Si Jesus nagtudlo sa mga tawo

Ikaw Usa ka Magtutudlo sa Simbahan ni Jesukristo

Gitawag ka sa Dios aron sa pagtudlo sa Iyang mga anak sa pamaagi sa Manluluwas. Gi-set apart ka niini nga calling pinaagi sa awtoridad sa Iyang balaan nga pagkapari. Bisan kon ikaw dili batid nga magtutudlo, samtang magpakabuhi ka nga takus, mag-ampo kada adlaw, ug magtuon sa mga kasulatan, ang Langitnong Amahan mohatag kanimo sa impluwensya ug gahum sa Espiritu Santo aron motabang kanimo nga magmalampuson (tan-awa sa 2 Nephi 33:1).

Kadtong gisalig sa imong pag-atiman mao ang mga anak sa Langitnong Amahan, ug nasayud Siya kon unsay ilang gikinahanglan ug unsaon sa pagtabang nila sa labing maayong paagi. Pinaagi sa Espiritu Santo, ang Dios mogiya kanimo samtang ikaw mangandam ug samtang magtudlo ka. Ipadayag Niya kanimo kon unsay angayan nimong isulti ug unsay angayan nimong buhaton (tan-awa sa 2 Nephi 32:5).

Ang mahinungdanong katuyoan sa pagtudlo ug pagkat-on sa ebanghelyo mao ang pag-usab og mga kinabuhi. Ang imong tumong isip usa ka magtutudlo mao ang pagtabang niadtong imong tudloan nga mobuhat sa tanan kutob sa ilang mahimo aron mas makabig ngadto sa ebanghelyo ni Jesukristo—usa ka paningkamot nga molapas pa sa oras sa klase. Dapita kadtong imong tudloan nga aktibong moapil diha sa pagkat-on sa mga baruganan ug doktrina ni Jesukristo ug molihok sa unsay ilang makat-unan. Awhaga sila sa paghimo sa ilang indibidwal ug pamilya nga pagtuon gawas sa klase nga maoy mag-unang tinubdan sa ilang pagkat-on sa ebanghelyo. Samtang molihok sila uban sa pagtuo pinaagi sa pagtuon isip mga indibidwal ug mga pamilya, magdapit sila sa Espiritu ngadto sa ilang mga kinabuhi, ug ang Espiritu ang magdala og tinud-anay nga pagkakabig. Tanan nga imong buhaton isip magtutudlo kinahanglang mopunting ngadto niining sagrado nga katuyoan.

Itudlo lamang ang doktrina sa gipahiuli nga ebanghelyo ni Jesukristo sigun sa makita diha sa mga kasulatan ug sa mga pulong sa mga propeta sa ulahing mga adlaw. Ang putli nga doktrina—mahangturon, dili mausab nga kamatuoran nga gitudlo sa Dios ug sa Iyang mga sulugoon—magdapit sa Espiritu ug adunay gahum sa pag-usab og mga kinabuhi.

Ang calling sa pagtudlo usa ka sagradong pagsalig, ug normal ra nga mobati usahay nga mabug-atan. Apan hinumdumi nga ang imong Langitnong Amahan mitawag kanimo, ug dili gayud Siya mosalikway kanimo. Buhat kini sa Ginoo, ug samtang magserbisyo ka “sa tibuok [nimo] nga kasingkasing, gahum, hunahuna ug kusog” (D&P 4:2), palambuon Niya ang imong mga kapasidad, mga gasa, ug mga talento, ug ang imong pagserbisyo makapanalangin sa kinabuhi niadtong imong tudloan.