Minerva Teichert (1888–1976), Moroni: The Last Nephite, 1949–1951, oil ion būļāwūt, 34¾ x 47 inij. Brigham Young University Museum of Art, 1969

Tijem̧ba 7–13

Moronai 7–9

“Kraist En Lōn̄aj Eok”

Lukkuun ekkatak Moronai 7–9 enaaj boktok im̧we eo an Jetōb Kwojarjar. Enaaj jipan̄ eo meļeļe kōn aikuj ko an ajri ro kwoj katakin ilo kūlaaj eo am̧.

Je En̄jake ko Rej Im̧we Eok

Kajjitōk bwe ren Kwaļo̧k

Kakeememej ajri kōn men ko kwar kajjitōk ippāer n̄an kōm̧m̧ani ilo wiik katak eo an wiik eo ļo̧k ak jet men rekar ekkatak jen baam̧le ko aer ilo wiik in. Kajjitōk ippāer n̄an kwaļo̧k ta eo raar ekkatak.

Katakin Katak ko: Ajri ro Reddikļo̧k

Moronai 7:33

N̄e ewōr aō tōmak, Imaron̄ kōm̧m̧an jabdewōt men Anij ekōņaan bwe in kōm̧m̧ane

Ajri ro im ewōr aer tōmak ilo Jisōs Kraist im leke ilo kajoor eo An remaron̄ kadedeļo̧k men ko reļļap n̄e renaaj jerbal n̄an E.

M̧akūtkūt ko Maron̄ Kōm̧m̧ani

• Riiti Moronai 7:33, im kajjitōk ippān ajri ro n̄an jutak n̄e reron̄ naan eo “tōmak.” Kōmeļeļeik bwe jej kwaļo̧k ad tōmak ilo Jisōs Kraist n̄e jej kōjparok kien ko An. Jipan̄ ajri ro kōm̧m̧ane juon laajrak ioon bo̧o̧t eo jet men Jisōs ekōņaan bwe ren kōm̧m̧ane, āinwōt pokake ro jineer im jemeer ak kwaļo̧k m̧ool. Kam̧ool bwe ad tōmak ilo Jisōs Kraist emaron̄ jipan̄ kōj kōjparok kien ko.

• Kwaļo̧k jet pijain ro jān Bok in Mormon (ak jen bok in jeje ko rekwojarjar jet) jerbali men ko reaorōk kōnke eaar wōr an tōmak ilo Jisōs Kraist (lale, n̄an waanjon̄ok, Gospel Art Book, nos. 19, 70, 78, 81). Jipan̄ ajri ro kwaļo̧k bwebwenatoon pija eo. Ba n̄an er ke kōn tōmak eo an armej rein ilo Jisōs Kraist, raar bōk kajoor n̄an kōm̧m̧ani ta eo Ekōņaan bwe ren kōm̧m̧ani

Moronai 7:41

Tōmak ilo Jisōs Kraist emaron̄ letok n̄an eō kōjatdikdik.

Elōn̄ armej ioon laļ ro rej en̄jake ke ejjeļo̧k aer kōjatdikdik. Ewi wāween am̧ maron̄ jipan̄ ajri ro kwoj katakin lo kōjatdikdikk eo ilo Jisōs Kraist?

M̧akūtkūt ko Maron̄ Kōm̧m̧ani

• Riit im kōmeļeļeik Moronai 7:41 n̄an ajri ro, im kajjitōk ippāer n̄an kajutak peier n̄e rej ron̄ men eo Moronai eaar ba jej aikuj bōk kōjatdikdik kake. Ba n̄an ajri ro kōn kōjatdikdik eo kwoj en̄jake kōn Jisōs Kraist.

• Kajjitōk ippān ajri ro n̄an ļōmņake juon eo rejeļā kajien me em̧ad ilo juon men epen. Kajjitōk ippān ajri ro n̄an jin̄aik juon pija in armej ro me remaron̄ kakeememej e n̄an bōk kōjatdikdik ilo Jisōs Kraist.

Moronai 7:47

“Jouj ej iakwe eo erreo an Jisōs Kraist.”

Ta en̄jake ko jen mour eo am̧ emaron̄ jipan̄ ajri ro jeļā jouj n̄an ro jet im kōm̧m̧an em̧m̧an n̄an er ilo iakwe?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an āliji naan in ippām: “Jouj ej iakwe eo erreo an Jisōs Kraist.” (Moronai 7:47). Jipan̄ ajri ro ļōmņake wāween ko Jisōs Kraist eaar kwaļo̧k iakwe n̄an ro jet (pija ko remaron̄ jipan̄, āinwōt Gospel Art Book, nos. 55, 83, 84). Ewi wāween An kar kwaļo̧k iakwe n̄an kōj? Wōn eo jemaron̄ kwaļo̧k iakwe n̄an e āinwōt kar Jisōs? N̄an waanjon̄ok, kwaļo̧k video eo “My Brother Hyrum” (ChurchofJesusChrist.org).

• Kajjitōk ippān ajri ro n̄an jin̄aik er make aer kwaļo̧k iakwe n̄an ro jet. Kakkobaba bwe ren likūt pija eo aer ijo enaaj kakeememej er n̄an iakwe ro jet āinwōt kar Jisōs.

Katakin Katak ko: Ajri ro Rerūttoļo̧k

Moronai 7:21–22, 25, 33

Ij jeraam̧m̧an n̄e ij tōmak ilo Jisōs Kraist.

Mormon eaar kōņaan bwe armej ro ren jeļā bwe kabwilōn̄lōn̄ ko raar jab bōjrak ke jerbal in kwaļo̧k eo an Jisōs ioon laļ in eaar jem̧ļo̧k. Toon wōt an wōr ad tōmak ilo Jisōs Kraist, jemaron̄, kōn jipan̄ eo An, kōm̧m̧an men otemjeļo̧k Ej kōņaan bwe jen kōm̧m̧ane—ekoba menin kabwilōn̄lōn̄ ko.

M̧akūtkūt ko Maron̄ Kōm̧m̧ani

• Jipan̄ ajri ro kōlaajrake ioon bo̧o̧t eo “men [ko r]em̧m̧an ” jej būki jen gospel eo an Jisōs Kraist, āinwōt an wōr baam̧le ko indeeo, jepļaakļo̧k n̄an Jemedwōj Ilan̄, im jeo̧rļo̧k jerawiwi ko ad. Innām kajjitōk ippān ajri ro n̄an riiti Moronai 7:21–22 im 25, pukot wāween eo jemaron̄ bōk aolep men ko rem̧m̧an. Ekōjkan ad kwaļo̧k tōmak eo ad ilo Jisōs Kraist im kalim̧m̧ur ko An?.

• Riit Moronai 7:33 n̄an ajri ro, innām kajjitōk ippāer n̄an ron̄jake ta eo jemaron̄ kōm̧m̧an n̄e ej wōr ad tōmak ilo Jisōs Kraist. N̄e ekkar, kwaļo̧k en̄jake ko am̧ kōn an kar tōmak eo am̧ kar jipan̄ eok kōm̧m̧ane ta eo Anij ekōņaan bwe kwon kōm̧m̧ane. Jipan̄ ajri ro ļōmņak kake im kwaļo̧k waanjon̄ok ko kōn mour ko aer. Elmen an tōmak ilo Kraist kar kōm̧m̧an juon oktak ilo waanjon̄ok kein?

Moronai 7:40–41; 9:25–26

Imaron̄ bōk kōjatdikdik ilo Jisōs Kraist, men̄e apan̄ ko reppen.

Mormon im Moronai raar ioon jekjek ko reppen, ak raar lo kōjatdikdik ilo Rilo̧mo̧o̧r Jisōs Kraist. Ewi wāween am̧ maron̄ jipan̄ ajri ro lo kōjatdikdik eo ilo Kraist n̄e rej ioon ebweer.

M̧akūtkūt ko Maron̄ Kōm̧m̧ani

• Jipan̄ ajri ro kōlaajraki jet inepata ko me ekōm̧m̧an bwe armej ro ren en̄jake ebweer ak ejjeļo̧k kōjatdikdik. Kajjitōk ippān ajri ro n̄an riiti Moronai 7:40–41 im 9:25–26, pukot men ko me remaron̄ jipan̄ ro jet me rej en̄jake ebweer. Ba n̄an er ewi wāween an Jisōs Kraist im gospel eo An kar jipan̄ eok ilo iien ko reppen.

• Kajjitōk ippān ajri ro n̄an je jidik naan n̄an eo ej en̄jake ebweer n̄an jipan̄ er bōk kōjatdikdik eo ilo Kraist, āinwōt an Mormon kar kōm̧m̧ane n̄an ļeo nejin Moronai 9:25–26. Rōjan̄ ajri ro n̄an kōjerbal naan ko jān eoon kein ilo naan ko aer.

• Tein̄i jidik kantenar kōn dān, im likūt ruo men ilowaaan—juon me en ebbebe im juon me ej tuļo̧k. Keidi men eo ej ebbebe eo n̄an juon armej eo ewōr an kōjatdikdik ilo Kraist Riit ippān doon Moronai 9:25. Ewi wāween an Kraist “kotak [kōj]” n̄e jej ioon apan̄ ko reppen. Jipan̄ ajri ro ļōmņak wāween ko remaron̄ likatōttōt ilo Rilo̧mo̧o̧r im katak ko An “ilo kōļmenļo̧kjeņ ko [aer] indeeo.”

Moronai 7:46–48

“Jouj ej iakwe eo erreo an Jisōs Kraist.”

Kōļapļo̧k menin letok eo an iakwe em̧ool ej juon kōttōbar eo ejjeļo̧k jem̧ļo̧kin. Elmen am̧ maron̄ im̧we ajri ro n̄an pukot iakwe eo em̧ool an Kraist?

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an kwaļo̧k ta meļeļein naan in “iakwe em̧ool.” Innām kajjitōk ippān juon iaan ajri ro n̄an riiti Moronai 7:45. (Eļan̄n̄e jet iaan naan ko ilo eoon in epen n̄an meļeļe, jipan̄ ajri ro lale ilo tikjinede.) Kajjitōk ippān ajri ro n̄an kōnono kōn armej ro rejeļā kajjier ro rej kwaļo̧k waanjon̄ok ko rem̧m̧an kōn iakwe em̧ool. Etke jouj kar ņaetan “iakwe eo erreeo an Kraist”? (Moronai 7:47). Ta eo eoon 48 ej katakin kōj kake ewi wāween ad obrak kōn jouj? Rōjan̄ kajjojo ajri ro n̄an jar kōn iakwe em̧ool ilo wiik im im reim̧aanļo̧k kōn wāween ko n̄an kwaļo̧k iakwe em̧ool.

• Jipan̄ ajri ro ļōmņake wāween ko Jisōs eaar kwaļo̧k iakwe em̧ool (lale, n̄an waanjon̄ok, Luk 23:34; Jon 8:1–11; Ether 12:33–34). Ekōjkan ad maron̄ ļoor waanjon̄ak eo An?

• Kajjitōk ippān ajri ro n̄an jet etan armj ro rejeļā kajjier ioon juon peba im likūt er ilo juon pāāk jidikdik ak kantenar. Kajjitōk ippāer n̄an kantenar eo aer n̄an m̧weeo, kālet juon āt kajjojo raan, im kōm̧m̧an jet men n̄an kwaļo̧k iakwe n̄an armej eo. Ilo katak eo juon, kajjitōk ippāer n̄an kwaļo̧k en̄jake ko ilo aer jerbal n̄an armej rein.

Kōketak Ekkatak ilo Mweo

Rōjan̄ ajri ro n̄an ļōmņake ro jet me remaron̄ pukot eļapļo̧k tōmak ak kōjatdikdik ilo Jisōs Kraist. Kajjitōk ippān ajri ro n̄an kwaļo̧k n̄an armej eo jet me raar ekkatak ilo kūlaaj rainin.

Kōkōm̧anm̧anļo̧k Ad Katakin

Rōjan̄ n̄an kautiej Wāween eo eaorōk kōn kautiej ej ļōmņak kōn Jemedwōj Ilan̄ im Jisōs Kraist. Komaron̄ kakeememej er n̄an kautiej ilo aer al mera ak in̄ūrn̄ūri juon al ak kwaļo̧k juon pija in Jisōs.