Tapno Maammuanyo, ni Gary L. Kapp

Disiembre 14–20

Moroni 10

“Umasidegkayo ken ni Cristo, ket Agbalinkayo a Naan-anay Kenkuana”

Mabalin a naaddaanen dagiti miembro ti klasem iti napapateg a padas iti panangbasa iti Libro ni Mormon iti daytoy a tawen. Agpannurayka kadagitoy a padas a mangparegta iti tunggal maysa iti klase nga agadal kadagiti nasantuan a kasuratan.

Isuratmo Dagiti Impresionmo

Yawis ti Panagbibinninglay

Mabalinmo nga awisen dagiti miembro ti klase a mangipapan a sumarsarungkar ni Moroni iti klase. Ania koma ti ibagada kenkuana maipapan iti insuratna iti Moroni 10? Adda kadi ania man a bersikulo a nangnangruna a napateg kadakuada? Nalabit a mabalinda nga ibinglay dagiti padasda kadagitoy a bersikulo.

Isuro ti Doktrina

Moroni 10:3–7

Mabalinko nga ammuen ti kinapudno babaen ti bileg ti Espiritu Santo.

• Mabalin a gun-oden dagiti miembro ti klase dagiti baro a nalawag a pannakaammo ken pannakaawat [insights] no adalenda ti Moroni 10:3–5 a nasayaat. Tapno matulongan ida, mabalinmo nga isurat dagiti napapateg a ragup ti balikas manipud kadagitoy a bersikulo iti nagsisina a papel ket ikkan iti maysa ti tunggal miembro ti klase wenno iti maysa a grupo dagiti miembro ti klase. Awisem ida a mangutob wenno mangilawlawag no ania ti kaipapanan dagiti ragup ti balikasda, agraman ti mabalinda nga aramiden a mangyaplikar iti daytoy iti biagda. Kalpasanna mabalin a basaenyo nga aggigiddan ti Moroni 10:3–5 , nga agsardeng no madanonyo ti maysa a ragup ti balikas nga inadal ti miembro ti klase tapno maibinglayna dagiti kapanunotanna.

• Tapno maallukoy dagiti miembro ti klase a mangibinglay kadagiti padasda iti panangyakem iti awis ni Moroni kadagitoy a bersikulo, mabalinmo nga awisen ida a mangipapan a padpadasenda nga allukoyen ti maysa a gayyem wenno miembro ti pamilia a manggun-od iti pammaneknek maipapan iti Libro ni Mormon. Kasano a mausarda ti Moroni 10:3–7? Ania dagiti padas a maibinglayda? Kasano a matulongantayo dagiti dadduma a makaawat no ania ti kayat a sawen ti mangammo iti maysa a banag “babaen ti bileg ti Espiritu Santo”? (Moroni 10:5).

Moroni 10:8–25

“Saanyo a tallikudan dagiti sagut ti Dios.”

• Apay a ti balakad a “saanyo a tallikudan dagiti sagut ti Dios” ket nangnangruna a napateg kadagitoy ud-udina nga aldaw? (Moroni 10:8). Allukoyem dagiti miembro ti klase a mangutob iti daytoy a saludsod bayat ti panangbasada iti Moroni 10:8–18. Tapno matulongan a mapapigsa ti pammati dagiti miembro ti klase kadagiti naespirituan a sagut, mabalinmo nga awisen ida a mangibinglay kadagiti pagarigan dagiti tao nga agus-usar iti tunggal sagut a nailista iti Moroni 10:9–16. Mabalin nga aggapu dagiti pagarigan kadagiti nasantuan a kasuratan, manipud iti pakasaritaan ti Simbaan, wenno manipud iti bukodda a biag. (Naisingasing dagiti pagarigan manipud iti Libro ni Mormon iti “Dagiti Nainayon a Resources.”) Mabalinmo pay nga ilawlawag no kasano a naiparangarang iti idadateng ti Libro ni Mormon ti sumagmamano kadagiti sagut a nailadawan kadagitoy a bersikulo. Apay a napateg para iti maysa a tao nga agkalkalikagum a manggun-od iti pammaneknek iti Libro ni Mormon tapno mamati kadagiti naespirituan a sagut? Ania ti aramidentayo no dadduma a “mangtallikud” kadagitoy a sagut iti biagtayo? Kasano a matulongandatayo dagitoy a sagut nga “umasideg ken ni Cristo, ket agbalin a naan-anay kenkuana”? (kitaen iti Moroni 10:30–33).

• Sabali pay a wagas a tapno masukisok dagiti naespirituan a sagut a nailadawan kadagitoy a bersikulo ket isurat iti pisarra dagiti saludsod kas iti Ania dagiti naespirituan a sagut? Asino ti nakaitedanda? Apay a naitedda? ken Kasano nga awatentayo ida? Kalpasanna awisem dagiti miembro ti klase a mangsukisok iti Moroni 10:8–25 a mangsapul kadagiti sungbat. (Makatulong pay dagiti palawag da Presidente Brigham Young ken Presidente Dallin H. Oaks iti “Dagiti Nainayon a Resources.”) Kas mainayon kadagiti naespirituan a sagut a nailista kadagiti bersikulo 9–16, ania dagiti dadduma pay a “sagut ti Dios” a naawattayo wenno nakaparaburantayo? (Moroni 10:8). Mabalin a kayatmo nga ibinglay no ania ti insuro ni Elder Bruce R. McConkie: “Awan gibus iti bilang ken awan patinggana iti panagduduma dagiti naespirituan a sagut. Dagiti nailista iti naipalgak a balikas ket ladawan laeng ti awan beddengna a panangibukbok iti nadiosan a parabur nga ited ti managparabur a Dios kadagiti agayat ken agserbi kenkuana” (A New Witness for the Articles of Faith [1985], 371).

Moroni 10:30–33

Makapagbalinak a naan-anay babaen ti parabur ni Jesucristo.

• Ania ti mariknam a mangtulong kadagiti miembro ti klasem nga umawat iti awis ni Moroni nga “umasideg ken ni Cristo, ket agbalin a naan-anay kenkuana”? (Moroni 10:32). Nalabit a ti panangirugi iti maysa a himno iti daytoy a topiko, kas iti “Come, Follow Me” (Hymns, no. 116), ket mabalin a mangawis iti Espiritu iti panaglilinnawagyo, ket mabalin nga ibinglay dagiti miembro ti klase dagiti ania man a pagnanaigan a makitada iti nagbaetan ti himno ken dagiti kinapudno a nasarakanda iti Moroni 10:30–33. Ania ti masursurotayo manipud kadagitoy a bersikulo ken iti daytoy a himno maipapan no ania ti kaipapanan ti umasideg ken ni Cristo? Ania ti kaipapanan ti agbalin a “naan-anay ken ni Cristo”? (kitaen met iti DK 76:50–53, 69). Iburaymo dagiti riknam maipapan no ania ti kaipapanan ti “nagbalin a naan-anay babaen ni Jesus” (DK 76:69), ket allukoyem dagiti miembro ti klase a mangibinglay iti riknada.

• Gapu ta daytoy ti maudi a panaglilinnawag ti klasem iti Libro ni Mormon iti daytoy a tawen, mabalin a kayatmo nga idawat kadagiti miembro ti klase a mangibinglay iti sumagmamano ti no ania ti narikna ken nasursuroda bayat ti panagadalda iti daytoy a libro. Tapno matulongan nga aramiden dagiti miembro ti klase daytoy, mabalinyo a basaen nga aggigiddan ti Moroni 10:32–33 ket idawat kadagiti miembro ti klase a mangbubos iti sumagmamano a minuto a mangut-utob no kasano a tinulongan ida ti Libro ni Mormon nga umasideg ken ni Cristo. Mabalinmo a saludsoden: Kasano a tinulongannatayo ti Libro ni Mormon a maaddaan iti nain-indaklan nga ayat para iti Dios? Kasano a natulongannatayo nga agpannuray a naan-anay iti parabur ni Cristo? Kasano a natulongannatayo a “saan a tallikudan” ti bileg ti Mangisalakan? Awisem dagiti miembro ti klase a mangibinglay iti pammaneknekda iti Libro ni Mormon ken ti saksina ken ni Jesucristo.

Yallukoy ti Panagsursuro iti Pagtaengan

Tapno matulongan dagiti miembro iti panangpadpadaan iti panagadalda iti Doktrina ken Katulagan iti sumaruno a tawen, mabalinmo nga irebyu ti Moroni 10:9–16 ket ilawlawag a dagitoy a sagut ti amin a pakakitaan iti Simbaan iti agdama. Bayat ti panangbasatayo iti Doktrina ken Katulagan, makitatayonto no kasano a nausar dagiti sagut ket bileg ti Dios a mangitrabaho iti aramidna kadagiti ud-udina nga aldaw.

Dagiti Nainayon a Resources

Pannakaiparangarang dagiti naespirituan a sagut iti Libro ni Mormon.

• Panangisuro babaen ti Espiritu: Nephi ken Lehi (Helaman 5:17–19)

• Nalaus a kadakkel ti pammati: Alma, Amulek, Ammon, ken dadduma pay (Ether 12:13–22)

• Panangagas: Alma (Alma 15:5–11)

• Dagiti nabileg a milagro: Dagiti tallo a disipulo (3 Nephi 28:19–22)

• Padto: Lehi (2 Nephi 1:6–7)

• Pannakakita kadagiti anghel: Amulek (Alma 10:7–10)

• Pannakaipatarus dagiti pagsasao: Mosiah (Mosiah 28:11–16)

Pammaneknek ni Presidente Brigham Young maipapan kadagiti naespirituan a sagut.

“Pammati. No mamatika kadagiti pagbatayan ti Ebanghelio ket ragpatem iti pammati, a daytoy ti sagut ti Dios, mangnayon iti ad-adu pay a pammati, agtultuloy a mangnayon iti pammati. …

“Ti Sagut ti Panagagas. Adtoyak a mangipaneknek iti ginasgasut a pagarigan dagiti lallaki, babbai, ken ubbing nga inagasan ti pannakabalin ti Dios, babaen ti panangipatay kadagiti ima, ken adun ti nakitak a dumanin matay, ket nagbiagda; ken adda dagiti pinanawan ti espiritu dagiti bagida, nagsublida manen. Paneknekak a nakitakon dagiti masakit a naagasan babaen ti pannakaipatay dagiti ima, a mayannurot iti kari ti Mangisalakan. …

“Pammadto, Paltiing, ken Pannakaammo. Mabalin a mammaltiing ti tunggal lalaki ken babai, ken addaan iti pammaneknek maipapan ken ni Jesus, a daytoy ti espiritu ti pammadto, ket maisakbay a makitana ti panunot ken pagayatan ti Dios maipanggep kadakuada, mangliklik iti dakes, ken mangpili ti nasayaat” (Teachings of Presidents of the Church: Brigham Young [1997], 252–53).

“Agtalekkayo iti amin a nasayaat a sagut.”

Insarita ni Presidente Dallin H. Oaks no kasano a binendisionan ti inana ti panagsapsapul kadagiti naespirituan a sagut: “Iti pannakapukawna iti asawana, saan a naan-anay ti balo nga inak. Inkararaganna no ania ti kasapulanna a mangipatungpal iti pagrebbenganna a mangpatanor iti tallo a babassit nga annakna! Nagsapsapul isuna, maikari isuna, ket naparaburan isuna! Nasungbatan dagiti kararagna iti adu a wagas, agraman ti panangawatna kadagiti naespirituan a sagut. Naaddaan iti nawadwad, ngem dagiti malagipko pay laeng ket isu dagiti sagut ti pammati, pammaneknek, ken sirib” (“Spiritual Gifts,” Ensign, Sept. 1986, 72).

Panangpadur-as iti Panangisurotayo

Mangilatang iti oras a makaibinglay dagiti agad-adal. “No ibinglay dagiti agad-adal no ania ti nasursuroda, saanda laeng a marikna ti Espiritu ken mapapigsa dagiti bukodda a pammaneknek, no di ketdi maallukoyda pay dagiti dadduma pay a miembro ti klase a mangtakuat kadagiti kinapudno para iti bagbagida” (Panangisuro iti Wagas ti Mangisalakan, 30).