Laj Lehi kib’eek chixk’atq li Kaqi Palaw, xb’aan laj Gary Smith

6–12 enero

1 Nefi 1–7

“Tinxik ut tinb’aanu”

Natikla xkawresinkil aawib’ jo’ aj k’utunel sa’ li Dominkil Tzoleb’aal rik’in tzolok aajunes sa’eb’ li loq’laj hu. K’e reetaleb’ ut tz’iib’aheb’ li musiq’anb’il na’leb’ nakak’ul. Kim, Taaqehin—Choq’ reheb’ li komon ut li junkab’al naru taak’anjelaq aawe naq nakattzolok.

Xtz’iib’ankil li nakak’oxla

Xkanab’ankileb’ chi wotzok

Maare naab’al reheb’ li komon sa’ laa tzoleb’aal ak neke’xnaw ru 1 Nefi 1–7, a’ut rajlal sut naq naqileb’ ru li loq’laj hu, naru naqatzoleb’ li yaalil na’leb’ li te’k’anjelaq qe sa’ li wanko wi’. Re xtikib’ankil li aatinak, maare tatruuq chixpatz’b’al reheb’ li komon sa’ li tzoleb’aal k’a’ru xe’xtzol malaj k’a’ru xjultiko’ reheb’ naq yookeb’ chi tzolok chiru li xamaan a’in.

Xk’utb’al li tzol’leb’

1 Nefi 1; 3–6

K’a’jo’ xnimal xloq’aleb’ li loq’laj hu.

• Jun esil aajel ru sa’ lix Hu laj Mormon a’an naq nim xloq’al li raatin li Dios. A’in jun chaab’il esil naru nakawotz naq nekex’ok jo’ tzoleb’aal chixtzolb’al lix Hu laj Mormon. Naru taatikib’ rik’in xpatz’b’al re li junjunq komon sa’ li tzoleb’aal naq tixsik’ ru junaq ch’ol sa’ 1 Nefi 1; 3–6 ut taaril ru sa’ junpaat re xsik’b’al chan ru naq li raatin li Dios kirosob’tesiheb’ li komon sa’ lix junkab’al laj Lehi, chi k’utk’u malaj chi ink’a’ k’utk’u. (Eb’ li komon sa’ li tzoleb’aal maare te’usaaq rik’in xb’aanunkil li ch’ina k’anjel a’in sa’ kok’ ch’uut.) Chirix a’an patz’ reheb’ li komon sa’ li tzoleb’aal naq te’xwotz li k’a’ru xe’xtaw. K’a’ru neke’xk’ut li raqal a’in chirix lix aajelileb’ ru li loq’laj hu?

• Jun aajayalihom jo’ aj k’utunel a’an xwaklesinkil xch’ooleb’ li komon ut li junkab’al re te’xtzol li evangelio naq moko wankeb’ ta sa’ li tzoleb’aal. Maare naru taaye reheb’ li komon sa’ li tzoleb’aal naq te’xtz’il rix chan ru naq laj Lehi kirileb’ li perel ch’iich’ bronce (chi’ilmanq 1 Nefi 5:10–19), ut chirix a’an naru taapatz’eb’ li patz’om jo’ a’in: K’a’ru kixk’oxla laj Lehi chirixeb’ li loq’laj hu? K’a’ru li wan xloq’al kixtaw sa’eb’ a’an? Eb’ li komon sa’ li tzoleb’aal te’ruuq ajwi’ chixtz’ilb’al rix li raatin li Elder Richard G. Scott, “El poder de las escrituras” (Liahona, noviembre 2011, 6–8), malaj te’ril ru jun raqal li aatin a’in sa’ “Xkomon chik li k’anjeleb’aal.” Chan ru naru naqak’anjela li raatin li Elder Scott naq yooko chixtzolb’al lix Hu laj Mormon chiru li chihab’ a’in?

• Jo’ tzoleb’aal, naru teeb’icha junaq b’ich chirixeb’ li loq’laj hu, jo’ “Naq nintzol li loq’laj hu” (Eb’ li B’ich, 179). Chirix a’an, naru taab’oqeb’ li komon sa’ li tzoleb’aal naq te’xwotz chan ru naq xe’osob’tesiik sa’ xyu’ameb’ rik’in xtzolb’aleb’ li loq’laj hu. Taaruuq ajwi’ te’xwotz chan ru naq xe’tenq’aak xb’aaneb’ li loq’laj hu re “te’chalq rik’in li Dios ut te’kole’q” (1 Nefi 6:4).

1 Nefi 2:11–19; 3:28–31

Naru naqataw xnawom qach’ool naq naq’unob’resiik li qaam.

• Laj Nefi nawb’il ru xb’aan xnimal xpaab’aal chirix li Qaawa’, a’ut maare us naq eb’ li komon sa’ li tzoleb’aal te’xnaw naq ki’ajman ru naq kixyal xq’e re tixk’ul lix nawom xch’ool—jo’ laa’o ajwi’. Maare eb’ li komon sa’ li tzoleb’aal te’ruuq chixk’eeb’al reetal sa’ 1 Nefi 2:16–19 chan ru naq kiru laj Nefi chixk’ulb’al lix nawom xch’ool. Taaruuq ajwi’ te’ril ru eb’ li raqal 11–14 re xk’eeb’al reetal k’a’ut naq laj Laman ut laj Lemuel ink’a’ ke’xk’ul xnawomeb’ xch’ool. Maare chaab’il li hoonal a’in re xkanab’ankileb’ li komon sa’ li tzoleb’aal chixwotzb’al chan ru naq xe’xk’ul xnawomeb’ xch’ool.

• Wan naq naqaj xk’ulb’al junaq sachb’a-ch’oolej re taqak’ul malaj re taqakawob’resi lix nawom qach’ool. A’b’anan, us ta laj Laman ut laj Lemuel ke’k’ule’ xb’aan jun li anjel, toj moko kaw ta lix paab’aaleb’. K’a’ru naru te’xtzol li komon sa’ li tzoleb’aal rik’in li kik’ulman, jo’ yeeb’il resil sa’ 1 Nefi 3:28–31 chirix li k’a’ru nakawob’resink re lix nawom qach’ool? (chi’ilmanq ajwi’ 1 Nefi 2:16). Naru taawotz li raatin li Awa’b’ej Harold B. Lee sa’ “Xkomon chik li k’anjeleb’aal.” K’a’ru naru naqab’aanu re naq kawaq lix nawom qach’ool?

1 Nefi 3–4

Li Dios tixk’uub’ jun b’e re taqab’aanu li rajom xch’ool.

• Li k’a’ru ke’xk’ul li ralal laj Lehi sa’ 1 Nefi 3–4 chanchan naq ch’a’aj, a’ut naab’al qe wan qanumsihom naq xqab’aanu li k’a’ru naraj li Dios, us ta ch’a’aj. Naq eb’ li komon sa’ li tzoleb’aal xe’ril ru 1 Nefi 3–4 sa’ li xamaan a’in, k’a’ru li yaalil na’leb’ xe’xtaw li xjultika reheb’ junaq xnumsihomeb’? Maare taaruuq taapatz’ reheb’ li komon sa’ li tzoleb’aal naq te’xwotzeb’ li raqal li neke’xk’ut li yaalil na’leb’ a’in, ut takanab’eb’ chixwotzb’al lix numsihomeb’. Chan ru naq eb’ li yaalil na’leb’ a’in nokohe’xtenq’a naq li Dios naraj naq taqab’aanu li k’a’ru ch’a’aj?

• Naru taajach ru li tzoleb’aal sa’ oxib’ ch’uut ut taaye re li junjunq ch’uut naq te’xtzol jun reheb’ li oxib’ sut naq ke’xyal xk’ulb’aleb’ li perel ch’iich’ bronce rik’in laj Laban (chi’ilmanq 1 Nefi 3:9–21; 1 Nefi 3:22–31; 4:1–4; ut 1 Nefi 4:5–38). Chirix a’an, naru taakanab’eb’ li junjunq ch’uut chixwotzb’al k’a’ru neke’xk’ut li raqal a’in chirix xtz’aqob’resinkil ru li rajom li Qaawa’. Chan ru naq eb’ li raqal a’in nokohe’xtenq’a naq yooko chixyalb’al qaq’e chixb’aanunkil li rajom xch’ool li Qaawa’?

Kinumta xsahileb’ xch’ool, xb’aan laj Walter Rane

Xb’oqb’aleb’ chi tzolok sa’ kab’l

Re xwaklesinkil xch’ooleb’ li komon chirilb’al ru 1 Nefi 8–10, taaruuq taawotz li aatin a’in xb’aan li Awa’b’ej Dieter F. Uchtdorf: “Naq wan k’iila ch’a’ajkilal li yookeb’ chi jalb’ehink qe, chan ru naq naqab’eresi li qilob’aal sa’ li loq’laj sahil ch’oolejil li yeechi’inb’il choq’ reheb’ li tiikeb’ chi paab’ank? Laa’in nink’oxla naq lix sumenkil li patz’om a’in natawman sa’ jun li matk’ kixk’ul jun profeet k’iila mil chihab’ chaq. Lix k’ab’a’ li profeet, a’an laj Lehi, ut lix matk’ tz’iib’anb’il sa’ li chaq’al ru ut sachb’a-ch’oolejil hu, lix Hu laj Mormon” (“Oxib’ li ixq riitz’ineb’ rib’,” Jolomil ch’utub’aj-ib’ re octubre 2017).

Xkomon chik li k’anjeleb’aal

Eb’ li video chirix lix Hu laj Mormon.

Sik’eb’ li video li neke’xk’ut li esil li neke’tawman sa’ 1 Nefi 1–7 sa’eb’ xch’uutil li video chirix lix Hu laj Mormon sa’ ChurchofJesusChrist.org, malaj sa’ li aplicación Biblioteca del Evangelio.

Eb’ li loq’laj hu wankeb’ xnimal xwankil.

Li Elder Richard G. Scott kixch’olob’ xyaalal lix loq’alileb’ li loq’laj hu:

“Eb’ li loq’laj hu chanchaneb’ li kok’ releb’aal saqen, li neke’saqenob’resink re li qak’a’uxl ut nokohe’xkanab’ chi b’eresiik ut chi musiq’aak chalen chaq taqe’q. Naru te’wanq jo’ jun laaw, re xteeb’al jun numleb’ re toowanq sa’ komonil rik’in li qaYuwa’ sa’ Choxa ut rik’in li Jesukristo, lix raarookil Alal.

“Eb’ li loq’laj hu … naru neke’wan jo’eb’ li chaab’il amiiw, li maab’ar ut maajo’q’e nokohe’xkanab’. Rajlal wankeb’ qik’in naq naqajeb’ ru. Neke’wan choq’ jun xk’ojleb’aal li yaal li naru chi ajsiik ru xb’aan li Santil Musiq’ej. Xtzolb’aleb’, xk’oxlankileb’, xtz’ilb’aleb’ rix, ut xkanab’ankil sa’ qach’ool eb’ li loq’laj hu, chanchan xnujob’resinkil jun kaax rik’ineb’ li amiiw, li chaq’rab’, ut li yaalil na’leb’ li naru naqataw yalaq jo’q’e, yalaq b’ar sa’ li ruchich’och’. …

“Xk’oxlankil rix jun raqal sa’eb’ li loq’laj hu naru nawan choq’ laaw re xteeb’al li k’utb’esinb’il na’leb’ ut lix b’eresihom li Santil Musiq’ej. Eb’ li loq’laj hu neke’ru chixtuqub’ankil jun ch’oolej li ch’a’ajkilanb’il, ut neke’xk’e tuqtuukilal, yo’onink, ut kawil ch’oolej re tooruuq chi numtaak sa’ xb’eeneb’ li ch’a’ajkilal sa’ li qayu’am. Wankeb’ xnimal xwankil chixk’irtesinkil xch’a’ajkilal li aamej naq wan li paab’aal chirix li Kolonel. Naru neke’xseeb’ob’resi li k’iraak sa’ tz’ejwalej” (“El poder de las escrituras,” Liahona, noviembre 2011, 6).

Tento naq wulaj wulaj taa’ak’obr’esimanq lix nawom qach’ool.

Li Awa’b’ej Harold B. Lee kixk’ut, “Lix nawom ch’oolej li wan aawik’in anajwan maak’a’aq wulaj wi maak’a’ nakaab’aanu rik’in” (Enseñanzas de los presidentes de la Iglesia: Harold B. Lee [2000], 43).

Xchaab’ilob’resinkil li qak’utum

Oksiheb’ li seraq’ ut li na’leb’ re xk’utb’aleb’ li jar raqal re li evangelio. Naab’aleb’ li yaalil na’leb’ sa’eb’ li loq’laj hu k’utb’ileb’ rik’in li k’a’ru kik’ulman, malaj rik’ineb’ li seraq’. Naq nakakawresi aawib’ chi k’utuk, k’oxla k’a’ru xak’ul laa’at li taaruuq taawanq choq’ xkab’ xyeeb’al xyaalal li k’a’ru wan sa’eb’ li loq’laj hu, ut eb’ li na’leb’ k’utb’ileb’ aran. (Chi’ilmanq Li k’utuk jo’ li Kolonel, 22.)