“Tijem̧ba 14–20. Moronai 10: ‘Itok n̄an Kraist, im Weppān ilo E,’” Itok, Ļoor Eō—N̄an Būraimere: Bok in Mormon 2020 (2020)
“Tijem̧ba14–20. Moronai 10,” Itok, Ļoor Eō—N̄an Būraimere: 2020
That Ye May Know, jen Gary L. Kapp
Tijem̧ba 14–20
Moronai 10
“Itok n̄an Kraist, im Weppān ilo E”
Jet ajri ilo kūlaaj eo am̧ emaron̄ wōr aer en̄jake ko ewōr tokjeer ilo ekkatak ko aer jān Bok in Mormon ilo m̧weeo. Ewi wāween am̧ maron̄ kōjerbal en̄jake kein n̄an rōjan̄ aolep ajri ro n̄an riit jeje ko rekwojarjar ilo m̧weeo?
Je En̄jake ko Rej Im̧we Eok
Kajjitōk bwe ren Kwaļo̧k
Leto-letak juon kape in Bok in Mormon. N̄e kajjojo ajri rejibwe bok eo, kajjitōk ippān n̄an kwaļo̧k juon men em̧m̧an ippān kōn Bok in Mormon—juon bwebwenato em̧m̧an, jidik naan in kam̧ool, ak juon en̄jake in ekkatak jān m̧weeo ak ilo m̧ōņjar.
Katakin Katak ko: Ajri ro Reddikļo̧k
Imaron̄ jeļā ippa make bwe Bok in Mormon ej m̧ool.
Pukot wāween ko n̄an jipān̄ ajri ro bōk kūr eo an Moronai n̄an kajjitōk ippān Anij eļan̄n̄e Bok in Mormon ej m̧ool.
M̧akūtkūt ko Maron̄ Kōm̧m̧ani
-
Kwaļo̧k juon pijain an Moronai kalbwin pileij ko (lale laajrak eo an wiik in ilo Itok, Ļoor Eō—N̄an Kajjojo Armej im Baam̧le ko), im kajjitōk ippān ajri ro n̄an kōmeļeļeik ta eo rej loe. Kajjitōk ippāer n̄an kalikkar pileij ko, im kōmeļeļeik bwe ioon pileij ko kar jeje naan ko jej kiiō riiti ilo Bok in Mormon. Kōm̧m̧an bwe ajri ro ren katen wōt n̄e er Moronai rej jeje ioon pileij ko im kaļbwini. Al ippān doon “The Golden Plates” (Children’s Songbook, 86).
-
Kwaļo̧k Bok in Mormon eo, im riiti Moronai 10:4. Kwaļo̧k bwe jemaron̄ kajjitōk ippān Anij eļan̄n̄e Bok in Mormon ej m̧ool, im Enaaj jilkintok Jetōb Kwojarjar n̄an kam̧ool n̄an kōj. Komaron̄ barāinwōt kōjerbal “Chapter 54: The Promise of the Book of Mormon” (Book of Mormon Stories, 156, ak ilo corresponding video ilo ChurchofJesusChrist.org). Kwaļo̧k ewi wāween an Jetōb Kwojarjar kar jipan̄ eok bōk kam̧ool kōn Bok in Mormon. Jipan̄ ajri ro meļeļe elemen en̄jake in kam̧ool eo jen Jetōb. Al juon al ippān ajri ro kōn kappukot m̧ool eo, āinwōt “Search, Ponder, and Pray” (Children’s Songbook,109).
Jemedwōj Ilan̄ ej letok n̄an eō menin letok ko an jetōb.
Moronai eaar kōmeļeļeik menin letok ko Anij ej litok n̄an ro Nejin n̄e ewōr aer tōmak ilo E. Kwomaron̄ jipan̄ ajri ro bōk tōmak bwe Anij enaaj leļo̧k n̄an er menin letok ko an jetōb.
M̧akūtkūt ko Maron̄ Kōm̧m̧ani
-
Je nōm̧ba 9 n̄an 16 ioon bar jet peba, im limi kajjojo peba āinwōt juon menin letok. Kōm̧m̧an bwe ajri ro ren bōk kūņaer rubwe menin letok ko. Ilo aer kōm̧m̧ane, riit ippān doon eoon ko jān Moronai 10:9–16 me ej keidļo̧k wōt nōm̧ba ko, im jipan̄ ajri ro kwaļo̧k kajjojo menin letok eo. Kōmeļeļeik bwe errein rej menin letok ko Jemedwōj Ilan̄ ej liļo̧k n̄an ro Nejin bwe jen maron̄ jipan̄ doon im kōm̧m̧ane jerbal in An.
-
Kōm̧m̧an bwe ajri ro ren kenono jidik kōn menin letok ko rem̧m̧an ippāer me raar būki. Ba n̄an ajri ro kōn menin letok ko an jetōb kwaar kile bwe Jemedwōj Ilan̄ eaar liļo̧k n̄an er, āinwōt menin letok ko an tōmak, māletlet, naan in kam̧ool, jouj, im maron̄ in ekkatak.
Jisōs Kraist ekōņaan bwe aolep ren itok n̄an E.
Elmen am̧ maron̄ jipan̄ ajri ro meļeļe ta meļeļein “itok n̄an Kraist.”
M̧akūtkūt ko Maron̄ Kōm̧m̧ani
-
Riit n̄an ajri ro jān Moronai 10:32, “Itok n̄an Kraist, im weppān ilo E,” im kajjitōk ippān ajri ro n̄an āliji naan eo ippām. Kajjitōk ippāer n̄an kilōke mejeer ilo am̧ likūt juon pija in Jisōs jabdewōt jikin ilo ruum̧ eo. Innām ba ren kōpeļļo̧k mejeer, pukot pija eo, im kuk tok ippān doon iturin Kōnono ippān ajri ro wāween ko jemaron̄ itok n̄an Kraist (lale, n̄an waanjon̄ok, Laajrak in Tōmak Ko 1:3–4). Āliji m̧akūtkūt in, kōtļo̧k an ajri ro likūt pija eo jabdewōt jikin ilo kūlaajruum̧ eo.
-
Jipan̄ ajri ro kainōknōke pāāj in menono me ej ba “Ij iakwe Anij kōn aolepen aō, aolepen aō ļōm̧ņak, im aolepen aō kajoor” (lale Moronai 10:32). Ewi wāween ad kwaļo̧k n̄an Anij ke jej iakwe E?
Katakin Katak ko: Ajri ro Rerūttoļo̧k
Imaron̄ jeļā m̧ool eo jen kajoor eo an Jetōb Kwojarjar.
Anij ekōņaan bwe jen aolep jeļā bwe Bok in Mormon ej m̧ool. Jipan̄ ajri ro meļeļe kallim̧ur eo an Anij n̄an “kwaļo̧k m̧ool eo n̄an eok, jen kajoor eo an Jetōb Kwojarjar.”
M̧akūtkūt ko Maron̄ Kōm̧m̧ani
-
Je naan kein ioon bo̧o̧t eo Riit, Keememej, Kōļmenļo̧kjeņ im Kajjitōk. Kajjitōk ippān ajri ro n̄an pukot naan kein ilo Moronai 10:3–4 Ta eo jej riiti, keememeje, kōļmenļo̧kjeņ, im kajjitōk n̄an bōke ak kōkajoorļo̧k naan in kam̧ool ko ad kōn Bok in Mormon? Kajjitōk ippān ajri ro n̄an pukot reinjuon kōtaan eoon kein im al “Search, Ponder, and Pray” (Children’s Songbook, 109).
-
Jipan̄ ajri ro keememej jet iaan en̄jake ko kwaar bōk n̄an ekkatak ippān doon jen Bok in Mormon. Kwaļo̧k en̄jake ko am̧ kōn Bok in Mormon, ekoba ewi wāween am̧ kar bōke ak kōkajoorļo̧k naan in kam̧ool eo am̧ ke ej m̧ool. Kajjitōk ippāer n̄an kwaļo̧k en̄jake ko im naan in kam̧ool ko aer.
-
Ba kōn juon iien me Jetōb Kwojarjar eaar kwaļo̧k kam̧ool n̄an kwe kōn jet men. Kōmeļeļeik am̧ kar en̄jake im am̧ kar jeļā bwe ekar jen Jetōb Kwojarjar. Jipan̄ ajri ro ekkatak jen eoon kein kōn wāween an Jetōb kōnono n̄an kōj: Jon 14:26–27; Katak im Bujen ko 6:15, 23; 8:2–3; 9:7–9; 11:12–14.
Jemedwōj Ilan̄ ej letok n̄an eō menin letok ko an jetōb.
Ewōr ilo tōre ad kein ad ro rej “kaarmejete … menini letok ko an Anij” (Moronai 10:8). Jipan̄ ajri ro lo bwe menin letok kein rej waļo̧k wōt ilo tōre in.
M̧akūtkūt ko Maron̄ Kōm̧m̧ani
-
Je etan menin letok eo ilo Moronai 10:9–16 ioon jidik peba, im likūti ilo juon bo̧k in leļo̧k. Je nōm̧ba 9 n̄an 16 ioon bo̧o̧t eo, im kajjitōk ippān ajri ro n̄an bōk kūņaer bōk peba eo jen bo̧k eo im keidi n̄an eoon in nōm̧ba eo ioon bo̧o̧t. Ta eo jej ekkatak jen menin letok eo jān eoon 8 17–18?
-
Kwaļo̧k bwe bwebwenato eo ej itok jen Bok in Mormon (lale “Chapter 3: The Angel Moroni and the Gold Plates,” Doctrine and Covenants Stories, 13–17). Jipan̄ ajri ro kalikkar menin letok ko loi ilo Moronai 10:9–16 bwe Anij eaar leļo̧k n̄an Josep Smith bwe en maron̄ bōktok Bok in Mormon. Etke Jemedwōj Ilan̄ ekōņaan bwe jen tōmak ilo menin letok ko rainin?
Jisōs Kraist ekōņaan bwe in itok n̄an E.
Elmen am̧ naaj kajjitōk ippān ajri ro n̄an “itok n̄an Kraist, im weppān ilo E”?
M̧akūtkūt ko Maron̄ Kōm̧m̧ani
-
Je ioon bo̧o̧t eo juon kajjitōk āinwōt Ta meļeļeik itok n̄an Kraist? Jipan̄ ajri ro pukote Moronai 10:32–33 n̄an lo uwaak ko rekkar. Jerbal ippān doon n̄an kōlaajraki ta eo Kraist ekōņaan bwe jen kōm̧m̧ane im ta eo Ej kallim̧uri n̄an kōm̧m̧ane n̄an kōj.
-
Kwaļo̧k eoon ko rem̧m̧antata ippam̧ ak bwebwenato ko jen Bok in Mormon me raar jipan̄ eok itok n̄an Kraist, im kajjitōk ippān ajri ro n̄an kōm̧m̧an āinwōt. Etale ippān ajri ro naan ko an Rikanaan Josep Smith jen Kadkad in Bok in Mormon: “Juon armej enaaj epaakeļo̧k Anji jān mour [Bok in Mormon] ko ie, jān jabdewōt bok ko jet.” Kwaļo̧k am̧ naan in kam̧ool elmen an menin waļo̧k ilo mour eo am̧.
Kōketak Ekkatak ilo Mweo
Kajjitōk ippān ajri ro n̄an jar n̄an bōk jouon naan in kam̧ool eo ekajoor kōn Bok in Mormon innām kwaļo̧k naan in kam̧ool eo an ippān baam̧le eo ak ro m̧ōttan.
Kōkōm̧anm̧anļo̧k Ad Katakin
Kōketak n̄an kwaļo̧k. Ajri ro rōreddik ekkā an wōr aer ļōmņak ko ewōr tokjeer kōn gospel in. Kwaļo̧k ļōmņak ko aer ejipan̄ er n̄an kōnono n̄an ro m̧ōttaer kōn gospel in (lale Teaching in the Savior’s Way,30).