“Jeptōm̧ba 7–13. 3 Nipai 1–7: ‘Kwōn Kotak Bōram im Kwōn M̧ōņōņō,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Jeptōm̧ba 7–13. 3 Nipai 1–7,” Itok, Ļoor Eō—N̄an Kajjojo Armej im Baam̧le ko: 2020
Juon Raan, Juon Bon̄, Juon Raan, jān Jorge Cocco
Jeptōm̧ba 7–13
3 Nipai 1–7
“Kwōn Kotak Bōram im Kwōn M̧ōņōņō”
RiNipai ro raar kam̧ool kōn kakōļļa kabwilōn̄lōn̄ ko, bōtaab ilo iien ko raar meļo̧kļo̧k ta eo raar en̄jake (lale 3 Nipai 2:1). Je im̧we ko am̧ naaj jipan̄ eok keememej en̄jake ko am̧ ilo jetōb ilo am̧ ekkatak 3 Nipai 1–7.
Je En̄jake ko Rej Im̧we Eok
Ilo jet wāween ko, eaar juon iien ekaitoktok limo n̄an erom juon ritōmak ilo Jisōs Kraist. Naan in kanaan ko raar kūrm̧ool—kakōļļe ko im kabwilōn̄lōn̄ ko rem̧m̧an ibwilijin armej ro raar kwaļo̧k bwe Rilo̧mo̧o̧r ejjab to enaaj ļotak. Ilo jekjek eo juon, eaar barāinwōt juon tōre ekaikdeelel n̄an ritōmak ro kōnke, ilo kejekdo̧o̧n aolep kabwilōn̄lōn̄ ko, ro rejjab tōmak raar ba bwe iien eaar eļļā ” kōn ļotak eo an Rilo̧mo̧o̧r (3 Nipai 1:5). Armej rein raar kōm̧m̧ane “juon iruj eļap iaolepān āneo” (3 Nipai 1:7) im em̧ool kar kōm̧m̧ane juon iien n̄an m̧an aolep ritōmak ro eļan̄n̄e kakōļļe kar kanaan kaka jān Samuel RiLeman eo—juon bon̄ ejjeļo̧k marok—eban kar waļo̧k.
Ilo jekjek kein reppen, rikanaan Nipai eaar “kanooj kūr n̄an an Anij ilo etan armej ro an” (3 Nipai 1:11). Uwaak eo an Irooj ej im̧we n̄an aolep ro rej en̄jake kakkure ak pere im aikuj n̄an jeļā bwe meram eo enaaj anjo̧ ioon marok: “Kwōn kotak bōram im kwōn m̧ōņōņō; … Inaaj kakūrm̧ool aolep men ko Iaar kōm̧m̧an bwe ren kōnono jān lo̧n̄iin rikanaan ro rekwōjarjar Aō” (3 Nipai 1:13).
Ļōmņak ko n̄an Ekkatak Jeje ko Rekwojarjar Ippam̧ Make
Irooj enaaj kakūrm̧ool aolep naan ko An.
Ekōjkan am̧ pijaik eok kar en̄jake eļan̄n̄e kwar juon iaan ritōmak ro ilo iien eo kar kōmeļeļeik ilo 3 Nipai 1–7? Ekōjkan am̧ maron̄ kar en̄jake, n̄an waanjon̄ak, n̄an kōttar bon̄ōn eo ejjeļo̧k marok, me kar kōjeļļā kōn ļotak eo an Rilo̧mo̧o̧r, jeļā bwe kwonaaj kar mej eļan̄n̄e eaar jab waļo̧k? Ilo am̧ riiti 3 Nipai 1:4–21 im 5:1–3, pukōt ta eo Nipai im ritōmak ro jet raar kōm̧m̧ane n̄an dāpij tōmak eo aer ilo iien ko reppen. Ekōjkan an Irooj kar kōjeraam̧m̧an er? Ta eo kwoj ekkatak me emaron̄ jipan̄ n̄e kwoj lo eok make kōttar kōjeraam̧m̧an ko kar kallim̧ur kaki jān Irooj?
Meļo̧kļo̧k en̄jake ko ilo jetōb ekōm̧m̧an aō m̧ōjņo̧ n̄an kapo ko an Setan.
Komaron̄ ļōmņak bwe kam̧ool kōn juon men eo ekanooj kabwilōn̄lōn̄ āinwōt juon bon̄ ejjeļo̧k marok kwonaaj kar keememeje ium̧win juon iien aitok im erom juon pedped n̄an naan in kam̧ool eo am̧. Bōtaab ememļo̧kjeņ ko an kakōļļe ko im kabwilōn̄lōn̄ ko RiNipai ro raar kam̧oole eaar āinwōt jakoļo̧k ilo iien. Ta eo eaar kōm̧m̧an bwe ren meļo̧kļo̧k, im ta kar tōprak ko an meļo̧kļo̧k? (lale 3 Nipai 1:22; 2:1–3).
Ta to kwoj kōm̧m̧ane n̄an keememej im bar kōkāāl kam̧ool eo am̧ kōn m̧ool ko ilo jetōb? N̄an waanjon̄ak, ļōmņak kōn ekōjkan je en̄jake ko am̧ ilo jetōb remaron̄ jipan̄ eok. Ekōjkan am̧ naaj kwaļo̧k naan in kam̧ool eo am̧ ippān ro repaake eok n̄an jipan̄ er tōmak?
Lale barāinwōt Alma 5:6; Henry B. Eyring, “O Remember, Remember,” Ensign ak Liahona, Nob. 2007, 66–69; Neil L. Andersen, “Tōmak Ejjab kōn Jide, ak kōn Jolet,” Ensign ak Liahona, Nob. 2015, 65–68.
3 Nipai 2:11–12; 3:1–26; 5:24–26
Irooj ej kōkajoorļo̧k Armej ro Rekwojarjar An ņae kauwōtata ilo jetōb.
Ilo tōre in ad, ejjab ekkā ad ioon kumi in riko̧o̧t ro me rej kilep kōj n̄an ilo̧k jān m̧ōko im̧ōd im koba ilo juon jikin. Bōtaab jej jelm̧ae kauwōtata ko ilo jetōb, im en̄jake eo an Riipai ro maron̄ pād ie kata ko me remaron̄ jipan̄ kōj. Kappukōt katak kein ilo am̧ riiti 3 Nipai 2:11–12 im 3:1–26.
Ilo 3 Nipai 5:24–26 jej riit kōn kobaļo̧k eo an armej ro an Irooj ilo raan ko āliktata. Ta eo eoon kein rej katakin kōn ekōjkan an Irooj aiin armej ro An rainin?
Lale barāinwōt “Worldwide Devotional for Youth: Messages from President Russell M. Nelson and Sister Wendy W. Nelson,” Juun 3, 2018, ChurchofJesusChrist.org; “Israel—The gathering of Israel,” Guide to the Scriptures, scriptures.ChurchofJesusChrist.org.
Ij juon rikaļoor an Jisōs Kraist.
Ta eo kwoj ļōmņak ej meļeļe in n̄an erom juon rikaļoor an Jisōs Kraist? (lale KB 41:5). Ilo 3 Nipai 5:12–26, Mormon eaar kabōjrak an kōkaduki ļo̧o̧k ko an RiNipai im kar kean̄ we eaar juon rikaļoor an Jisōs Kraist. Innām, ilo 3 Nipai 7:15–26, eaar kōmeļeļeik jerbal in karejar eo an rikaļoor ro jet—armej in Nipai. Ta eo kwoj lo ilo enanan kein ruo me ejipan̄ eok meļeļe ta meļeļe n̄an erom juon rikaļooran Kraist?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
3 Nipai 3:13–14, 25–26
Ta eo RiNipai ro raar kōm̧m̧ane n̄an kōjparok er make jān rikejdāt eo raar jelm̧ae. Ta eo jej kōm̧m̧ane n̄an kōm̧m̧an bwe m̧weo im̧ōd en juon jikin einem̧m̧an im kattōrak jān nana eo ilo laļ in?
3 Nipai 2:1–3; 6:15–17
N̄an jipan̄ baam̧le eo am̧ ekkatak kōn ekōjkan an Setan maron̄ m̧oņe kōj, jin̄aik juon ānbwin, im ilo an baam̧le eo am̧ riiti 3 Nipai 2:1–3 im 6:15–17, kōkaļļeik m̧ōttan ko roktak an ānbwin eo kar kōnono kake. Ekkar n̄an eoon kein, ta jet iaan wāween ko Setan ej kapo kōj n̄an meļo̧kļo̧k Anij im oktakļo̧k n̄an jerawiwi?
3 Nipai 4:7–12, 30–33
Ta eo RiNipai ro raar kōm̧m̧ane ke raar lo an riko̧o̧t in Gadianton ro raar itok? Ta eo baam̧le eo am emaron̄ ekaktak jān RiNipai ro n̄e jej en̄jake jekjkej ko reppen? Ta eo jemaron̄ ekkatak jān naan ko an RiNipai ro ālkin an Irooj kar jpan̄ er ilo tōre ko aer reppen?
3 Nipai 5:13; Katak im Bujen ko 41:5
Riiti 3 Nipai 5:13 im Katak im Bujen ko 41:5, im ekōnono kōn ta meļeļe in n̄an erom juon rikaļool an Jisōs Kraist. Bōlen ro uwaan baam̧le remaron̄ kōnono kōn iien ko ke raar kile doon kōn aer rikaļoor. Eļan̄n̄e ewōr nejūm̧ ajri ro reddik, komaron̄ kōm̧m̧an pāāj me ej ba, “N̄aij juon rikaļool an Jisōs Kraist,” im kōm̧m̧an bwe ren kōņak pāāj eo jabdewōt iien kwoj kile aer ļoor Rilo̧mo̧o̧r.
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere.
Kōkōm̧anm̧anļo̧k Ad Katakin
Jipan̄ baam̧le eo am̧ karōki jeje ko rekwojarjar n̄an er make. Nipai eaar ba, “iaar karōki tok aolep jeje ko rekwōjarjar n̄an kōm, bwe en n̄an am maron̄ jeraam̧m̧an im jeļā” (1 Nipai 19:23 N̄an jipan̄ baam̧le eo am̧ karōki jeje ko rekwojarjar n̄an er make, komaron̄ kūr er n̄an kejekļo̧kjeņ kōn ta eo rekōņan bwe en dedeļo̧k eļan̄n̄e raar pād ibwilijin ritōmak ro kar kōmeļeļeik ilo 3 Nipai 1:4–9. (Lale Teaching in the Savior’s Way,30
Juon Raan, juon Bon̄, im juon Raan, jān Walter Rane