Jun eetalil re k’utuk

Sa’ li hu a’in, taataw li k’utb’il eetalil a’in sa’ li junjunq chi tusb’il aatin: xkanab’ankileb’ chi wotzok, xk’utb’al li tzol’leb’, ut xb’oqb’aleb’ chi tzolok sa’ kab’l. K’iila sut naq yookat chi k’utuk, eb’ li oxib’ raqal a’in te’xjunaji rib’, malaj te’xjal xna’aj. Jo’ jun eetalil, k’e reetal naq rik’in li wotzok naru na’ux xk’utb’al li tzol’leb’, ut naq naqak’ut li tzol’leb’, tento taa’uxq xkanab’ankileb’ chi wotzok. Jo’kan ajwi’, naru taak’e xb’oqb’aleb’ chi tzolok sa’ kab’l naq yooqex chi aatinak jo’ tzoleb’aal. Kanab’ a’in chi k’ulmank jo’ chanru eek’asinb’il xb’aan li Musiq’ej, re te’tenq’aaq li ani tzolb’ileb’ aab’aan.

Xkanab’ankileb’ chi wotzok

Jo’ xcha’al li junjunq tzoleb’aal, kanab’eb’ li komon sa’ li tzoleb’aal chixwotzb’al lix na’leb’eb’ ut li k’a’ru xe’xk’ul chiru li jun xamaan naq xe’xtzol li loq’laj hu jo’ komon ut jo’ junkab’al, ut xe’xyu’ami li k’a’ru xe’xtzol. Tenq’aheb’ li komon chixk’eeb’al reetal naq aajel ru li tzolok neke’xb’aanu sa’ kab’l. Ink’a’ taachalq lix jalajikeb’ xch’ool ka’ajwi’ rik’in tzolok sa’ domingo, rik’in aj b’an wi’ li k’a’ru neke’xk’ul wulaj wulaj. Naq eb’ li komon neke’rab’i li k’a’ru xe’xk’ul lix komoneb’ chik, k’a’jo’ wi’chik naq te’xsik’ xk’ulb’al li na’leb’ a’an choq’ reheb’.

Moko chixjunileb’ ta te’ril li ch’ol re li junjunq tzoleb’aal, ut us ta xe’ril, wankeb’ li ink’a’ sa te’reek’a xwotzb’al. Kanab’eb’ chixjunileb’ li komon chireek’ankil naq wankeb’ xwankil sa’ li tzoleb’aal, us ta maare ink’a’ te’raj wotzok.

Xk’utb’al li tzolʼlebʼ

Laa’at ut eb’ li komon sa’ laa tzoleb’aal tento teek’e eech’ool rik’in li tzol’leb’—a’an li yaalil na’leb’ re li evangelio—li natawman sa’eb’ li jar raqal sa’eb’ li loq’laj hu li eetanb’ileb’. Naq nekex’aatinak chirix li tzol’leb’ sa’eb’ li loq’laj hu, k’a’ruheb’ li raqal, li aatin, li k’a’ru xak’ul, li patz’om, ut xkomoneb’ chik li k’anjeleb’aal naru nakawotz? Chan ru naq tatruuq chiroksinkileb’ li k’anjeleb’aal a’in re xtenq’ankileb’ li komon chixtzolb’al ut chixtawb’aleb’ ru li na’leb’ chirix li evangelio? Chan ru naru nakawaklesi xch’ooleb’ li komon chixtz’iib’ankil ut chixyu’aminkil li na’leb’ xe’xk’ul ut xe’reek’a?

Xb’oqb’aleb’ chi tzolok sa’ kab’l

Sa’ xraqik li tzoleb’aal, chiru junpaat numsi li k’a’ru taak’utmanq sa’ li xamaan jun chik. K’oxla chan ru naq taatenq’aheb’ li komon sa’ laa tzoleb’aal re naq yooqeb’ chi tzolok sa’ lix Hu laj Mormon sa’ kab’l, xjuneseb’ ut rik’ineb’ lix junkab’al.