Adtoy ti Kordero ti Dios, ni Walter Rane

Disiembre 21–27

Paskua

“Umayto Ditoy Lubong a Mangsubbot kadagiti Taona”

Kabayatan ti panagadalmo iti pannakayanak ni Jesucristo daytoy a lawas, ibilangmo no kasano a matulongam ti klasem a mangpapigsa kadagiti pammaneknekda maipapan ken ni Jesucristo ken ti Pannubbotna. Makatulong ti sumagmamano kadagiti kapanunotan iti daytoy a balabala.

Isuratmo Dagiti Impresionmo

Yawis ti Panagbibinninglay

Awisem dagiti miembro ti klase a mangbukel iti kada paris wenno babassit a grupo ket ibinglay no kasano a ti panangsursuro maipapan ken ni Jesucristo manipud iti Libro ni Mormon itoy a tawen ket nangpapigsa iti pammatida Kenkuana ken dagiti pannursurona.

Isuro ti Doktrina

1 Nephi 11:13–23; Helaman 14:1–13; 3 Nephi 1:4–22

Nayanak ni Jesucristo tapno agbalin a Mangisalakantayo.

• Kasano a mausarmo ti Libro ni Mormon a mangisuro kadagiti miembro ti klase maipapan iti sagrado a pasamak iti pannakayanak ti Mangisalakan? Maysa a wagas ket mangbingay iti klase iti tallo a grupo ket ikkan ti tunggal grupo iti maysa kadagiti sumaganad a binatog iti nasantuan a kasuratan tapno aggigiddan a basaenda: 1 Nephi 11:13–23; Helaman 14:1–13; ken 3 Nephi 1:4–22. Idawat kadagiti grupo a mangilawlawag no ania ti isuro dagitoy a nasantuan a kasuratan kadakuada maipapan iti pannakayanak ti Mangisalakan. Kalpasanna mabalin nga ibinglay ti tunggal grupo iti dadduma pay iti klase no ania ti inlawlawagda. Apay a napateg nga adda saksi iti Libro ni Mormon maipapan iti pannakayanak ti Mangisalakan?

• Napateg ti panangammo maipapan iti pannakayanak ni Cristo, ngem napatpateg ti panangammo no apay a nayanak Isuna. Kasano a matulongam dagiti sursuruam a mangutob iti pangsubbot a bileg ni Jesucristo? Nalabit a mabalin nga ibinglay dagiti miembro ti klase ti sumagmamano nga estoria ken binatog nga inadalda iti daytoy a lawas (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). Allukoyem ida a mangibinglay no kasano a nangpauneg iti panagyamanda ti pannakayanak ti Mangisalakan ken iti panangsubbot a bilegna dagiti banag nga inadalda.

• Tapno mairugi ti panaglilinnawag maipapan kadagiti sagut nga inted ti Dios kadatayo babaen ti Anakna, mabalinmo nga awisen ti sumagmamano a miembro ti klase tapno pagsasaritaan maipapan kadagiti naisangsangayan a sagut a naawatda iti Paskua. Kasano nga ipakitatayo ti panagyaman kadagiti sagut nga awatentayo? Kalpasanna mabalin a basaen dagiti miembro ti klase ti adaw ni Presidente Thomas S. Monson a masarakan iti “Dagiti Nainayon a Resources” ken ilawlawag dagiti uppat a sagut a dinakamat ni Presidente Monson. Ania nga papel ti akmen ti Mangisalakan kadagitoy a sagut? Kasano a maipakitatayo ti panagyamantayo iti Nailangitan nga Ama para kadagitoy a sagut?

• Kas paset ti panaglilinnawagyo maipapan iti Paskua, ibilang ti panangawis kadagiti miembro ti klase a mangpatokar wenno mangkanta kadagiti himno ti Paskua. Mabalinmo met a sukisoken ti sumagmamano kadagiti resources a nailista iti “Dagiti Nainayon a Resources.”

Panid ti paulo ti Libro ni Mormon; pakauna iti Libro ni Mormon; 2 Nephi 25:23, 26; 33:4, 10

Paneknekan ti Libro ni Mormon maipapan ken ni Jesucristo.

• Iti yaasideg ti pananggibus ti panagadalmo iti Libro ni Mormon iti Sunday School, mabalin a kayatmo ti mangted kadagiti miembro ti klase iti gundaway a mangutob iti no ania ti nasursuroda maipapan ken ni Jesucristo iti Libro ni Mormon iti daytoy a tawen. Tapno makatulong a mangirugi iti pananglilinnawag, mabalin nga aggigiddan a basaenyo ti 2 Nephi 25:23, 26 ken 33:4, 10, kasta met dagiti adaw manipud iti pakauna iti Libro ni Mormon ken ti panid ti paulo. Mabalinmo pay ti mangibinglay iti estoria wenno binatog a nangyas-asideg kenka ken ni Jesucristo ket kalpasanna ikkam dagiti miembro ti klase iti sumagmamano a minuto a mangibinglay iti bukodda nga estoria wenno binatog. Iburaymo ti pammaneknekmo maipapan iti Libro ni Mormon, ket awisem dagiti dadduma pay a miembro ti klase a mangaramid iti kasta met laeng.

Yallukoy ti Panagsursuro iti Pagtaengan

Tapno maparegta dagiti miembro ti klase a mangirugi iti panangbasa iti Doktrina ken Katulagan, mabalinmo nga ibinglay ti paggugustom a bersikulo wenno makaparegta a padasmo iti panagadal iti Doktrina ken Katulagan.

Dagiti Nainayon a Resources

Dagiti resources iti Paskua.

• Mateo 1:18–25; 2; Lucas 2

• Libro ti Arte iti Ebanghelio, dagiti bilang 28, 29, 30, 31, 81

• Dagiti ladawan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia

• “A Savior Is Born—Christmas Video” (video, ChurchofJesusChrist.org)

• “Good Tidings of Great Joy: The Birth of Jesus Christ” (video, ChurchofJesusChrist.org)

• Christmas.ComeUntoChrist.org

• First Presidency Christmas Devotionals (ChurchofJesusChrist.org/broadcasts/first-presidency-christmas-devotionals)

Dagiti sagut ti Mangisalakan.

Insuro ni Presidente Thomas S. Monson:

Inutobko maipapan kadagiti pagdumaan ti Paskua. Dagiti nangina a sagut, singingina a naipakete ken napintas ti pannakabungonna, ket dimmanon kadagiti nalatak a pangkomersio a katalog nga addaan iti headline a ‘Para iti tao nga addaan iti amin a banag.’ Iti kasta a maysa a mabasbasa nadlawko ti tallo-gasut-ket-pitupulo a kuadrado a metro a pagtaengan a nabungon ken naikkan iti dakkel a laso ken adda kardna a naisurat ti, ‘Naimbag a Paskua.’ Nairaman kadagiti dadduma pay a banag dagiti golf club a nakaikabilan dagiti diamante para iti golfer, ti Carribean cruise para iti agbambaniaga, ken ti nangina a biahe iti Swiss Alps para iti agsuksukisok. Dagitoy a sagut ti kasla mayannatup iti tema ti Christmas cartoon a nakaipabuyaan ti Tallo a Masirib a Lallaki nga agbambaniaga nga agturong iti Betlehem nga addaan kadagiti naibungon a sagut a nakasakay kadagiti kamelioda. Kuna ti maysa, ‘Agannadka, Baltazar, mangrugrugitayon iti maysa a banag kadagitoy a sagut a saan a mapengdan!’ …

“Iti sumagmamano a kanito, lipatentayo koma dagiti katalog ti Paskua, nga addaan iti sagsagutda iti karkarna a panangiladawan. Ditayo koma panunoten ti maipapan kadagiti sabong para ken Ina, ti naisangsangayan a kurbata para ken Ama, ti napintas a munieka, ti tren nga agbusina, ti nabayagen nga ur-urayen a bisikleta … ket iturongtayo ti pampanunottayo kadagiti sagut nga inted ti Dios nga agpaut. Pinilik manipud iti atiddog a listaan ti uppat laeng: …

“Umuna, ti sagut ti pannakayanak. Sapasap daytoy a naisagut iti tunggal maysa kadatayo. Nadiosan a pribilehiotayo a nangpanaw iti nadiosan a pagtaengantayo tapno maaddaan iti mortal a bagi ket ipakita babaen ti panagbiagtayo ti pannakaikari ken kualipikasion tapno iti maysa nga aldaw makasublitayo Kenkuana, kadagiti patpatgentayo, ken ti pagarian a maawagan iti celestial. … Pagrebbengantayo nga ipakita ti panagyamantayo babaen dagiti aramid iti biagtayo. …

“Maikadua, ti sagut ti talna. Iti naburibor a lubong a pangnanaedantayo, ti ringgor ti trapiko, dagiti napigsa a makasinga a komersial ti media, ken dagiti adu a kasapulan a naidawat iti panawentayo—ditayo malipatan dagiti problema ti lubong—mangigapu iti sakit ti ulo, mangdangran, ken mangusar iti pigsatayo a makabael. …

“Isu a nadagsenan iti ladingit ken makaammo iti liday ket makisao iti tunggal naburiboran a puso ken mangted iti sagut ti talna. ‘Ti talna ibatik kadakayo, ti talna itdek kadakayo: saan a kas iti panangited ti lubong ti panangitedko kadakayo. Saan koma nga agpulkok ti pusoyo, ken di agbuteng’ (Juan 14:27). …

“Maikatlo, ti sagut ti ayat. ‘Maestro, ania ti dakkel a bilin iti linteg?’ dinamag ti abogado ken ni Jesus. Dagus a nasungbatan iti: ‘Ayatem ti Apo a Diosmo iti amin a pusom, ken iti amin a kararuam, ken iti amin a panunotmo.

“‘Daytoy ti umuna ken dakkel a bilin.

“‘Ket ti maikadua isu umasping kenkuana, Ayatem ti padam a tao a kas iti bagim’ (Mateo 22:37–39). …

“Maikapat, ti sagut ti biag—uray ti imortalidad. Naglaon ti plano ti Nailangitan nga Amatayo kadagiti kangrunaan a panangipeksa iti pudno nga ayat. Mapukaw ti amin a napateg kadatayo, uray dagiti pamiliatayo, dagiti gagayyemtayo, ti rag-otayo, dagiti pammaneknektayo, no saan a gapu iti Amatayo ken iti Anakna, ti Apo a ni Jesucristo. Maibilang kadagiti kapatgan a kapanunotan ken sinurat iti daytoy a lubong ti nadiosan a palawag ti kinapudno: ‘Ta kasta la unay ti panagayat ti Dios iti lubong, nga intedna ti Anakna a Bugbugtong, tapno amin a mamati kenkuana saan a mapukaw, no di ket adda biagna nga agnanayon’ (Juan 3:16)” (“Gifts,” Ensign, Mayo 1993, 59–62).

Panangpadur-as iti Panangisurotayo

OK laeng nga isao ti, “Diak ammo.” Idinto a nasken nga aramidem ti amin a mangsungbat kadagiti ania man a saludsod dagiti miembro ti klase maipapan iti ebanghelio, saan a namnamaen ti Apo nga ammom ti amin a banag. No saanmo nga ammo no kasano ti sumungbat iti maysa a banag, ibilang ti panagresponde babaen ti panangawis iti klase nga aggigiddan a mangsukisok iti sungbat kadagiti nasantuan a kasuratan ket ibinglay no ania ti nasarakanda. (Kitaen iti Panangisuro iti Wagas ti Mangisalakan, 24.)