Jibbon̄ōn Ko Raiboojoj

Jen Elder Bruce D. Porter

Jen Jiljilimjuonn̄oul eo

Jej jab aikuj in mijak ilju im jekļaj, barāinwōt bōjrak jen kōjatdikdik im m̧ōņōņō, kōnke Anij ej pād ippād.

Ilo joten in Taije ilo Jerusalem, Jisōs im rikaļoor ro An raar ioon doon ilo juon ruum̧ n̄an kōjparok Kijone eo. Em̧m̧aan ro raar etal Ippān kar jab jeļā bwe kōjota in enaaj juon raan naaj erom Kwojkwoj eo Āliktata. Raar ke jeļā menin im ta meļeļein, remaron̄ kar jan̄.

M̧aajta eo aer, kōn menin, kar lukkuun meļeļe bwe wāween eo ilo Gethsemane im Golgotha ejjab etto naaj ijjino. Awa ko reppen tata ilo bwebwenato in laļ in raar iten waļo̧k; mekarta, Jisōs eaar ba n̄an er, “Ilo laļ kom̧ij en̄taan, a kom̧win m̧ōņōņō; N̄a Iar bōk anjo̧ ioon laļ” (Jon 16:33).

Jej mour ilo juon tōre epoktak im jab alikkar, juon iien Irooj eaar kōņaan kake n̄an Enoch eo enaaj kōkkaļļeik raan ko renana im kōmmetak (lale Moses 7:60). Kakkure eo im iien ko reppen maron̄ pād im̧aan, kōj barāinwōt aikuj kwaļo̧k peran im m̧ōņōņō. Jej mour ilo epepen eo āliktata, tōre eo Anij eaar kōjepļaak tok Kabun̄ eo im aelōn̄ eo An n̄an laļ in n̄an m̧aanjebpopo n̄an ro̧o̧ltok eo an Nejin.

Būreejtōn Boyd K. Packer kar kōnono kōn ajri ro jibūn im ļapļo̧k in jorrāān ilo laļ in jej mour ie. Eaar ba: “Renaaj loe elōn̄ m̧akūtkūt ko rej waļo̧ktok ilo iaļ eo ilo mour eo aer. Jet iaer naaj inepata kōn aer peran im kōļapļo̧k aer tōmak. Ak eļan̄n̄e rej lukkuun pukōt n̄an jipan̄ im tōl, renaaj bōk kajoor ioon men ko rekauwōtata.”

Tokālik eaar kakobaba: “Aorōk ko an m̧wil ko jukjukinpād eo make ej aikuj pedped ioer emōj aer nana ļo̧k ilo juon jukjukinpād eo eļapļo̧k. Mekarta, ijjab mijak ilju” (“Do Not Fear,” Ensign orLiahona, May 2004, 77, 78).

Ro jeiū im jatū, jej aikuj jab mijak ilju im jekļaj, barāinwōt jab bōjrak jen kōjatdikdik im peran, kōnke Anij ej pād ippād. Ilubwilijin naan in kapilōk ko m̧oktata kar ļo̧o̧ki me Jisōs eaar letok n̄an rikaļoor ro An rekāāl ilo Galilee kar ruo naan in rōjan̄ ko, “Jab mijak” (Luk 5:10). Eaar bar āliji kapilōk in elōn̄ alen ilo iien kwaļo̧k eo An. N̄an Rikwojarjar ro An rainin, Rilo̧mo̧o̧r eo eaar jiron̄ kōj bwe jej aikuj jab mijak, bwe Irooj ej pād ippād, im naaj jutak ippān (lale D&C 68:6).

Irooj enaaj jutak kōn Kabun̄ eo An im armej ro im kōjparok er ilo aenōm̧m̧an m̧ae An itok. Ewōr aenōm̧m̧an ilo Zaion im ilo stake ko an, bwe E ar kwaļo̧k: Im bwe koba ippān doon ioon ānen Zaion, im ilo stake ko an, n̄an juon jikin kattōrak, im n̄an juon jikin kone jān lan̄, im jān kakkure n̄e enaaj lutōk ioon aolepān laļ” (lale D&C 115:5–6).

Kabun̄ in ej jutak āinwōt juon jipan̄ ekajoor an kōjparok n̄an membōr ro an. Men̄e jekjek ko ilo laļ in remaron̄ erom kalulu ilo jet iien, Armej ro Rekwojarjar retiljek renaaj pukōt jikin kone ilo stake ko an Zaion. Irooj eaar leļo̧k bwe juon dekā emōj jeke jab kōn pā enaaj dāpilļo̧k m̧ae enaaj kobrak aolep laļ (lale Daniel 2:31–45; D&C 65:2). Im ejjeļo̧k kajoor an armej enaaj bōbrae an dāpilļo̧k, bwe Anij ej rijeje eo an jerbal in im Jisōs Kraist ej dekā in jabōn em̧.

Nipai eaar lo ilo visōn bwe ilo raan ko āliktata kajoor an Lam an Anij enaaj wanlaļtak “ioon armej in bujen ko an Irooj im raar pojak kōn jim̧we im kōn kajoor in anij ilo aiboojoj eļap (1 Nipai 14:14).

Kōj wōj aolep, im baam̧le ko ad, maron̄ kōņak kein tariņae kōn kajoor an Anij āinwōt juon kattōrak eļan̄n̄e jenaaj ak m̧ool wōt n̄an Kabun̄ eo an Jisōs Kraist im Armej ro Rekwojarjar ilo Raan-ko Āliktata im kōm̧m̧an bwe Jetōb en ritōl. Mālijjon̄ maron̄ waļo̧k, im jemaron̄ jab meļeļe men otemjej ej waļo̧k n̄an kōj ak peļaakid. Ak eļan̄n̄e ej ettā būruwed, jej leke ilo Irooj. Enaaj letok n̄an kōj kajoor im tōl ilo aolep apan̄ an mour. N̄e ad kōņaan ej n̄an wōt kabun̄ Būruwōn, jenaaj jeram̧m̧an kōn juon aenōm̧m̧an im jenaaj en̄jake ilowaad.

Ilo raan ko m̧okta an Jepļaaktok eo, membōr ro an Kabun̄ in raar jelm̧ae eļap mālijjon̄. Būreejtōn Brigham Young eaar ba kōn iien in: “N̄e jej jepooļ jen rinana ro, jen mej im kakkure rej kaamijak ilo aolep tōrere ko, ij keememej bwe iaar en̄jake āinwōt lan̄lōn̄ [im] aenōm̧m̧an ilo jetōb eo aō, āinwōt aō en̄jake kiiō. Kwaļo̧k bwe waļo̧kin ak ilju emaron̄ jab em̧m̧an ak emaron̄ lukkuun nana., ak ij jan̄in kar lo juon iien ilo Ko̧jpeļ in ak ta eo iaar jeļā bwe waļo̧k eo enaaj jipan̄ n̄an kwaļo̧k m̧ool.”(Teachings of Presidents of the Church: Brigham Young [1997], 357).

Mijenede eo m̧ōtta, Paul, eaar juon eo aolep ej kwaļo̧k kam̧ōņōņō. Āinwōt juon baba, eaar ewōr ruo jorāān ilo ānbwinnin. Em̧ool men̄e kōjdat ej waļo̧k, eaar wōnm̧aanļo̧k jerbal n̄an ro jet ilo lan̄lōn̄ im ito limo. Juon iien eaar deļo̧n̄e opiij eo jijet ilo wiiljea eo im ba, “Mour ej ijjino ilo juon wiiljea jarom!” Inaaj aolep iien keememej e, jet iiō mokta jen an kar mej, eaar jibwe kijeek eo iien eo ej iuwe ilo wiiljea eo waan ilo an bukwi armej ro kappukwe. Āinwōt kijeek in ejjamin kun, tōmak an Paul eaar jab mākunļo̧k ilo iien.

Ke iaar juon rijikuuļ ilo Brigham Young University, iaar jokwe ilo juon em̧ ippān jet likao. Ruum̧ mate eo aō, Bruce, bōlen eaar juon armej ewōr an kōjatdikdik iaar jeļā. Kōm̧ij jan̄in kar ron̄ an ba jabdewōt naan nana kōn jabdewōt armej ak jabdewōt jekjek, im ekar pen n̄an jab maron̄ en̄jake rōjan̄ im̧aan mejān. An peran eaar itok jān leke ilo Rilo̧mo̧o̧r im ko̧jpeļ eo.

Juon raan emōļo, ekkōtoto, bar juon m̧ōtta, Tom, eaar etetal peļaakin kāmbōj in university eo. Eaar 7:00 ilo jibbon̄, im kāāmbōj eo eaar ejjeļo̧k armej ie im marok. Eaar wōtlo̧k sno killep, ippān tok juon kōto ekajoor. “Juon in mejatoto enana,” Tom eaar ļōmņak. Ej etetal ļo̧k wōt, im ibuļōn maroklep im sno eo, eaar ron̄ juon armej ej al.

Kōn kōtmene eo ejjejjet, jen sno ko reļļap im̧aan eaar itok eo m̧ōttam ekōjatdikdik, Bruce. Pein erļo̧k lōn̄ļo̧k n̄an mejatoto, eaar al juon al jān Broadway musical Oklahoma: “O ta ej jab juon jibbon̄ eaiboojoj ke! O, ta ej jab juon raan eaiboojoj ke! Iaar bōk juon en̄jake eaiboojoj, men otemjej renaaj em̧m̧an rainin” (Richard Rodgers and Oscar Hammerstein II, “Oh, What a Beautiful Morning” [1943]).

Jen kar en̄jake in, ainikien m̧ōņōņō eo ej ilo lan̄ eo emarok eaar erom n̄an n̄a juon kōkkaļļe in ta eo kōn tōmak im kōjatdikdik. Aaet ilo juon laļ ej ļapļo̧k jorrāān ie, kōj āinwōt Armej ro Rekwojarjar ilo Raan-ko Āliktata, jeļā bwe kajoor in lan̄ ej pād ippān Kabun̄ eo an Anij im armej ro. Jemaron̄ lan̄lōn̄ ilo jeļāļo̧kjeņ in bwe juon jibbon̄ eaiboojoj ej pād im̧aan—jinoin raan in millinium, n̄e enaaj āindein an Nejin armej itok im irooj bar juon alen ilaļ in.

Ij ļōmņak barāinwōt kōn ruo jibbon̄ōn ko raiboojoj ilo bwebwenato in laļ in. Ilo jibbon̄ in Spring 1820, ilo juon jibbon̄ eaiboojoj, juon raan em̧m̧an ilo Palmyra, New York, juon likao etan Joseph Smith eaar deļo̧n̄e juon bukwin wōjke im kar bukwelōlō ilo jar. Uwaak eo n̄an jar eo, waļo̧ktok eo an Jemed im Nejin, kar jino jerbal eo an iien ko rejjejet an tarlep in iien ko im Jepļaaktok eo an Kabun̄ eo an Jisōs Kraist n̄an laļ in.

Em̧ool bar juon jibbon̄ eaiboojoj enan̄in 2,000 iiō ko rem̧ootļo̧k inamōj in dipin jikin kweilo̧k Jeruselam. Aļ eaar tak kōn meram meņāān in jibbon̄ in Ijtō eo. Juon kumi in kōrā kar itok n̄an lotok juon lōb, kōjatdikdik n̄an kapit ānbwin eo an aer Irooj. Ruo enjeļ kar loļo̧k er im ba: “Etke kom̧ij pukot eo E mour, ippān ro re mej? E jab pād ijin, a em̧ōj An jerkakpeje”(Luke 24:5–6).

Jen anjo̧ an Jisōs Kraist ioon jerawiwi im mej, ij kwaļo̧k aō kam̧ool. Jen karōk in tūriam̧o eo an Jemed Indeeo im An iakwe ejjeļo̧k jem̧ļo̧kin, ij kam̧ool. Ilo ad jerkak kajjojo jibbon̄, jen reilōn̄ļo̧k n̄an lan̄ ilo tōmak im ba, ”O, ta ejjab juon raan aiboojoj,” Ij jar ilo etan Jisōs Kraist, amen.