Jilu Nipai: Jon̄oulruo Rein Me Iaar Kāālet, jān Gary L. Kapp

Jeptōm̧ba 21–27

3 Nipai 12–16

“N̄a Kien eo, im Meram eo”

Ekanooj lōn̄ pedped in katak n̄an kappukōti ilo 3 Nipai 12–16. Jet rej kōmejajaik ilo unin tōl in, bōtaab komaron̄ lo ro jet. Kōtļo̧k bwe Jemedwōj Ilan̄, kōn Jetōb eo An, katakin eok ta eo kwoj aikuji kiiō wōt.

Je En̄jake ko Rej Im̧we Eok

Ilo ejja wāween eo wōt ro rikaļooran Jisōs me raar aiin doon ilo toļ Galilee, armej ro me raar aiin doon ilo tampeļ eo ilo ānen Bun̄peļo̧k kar mour ium̧win kien Moses. Raar ļoore kōnke eaar tōlļo̧k jetōb ko aer n̄an Kraist (lale Jekab 4:5), im kiiō Kraist eaar jutak im̧aer, kean̄ kōn kien eo eutiejļo̧k. Bōtaab jekdo̧o̧n ro iaad me rejjan̄in kar mour kōn kien Moses remaron̄ kile bwe jon̄ak eo Jisōs eaar ejaake n̄an rikaļoor ro An ej aikuj juon kien eutiejļo̧k. “Ikōņaan bwe kom̧in weeppān,” Eaar kean̄ (3 Nipai 12:48). Eļan̄n̄e menin ekōm̧m̧an am̧ en̄jake likjab, keememej bwe Jisōs eaar barāinwōt ba, “em̧ōņōņō ro rej jeram̧ōl ilo jetōb ro rej itok n̄an Eō, bwe aer aelōn̄ in lan̄” (3 Nipai 12:3). Kien in eutiejļo̧k ej juon kūr—bar juon wāween ba “ itok n̄an Eō im mour” (3 Nipai 12:20). Āinwōt kien Moses, kien in ej bōkļo̧k kōj n̄an Kraist—Eo ej make wōt me emaron̄ lo̧mo̧o̧ren im kōweppān kōj. “Lo,” Eaar ba, “N̄a kien eo, im meram eo. Kom̧in reitok n̄an eō, im niknik n̄an jem̧ļo̧kin, im kom̧ naaj mour” (3 Nipai 15:9).

Ļōmņak ko n̄an Ekkatak Jeje ko Rekwojarjar Ippam̧ Make

3 Nipai 12–14

Katak ko an Rilo̧mo̧o̧r eo ej kwaļo̧k n̄an n̄a ekōjkan erom juon rikaļoor em̧ool.

Ekanooj lōn̄ m̧ool ko, naan in kapilōk ko, im kakkōl ko ilo 3 Nipai 12–14. En̄in ej juon wāween n̄an ekkatak im jipan̄ ta eo Rilo̧mo̧o̧r eo eaar katakin ilo jepta kein: Kāālet juon kumi in eoon ko, im lale eļan̄n̄e komaron̄ ba ilo tu kadu in ta eo eoon ko rej katakin ilo juon jāntōj me ej ijjino kōn “Rikaļoor ro rem̧ool an Jisōs Kraist rej …” N̄an waanjon̄ak, juon tukadu in 3 Nipai 14:1–5 maron̄ in “Rikaļoor ro rem̧ool an Jisōs Kraist rejjab ekajet.” Komaron̄ kōņaan kāālet juon eoon jān jepta kein me eļaptata meļeļe in n̄an kwe im kakilōklōke ak je im likūti ijo enaaj emakijkij am̧ naaj loe. Kejekļo̧kjeņ kōn ekōjkan am̧ maron̄ kōjerbal ta eo kwoj katak n̄an kijejeto ko am̧ make n̄an erom juon rikaļooran Jisōs Kraist em̧m̧anļo̧k.

Lale barāinwōt Matu 5–7; Luk 6:20–49.

3 Nipai 12:1–2; 15:23–24; 16:1–6

Em̧ōņōņō ro rej tōmak ilo jab loe.

Keidi n̄an aolepān oran ajri ro nejin Anij, ekanooj iiet em̧ōj aer kar lo Rilo̧mo̧o̧r im ron̄ Ainikien, jān armej ro raar leo ilo ānen Bun̄-peļo̧k. Elōn̄ wōt iaad eļapļo̧k aer āinwōt armej ro kar kōmeļeļiki ilo 3 Nipai 12:2; 15:23; im 16:4–6. Ta kallim̧ur ko kar kōm̧m̧ani n̄an kain armej rōt kein ilo eoon kein? Ekōjkan an kallim̧ur kein kar kūrm̧ool ilo mour eo am̧?

Lale barāinwōt Jon 20:26–29; 2 Nipai 26:12–13; Alma 32:16–18.

3 Nipai 12:21–30; 13:1–8, 16–18; 14:21–23

Jerbal ko rejim̧we rejjab bwe, būruwō eaikuj barāinwōt erreo.

Juon unin kōnono komaron̄ kile ilo jepta kein ej kūr eo an Rilo̧mo̧o̧r n̄an mour juon kien eutiejļo̧k—n̄an erom jim̧we ejjab wōt jerbal ko itulik bōtaab barāinwōt ilo būruwōd. Kappukōt unin kōnono in ke Rilo̧mo̧o̧r ej kōnono kōn aitwerōk (3 Nipai 12:21–26), etoon in ānbwin (3 Nipai 12:27–30), jar (3 Nipai 13:5–8), im jitlo̧k (3 Nipai 13:16–18). Ta waanjon̄ak ko jet komaron̄ loi? Ta eo komaron̄ kōm̧m̧ane n̄an karreoik ikdeelel ko an būruwōm̧ ijello̧kin kalimjōk wōt m̧akūtkūt ko itulik wōt?

3 Nipai 14:7–11

Eļan̄n̄e ij kappukōt “men ko rem̧m̧an” jān Jemedwōj Ilan̄, inaaj būki.

Būreejtōn Russell M. Nelson eaar ba: “Anij ej ke kōņaan kōnono n̄an eok? Aaet! … O, elōn̄ men ko reļļap Jemōm̧ ilo Lan̄ ekōņaan bwe kwōn jeļā” (“Revelesōn n̄an Kabun̄ eo, Revelesōn n̄an Mour ko Ad,” Ensign ak Kweilo̧k eo Eļap, Māe 2018, 95). Āinwōt am̧ riiti kūr eo an Irooj ilo 3 Nipai 14:7–11 n̄an kajjitōk, kappukōt,im kaḷḷaḷḷaḷ, kejōkļo̧kjeņ kōn ta “men ko rem̧m̧an” Emaron̄ kōņaan bwe kwon kajjitōk kaki. Dam̧oļo̧k in jeje kein rekwojarjar remaron̄ jipan̄ eok meļeļe ekōjkan n̄an kajjitōk, kappukōt, im kaļļaļļaļ. Remaron̄ barāinwōt jipan̄ kōmeļeļeik jet jar ko rejjab uwaak ilo wāween eo kwoj kōtmene: Aiseia 55:8–9; Hilamōn 10:5; Moronai 7:26–27, 33, 37; im Katak im Bujen ko 9:7–9.

Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le

Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kaki n̄an tōpar aikuj ko an baam̧le eo am̧. Erkein rej jet iaan ļōmņak ko.

3 Nipai 12:48

Ekōjkan an ennaan eo an Elder Jeffrey R. Holland “Em̧ool—Kom̧ Naaj Weeppān” (Ensign ak Kweilo̧k eo Eļap, Nob. 2017, 40–42) jipan̄ kōj meļeļe naan ko an Rilo̧mo̧o̧r ilo eoon kein? Komaron̄ barāinwōt lo jipan̄ ilo Moronai 10:32–33.

3 Nipai 12:9, 38–42; 14:3–5, 12

Ekōjkan an eoon kein jerbal n̄an ikitōltōl ko ilubwilijin ro uwaan baam̧le eo? Bōlen baam̧le eo am̧ emaron̄ kōm̧m̧ani jet menin kōttōpar ko ippān doon n̄an mour tiljekļo̧k kōn pedped in katak kein.

3 Nipai 13:19–21

Eoon kein remaron̄ jino juon ekōnono kōn ta ko baam̧le eo am̧ ej kaorōki. Ewōr ket jet menin aorōk ko ioon laļ in me rej bōbare eok jān mour kōn menin aorōk ko ilo lan̄? Komaron̄ kōmejajaik un in ilo am̧ tōl baam̧le eo am̧ ilo juon iien kappok menin aorōk eo n̄an pukōt men ko ilo m̧weo im̧ōmi me rej kakeememej ro uwaan baam̧le eo kōn menin aorōk ko kōn aorōkin indeeo.

3 Nipai 14:7–11

Ajri ro reddikļo̧k remaron̄ lem̧ōņōņō kōn juon ikkure, kar im̧we jān 3 Nipai 14:8–9, eo rej kajjitōk kōn jet men im bōk jet men ilo an kanooj oktak. Ta eo Rilo̧mo̧o̧r ekōņaan bwe jen jeļā kōn Jemedwōj ilo Lan̄ ke Eaar kwaļo̧k waanjon̄ak in?

3 Nipai 14:15–20

Ta “leen eo em̧m̧an” ej jipan̄ kōj jeļā bwe Josep Smith, ak Būreejtōn eo an Kabun̄ kiiō, ej juon rikanaan em̧ool?

3 Nipai 14:24–27

Ļōmņak kōn wāween ko komaron̄ jipan̄ baam̧le eo am̧ pijaikļo̧k būrabōļ eo ilo eoon kein. Bōlen ro uwaan baam̧le eo remaron̄ jin̄aik pija ko, kōm̧m̧an in kōl ko, ak kalōk men ko ioon pedped ko repen im rebokbok.

Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.

Kōkōm̧anm̧anļo̧k Ad Katakin

Kōjerbal men ko kein katakin. Rilo̧mo̧o̧r eaar katakin m̧ool ko rem̧wilaļ ilo an kōnono kōn men ko me jejeļā kaki. Komaron̄ kōm̧m̧ane jet men ko reierļo̧k ilo an baam̧le eo am̧ riiti 3 Nipai 12–16. N̄an waanjon̄ak, n̄e kwoj riiti jebta 12, komaron̄ kwaļo̧k jet jo̧o̧ļ; juon kāāntōļ, im juon kopa. Menin emaron̄ barāinwōt tōlļo̧k n̄an juon m̧akūtkūt in etale em̧m̧an. Ālkin am̧ kar riiti jepta kein, bar kwaļo̧k menin katak eo, im kajjitōk ippān ro uwaan baam̧le eo ta eo Rilo̧mo̧o̧r eaar katakin kajjojo.

Rilo̧mo̧o̧r ej Loļo̧k Armej ro ilo Amedka, jān Glen S. Hopkinson