“O̧kwōj 31–Jeptōm̧ba 6. Hilamōn 13–16: ‘Naan ko Rem̧m̧an kōn Lan̄lōn̄ Eļap,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
O̧kwōj 31–Jeptōm̧ba 6,” Itok, Ļoor Eō—N̄an Kajjojo Armej im Baam̧le ko: 2020
Samuel RiLeman eo ej katakin jān ioon wo̧o̧ļ eo, jān Arnold Friberg
O̧kwōj 31–Jeptōm̧ba 6
Hilamōn 13–16
“Naan ko Rem̧m̧an kōn Lan̄lōn̄ Eļap”
Ilo am̧ je im̧we ko am̧ wiik in, ļōmņak kōn ekōjkan an pedped in katak ko ilo Hilamōn 13–16 ejaak ioon im kapenļo̧k men ko jet kwaar ekkatak kaki ilo jeje ko rekwojarjar.
Je En̄jake ko Rej Im̧we Eok
Jinoin an kar Samuel RiLeman eo kar kajjieon̄ n̄an kwaļo̧k “naan ko rem̧m̧an” ilo Zarahemla (Hilamōn 13:7), Ripinai ro me kapen būruwier rekar makoko in ron̄jake im rekar kadiwōjļo̧ke. Komaron̄ ba eaar āinwōt n̄e raar kalōk juon wo̧o̧l epen deļo̧n̄e ipeļaakin būruwier jon̄an eaar bōbrae er jān aer eo̧ron̄ ennaan eo an Samuel. Samuel eaar meļeļe aorōkin ennaan eo eaar kwaļo̧ke im eaar kwaļo̧k an tōmak ilo an ļoor kien eo an Anij “bwe en bar ro̧o̧lļo̧k, im kanaan” (Hilamōn 13:3). Ejja āinwōt an Samuel kar kōm̧m̧ane, jej aolep ioon o̧o̧ļ ko ilo ad “kōpooj iaļ eo an Irooj” (Hilamōn 14:9) im kajjieon̄ ļoor rikanaan ro An. Im āinwōt Samuel, jej barāinwōt kwaļo̧k kam̧ool kōn Jisōs Kraist, “eo em̧ool Enaaj itok,” im kūr aolep n̄an “tōmak ilo etan” (Hilamōn 13:6; 14:13). Ejjab aolep renaaj ron̄jake, im jet remaron̄ niknik ilo jum̧ae kōj. Bōtaab ro rej tōmak lo ennaan in kōn tōmak ilo Kraist rej lo bwe em̧ool ej “naan ko rem̧m̧an kōn lan̄lōn̄ eļap” (Hilamōn 16:14).
Ļōmņak ko n̄an Ekkatak Jeje ko Rekwojarjar Ippam̧ Make
Irooj ej letok kakkōl ko n̄an ippān rikanaan ro An.
Ilo jeje ko rekwojarjar, rikanaan ro jet iien rej keidi er n̄an riwaj ro ioon juon o̧o̧ļ ak tawōr me rej kakkōl kōn kauwōtata ko (lale Aiseia 62:6; Ezekiel 33:1–7).
Būreejtōn M. Russell Ballard eaar katakin: “Ilo epepen ko, rikanaan ro raar kakūrm̧ool jerbal eo aer ke raar kakkōl armej ro kōn kauwōtata ko repād im̧aer. Rijilōk ro an Irooj eaar wōr aer eddo n̄an mije, kakkōl, im pukōtļo̧k n̄an jipan̄ ro me rej pukōt uwaak ko raorōk an mour” (“Anij Ej pād ilo Jebwe eo,” Ensign ak kweilo̧k eo Eļap, Nob. 2015, 25).
Ilo am̧ ekkatak im kejōkļo̧kjeņ kōn Hilamōn 13, komaron̄ kakōļļeik elōn̄ kakkōl ko me Samuel ekar litok. N̄an waanjon̄ak, ta eo eaar katakin kōn ukweļo̧k? kōn ettā im m̧weie? Ekōjkan an kakkōl kein iookwaj kwe? Ta kakkōl ko rikanaan ro raan kein kar litok āliktata, im ta eo kwoj en̄jake kwoj aikuj kōm̧m̧ane kōn kakkōl kein?
Rikanaan eo ej tōlļo̧k kōj n̄an Jisōs Kraist.
Irooj ej tūriam̧o n̄an ro rej ukweļo̧k.
Ilo jino in, kar jilōkļo̧k Samuel n̄an Rinipai ro n̄an kwaļo̧k ennaan eo ekam̧ōņōņō kōn itok eo an Rilo̧mo̧o̧r eo (lale Hilamōn 13:7). Kōnke raar makoko in ron̄jake, eaar bar ro̧o̧lļo̧k kōn kakkōl ko rekajoor kōn ekajet ko an Anij. Bōtaab kakkōl ko rekar jab m̧ūjkōk aer kobaik juon kūr etūriam̧o n̄an ukweļo̧k, pukōt kūr kein ilo aolepān Hilamōn 13–15 (eļaptata lale Hilamōn 13:6, 11; 14:15–19; 15:7–8). Ekōjkan an kūr kein iookwaj kwe? Ta eo jej katak jān eoon kein kōn ukweļo̧k? N̄aat eo kwaar en̄jake tūriam̧o an Anij me ej itok jān am̧ ukweļo̧k?
Kōkaļļe ko im kabwilōn̄lōn̄ ko remaron̄ kōkajoorļo̧k tōmak eo an ro me rejjab kapen būruwier.
Ilo Hilamōn 14, Samuel eaar kōmeļeļeik unin an kar Irooj letok kakōļļe ko kōn ļotak im mej eo an Rilo̧mo̧o̧r: “N̄an un in bwe kom̧in maron̄ tōmak ilo Etan.” (Hilamōn 14:12). Ilo am̧ ekkatak kōn Hilamōn 14, je kakōļļe ko kōn ļotak eo an Rilo̧mo̧o̧r ilo eoon 1–8 im kakōļļe ko kōn mej eo An ilo eoon 20–28. Etke kwoj ļōmņak kakōļļe kein renaaj kar wāween ko rejejjet n̄an kwaļo̧k kakōļļein ļotak im mej eo an Jisōs Kraist?
Komaron̄ ke ļōmņak kōn jabdewōt kakōļļe ko Irooj eaar litok n̄an jipan̄ kwe tōmak ilo E? N̄an waanjon̄ak, rikanaan ro raar ba im̧aanļo̧k kōn kakōļļe ko me renaaj waļo̧k m̧okta jān Itok eo Kein Karuo an Rilo̧mo̧o̧r eo (lale “Kakōļļe ko an Iien ko,” Unin Tōl eo n̄an Jeje ko Rekwojarjar, scriptures.ChurchofJesusChrist.org). Elōn̄ ke iaan kakōļļe kein rekar kūrm̧ool ilo raan kein ad? Kakōļļe ko jet me rej tōlļo̧k n̄an tōmak ilo Jisōs Kraist remaron̄ in ļap aer n̄an kwe im dik an jelet. Bōk jidik iien n̄an kejōkļo̧kjeņ kōn wāween ko kwaar kam̧ool kōn An im̧we mour eo am̧.
Ta kakkōl eo kar letok kōn kakōļļe ko ilo Hilamōn16:13–23? Ekōjkan am̧ maron̄ kōjekdoon m̧wil eo an armej ro kar kōmeļeļeik kaki ilo eoon kein?
Lale barāinwōt Alma 30:43–52; Ronald A. Rasband, “Kōn Karōk eo Ekwojarjar,” Ensign ak Kweilo̧k eo Eļap, Nov. 2017, 55–57.
Ļoor kapilōk eo an rikanaan eo ej bōkļo̧k kōj epaakeļo̧k Irooj.
Elder Neil L. Andersen eaar katakin: “Em̧ōj aō loe n̄e ij lukkuun ekkatak naan ko an rikanaan eo an Anij im m̧ōņōņō, kōn kijenmej, jetōb ej ļōn̄aj ankilaaō ippān katak ko an reim̧we, aō tōmak ilo Irooj Jisōs Kraist aolep iien ej ļapļo̧k. Eļan̄n̄e jej kālet n̄an kowaan kapilōk eo an im ļōmņak bwe jejeļāļo̧k, ad tōmak ewaan im ad errem̧aanļo̧k enaaj tinaad” (“Rikanaan eo an Anij,” Ensign ak Kweilo̧k eo Eļap, Māe 2018, 26–27). Ekōjkan an naan ko im jerbal ko an Rinipai ro ilo Hilamōn 16 kapene ta eo Elder Andersen eaar katakin? Ta kallim̧ur ko am̧ make kwoj en̄jake kwoj aikuj kōm̧m̧ani ikkijien rikanaan ro an Anij im ennaan ko aer?
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
Hilamōn 13:3–4
Ta eo ej im̧we baam̧le eo am̧ kōn uwaak eo an Samuel n̄an kean̄ eo an Irooj ilo Hilamōn 13:3–4? Ilo iien ekkatak eo an baam̧le eo am̧ wiik in, bōlen komaron̄ kōketak ro uwaan baam̧le eo n̄an kwaļo̧k en̄jake ko me rej “itok ilo [būruwer].”
Hilamōn 13:38
Ļōmņak eo bwe m̧ōņōņō maron̄ loe “ilo kōm̧m̧an ko renana” ekkā an waļo̧k ilo raan kein. Ilo wāween ta ko me ilo ad kar mour kōn gospel eo eaar bōktok n̄an kōj m̧ōņōņō eo em̧ool?
Hilamōn 15:3
Ekōjkan an kajim̧we eo an Anij kwaļo̧k iakwe eo An n̄an kōj? Kūr ro uwaan baam̧le eo n̄an kajjitōk ilo ettā ippān Irooj ta eo remaron̄ kōm̧m̧ane n̄an em̧m̧anļo̧k.
Hilamōn 15:5–8
Ta eo jej ekkatak kōn oktak eo jān RiLeman ro kar kōmeļeļeik ilo eoon kein? Ekōjkan ad maron̄ ļoor waanjon̄ak eo aer?
Hilamōn 16:1–3
Baam̧le eo am̧ enaaj lem̧ōņōņō n̄an tieta kōn bwebwenato eo an Samuel RiLeman eo? Ālkin riiti bwebwenato eo, bōlen ro uwaan baam̧le eo remaron̄ juon lok juon jutak ioon juon jea im riiti jet iaan kanaan ko an Samuel ilo an ro jet uwaan baam̧le eo āinwōt ke rej lippo̧ņeļo̧k ak kade kōn dekā ko. Menin emaron̄ jipan̄ baam̧le eo am̧ meļeļe ekōjkan an Samuel im RiNipai ro maron̄ kar en̄jake. Ajri ro reddk remaron̄ barāinwōt m̧ōņōņō ilo jin̄aik pija ko kōn bwebwenato eo. Ekōjkan ad maron̄ āinwōt Samuel im kwaļo̧k gospel eo ippān ro jet jekdo̧o̧n mijak ko ad?
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Itok, Ļoor Eō—N̄an Būraimere
Kōkōm̧anm̧anļo̧k Am̧ Ekkatak Ippam̧ Make
Pukot Jon̄ok ko. Juon jon̄ak ej juon karōk ak m̧ōņōkjān me maron̄ kōjerbale āinwōt juon unin tōl n̄an kadedeļo̧ke juon jerbal. Ilo jeje ko rekwojarjar, jej lo jon̄ak ko me rej kwaļo̧k ekōjkan an Irooj kadedeļo̧k jerbal eo An, eo āinwōt jilkinļo̧k ro Rikarejeran n̄an kakkōl armej ro.
© The Book of Mormon for Young Readers, Samuel RiLeman eo, jān Briana Shawcroft