Minerva Teichert (1888–1976), Alma Baptizes in the Waters of Mormon, 1949–1951, oil on masonite, 35⅞ x 48 inches. Brigham Young University Museum of Art, 1969

Nobōm̧ba 30 Tijem̧ba 6

Moronai 1–6

“N̄an Kōjparok Er ilo Wāween Ejim̧we”

Mokta jen am̧ jino karōk m̧akūtkūt in ekkatak ko n̄an ajri ro, lukkuun ekkatak Moronai 1–6, pukot pedped in katak ko im eoon ko me kwoj en̄jake rej aikuj in meļeļe.

Je En̄jake ko Rej Im̧we Eok

Kajjitōk bwe ren Kwaļo̧k

Kajjitōk ippān ajri ro n̄an kwaļo̧k ta ko raar ekkatak kōn Moronai. Kwomaron̄ bar kōjerbal “Chapter 53: Moroni and His Teachings” (Book of Mormon Stories, 154–55, ak ilo corresponding video ilo ChurchofJesusChrist.org) n̄an jipan̄ er keememej.

Katakin Katak ko: Ajri ro Reddikļo̧k

Moronai 4–5

Ij bōk kwojkwoj eo n̄an kwaļo̧k bwe Inaaj keememej Jisōs Kraist.

Kwojkwoj eo emaron̄ juon jetōb in en̄jake—bar n̄an ajri ro redik. Ewi wāween am̧ maron̄ jipan̄ ajri ro kwoj katakin n̄an kōjerbal iien kwojkwoj eo n̄an ļōmņak kōn Jisōs?

Makūtkūt ko Maron̄ Kōm̧m̧ani

• Kwaļo̧k juon pijain an armej ro bōk kwojkwoj eo (lale Gospel Art Book, no.108). Kajjitōk ippān ajri ro n̄an jiron̄ eok ta eo ej waļo̧k ilo iien kwojkwoj eo. Ta eo jej aikuj kōm̧m̧ane ilo iien kwojkwoj eo?

• Kajjitōk ippān ruo membōr in ward eo bwe ren itok n̄an kūlaaj eo im riiti Moronai 4:3 im 5:2 n̄an ajri ro im kwaļo̧k etke rej bōk kwojkwoj eo kajjojo wiik. Kajjitōk ippāer n̄an kwaļo̧k men ko ajri ro remaron̄ kōm̧m̧ane n̄an jipan̄ er ļōmņak kōn Jisōs ilo iien kwojkwoj eo im keememej E iien otemjeļo̧k.

• Al juon al me ejipan̄ ajri ro ļōmņak kōn Jisōs, āinwōt “Reverently, Quietly” (Children’s Songbook, 26). Kajjitōk ippān ajri ro n̄an kaminene jijet im jab keroro ilo iien kwojkwoj eo.

Moronai 6:1–3

Imaron̄ keppopo n̄an peptaij.

Kōmeļeļe eo an Moronai kōn armej ro raar peptaij ilo raan ko an emaron̄ jipan̄ ajri ro keppopo n̄an bōk kain̄i in eaorōk rainin.

Makūtkūt ko Maron̄ Kōm̧m̧ani

• Riiti naan ko jān Moronai 6:1–3 me ej katakin wōn ro remaron̄ peptaij. Kōmeļeļeik naan ko me ajri ro remaron̄ jab meļeļe kaki. N̄an waanjon̄ok, juon meļeļein “bōro erub im jetōb ettā” ej n̄an en̄jake būrom̧ōj kōn jerawiwi ko ad (Moronai 6:2). Ba ewi wāween am̧ kar keppopo n̄an peptaij, ak kajjitōk ippān juon eo me ej kab peptaij n̄an kōmeļeļeik wāween an kar keppopo. Jipan̄ ajri ro ļōmņake wāween ko remaron̄ keppopo n̄an peptaij juon raan.

• Kwaļo̧k pijain armej ro raar peptaij (lale Gospel Art Book, nos.103, 104), im kōm̧m̧an bwe ajri ro ren kōnono kōn ta eo raar loe ilo pija ko Jipan̄ er loi men ko redik, āinwōt dān im nuknuk mouj ko. Kajjitōk ippān ajri ro etke jej peptaij, im kōmeļeļeik etke kwaar kālet n̄an peptaij.

Moronai 6:4–6, 9

Ij jeraam̧m̧an n̄e ij etal im jar.

Ajri ro kwoj katakin rej ke meļeļe etke jej ilo̧k im jar aolep wiik? Moronai 6 ej letok jet un ko raorōk.

Makūtkūt ko Maron̄ Kōm̧m̧ani

• Kajjitōk ippān ajri ro etke rekōņaan etal im jar, im jipan̄ er kwaļo̧k jet men ko jej kōm̧m̧ani ilo jikin jar. Riit n̄an er jet iaan men kein jān Moronai 6:4–6, 9, im kajjitōk ippāer n̄an kōnono kake ak jin̄aik pijain aer make kōm̧m̧ani jet iaan men kein (āinwōt jar , kwaļo̧k, al, im bōk kwojkwoj eo).

• Jipan̄ ajri ro al juon al kōn pād ilo jikin kabun̄jar, āinwōt “When I Go to Church” (Children’s Songbook, 157). Ba n̄an ajri etke em̧m̧an ippam̧ etal im jar im elmen an kōjeraam̧m̧an eok.

Katakin Katak ko: Ajri ro Rerūttoļo̧k

Moronai 2–6

Jetōb Kwojarjar ej menin letok eo ekwojarjar.

Jetōb Kwojarjar ej waļo̧k elōn̄ alen ilo Moronai 2–6. Ewi wāween am̧ maron̄ kōjerbal jebta kein n̄an jipan̄ ajri ro meļeļe elmen an Jetōb Kwojarjar maron̄ jipan̄ er?

Makūtkūt ko Maron̄ Kōm̧m̧ani

• Kajjitōk ippān ajri ro n̄an pukote ilo aolep eoon ilo Moronai 2–6 me ej kwaļo̧k kōn Jetōb Kwojarjar ak Jetōb. Riiti kajjojo eoon kein ippān doon, im kajjitōk ippān ajri ro n̄an kōlaajraki ioon bo̧o̧t eo men ko raar ekkatak kōn Jetōb Kwojarjar. Ekōjkan an Jetōb Kwojarjar eo maron̄ jipan̄ kōj?

• Ba n̄an ajri ro kōn juon iien kwaar en̄jake im̧we eo an Jetōb Kwojarjar eo, emaron̄ ilo im̧ōnjar eo ak ijoko jet. Kōmeļeļeik wāween am̧ kar jeļā ke ekar Jetōb Kwojarjar im wāween An kar jipan̄ eok. Kajjitōk ippān ajri ro n̄an kwaļo̧k jabdewōt en̄jake ko raar en̄jaki jen Jetōb Kwojarjar, im rōjan̄ er n̄an pukot im̧we eo An.

  

  Menin letok eo an Jetōb Kwojarjar ej itok jen likūt pā ko iood.

Moronai 4–5

Ij bōk kwojkwoj eo n̄an kwaļo̧k bwe inaaj keememej Jisōs Kraist iien otemjej.

N̄e ajri ro remeļeļe aorōk eo an kwojkwoj eo, renaaj kautieje n̄an epaake Anij ilo iien kain̄i in.

Makūtkūt ko Maron̄ Kōm̧m̧ani

• Je naan kein jen Moronai 4:3 im 5:2 ioon jidik peba, im kajjitōk ippān ajri ro n̄an likūt naan ko ilo jim̧weier. Ekkar n̄an eoon kein, etke kwojkwoj eo eaorōk?

• Kajjitōk ippān ajri ro n̄an antoone n̄e eo m̧ōttaer ej kab kein kajuon an itok n̄an kweilo̧k in kwojkwoj eo. Ewi wāween aer maron̄ kōmeļeļeik n̄an eo m̧ōttaer ta meļeļein kwojkwoj eo im etke jej bōke? Rōjan̄ er n̄an kōjerbal Moronai 4:3 im 5:2 ilo kōmeļeļe ko aer make.

• Kajjitōk ippān ajri ro n̄an kwaļo̧k men ko baam̧le ko aer rej kōm̧m̧ani ilo iien kwojkwoj eo n̄an kautiej im ļōmņak kōn Jisōs Kraist. Ta bar ļōmņak ko ewōr ippāer? Kajjitōk ippāer n̄an bōk juon iaan ļōmņak kein bwe en juon kōttōbar n̄an joļo̧k eļap iien n̄an ļōmņak kōn Rilo̧mo̧o̧r ilo iien kwojkwoj eo.

Moronai 6:4–6, 9

Jej ilo̧k n̄an jikinjar n̄an bōk kwojkwoj eo im rie doon.

Naan ko an Moronai remaron̄ jipan̄ ajri ro kwoj katakin lo jibadbad eo eļap n̄an itok n̄an jar kajjojo wiik.

Makūtkūt ko Maron̄ Kōm̧m̧ani

• Je Etke jej itok n̄an jar? ioon bo̧o̧t eo, im kajjitōk ippān ajri ro n̄an je uwaak ko. Kajjitōk ippāer n̄an pukot bar uwaak ko jet ilo Moronai 6:4–6, 9 im kobaiki ilo laajrak eo ioon bo̧o̧t eo. Kajjitōk ippān ajri ro n̄an kwaļo̧k ta eo raar jeraam̧m̧an kake ilo aer itok n̄an jar. Kōm̧m̧an bwe ren kōmeļeļeik n̄an eo m̧ōttan jen bar juon kabun̄ etke rej kam̧m̧ool bwe rej pād ilo Kabun̄.

• Kwaļo̧k pija ko ak waanjon̄ok in m̧ōn̄ā ko rōūne. Etke eaorōk n̄an kaddōkļo̧k ānbwiniid? Riit ippān doon Moronai 6:4, im kajjitōk ippān ajri ro ta eo rej ļōmņake kōn meļeļein naan in “eddōkļo̧k ilo em̧m̧an eo an naan in Anij.” Ewi wāween an naan eo an Anij kaddōkļo̧k kōj?

• Kajjitōk ippān juon ajri n̄an riiti kout in jān Elder Jeffrey R. Holland, im kōnono kōn ta eo ej kwaļo̧k kake ilo ad maron̄ kaddōkļo̧k doon: “Elōn̄ armej rejjab itok in jar n̄an baj pukote wōt ta katakin gospel eo em̧ool ak pukot ro m̧ōttaer, bōtaab aolep men kein raorōk. Rej itok im pukote jetōbin en̄jake. Rekōņaan aenōm̧m̧an. Rekōņaan bwe ļōn̄aj tōmak im kōkāāl aer kōjatdikdik. Rekōņaan, ilo tukaduin, n̄an naajdik jān em̧m̧an eo an naan in Anij, n̄an kōkajoorļo̧r jen kajoor ko an lan̄” (“A Teacher Come from God,” Ensign, Māe 1998,26). Ewi wāween ad jipan̄ naajdik jetōb ko an doon ilo jar?

Kōketak Ekkatak ilo Mweo

Rōjan̄ ajri ro n̄an kōnono ippān baam̧le eo aer kōn un ko em̧m̧an ippāer n̄an itok im jar kajjojo wiik.

Kōkōm̧anm̧anļo̧k Ad Katakin

Rie ro jinen im jemān. Lukkuun pukot wāween ko n̄an rie ro jinen im jemān ajri ro kwoj katakin. Ewi wāween am̧ rie kijejeto ko aer n̄an katakin gospel eo n̄an ajri ro nejier? N̄an waanjon̄ok, kwomaron̄ kōnono n̄an ro jinen im jemān kōn aikuj im itok limo ko aer ro nejier ak kwaļo̧k n̄an er ta eo ro nejier rej ekktak ilo kūlaaj (lale Teaching in the Savior’s Way,25).