eb’ li perel chʼiichʼ oor

30 diciembre–5 enero

Eb’ li perel sa’ xtiklajik lix Hu laj Mormon

“Jun chik Chʼolobʼanbʼil Esil chirix li Jesukristo”

Tzol li perel re xjolomil li aatin sa’ lix Hu laj Mormon, jo’ ajwi’ li Xtikib’ankil; lix Ch’olob’ahomeb’ li Oxib’ chi aj Yehol Nawom, li Waqxaqib’ chi aj Yehol Nawom, ut li Profeet aj Jose Smith, ut “Jun ch’ina ch’olob’anb’il aatin chirix lix Hu laj Mormon.” Naq nakab’aanu chi jo’kan, tz’iib’aheb’ li na’leb’ nakak’ul rik’in li Santil Musiq’ej chirix chan ru xtenq’ankileb’ li wankeb’ sa’ laa tzoleb’aal re te’xtzol chi chaab’il lix Hu laj Mormon.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Re xtikib’ankil, naru taakanab’eb’ junjunqeb’ li komon chixwotzb’al k’a’ru xe’xtzol sa’eb’ li perel sa’ xtiklajik lix Hu laj Mormon li xnimob’resink re lix nawomeb’ xch’ool chirix li loq’laj hu a’in.

reetalil li k‘utuk

Xk’utb’al li tzol’leb’

Perel re xjolomil li aatin saʼ lix Hu laj Mormon

Lix Hu laj Mormon naru chixkawob’resinkil li qapaab’aal chirix li Jesukristo.

• Rik’in rilb’al ru li perel re xjolomil li aatin sa’ lix Hu laj Mormon, li tz’iib’anb’il xb’aan laj Moroni, eb’ li komon sa’ laa tzoleb’aal naru te’kawresiiq chixtzolb’al lix Hu laj Mormon chiru li chihab’ a’in. Chan ru naq eb’ li aatin sa’ li perel re xjolomil li aatin naru te’xchaab’ilob’resi li tzolok neke’xb’aanu? Maare tatruuq chixtz’iib’ankileb’ li patz’om chiru li pizarron—jo’ K’a’ut naq wan qik’in lix Hu laj Mormon? malaj Chan ru naq jalan lix Hu laj Mormon rik’in jalaneb’ chik chi hu?—ut b’oqeb’ li komon sa’ li tzoleb’aal chixsik’b’al xsumenkil naq te’ril ru li perel re xjolomil li aatin xjuneseb’ malaj sa’ ka’kab’il. Naru te’xwotz li musiq’anb’il na’leb’ li nachal rik’ineb’. Naru ajwi’ taawaklesiheb’ xch’ool li komon sa’ li tzoleb’aal re te’xye resil chan ru naq te’raj xtzolb’al lix Hu laj Mormon chiru li chihab’ a’in. Qayehaq, k’a’ru yooqeb’ chixsik’b’al? Chan ru naq te’tzoloq rik’in li Santil Musiq’ej naq yookeb’ chi tzolok?

• Jun rajb’al lix hu laj Mormon li aajel ru wan chi tz’iib’anb’il sa’ li perel re xjolomil li aatin: “re te’q’unb’esiiq xch’ool laj Judio ut laj Gentil naq li Jesus a’an li Kristo.” Naru taak’e xb’oqb’aleb’ li komon sa’ li tzoleb’aal re te’xwotzeb’ li raqal sa’ lix Hu laj Mormon li xkawob’resink re lix paab’aaleb’ chirix li Jesukristo (taaruuq ajwi’ te’ril junjunq aatin sa’ “Xkomon chik li k’anjeleb’aal”). Eb’ li komon sa’ li tzoleb’aal taaruuq te’ril ru junjunq li raqal a’in rochb’een li ani chunchu chixk’atq, ut te’xwotz chan ru naq lix Hu laj Mormon xkawob’resi lix nawomeb’ xch’ool chirix li Kolonel.

Xtikib’ankil lix Hu laj Mormon

Lix Hu laj Mormon naru chiqatenq’ankil re “xjilosinkil qib’ rik’in li Dios.”

• Sa’ Xtikib’ankil sa’ lix Hu laj Mormon, wan li na’leb’ li aajel ru naq te’xtaw ru li ani te’iloq re. Maare usaq choq’ re laa tzoleb’aal rilb’al sa’ junpaat lix tikib’ankil, ut te’xk’e reetal junjunq li na’leb’ li te’tenq’anq re li ani yoo chirilb’al ru xb’een wa lix Hu laj Mormon. Chirix a’an, eb’ li komon te’ruuq chixwotzb’al li k’a’ru neke’xtaw. Maare te’raj xb’aanunkil jun k’utb’esink chirix chan ru naq te’xk’ut raj lix Hu laj Mormon chiru anihaq. Eb’ li video sa’ “Xkomon chik li k’anjeleb’aal” maare te’ruuq ajwi’ chetenq’ankil.

• Maare wankeb’ ani sa’ laa tzoleb’aal li xe’xk’ul k’a’ruhaq li naxk’ut xyaalal li raatin laj Jose Smith: “Jun li winq q’axal wi’chik taaruuq chixjilosinkil rib’ rik’in li Dios rik’in xpaab’ankil li na’leb’ wan [sa’ lix Hu laj Mormon], chiru k’a’ruhaq chik chi hu.” Naru taapatz’ reheb’ li komon sa’ li tzoleb’aal naq te’xwotz chan ru naq xe’xjilosi rib’ rik’in li Dios rik’in xyu’aminkil li yaalil na’leb’ xe’xtzol sa’ lix Hu laj Mormon. Naru ajwi’ taaye reheb’ li komon sa’ li tzoleb’aal naq te’xwotz xsumenkileb’ li patz’om a’in yeeb’il xb’aan li Awa’b’ej Russell M. Nelson: “Xb’een, chan raj ru taawanq lee yu’am wi ta maak’a’ lix Hu laj Mormon? Xkab’, k’a’ru li ink’a’ raj teenaw? Rox, k’a’ru raj taasache’q cheru?” (Lix Hu laj Mormon: K’a’ru raj xjalanil laa yu’am chi maak’a’ li hu a’an?” ( Jolomil ch’utub’aj-ib’ re octubre 2017).

• Ma wan ani sa’ laa tzoleb’aal li x’ilok reheb’ li raqal sa’ lix Hu laj Mormon b’ar wankeb’ wi’ jalan jalanq k’ab’a’ej choq’ re li k’uub’anb’il na’leb’ re li kolb’a-ib’, jo’ yeeb’il sa’ Kim, taaqehin—Choq’ reheb’ li komon ut li junkab’al? Wi wan, kanab’eb’ chixwotz’b’al li k’a’ru xe’xtzol.

“Lix Ch’olob’ahomeb’ li Oxib’ chi aj Yehol Nawom”; “Lix Ch’olob’ahomeb’ li Waqxaqib’ chi aj Yehol Nawom”

Chiqajunilo nokoru chi wank choq’ aj yehol nawom chirix lix Hu laj Mormon.

• Xtz’ilb’al rix lix Ch’olob’ahomeb’ li Oxib’ ut li Waqxaqib’ chi aj Yehol Nawom taaruuq tixnimob’resi lix nawomeb’ xch’ool li komon sa’ laa tzoleb’aal, ut tixtenq’aheb’ chixk’oxlankil chan ru naru neke’xwotz lix ch’olob’ahomeb’ a’an. Naru taapatz’ re lix yijach li tzoleb’aal naq te’ril ru “Lix Ch’olob’ahomeb’ li Oxib’ chi aj Yehol Nawom” ut lix yijach chik naq te’ril ru “Lix Ch’olob’ahomeb’ li Waqxaqib’ chi aj Yehol Nawom,” ut te’xwotz li na’leb’ malaj li aatin li wan xwankil choq’ reheb’. Chan ru naq jalaneb’ li wiib’ chi ch’olob’ahom? Chan ru naq juntaq’eeteb’? K’a’ru naqatzol rik’ineb’ laj yehol nawom a’in chirix xwotzb’al lix nawom qach’ool? Re xtikib’ankil li aatinak chirix k’a’ut naq aajeleb’ ru li oxib’ chi aj yehol nawom, naru taawotz li raatin li Awa’b’ej Dallin H. Oaks sa’ “Xkomon chik li k’anjeleb’aal,” malaj naru taak’ut li video “The Testimony of the Three Witnesses” (ChurchofJesusChrist.org).

laj Jose Smith ut li oxib’ chi aj yehol nawom, naq ke’tijok sa’ komonil

Li oxib’ chi aj yehol nawom ke’xch’olob’ xyaalal lix Hu laj Mormon.

“Lix Chʼolobʼahom li Profeet aj Jose Smith”

Laj Jose Smith kiwan choq’ k’anjeleb’aal sa’ ruq’ li Dios re xk’amb’al chaq chi kutankil lix Hu laj Mormon.

• Eb’ li komon sa’ li tzoleb’aal maare ak xe’rab’i resil li yeeb’il sa’ “Lix Ch’olob’ahom li Profeet aj Jose Smith,” a’ut maare tatruuq chixtenq’ankileb’ re te’xtaw chik xna’leb’eb’. Qayehaq, taaruuq taab’oqeb’ chixtz’iib’ankil sa’ tusulal li k’a’ru kik’ulman sa’ li esilal kixye laj Jose Smith. Rik’in li k’a’ru kixk’ul a’an, k’a’ru naru taqaye chirix k’a’ut naq li Qaawa’ xk’e xloq’al lix Hu laj Mormon?

• Li b’ich “Jun anjel taqlanb’il” (Eb’ li B’ich, 8) na’aatinak chirix lix k’utunik lix Hu laj Mormon. Chirix xb’ichankil malaj rab’inkil li b’ich a’in, eb’ li komon sa’ li tzoleb’aal te’ruuq chixtawb’al li aatin sa’ “Lix Ch’olob’ahom li Profeet aj Jose Smith” li naxk’am rib’ rik’in malaj naxk’ut xyaalal li aatin sa’ li b’ich.

reetalil li tzolok

Xb’oqb’aleb’ chi tzolok sa’ kab’l

Re xwaklesinkileb’ xch’ool li komon sa’ li tzoleb’aal re te’ril ru 1 Nefi 1–7, ye reheb’ naq te’xsik’eb’ li na’leb’ malaj li yaal li taatenq’anq reheb’ sa’ li wankeb’ wi’ sa’ xyu’ameb’—jo’ rik’in junaq ch’a’ajkilal sa’ xjunkab’aleb’, malaj junaq xb’oqb’aleb’ sa’ li Iglees.

reetalil li k’anjeleb’aal

Xkomon chik li k’anjeleb’aal

Eb’ li raqal sa’ lix Hu laj Mormon li neke’xch’olob’ xyaalal li Jesukristo.

• Mosiah 3:5–8

• Alma 5:48; 7:10–13

• Helaman 5:12

• 3 Nefi 9:13–18; 11:6–14

• Moroni 10:32–33

Eb’ li video chirix lix Hu laj Mormon sa’ ChurchofJesusChrist.org.

• “El Libro de Mormón—Introducción”

• “¿Qué es el Libro de Mormón? Reseña de 60 segundos”

• “Una historia del Libro de Mormón”

Re rilb’al chik xkomon, chi’ilmanq xch’uutil li video chirix lix Hu laj Mormon sa’ ChurchofJesusChrist.org malaj li aplicación Biblioteca del Evangelio.

Raajelileb’ ru li oxib’ chi aj yehol nawom.

Li Awa’b’ej Dallin H. Oaks kixch’olob’ k’a’ut naq q’axal aajel ru Lix Ch’olob’ahomeb’ li Oxib’ chi aj Yehol Nawom:

“Lix Ch’olob’ahomeb’ li Oxib’ chi aj Yehol Nawom wan chi xaqab’anb’il rik’in nimla wankilal. Li junjunq reheb’ li oxib’ kiwan rajb’al naq tixsach raj xyaalal lix ch’olob’ahom wi ta moko yaal ta, malaj naq tixjal li aatin wi ta ink’a’ raj tz’aqal re ru. Ak nawb’il chi us naq sa’ xk’ab’a’ li jachok-ib’ ut li sowenak chirixeb’ chik laj jolominel sa’ li Iglees, li junjunq reheb’ li oxib’ chi aj yehol nawom ke’isiik chaq sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, waqxaqib’ chihab’ chirix naq kipuktesiman lix ch’olob’ahomeb’. Xkoheb’ li oxib’ li junjunq sa’ xb’e, ut maak’a’ kijunajink reheb’ re te’xk’uub’ xna’leb’ sa’ komonil. A’b’anan toj sa’ roso’jik lix yu’ameb’—chalen 12 toj 50 chihab’ chirix naq ke’isiik chaq—maajun reheb’ laj yehol nawom a’in kixjal lix ch’olob’ahom jo’ naq puktesinb’il, chi moko ke’xye k’a’ruhaq li taasachoq raj xyaalal lix ch’olob’ahomeb’ ” (“The Witness: Martin Harris,” Ensign, Mayo 1999 , 36).

Lix ch’olob’ahom laj John Whitmer.

Laj John Whitmer, jun reheb’ li waqxaqib’ chi aj yehol nawom chirix lix Hu laj Mormon, kixye: “Maajun wa wab’ihom naq junaq reheb’ li oxib’ malaj li waqxaqib’ chi aj yehol nawom xsachom xyaalal li k’a’ru ke’xch’olob’. … Xikenaq li qak’ab’a’ chiru chixjunileb’ li tenamit, li aatinob’aal, ut li teepal, jo’ jun choxahil k’utb’esink, k’eeb’il xb’aan li Dios. Ut a’an tixk’e chi uxmank li rajom xch’ool li Dios, jo’ chanru li ch’olob’ank li tz’iib’anb’il aran” (sa’ Noel B. Reynolds, ed., Book of Mormon Authorship Revisited: The Evidence for Ancient Origins [1997], 55–56).

Xchaab’ilob’resinkil li qak’utum

Sik’ aamusiq’ankil. Sa’ xna’aj rilb’aleb’ li tusleb’ aatin a’in jo’ na’leb’ li tento taataaqe, oksiheb’ jo’ jun xyo’leb’aal na’leb’ li taatenq’anq aawe re taak’ul aamusiq’ankil naq nakak’oxla li rajomeb’ ru li ani nakatzoleb’.