelel eo ebun̄bun̄ ippān armej n̄an jipan̄ rijarm̧ōl im riaikuj, Irooj ej errā kōn jibadbad eo ad ak Ej kakkōļ kōj bwe ej aikuj kōm̧m̧ane ilo iaļ eo An (lale D&C 104:16). Ilo bar juon wāween ilo kijejeto ko ad n̄an jipan̄, jemaron̄ kōmetak e. Irooj eaar katakin kōj aikuj eo n̄an rōjan̄ un̄n̄are kōj make. Aaet men̄e jej maron̄ jipan̄, jej jab aikuj leļo̧k ak kōpooje ta eo remaron̄e ak naaj kōm̧m̧ane n̄an er make. Aolep jikin ej kajjieon̄, laļ in ej katak men eo enana jen leļo̧k jabdewōt ijjeļo̧kin kajjitōk ippān bwe en jerbal n̄an bōke. Em̧ool Anij ejeļā ijo em̧m̧antata.

Jen ļōmņak kōn waanjon̄ok ko jet. Irooj ewōr iaļ eo Ippān n̄an kōm̧m̧an jerbal in mijenede. Ej kōmeļeļe ilo eoon ko im ilo Preach My Gospel im kōjerbale āinwōt unin tōl jen Jetōb eo.

Irooj ewōr An, ak iaļ eo, n̄an iakwe. Ro jen laļ in rej ba ta eo elukkuun aorōk ej bwe ruo armej rej iakwe doon. Jemed ilo Lan̄ ej katakin bwe menin ej aorōk, ak Ej katakin kōj eļapļo̧k: bwe ewōr juon wāween emālim im iien n̄an kwaļo̧k iakwe in.

Kiene Kōj Make

Joseph Smith eaar katakin ke ej jodikdik iaļ ko an Irooj. Ke kar kajjitōk ippān ekōjkan an tōl Kabun̄ in, eaar kōmeļeļeik bwe eaar katakin pedped ko rejim̧we im membōr ro raar kiene er make.¹⁴Ro jeiū im jatū, rijilōk ro ad rej mour im rikanaan ro rej katakin wōt ejja pedped in katak ko rejim̧we. Kajjitōk eo ej “Jej ke kōjerbal pedped in katak kein n̄an kien e kōj make?”

Juon men ekkā ad katak ej n̄an ejaake im kakūrm̧ool eddo ko ad jabdewōt jikin jej pād ie. Jet iien jej lo kapo n̄an em̧m̧akūt n̄an jet eria kāāl, ļōmņak bwe ajri ro nejid renaaj lōn̄ļo̧k ro m̧ōttāer im būrookraam̧ ko rem̧m̧anļo̧k an jodikdik.

Ro jeiū im jatū, jej ke lukkuun lōmņak kōn lo̧mo̧o̧r eo an ajri ro nejid ej jukjukinpād eo rej jokwe ie? Rijilōk ro im rikanaan ro emakijkij aer kar katakin bwe ta eo ej waļo̧k ilowaan m̧weo eļapļo̧k an aorōk ļo̧k jān ta eo jej loe inamōj. Wāween ad kōkkaajririik ajri ro nejid eļapļo̧k an aorōk jen ijo jej kōkkaajririik er.

Ilo m̧ool ewōr wāween ko jet raorōk rej kitbuuj kālet ia eo n̄an jokwe ie, im kam̧oolol, Irooj enaaj tōl kōj eļan̄n̄e jej pukōt kapen eo An.

Bar juon kajjitōk ej “Ia eo jej aikuji? Ium̧win 16 iiō ko iaar jerbal ilo būreejtōnji eo an Houston Texas North Stake. Elōn̄ raar em̧m̧akūt n̄an eria ko ilowaan iiō kein. Emakijkij am kar bōk juon taļboon ko̧o̧l ej kōjjeļāik juon armej ej em̧m̧akūt tok im kajjitōk ward ta eo em̧m̧an tata . Juon wōt kōttan iaar bōk juon taļboon ko̧o̧l ej kajjitōk, “Ward ta eo eakuji juon baam̧le em̧m̧an? Ia eo kōm̧ maron̄ jipan̄ ie?”

Ilo iiō ko m̧okta ilo Kabun̄ in, Būreejtōn Brigham Young im ro jet raar kūr membōr ro n̄an etal n̄an juon jikin n̄an kalōk Kabun̄ eo ie. Oktak eo ej bwe kiiō ewōr ippād membōr ro retōmak jabdewōt jikin ko renaaj etal n̄an jabdewōt jikin rikanaan eo ej kajjitōk ippāer n̄an etal n̄ane. Kom̧ij ke kōtmene bwe Būreejtōn Monson n̄an kajjojo ej jiron̄ļo̧k elōn̄ļo̧k jān 14 milien iaad ijo baam̧le eo ad ej aikuji ie? Iaļ eo an Irooj ej bwe jen eo̧ron̄ katakin ko an ritōl ro ad, meļeļe pedped ko rejim̧we, im kiene kōj make.

Lukkuun Aorōk

Kōn men otemjej ej waļo̧k ilo Kabun̄ in rainin, im ilo an Irooj kōļapļo̧k jerbal eo An ilo jabōn otemjej, aaet earorōkļo̧k bwe jej jerbale men otemjej ilo iaļ eo An!

Elukkuun aorōk ilo jerbal in lo̧mo̧o̧r, in bwe jen ekkatak “ilo men in letok eo kōn Nejin, Anij eaar kōpooj juon iaļ em̧m̧anļo̧k” (Ether 12:11). Katak eo an Kraist “ilo iaļ in; im ejjeļo̧k bar juon iaļ ak et letok ium̧in lan̄ bwe armej ren maron̄ mour ilo aelōn̄ in Anij” (2 Nipai 31:21).

Kajem̧ļo̧k

Ilo ad lo elōn̄ armej ilo laļ in rainin rej mour kōn tarpok, ak nana, jōbwābwe ilo iaļ ko rebōd, im en̄taan kōn jekjek ko ejjeļo̧k tokjāer kōn kālet ko rebōd, ekōm̧m̧an aō kōņaan kwaļo̧k āinwōt kar Alma:

“O Bwe in kar juon enjeļ, im kar tōpar aolep kōņaan ko an buruō, bwe in maron̄ ilo̧k im kōnono kōn jilel an Anij, kōn ainikien eo enaaj kōm̧akūtkūt laļ, im kūr ukweļo̧k n̄an armej otemjeļo̧k!

“Aaet, in kar kabun̄bun̄ļo̧k n̄an armej otemjeļo̧k… karōk in lo̧mo̧r, bwe rej aikuj ukweļo̧k im itok n̄an ad Anij, bwe en jab bar wōr eļapļo̧k būrom̧ōj ioon aolepān mejān laļ” (Alma 29:1–2).

Bar juon alen, ij kam̧ool bwe Irooj ewōr an iaļ! Jemedwōj Ilan̄ ejeļā kajjeed, iakwe kōj, im kōņaan jipan̄. Ejeļā wāween eo em̧m̧aan tata n̄an jipan̄. Jej jab jetōb ro atamjinemjen!

Ad Rilo̧mo̧o̧r, Jisōs Kraist, ej “iaļ eo, m̧ool eo, im mour eo” (Jon 14:6; lale barāinwōt Alma 38:9). Iaļ eo An ej pedped wōt ioon m̧ool eo n̄an indeeo im Ej tōl ļo̧k kōj n̄an aenōm̧m̧an ilo laļ in, im mour indeeo ilo laļ eo ej itok (lale D&C 59:23).

Kakeememej ko

1. Lale 2 Nipai 5:27; Mosaia 4:27; Alma 7:23–25.

2. Lale Exodus 20:14; Duteronomi 6:5; John 13:34–35; Rom 1:24–32; 1 Tessalonika 4:3; Alma 39:3–5.

3. Lale Mosaia 4:21–27; Doctrine and Covenants 104:15–18.

4. Lale Matu 6:5–13; 2 Nipai 32:8–9; 3 Nipai 18:21; Doctrine and Covenants 10:5.

5. Lale Jabon Kōnnaan Ko 15:1; Kolosse 4:6; Jemes 5:12; 3 Nipai 11:29–30.

6. Lale Doctrine and Covenants 64:10–11; 121:41–46.

7. Lale Matu 25:14–30; Jon 10:1–14; Doctrine and Covenants 50:26; 107:99–100; 121:34–40.

8. Lale Jenesis 2:24; Jekab 2:27; Doctrine and Covenants 42:22; 132:19.

9. Lale Mosaia 4:14–15; Doctrine and Covenants 68:25–28.

10. Lale Doctrine and Covenants 43:8–9; 88:77–79, 118.

11. Lale Moronai 7:15–19; 10:3–5; Doctrine and Covenants 9:7–9.

12. Lale Doctrine and Covenants 33:8–10; 100:3–8.

13. Lale Doctrine and Covenants 89.

14. Lale Teachings of Presidents of the Church: Joseph Smith (2007), 284.