Behold the Lamb of God, jān Walter Rane

Tijem̧ba 21–27

Kūriijmōj

“Enaaj Itok n̄an Laļ n̄an Lo̧mo̧o̧ren Armej ro An”

Ajri ro ekkā aer kijōrjōr in kōnono kōn aer kemem e Kūrijm̧ōj. Kōļmenļo̧kjeņ kōn ta eo kwomaron̄ kōm̧m̧ane n̄an jipan̄ er mije wōt Jisōs Kraist im kam̧m̧oolol kōn lo̧tak eo An.

Je En̄jake ko Rej Im̧we Eok

Kajjitōk bwe ren Kwaļo̧k

Kajjitōk ippān ajri ro n̄an kwaļo̧k ak jin̄aik juon pija in jet me baam̧le eo aer raar kōm̧m̧ane ilo iien Kūrijm̧ōj n̄an jipan̄ er keememej Jisōs Kraist.

Katakin Katak ko: Ajri ro Reddikļo̧k

1 Nipai 11:13–22; Mosaia 3:5–8; Alma 7:9–13; Hilamōn 14:1–6; 3 Nipai 1:15, 19–21

Jisōs Kraist eaar lo̧tak bwe en aō Rilo̧mo̧o̧r.

Ajri ro kwoj katakin rejeļā ke etke jej kemem e Kūrijm̧ōj? Ewi wāween am̧ maron̄ jipan̄ er meļeļe etke lo̧tak eo an Jisōs Kraist ej juon iien n̄an keemem e?

Makūtkūt ko Maron̄ Kōm̧m̧ani

• Kwaļo̧k bwebwenatoon lo̧tak eo an Jisōs, kwaļo̧k pija ko ilo am̧ kōm̧m̧ane (āinwōt Gospel Art Book, nos.28, 29, 30, 31). Kōm̧m̧an bwe ajri ro ren kwaļo̧k ta eo rejeļā. Kōjerbal peij in m̧akūtkūt eo an wiik in n̄an katakin ajri ro bwe armej ro ilo tōre ko ilo Bok in Mormon raar jeļā kōn lo̧tak eo an Jisōs.

• Riiti eoon kein raorōk Alma 7:11–12 n̄an katakin ajri ro ta eo Jisōs Kraist eaar kōm̧m̧ane n̄an kōj. Kwaļo̧k etke kwoj kam̧m̧oolol bwe Jisōs Kraist eaar lo̧tak, im kwaļo̧k en̄jake ko am̧ kōn en̄taan in pinmuur eo An.

• Kwaļo̧k pija ko kōn en̄taan in pinmuur eo an Rilo̧mo̧o̧r—āinwōt en̄taan eo An ilo Gethsemane, mej eo ioon dōbwāāl, im Jerkakpeje eo (lale Gospel Art Book, nos. 56, 57, 58, 59). Kajjitōk ippān ajri ro n̄an kwaļo̧k n̄an eok ta eo rej loe ilo pija eo. Jipan̄ er meļeļe bwe Jemedwōj Ilan̄ eaar jilkintok Jisōs Kraist n̄an laļin n̄an en̄taan kōn jerawiwi ko ad, mej kōn kōj, im kar jerkakpeje bwe jen maron̄ jepļaak im mour Ippān.

• Al ippān ajri ro juon al kōn lo̧tak eo an Jisōs, āinwōt “He Sent His Son” or “Away in a Manger” (Children’s Songbook, 34–35, 42–43). Kalikkar n̄an ajri ro eoon ko ilo al eo me ej kōmeļeļeik kōjeraam̧m̧an ko ad kōn wōt lo̧tak eo an Jisōs.

2 Nipai 25:23, 26

Bok in Mormon eo ej kam̧ool kōn Jisōs Kraist.

Ilo am̧ kadedeļo̧k ekkatak eo am̧ kōn Bok in Mormon iiōin, kakeememej ajri ro bwe bok in ej “Bar juon Kallim̧ur in Jisōs Kraist,” kar jeje n̄an jipan̄ kōj itok n̄an E.

Makūtkūt ko Maron̄ Kōm̧m̧ani

• Kotak juon kape in Bok in Mormon bwe ajri ro ren loe. Riiti taitōļ eo im kalikkar naan ko “Bar juon Kallim̧ur in Jisōs Kraist.” Kōm̧m̧an bwe ajri ro ren bōk kūņaer jibwe bok eo, im jipan̄ er pukot etan Rilo̧mo̧o̧r ilo kōbar eo. Ba n̄an ajri ro wāween am̧ en̄jake kōn Bok in Mormon im wāween an kar jipan̄ eok jeļā kōn Jisōs Kraist.

• Leļo̧k n̄an ajri ro juon pijain Jisōs, ak kōm̧m̧an bwe ren make jin̄aik pijain E. Kajjitōk ippāer n̄an kotak pija ko aer kajjojo iien n̄e rej ron̄ etan Kraist ilo am̧ 2 Nipai 25:23, 26. Kam̧ool bwe Bok in Mormon eaar jeje n̄an jipan̄ kōj “tōmak ilo Kraist” (2 Nipai 25:23).

• Kwaļo̧k n̄an ajri ro juon iaan eoon ko rem̧m̧an ippām̧ ak bwebwenato ko jen Bok in Mormon me ekar jipan̄ eo jeļā kōn Jisōs Kraist. Kajjitōk ippān ajri ro kōn bwebwenato ko em̧m̧an ippāer ilo Bok in Mormon, im jipan̄ er lo wāween an bwebwenato kein jipan̄ kōj jeļā kōn Rilo̧mo̧o̧r im n̄an epaakeļo̧k E. Lale pija ko jet ilo Book of Mormon Stories emaron̄ jipan̄ er keememej bwebwenato ko.

Katakin Katak ko: Ajri ro Rerūttoļo̧k

1 Nipai 11:13–22; Mosaia 3:5–8; Alma 7:10–13; Hilamōn 14:1–6; 3 Nipai 1:15, 19–21

Jisōs Kraist eaar lo̧tak bwe en aō Rilo̧mo̧o̧r.

Kōļmenļo̧kjen ewi wāween am̧ maron̄ jipan̄ ajri ro meļeļe aorōkin lo̧tak eo an Kraist im ta meļeļein n̄an er.

Makūtkūt ko Maron̄ Kōm̧m̧ani

• Leļo̧k n̄an kajjojo ajri juon eoon jān peij in m̧akūtkūt eo an wiik in. Kajjitōk ippāer n̄an riiti eoon eo aer, kalikkar wōnrikanaan eo ej kōnono, im kwaļo̧k juon men me rikanaan in eaar jeļā kōn Jisōs Kraist. Leļo̧k n̄an er jipan̄ ak ren jerbal ippān eļan̄n̄e aikuji.

• Kōlaajraki ioon bo̧o̧t eo jet men ko raar waļo̧k ilo iien lo̧tak eo an Jisōs, āinwōt an kōmeļeļeik ilo Luk 2:4–14; Matu 2:1–2; and 3 Nipai 1:15, 19–21. Jipan̄ ajri ro pukot eoon kein n̄an ļōmņake n̄e men kein raar waļo̧k ilo Betlem, Amedka, ak jim̧or. Etke jej kam̧m̧oolol bwe ewōr ippād Bok in Mormon āinwōt kein kam̧ool eo kein karuo kōn lo̧tak eo an Jisōs Kraist im jerbal eo an Rilo̧mo̧o̧r?

• Riiti Alma 7:10–13 ippān ajri ro. Ta eo jaar ekkatak jān eoon kein kōn lo̧tak eo an Jisōs? Kajjitōk ippān ajri ro n̄an kwaļo̧k etke rej kam̧m̧oolol kōn Jisōs Kraist, im kwaļo̧k naan in kam̧ool eo am̧ kōn E.

2 Nipai 25:23, 26; 33:4, 10

Bok in Mormon eo ej kam̧ool kōn Jisōs Kraist.

Kōnono kōn Bok in Mormon, Rikanaan Josep Smith eaar ba bwe “juon armej enaaj epaakeļo̧k Anij jān an mour ekkar n̄an katak ko ie, jān jabdewōt bok ko jet” (Kadkad in Bok in Mormon). Ewi wāween am̧ maron̄ jipan̄ ajri ro meļeļe kōn kallim̧ur in?

Makūtkūt ko Maron̄ Kōm̧m̧ani

• Leļo̧k juon iaan eoon kein n̄an kajjojo ajri: 2 Nipai 25:23, 26; 33:4, 10. Kajjitōk ippān ajri ro n̄an riiti eoon eo aer im kalikkar ta eo rikanaan eo an Bok in Mormon ej kōņaan bwe jen jeļā. Kajjitōk ippāer n̄an je ta eo rekar loe ioon bo̧o̧t eo. Kōmeļeļeik bwe men kein rej kalikkar juon jibadbad eo eaorōk an Bok in Mormon. Kōm̧m̧an bwe ajri ro ren kōnono kake ippān doon ewi wāween aer maron̄ kōmeļeļe n̄an eo m̧ōttaer kōn juon jibadbad eo eaorōk an Bok in Mormon.

• Kwaļo̧k n̄an ajri ro juon iaan eoon ko rem̧m̧antata ippam̧ ak bwebwenato ko jān Bok in Mormon bwe ejipan̄ eok jeļā kōn Jisōs Kraist. Kajjitōk ippān ajri ro kōn bwebwenato ko em̧m̧antata ippāer ilo Bok in Mormon, im jipān̄ er lo an bwebwenato kein jipan̄ kōj jeļā kōn Rilo̧mo̧o̧r im n̄an epaakeļo̧k E. Kwaļo̧k n̄an ajri ro ewi wāween an Bok in Mormon kar jipan̄ eok jeļā bwe Jisōs ej RiKraist eo. Rōjan̄ ajri ro n̄an ļōmņake juon eoon ak bwebwenato jān Bok in Mormon me ej kōkajoorļo̧k tōmak eo aer ilo Jisōs Kraist. Kajjitōk ippāer n̄an kwaļo̧ke n̄an eo m̧ōttaer ak ro uwaan baam̧le eo ro me rejjan̄in jeļā kōn Bok in Mormon.

Kōketak Ekkatak ilo Mweo

Kajjitōk ippān ajri ro n̄an kwaļo̧k n̄an baam̧le eo aer ewi wāween an Bok in Mormon kar jipan̄ er jeļā eļapļo̧k kōn Kraist. Rōjan̄ er n̄an kwaļo̧k juon eoon ak bwebwenato jen Bok in Mormon āinwōt m̧ōttan naan in kam̧ool eo aer.

Kōkōm̧anm̧anļo̧k Ad Katakin

Em̧m̧an bwebwenato ippān ajri ro. Bwebwenato rej jet wāween ko rem̧m̧antata n̄an jipan̄ ajri ro jeļā im keememej m̧ool ko. Ilo am̧ kwaļo̧k bwebwenato in lo̧tak eo an Jisōs, bar ļōmņake in kwaļo̧k bwebwenato ko jān mour eo am̧ me ekar kōkajoorļo̧k tōmak eo am̧ ilo Rilo̧mo̧o̧r.