“Jeptōm̧ba 14–20. 3 Nipai 8–11: ‘Kom̧in Jutak im Wōnm̧aantak n̄an Ippa,’” Itok, Ļoor Eō—N̄an Kajjojo Armej im Baam̧le ko: Bok in Mormon 2020 (2020)
“Jeptōm̧ba 14–20. 3 Nipai 8–11,” Itok Ļoor Eō—N̄an Kajjojo Armej im Baam̧le ko: 2020
N̄a Meram in Laļ in, jān James Fullmer
Jeptōm̧ba 14–20
3 Nipaii 8–11
“Kom̧in Jutak im Wōnm̧aantak n̄an Ippa”
Ilo 3 Nipai 8–11, armej ro raar ron̄ ainikien Anij kōnono n̄an er. Ilo am̧ riiti jebta kein, kanooj leļo̧k am̧ n̄an ta eo ainikien Anij ej kōnono n̄an er.
Je En̄jake ko Rej Im̧we Eok
“Lo, N̄aij Jisōs Kraist, eo rikanaan ro raar kam̧ool ke Enaaj itok n̄an laļ.” (3 Nipai 11:10). Kōn naan kein, jerkakpeje Rilo̧mo̧o̧r eo eaar kwaļo̧k kadkadin E make, kakūrm̧ool elōn̄ļo̧k jān 600 iiō ko kōn kanaan ko an Bok in Mormon. “Waļo̧kļo̧k eo im kean̄ eo,” Elder Jeffrey R. Holland eaar je, “rej men ko raorōk tata, iien eo eļap tata, ilo aolepān bwebwenato an Bok in Mormon. Eaar loļo̧k eo im jem̧ļo̧k eo me kar karon̄ im im̧we aolep rikanaan in Rinipai ro. … Aolep raar kōnono kōn e, al kōn e, ettōņak kōn e, im jar kōn waļo̧kļo̧k eo an—bōtaab en̄in eaar lukkuun in waļo̧k. Raan n̄an raan! Anij eo ej aolep bon̄ōn ko remarok n̄an meram in jibbon̄ kar waļo̧k” (Christ and the New Covenant [1997], 250–51).
Ļōmņak ko n̄an Ekkatak Jeje ko Rekwojarjar Ippam̧ Make
Jisōs Kraist ej Meram eo an Laļ in
Komaron̄ kile bwe jon̄ak ko reiookļo̧k maroklep im meram—jim̧or in kanniōk im ilo jetōb—rej āliji ilo aolepān 3 Nipai 8–11. Ta eo kwoj ekkatak jān jepta kein kōn maroklep im meram ilo jetōb? Ta eo maroklep ej bōktok n̄an mour eo am̧? Ta eo ej bōktok meram? Etke kwoj ļōmņak Rilo̧mo̧o̧r eo eaar kāālet n̄an kwaļo̧k kadkadin E make āinwōt “meram im mour an laļ”? (3 Nipai 9:18; 11:11). Ekōjkan an Jisōs Kraist juon meram ilo mour eo am̧?
Eļan̄n̄e ij ukweļo̧k, Rilo̧mo̧o̧r eo enaaj aiin, kōjparok, im kemour eō.
Ekōjkan am̧ pijaikļo̧k armej ro raar en̄jake ālkin en̄jake kakkure eo im maroklep eo kar kōmeļeļeik ilo 3 Nipai 8? Ekōjkan am̧ ļōmņak remaron̄ in kar en̄jake ke raar ron̄ ainikien Rilo̧mo̧o̧r eo kōnono kōn meram, tūriam̧o, im lo̧mo̧o̧r ilo jepta 9 im 10?
Jekdo̧o̧n men̄e Rilo̧mo̧o̧r eo eaar kean̄ bwe kakkure eo enana eaar juon tōprak in jerawiwi ko an armej ro, Eaar kallim̧ur bwe enaaj kemour ro me renaaj kar jepļaaktok n̄an E im ukweļo̧k (lale 3 Nipai 9:2, 13). Elder Neil L. Andersen eaar ba: “Ij bwilōn̄ kōn pein tūram̧o eo an Rilo̧mo̧o̧r eo im iakwe eo n̄an ro raar ukweļo̧k, jekdo̧o̧n ta ewi jon̄an ļōmņak kōn e make eo an ro raar jeorlo̧k aer jerawiwi. Ij kam̧ool bwe Rilo̧mo̧o̧r eo ej maron̄ im ekijooror n̄an jeorļo̧k jerawiwi ko ad” (“Repent … That I May Heal You,” Ensign ak Liahona, Nob. 2009, 40).
Etale 3 Nipaii 9–10 kōn kein kam̧ool eo kōn tūriam̧o an Kraist im An kijooror n̄an jeorļo̧k bōd. N̄an waanjon̄ak, ta eo kwoj loe ilo 3 Nipai 9:13–22 im 10:1–6 me ej jipan̄ eok en̄jake iakwe im tūriam̧o eo an Rilo̧mo̧o̧r eo? Kejekļo̧kjeņ kōn en̄jake ko ke kwar en̄jake An “kakweilo̧ktok” im “naajdik” eok (lale 3 Nipai 10:4). Ļōmņak in je en̄jake kein ilo juon jōnōļ ak kwaļo̧ki ippān ro kwoj iakwe er.
Imaron̄ ekkatak n̄an ron̄jake im meļeļe ainikien Anij.
Em̧ōj ke am̧ kar en̄jake bwe kwar kakkōt n̄an meļeļe juon ennaan me Anij eaar kōnono n̄an kwe? Bōlen en̄jake eo an armej ro ilo 3 Nipai 11:1–8 emaron̄ jipan̄ eok meļeļe jet pedped in katak ko kōn ron̄jake im meļeļe ainikien Anij. Komaron̄ kile piktok ko kōn ainikien Anij me armej ro raar ron̄jake im ta eo raar kōm̧m̧ane n̄an kōkm̧anm̧anļo̧k meļeļe kake. Ekōjkan an bwebwenato in maron̄ jerbal n̄an kijejeto ko am̧ n̄an ron̄jake im kile ainikine Anij ilo mour eo am̧ kōn revelesōn an juon make?
Jisōs Kraist ej kūr eō n̄an bōk juon naan in kam̧ool aō make kōn E.
Eaar wōr enan̄in 2,500 armej ro raar aiin doon ilo Bun̄-peļo̧k (lale 3 Nipai 17:25). Jekdo̧o̧n oran in eļap, Rilo̧mo̧o̧r eo eaar kūr er kajjojo “juon illo̧k juon” n̄an en̄jake jenkwan dila ko ilo Pein im Neen (3 Nipai 11:14–15). Ta kar meļeļe in elmakot in n̄an kwe kōn aorōk eo an wōr en̄jake ko an juon make bwe kalōk tōmak ilo Jisōs Kraist. Ilo wāween ta ko Rilo̧mo̧o̧r eaar kūr kwe n̄an “jutak im wōnm̧aantak n̄an” Ippān? (3 Nipai 11:14). Ta en̄jake ko raar jipan̄ eok bōk juon kam̧ool bwe E ej am̧ Rilo̧mo̧o̧r? Komaron̄ barāinwōt ļōmņak kōn ekōjkan an waanjon̄ak eo an Rilo̧mo̧o̧r ilo eoon kein maron̄ im̧we kijejeto ko am̧ n̄an jerbal in karejar n̄an ro jet.
Juon illo̧k Juon, jān Walter Rane
Ļōmņak ko n̄an Ekkatak Jeje ko Rekwojarjar an Baam̧le im Nokon in Jota eo an Baam̧le
Ilo am̧ riiti jeje ko rekwojarjar ippān baam̧le eo am̧, Jetōb emaron̄ jipan̄ eok jeļā ta pedped in katak ko n̄an kwaļo̧ki im kōnono kake n̄an tōpar aikuj ko an baam̧le eo am̧. Erkein rej jet iaan ļōmņak ko.
3 Nipai 8–9
N̄an jipan̄ baam̧le eo am̧ keidi n̄an en̄jake ko kar kōmeļeļeik ilo 3 Nipai 8–9, komaron̄ bar ba ak ron̄jake juon rekoot in jimettan in jepta kein ilo juon ruum̧ emarok. Ekōnono kōn ta eo emaron̄ in kar āinwōt n̄an pād ilo maroklep eo ium̧win raan ko jilu. Innām komaron̄ kōnono kōn ekōjkan an Jisōs Kraist ej “meram eo … an laļ” (3 Nipai 9:18).
3 Nipai 10:1–6
Kōļmenļo̧kjeņ eo kōn juon lo̧lo̧ ej aiin jojo ko nejin emaron̄ in juon kein katakin ekajoor n̄an jipan̄ ajri ro meļeļe piktok eo an Rilo̧mo̧o̧r eo im mijen eo. Komaron̄ riiti eoon kein ilo an baam̧le eo am̧ lale pija eo kōn juon lo̧ļo̧ im jojo ko. Etke lo̧lo̧l eo ej aikuj in aiin jojo ko nejin? Etke Rilo̧mo̧o̧r eo eaar kōņaan aiinļo̧k kōj epaakeļo̧k E? Ta eo emaron̄ in waļo̧k eļan̄n̄e juon jojo ekar kāālet n̄an jab kobaļo̧k ke kar kūr?
3 Nipai 11:1–7
Bōlen komaron̄ riiti jet iaan eoon kein ilo mera, “ainikien edik” (3 Nipai 11:3). Ta eo armej ro raar aikuj in kōm̧m̧ane n̄an meļeļe ainikien eo jān lan̄? Ta eo jej ekkatak jān en̄jake eo aer?
3 Nipai 11:21–38
Ewōr ke juon ilo baam̧le eo am̧ ej kōppopo n̄an peptaij? Riiti 3 Nipai 11:21–38 emaron̄ jipan̄ er kōppopo. Ekōjkan an kejekļo̧kjeņ kōn katak ko an Rilo̧mo̧o̧r ilo eoon kein jipan̄ ro uwaan baam̧le eo me em̧ōj kadede aer kar peptaij?
3 Nipai 11:29–30
Ta eo eoon kein rej katakin kōn kōn akweel? Ekōjkan ad maron̄ “[kō] jako” akweel ilo m̧weo im̧ōd? (3 Nipai 11:30).
Kōn elōn̄ļo̧k ļōmņak ko n̄an katakin ajri ro, lale unin tōl eo an wiik in ilo Ito, Ļoor Eō—N̄an Būraimere.
Kōkm̧anm̧anļo̧k Am̧ Ekkatak Ippam̧ Make
Je Men ko Reim̧we. Elder Richard G. Scott eaar ba, “Jeļāļo̧kjeņ eo kar kōjparok je ej jeļāļo̧kjeņ eo ej pād ilo iien aikuj. … [Je im̧we ko ilo jetōb] ej kōkōm̧anm̧anļo̧k āinwōt eo kōn am bōk eļapļo̧k meram” (“Acquiring Spiritual Knowledge,” Ensign, Nob. 1993, 88).
Juon Rilale Sip, jān Howard Lyon