Ennaan eo an Būreejtōnji eo Kein Kajuon, Pāpode 2018
Keememej E Iien Otemjeļo̧k
Jān Būreejtōn Henry B. Eyring
Rikakpilōklōk eo Kein Kajuon ilo Būreejtōnji eo Kein Kajuon
Kōmaron̄ ke pijakiļo̧k ippa rikanaan Moronai ilo an jeki naan ko āliktata ilo Bok in Mormon io̧o̧n pilej kooļ ko? Ekar make iaan. Ekar lo laļ eo an, armej ro an, im an baam̧le eo an jepeepļo̧k. Ānein ekar “juon doulul” ejjeļo̧k jem̧ļo̧kin kōn uror im kōto̧o̧rļo̧k bōtōktōk (Mormon 8:8). Ak ekar wōr an kōjatdikdik, kōnke em̧ōj an loe tōre in ad! Im aolep men ko ekar jeki, ej karwainene kōj n̄an keememej (lale Moronai 10:3).
Būreejtōn Spencer W. Kimball (1895-1985) ekar peran ilo katakin bwe naan eo eaorōk tata ilo tūkjinede eo ej keememej. Kōnke em̧ōj ad kar kōm̧m̧an kallim̧ur ippān Anij, ekar ba, “un eo eļap ad ej n̄an keememej” kallim̧ur ko.1
Komaron̄ pukōt naan in keememej ilo jeje ko rekwo̧jarjar. Ke Nipai eaar rōjan̄ ļōm̧aro jein, ekkā an karuwaineneik er n̄an keememej naan ko an Irooj im keememej an Anij kar ļoomo̧o̧ren ro jemeer (lale 1 Nipai 15:11, 25; 17:40).
Ilo ennaan eo an eļap āliktata, Kiin̄ Benjamin ekar kōjerbal naan eo keememej jiljilimjuon kōttan. Ej kōjatdikdik bwe armej ro an rōnij keememej “ļap eo an Anij” … “im An em̧m̧an im meanwōd” n̄an kom̧ (Mosaia 4:11; lale barāinwōt 2:41; 4:28, 30; 5:11-12).
Ke Rilo̧mo̧o̧r eaar kōjeram̧m̧an kwojkwoj eo, ekar karuwaineneik rikaļoor ro an n̄an bōk kakōļļe “n̄an keememej” en̄taan eo An (Luk 22:19). Ilo aolep jar in kwojkwoj eo kwe im n̄a jej ron̄, naan eo iien otemjeļo̧k ej waļo̧k naan eo kemeemej (lale K&B 20:77, 79).
Ennaan in aō ej juon kūr, em̧ool juon akweļap, n̄an keememej. Ijin ewōr jilu kōļmenļo̧kjeņ ko kōn ta eo komaron̄ keememej ilo am̧ bōk m̧ōttan kwojkwoj eo kajjojo wiik. Ij kōjatdikdik bwe enaaj jipan̄ eok, āinwōt an jipan̄ iō.
Keememej Jisōs Kraist
Mokta, kememej Rilo̧mo̧o̧r eo. Keememej wōn E ilo an kar ped laļ in, elmen An kar kōnono n̄an ro jet, im elmen An kar kwalo̧k jouj ilo kōm̧m̧an ko An. Keememej wōn ro Ekar iaio ipper im ta ko Ekar katakin. Rilo̧mo̧o̧r eo ekar “etal im kōm̧m̧an em̧m̧an” (Jerbal 10:38). Eaar lo lo̧k ro rinan̄inmej. Ekar lelo̧k aolepān An n̄an kōm̧m̧ane ankilaan Jemān.
Elaptata, jemāron keememej wōnāān eo elap Ekar kōllāiki, kōn iakwe eo An n̄an kōj, n̄an jo̧ļo̧k libijinjin in jerawiwi ko ad. Ilo ad keememej E, ikdeelel eo ad n̄an ļoor E enaj eddōkļo̧k. Jenaaj kōņaan bwe jen jidik jouj, laplo̧k joļo̧k bōd, im n̄an pukōt ta eo Anij ekōnaan im kōm̧m̧ane.
Keememej Ta Eo Kwoj Aikuj Kōm̧m̧ane N̄an Em̧m̧an ļo̧k.
Elukkun pen n̄an ļōmņake Rilo̧mo̧o̧r eo—erreo im wāppen eo An—eļan̄n̄e jej keidi barāinwōt ad erreo im wāppen. Emōj ad kōm̧m̧an kallim̧ur n̄an pokake kien ko An, bōtaab iien otemjej jej wōtļo̧k n̄an tōpar jon̄ak kein lōn̄. Ak Rilo̧mo̧o̧r eo ejela men in en kar waļo̧k, unin An kar letok kain̄i eo an kwojkwoj.
Kwojkwoj eo epād okar in ilo Kallim̧ur Mokta ekkatak n̄an katok, im ej n̄an kwaļo̧k jerawiwi ko (lale Livitikōs 5:5). Jej jab bar katok kōn men in mour ko, ak jemārōn joļo̧k jarwiwi ko ad. Jeje ko rekwojarjar rej kur menin katok ilo “bōro erup im jetōb ettā” (3 Nipai 9:20). Itok n̄an iien kwojkwoj kōn juon bōro n̄an ukweļo̧k (lale K&B 59:12; Moronai 6:2). Eļan̄n̄e kwonaaj kōm̧m̧ane men kein, kwonaaj bōk joļo̧k bōd in jerawiwi ko am̧ im kwojjamin naaj jejļo̧k jān iaļ eo ej tōļļo̧k eok n̄an Anij.
Keememej Eddōkļo̧k eo Kwoj Kōm̧m̧ane
Ilo am̧ lale mour eo am̧ ilo iien eo kwoj bōk kain̄i eo an kwojkwoj eo, ij kōjatdikdik ļōmņak ko am̧ rejjab wōt ilo men ko rebōd kwar kōm̧m̧ani ak barāinwōt men ko rejimwe kwoj kōm̧m̧ani—iien ko kwar en̄jake bwe Jemed Ilan̄ im Rilo̧mo̧o̧r raar m̧ōņōņō ippam̧. Em̧o̧o̧l komaron̄ bōk jidik iien ilo iien kwojkwoj eo n̄an kajjitōk ippān Anij n̄an jipan̄ eok loe men kein. Ilo am̧ kōm̧m̧ane, ij kallim̧ur bwe kwonaaj en̄jake juon men. Kwonaaj en̄jake kōjatdikdik.
N̄e em̧ōj aō kōm̧m̧ane men in, Jetōb eo enaaj kalikkar n̄an n̄a bwe jekdo̧o̧n n̄e ij ettoļo̧k jān weppān, ij em̧m̧anļo̧k ilo rainin jān kar inne. Im ej letok n̄an eō lōke eo bwe, kōnke kōn Rilo̧mo̧o̧r eo, imaron naaj em̧m̧anļo̧k ilju.
Iien otemjej ej juon iien eaitok, im ebōk eļap iien in jerbal. Kwojeļā jān en̄jake eo am̧ ewi jon̄an an pen am̧ ļōmņak kōn juon men aolep iien. Ak jekdo̧o̧n ewi jon̄an am̧ kōjparok kien n̄an kemeemej E iien otemjej, Enaaj iien otemjej keememej eok.
Rilo̧mo̧o̧r eo ejeļā apan̄ ko am̧. Ejeļā ta im elmen an un ko ilo mour in keeņ eok Ejeļā ewi jon̄an am̧ aikuji kōjeram̧man eo me ej itok jān am̧ iien otemjej keememej E im pokake E—“bwe [kwon] māron iien otemjej bwe jetōb eo An en māron̄ pād [ippam̧]” (K&B 20:77; kakobabain katak).
Kōn menin, Ej bar karuwainene kwe n̄an tebōļ in kwojkwoj eo kajjojo wiik, bar juon alen lewaj n̄an am̧ kam̧ool im̧aan Mejān bwe kwonaaj iien otemjej keememej E.
© 2018 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo Kajin English: 6/17. Kōmālim an ukook: 6/17. Ukook eo an First Presidency Message, February 2018. Marshallese. 15046 874