Samuel Rileman ioon Wōrwōr eo jān Arnold Friberg

O̧kwōj 31–Jeptōm̧ba 6

Hilamōn 13–16

“Naan in Lan̄lōn̄ im Mōņōņō Eļap”

Keppopo n̄an katakin n̄an riiti Hilamōn 13–16 im kōļmenļo̧kjeņ ta m̧akūtkūt ko rem̧m̧antata renaaj jipan̄ ajri ro ekkatak kōn m̧ool ko ilo jeba kein.

Je En̄jake ko Rej Im̧we Eok

Kajjitōk bwe ren Kwaļo̧k

Kwaļo̧k juon pija in Samuel Rileman eo, im kajjitōk ippān ajri ro n̄an kwaļo̧k juon men rejeļā kōn e. N̄an waanjon̄ok, remaron̄ kōnono kōn bwebwenato in an Samuel kwaļo̧k ioon wōrwōr eo ak kōkkaļļe ko eaar ba renaaj waļo̧k n̄e Jisōs enaaj lo̧tak?

Katakin Katak ko: Ajri ro Reddikļo̧k

Hilamōn 13:2–5

Jetōb emaron̄ kōnono tok n̄an būruwōd.

Ke Samuel Rileman eo kar kakien bwe en kwaļo̧k n̄an Rinipai ro, Jemedwōj Ilan̄ eaar jipan̄ e bween jeļā ilo būruwōn ta eo eaikuj ba.

M̧akūtkūt ko Maron̄ Kōm̧m̧ani

• Katakin ajri ro bwe ilo ad kōnono n̄an doon kōjerbal naan ko, Jetōb Kwojarjar emaron̄ kōnono kōn en̄jake ko ilo būruwōd. Kajjitōk ippāer n̄an jibwe ubweer kajjojo iien kwoj riit kōn naan eo “bōro” ilo Hilamōn 13:2–5. Jipan̄ er kainōknōk juon peba kōjekjek in wōt menono eo me ej ba, “Jetōb eo ej kōnono n̄an eō ilo būruō.”

• Ba n̄an ajri ro bwe ke raar peptaij im kar kapen, renaaj bōk menin letok eo an Jetōb Kwojarjar n̄an jipan̄ er jeļā bwe Jemedwōj Ilan̄ ekōņaan bwe ren kōm̧m̧ane im ba. Jipan̄ er ļōmņake men ko Jetōb kwojarjar emaron̄ jiron̄ er, im kajjitōk ippāer n̄an kwaļo̧k ta eo remaron̄ kōm̧m̧ane n̄an ļoor im̧we ko An.

Hilamōn 14:2–7, 20–25

Rikanaan ro rej kwaļo̧k kōn Jisōs Kraist.

Bwebwenato eo kōn Samuel Rileman eo ej juon iien em̧m̧an n̄an katakin ajri ro bwe aolep rikanaan ro rej kwaļo̧k kōn Jisōs Kraist.

M̧akūtkūt ko Maron̄ Kōm̧m̧ani

• Kwaļo̧k pijain Samuel Rileman eo ilo laajrak eo an wiik in ilo Itok, Ļoor Eō—N̄an Kajjojo Armej im Baam̧le ko, im ba n̄an ajri ro, ilo naan ko repidodo, kōn en̄jake eo an ilo Hilamōn 13–16. Kwomaron̄ bar kōjerbl “Chapter 40: Samuel the Lamanite Tells about Jesus Christ” (Book of Mormon Stories, 111–13, ak pija in alooj eo ilo ChurchofJesusChrist.org). Kōm̧m̧an bwe ajri ro en kwaļo̧k ta eo rejeļā kōn Samuel Rileman eo.

• Al ippān doon “Samuel Tells of the Baby Jesus” ak eoon jiljilimjuon “Book of Mormon Stories” (Children’s Songbook, 36, 118–19). Kwaļo̧k jet men kwoj nōbar Samuel kake, im kōm̧m̧an bwe ajri ro ren kwaļo̧k ta eo em̧m̧an ippāer kōn bwebwenato eo.

• Ņooj pija ko ipeļaakin ruum̧ eo me ej pinej jenkwan kōkkaļļe ko me Samuel eaar kanaan kaki ilo Hilamōn 14:2–7 im 20–25. Riiti juon eoon me ej kwaļo̧k juon iaan kōkkaļļe ko, im kajjitōk ippān ajri ro n̄an pukot pija in kōkkaļļe eo. Kōmeļeļeik bwe kōkkaļļe kein raar jipan̄ Rinipai ro jeļā kōn Jisōs Kraist. Kam̧ool bwe, āinwōt Samuel, aolep rikanaan ro rej kam̧ool kōn Jisōs Kraist.

Rikanaan eo ej ba kajjien̄ kōj n̄an Jisōs Kraist.

Hilamōn 16:1–6

Ij jeraam̧m̧an n̄e ij ļoor rikanaan eo.

Jemedwōj Ilan̄ eaar letok n̄an kōj juon rikanaan n̄an jipan̄ kōj jeļā Ankilaan im ļoor An karōk. Jej jeraam̧m̧an ilo ad ron̄jake im pokake naan ko an rikanaan eo.

M̧akūtkūt ko Maron̄ Kōm̧m̧ani

• Jipan̄ ajri ro kalōk juon wōrwōr jidikdik kōn buļak ak bok. Kōjerbal kein ikkure jidikdik ak toļe n̄an pinej jenkwan Samuel, kōm̧m̧an bw ajri ro ren jipan̄ “Samuel” tallōn̄n̄e wōrwōr eo n̄an katakin armej ro kōn Jisōs Kraist. (Bar lale peij in m̧akūtkūt eo an wiik in.) Kwaļo̧k naan ko jān Hilamōn 16:1 im 5 n̄an kōmeļeļeik bwe jet iaan armej ro raar tōmak Samuel im kar peptaij. Kwaļo̧k naan ko jān Hilamōn 16:2 im 6 n̄an kwaļo̧k bwe jet raar jab tōmak im raar illu ippān Samuel. Kam̧ool bwe armej ro raar ļoor rikanaan eo raar jeraam̧m̧an.

• Kwaļo̧k juon pijain Rilo̧mo̧o̧r, im kajjitōk ippān juon ajri n̄an pinej jenkwan rikanaan eo im tōl ajri ro jet ipeļaakin ruum̧ eo ilo aer al jet eoon jen “Ļoor Rikanaan eo” (Children’s Songbook, 110–11) ak al ko jet kōn rikanaan ro. Innām kajjitōk ippān juon ajri bwe en pinej jenkwan rikanaan eo n̄an tōl ļo̧k ajri ro n̄an pijain Rilo̧mo̧o̧r eo. Kam̧ool bwe eļan̄n̄e jej ļoor rikanaan eo, enaaj tōl ļo̧k kōj n̄an Jisōs Kraist. Kwaļo̧k jet men ko rikanaan eo eaar kwaļo̧ke kōn Jisōs. Ewi wāween ad maron̄ ļoor kapilōk eo an?

Katakin Katak ko: Ajri ro Rerūttoļo̧k

Hilamōn 13:2–4

Jetōb emaron̄ kōnono tok n̄an būruwōd.

Juon iien, ajri ro kwoj katakin renaaj aikuj in jeļā wāween ta eo Samuel eaar kōm̧m̧ane: kwaļo̧k ennaan eo me Irooj eaar likūti ilo būruweer.

M̧akūtkūt ko Maron̄ Kōm̧m̧ani

• Kwaļo̧k juon pijanin Samuel Rileman eo (āinwōt in ilo Itok, Ļoor Eō—N̄an Kajjojo Armej im Baam̧le ko), im kajjitōk ippān ajri ro ewi wāween an Samuel kar jeļā ta eo en ba ke eaar kwaļo̧k jen wōrwōr eo. Kajjitōk ippāer n̄an pukot Hilamōn 13:2–4 n̄an uwaake. Kwaļo̧k kōn juon ke Jetōb Kwojarjar eaar jipan̄ eok jeļā ilo būruwōm̧ ta eo Anij ekōņaan bwe kwon kōm̧m̧ane ak ba. Kajjitōk ippān ajri ro n̄an kwaļo̧k ejja en̄jake ko aer.

• Kwaļo̧k juon pijain rikanaan eo emour ej kōnono ilo kweilo̧k eo eļap. Ba n̄an ajri ro bwe Anij ej ba n̄an rikanaan ro ta eo ren ba n̄an kōj, āinwōt An kar ba n̄an Samuel ta eo en ba n̄an Rinipai ro. Kōnono ippān doon kōn men ko rikanaan ro rej ba me raar im̧we eok ak ajri ro.

Hilamōn 14:2–28

Rikanaan ro rej kwaļo̧k kōn Jisōs Kraist.

Jibadbad in ennaan ko an Samuel ej n̄an kam̧ool kōn Jisōs Kraist n̄an kūr armej ro n̄an ukweļo̧k im itok n̄an E. Jerbal eo an rikanaan ro ad raan kein ejjeļo̧k oktak.

M̧akūtkūt ko Maron̄ Kōm̧m̧ani

• Kajjitōk ippān ajri ro n̄an riiti Hilamōn 14:2–6 im jin̄aik pijain kōkkaļļe in lo̧tak eo an Jisōs. Kajjitōk ippān ro jet ilo kūlaaj eo n̄an riiti Hilamōn 14:20–28 im jin̄aiki pijain kōkkaļļe in mej eo an Jisōs. Innām kajjitōk ippān kajjojo kūrub n̄an kwaļo̧k ļōmņak ko aer. Riit ippān doon Hilamōn 14:11–12, im kajjitōk ippān ajri ro n̄an ron̄jake etke Samuel eaar kanaan kōn kōkkaļļe kein. Ewi wāween ad ekkatak kōn Jisōs Kraist rainin?

• Kōmeļeļeik bwe ke Samuel Rileman eo eaar kwaļo̧k kōn Jisōs Kraist, rikanaan ro raan kein rej bar kōm̧ane rainin. Kwaļo̧k juon ennaan jān ennaan in kweiļo̧k eo ej kab jem̧ļo̧k ļo̧k me rikanaan eo emour eaar kam̧ool kōn Kraist. Kajjitōk ippān ajri ro n̄an kwaļo̧k ta eo rikanaan eo eaar katakin er kōn Jisōs Kraist.

Hilamōn 16:1–6

Ij jeraam̧m̧an n̄e ij ļoor rikanaan eo.

Jemedwōj Ilan̄ eaar letok n̄an kōj juon rikanaan n̄an jipan̄ kōj jeļā Ankilaan im ļoor An karōk. Jej jeraam̧m̧an ilo ad ron̄jake im pokake naan ko an rikanaan eo.

M̧akūtkūt ko Maron̄ Kōm̧m̧ani

• Riit ellaaj Hilamōn 16:1 im 5, im kajjitōk ippān ajri ro n̄an jutak n̄e rej ron̄ kōn armej ro raar tōmak naan ko an Samuel. Innām riiti eoon 2 im 6, im kajjitōk ippān ajri ro n̄an jijet n̄e rej ron̄ kōn armej ro raar jab tōmak. Ewi wāween ad maron̄ kwaļo̧k ke jej tōmak naan ko an rikanaan eo emour?

• Kwaļo̧k juon pija in juon rikanaan eo emour, im kajjitōk ippān ajri ro n̄an kwaļo̧k juon men rejeļā kōn e. Kwaļo̧k ewi wāween am̧ kajjieon̄ in ļoor katak ko an im ekojkan kōm̧m̧ani rekar maron̄ kōjeraam̧m̧an eok.

Kōketak Ekkatak ilo M̧weo

Kajjitōk ippan ajri ro n̄an ekkatak jet men rikanaan eo eaar ba im kwaļo̧ke ilo kūlaaj ilo wiik eo tok juon.

Kōkōm̧anm̧anļo̧k Ad Katakin

Rōjan̄ ajri ro n̄an kajjitōk kajjitōk ko. “Kajjieon̄ lo uwaak ko an [ajri ro] āinwōt iien em̧m̧an, ejjab inepata ak kapan̄pan̄ n̄an katak eo am̧. … Kain kajjitōk rot in elewaj n̄an eok ļōmņak ko n̄an ta eo ajri ro rej ļōmņake, ta inepata ko aer, im ewi wāween aer lo uwaak ko n̄an men ko rej ekkatak” (bar lale Teaching in the Savior’s Way, 25–26).