Sa vakavulici ira tiko na tamata o Jisu

Oi Kemuni E Dua na Qasenivuli ena Lotu i Jisu Karisito.

O sa kacivi mai vua na Kalou mo vakavulici ira na luvena ena Nona ivakarau na iVakabula. O sa lesi ka vakatikori ki na veikacivi oqo ena lewa ni Nona matabete tabu. Kevaka mada ga o sega ni kenadau ena veivakavulici, ia ni ko bula kilikili, masu e veisiga, ka vulica na ivolanikalou, ena solia vei iko na Tamada Vakalomalagi na veivakauqeti kei na kaukauwa ni Yalo Tabu me vukei iko mo rawa-ka (raica na 2 Nifai 33:1).

O sa na nuitaki mo veiqaravi vei ira na luvena na Tamada Vakalomalagi, ka sa kila tu o Koya na nodra gagadre kei na sala uasivi duadua me tarai ira kina. Ena qai tuberi iko na Kalou, ena Nona Yalotabu ena gauna ni nomu vakavakarau ka vakakina ena gauna ni nomu veivakavulici. Ena vakatakila vei iko ko Koya na ka dodonu mo tukuna ka cakava (raica na 2 Nifai 32:5).

Na inaki bibi ni kena vakatavulici ka vulici na kosipeli o ya me veisautaka na bula. Na nomu inaki vaka qasenivuli o ya mo vukei ira o vakavulica mera cakava nodra igu taucoko mera saumaki mai ki na kosipeli i Jisu Karisito—na lalawa e lako sivita yani na gauna ni kalasi. Sureti ira o vakavulica mera cuqena na vakaitavi ka gumatua ena nodra vulica na ivakavuvuli ni vunau i Jisu Karisito ka cakava na ka era sa vulica. Vakayaloqaqataki ira mera vuli vaka tamata yadua ka vakamatavuvale ena taudaku ni kalasi me sa ivurevure taumada ni nodra vulica na kosipeli. Ni ra cakacakataka nodra vakabauta mera vuli yadua ka vakamatavuvale, era na sureta kina na Yalotabu ki na nodra bula, ni sai Koya ena kauta mai na saumaki dina. Na veika kece o vakayacora me vaka e dua na qasenivuli mena dusia na inaki vakalou oqo.

Mo vakavulica duadua ga na ivunau ni kosipeli vakalesuimai i Jisu Karisito sa tiko ena ivolanikalou kei na nodra vosa na parofita edaidai. Na ivunau savasava—tawamudu, me baleta na dina ka sega ni veisau me vaka e vakavulica na Kalou vei ira na Nona italai—ena sureta na Yalotabu ni sa tu vua na kaukauwa me veisautaka na bula.

Na veikacivi ni veivakavulici sa dua na veidinadinati tabu, ka sa ivakarau ni bula me tuburi keda na yalomarau ena veigauna eso. Ia mo nanuma tiko ni sa kacivi iko na Tamamu Vakalomalagi, ka na sega vakadua ni laivi iko o Koya. Oqo na cakacaka ni Turaga, ni ko na qarava “ena yalomudou taucoko, igu, vakasama kei na kaukauwa” (VV 4:2), ena vakalevutaka o Koya na nomu gugumatua, isolisoli, kei na taledi, ka veivakalougatataki ^ki na nomu veiqaravi ki na nodra bula o vakavulica tiko.