“6–12 enero. 1 Nefi 1–7: “Tinxik ut tinb’aanu,” ” Kim, Taaqehin—Choq’ reheb’ li komon ut li junkab’al: Lix Hu laj Mormon 2020 (2020)
“6–12 enero. 1 Nefi 1–7,” Kim, Taaqehin—Choq’ reheb’ li komon ut li junkab’al: 2020
Laj Lehi kib’eek chixk’atq li Kaqi Palaw, xb’aan laj Gary Smith
6–12 enero
1 Nefi 1–7
“Tinxik ut tinb’aanu”
Laj Nefi kixtz’iib’a li “k’a’ru re li Dios” (1 Nefi 6:3). Naq nakatzol li esil kixtz’iib’a laj Nefi, k’e reetal li k’a’ru re li Dios li nakataw, ut jwal wi’chik li musiq’anb’il aawe xb’aan li Musiq’ej.
Xtz‘iib‘ankil li nakak‘oxla
Lix Hu laj Mormon natikla rik’in li resil jun li junkab’al li yookeb’ chixnumsinkileb’ li ch’a’ajkilal. Kik’ulman a’an sa’ 600 chihab’ ma nayo’la li Kristo, a’b’an wankeb’ na’leb’ sa’ li esil a’in li wan rilom rik’ineb’ li junkab’al anajwan. Li junkab’al a’in kiwan sa’ jun ruchich’och’ yoo chi tamk wi’ li maa’usilal, a’ut li Qaawa’ kixyeechi’i reheb’ naq wi te’xtaaqe a’an, a’an tixk’ameb’ xb’e re xkolb’aleb’. Sa’ lix b’eenikeb’ ke’wan li chaab’il hoonal jo’eb’ ajwi’ li hoonal moko chaab’ileb’ ta; ke’xk’uleb’ ninqi osob’tesink ut sachb’a-ch’oolej, a’b’an ke’xnumsi ajwi’ naab’al li wech’ok-ib’. Sa’eb’ li loq’laj hu, anchal maajo’q’e natawman jun esil jo’ a’in chirix jun li junkab’al li yookeb’ chixyalb’aleb’ xq’e chixyu’aminkil li evangelio; jun yuwa’b’ej li yoo chixyalb’al xq’e chixwaklesinkil xpaab’aaleb’ lix junkab’al, eb’ li alalb’ej k’ajolb’ej li neke’xsik’ ru ma te’xpaab’ malaj ink’a’, jun na’b’ej li yoo xk’a’uxl chirix lix kolb’aleb’ rix lix kok’al, ut eb’ li asb’ej iitz’inb’ej li neke’xnumsi li sowenak ut li wech’ok-ib’—ut wan naq neke’xkuyeb’ xmaak chirib’ileb’ rib’. Sa’ chixjunil a’in, wan jun li wankilal naqak’ul rik’in xtaaqenkil li paab’aal kixk’ut li junkab’al a’in—us ta moko tz’aqaleb’ ta re ru.
Li na’leb’ re xtzolb’aleb’ li loq’laj hu aajunes
K’a’jo’ xnimal xloq’aleb’ li loq’laj hu.
Sa’eb’ li ch’ol 1–6 re lix Hu laj Mormon wankeb’ k’iila aatin chirixeb’ li loq’laj hu, li loq’laj tz’iib’anb’il esil, ut li raatin li Qaawa’. Naq nakawil ru 1 Nefi 1–6, k’a’ru nakatzol chirix k’a’ut naq “k’a’jo’ xnimal xloq’al” li raatin li Dios? (1 Nefi 5:21). K’a’ru neke’xk’ut li raqal a’in chawu chirixeb’ li loq’laj hu? K’a’ru nakataw li nakatxmusiq’a chixtz’ilb’aleb’ rix li loq’laj hu chi k’eeb’ilaq wi’chik aach’ool?
Chi’ilmanq ajwi’ “Scriptures Legacy” (video, ChurchofJesusChrist.org).
Lix Hu laj Mormon naxch’olob’ xyaalal li Jesukristo.
Jo’ chanru naq yeeb’il sa’ li perel re xjolomil li aatin naq li rajom li hu a’an xq’unb’esinkileb’ xch’ool chixjunileb’ naq li Jesus a’an li Kristo—chi jo’kan, lix Hu laj Mormon natikla rik’in lix chaq’al ru k’utb’esinb’il matk’ laj Lehi kiril wi’ li Kolonel. K’a’ru nakatzol chirix li Jesukristo rik’in li kiril laj Lehi? K’a’ru junjunqeb’ lix k’anjel li Qaawa’ li “ninq ut sachol ch’oolej” sa’ laa yu’am? (1 Nefi 1:14).
Naq ninsik’ ut ninkanab’ wib’ chiru li Qaawa’, a’an naru tixq’unob’resi inch’ool.
Us ta juntaq’eet li junkab’al ke’k’i wi’ laj Laman, laj Lemuel, ut laj Nefi ut juntaq’eet li ke’xnumsi, jwal nim xjalanil chan ru ke’sumen chiru li choxahil b’eresihom kixk’ul lix yuwa’eb’ sa’ li ch’ol a’in. Naq nakawil ru 1 Nefi 2, sik’ ma naru taak’e reetal k’a’ut naq kiq’unob’resiik lix ch’ool laj Nefi us ta ink’a’ ke’q’unob’resiik xch’ooleb’ li ras? Naru ajwi’ tatk’oxlaq chirix chan ru nakatsumen chiru xb’eresihom li Qaawa’, ma rik’in li Santil Musiq’ej malaj rik’in xyaab’ xkux lix profeet. Jo’q’e aaweek’ahom li Qaawa’ chixq’unob’resinkil aach’ool re naq chi anchalaq wi’chik aach’ool taak’ul lix b’eresihom ut lix na’leb’?
Li Dios tixkawresi jun b’e re taaruuq tinb’aanu li rajom a’an.
Naq li Qaawa’ kixtaqla laj Lehi ut lix junkab’al chixk’ulb’aleb’ li perel ch’iich’ bronce rik’in laj Laban, ink’a’ kixch’olob’ chi tz’aqal chan raj ru te’xtz’aqob’resi ru li taqlahom a’an. Kok’ aj xsa’ nak’ulman a’in rik’in jalaneb’ chik li taqlahom malaj k’utb’esinb’il na’leb’ naqak’ul rik’in li Dios, ut rik’in a’an wan naq maare taqeek’a naq a’an naxpatz’ li k’a’ru “ch’a’aj ” (1 Nefi 3:5). K’a’ru namusiq’ank aawe sa’ lix sumehom laj Nefi chiru lix taqlahom li Qaawa’, li natawman sa’ 1 Nefi 3:7, 15–16? Ma wan k’a’ruhaq li musiq’anb’ilat wi’ naq “tatxik ut taab’aanu”?
Naq nakatzol 1 Nefi 1–7, sik’ chan ru naq li Dios kixkawresi li b’e choq’ re laj Lehi ut lix junkab’al. Chan ru xb’aanuhom a’in choq’ aawe?
Chi’ilmanq ajwi’ Proverbios 3:5–6; 1 Nefi 17:3; “Paab’ank, Xpaab’ankil,” Li K’utul Raqal reheb’ li Loq’laj Hu; eb’ li video re lix Hu laj Mormon sa’ ChurchofJesusChrist.org malaj li aplicación Biblioteca del Evangelio.
Naq neke’jultik we lix k’anjel li Dios, naru taawanq tz’aqal inpaab’aal re ab’ink chiruheb’ lix taqlahom.
Naq laj Laman ut laj Lemuel ke’raj wech’ink-ix, chi kok’ aj xsa’ ke’wan laj Nefi ut laj Lehi aran re xwaklesinkileb’ xch’ool ut xq’usb’aleb’. Naq nakawaj wech’ink-ix, rilb’aleb’ ru li raatin laj Nefi ut laj Lehi naru tixk’e aawe xchaab’ilal li na’leb’. K’a’ru ke’xb’aanu laj Nefi ut laj Lehi re xyalb’al chixtenq’ankileb’ li komon sa’ lix junkab’aleb’ chixnimob’resinkil lix paab’aaleb’ chirix li Dios? (chi’ilmanq 1 Nefi 4:1–3; 5:1–8; 7:6–21). K’a’ru nakatzol rik’in lix b’aanuhomeb a’an li naru tatxtenq’a naq nakat-aaleek chi wech’ink-ix malaj chi po’resink ch’oolej?
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.
1 Nefi 1–7
Naq yookex chirilb’al ru 1 Nefi 1–7, naru taapatz’ reheb’ li komon sa’ laa junkab’al naq texk’e reetal chan ru ke’wotzok li komon sa’ lix junkab’al laj Lehi ut li xSariah. K’a’ru naru naqatzol rik’in lix wanjikeb’ li naru tixtenq’a li qajunkab’al?
Laj Nefi ut lix junkab’al ke’roxloq’i li raatineb’ li profeet.
1 Nefi 2:20
Li na’leb’ sa’ 1 Nefi 2:20 k’iilasutinb’il rajlal sa’ lix Hu laj Mormon. Chan ru naru laa junkab’al chixyu’aminkil li na’leb’ a’an naq neketzol lix Hu laj Mormon sa’ komonil chiru li chihab’ a’in? Maare naru teeyiib’ jun num ruhil hu tz’iib’anb’il wi’ lix yeechi’ihom li Qaawa’ sa’ li raqal a’in ut teek’e b’ar taa’ilmanq sa’ lee rochoch. A’an naru texxtenq’a re taajultiko’q eere chi aatinak chi jo’q’ehaq chirix chan ru naq eerilom li Qaawa’ chirusilankil lee junkab’al naq yookex chixpaab’ankileb’ lix chaq’rab’. K’oxla xtz’iib’ankileb’ li numsihom a’in sa’ li nim ruhil hu.
1 Nefi 2:11–13; 3:5–7
Maare us choq’ re laa junkab’al xk’eeb’al reetal lix jalanil lix sumehom laj Laman ut laj Laman chiruheb’ lix taqlahom li Dios rik’in lix sumehom laj Nefi. K’a’ru naru naqatzol sa’ 1 Nefi 2:11–13; 3:5–7 chirix li wech’ink-ix? K’a’ruheb’ li osob’tesink li neke’chal naq naqak’anjela li qapaab’aal?
1 Nefi 3:19–20; 5:10–22; 6
Eb’ li raqal a’in maare te’ruuq chixmusiq’ankil laa junkab’al chixk’uub’ankil jun tz’iib’anb’il esil chirix li k’a’ru nim xwankil nak’ulman sa’ lee yu’am. Maare naru taatikib’ jun tz’iib’anb’il esil re laa junkab’al, jo’ chanchan li esil kixk’uula laj Nefi ut laj Lehi chirix lix numsihomeb’ lix junkab’al. K’a’ru taatz’iib’a raj sa’ li resil laa junkab’al?
1 Nefi 7:19–21
K’a’ru naxtoch’ qach’ool chirix lix b’aanuhom laj Nefi sa’eb’ li raqal a’an? Chan ru na’osob’tesiik li qajunkab’al naq “tikto” nokokuyuk maak chiqib’il qib’?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Xchaab’ilob’resinkil li qak’utum
Tzoleb’ li loq’laj hu chi kok’ aj xsa’. Jun xlaawil li chaab’il k’utuk sa’ li ochoch, a’an xk’eeb’al chi uxmank li tzolok chi kok’ aj xsa’ sa’ laa junkab’al. Li Awa’b’ej Thomas S. Monson kixk’ut, “K’a’jo’ wi’chik xchaab’ilal xtzolb’aleb’ ut xyu’aminkileb’ li loq’laj hu sa’ li qayu’am wulaj wulaj chiru li kawil tzolok nak’ulman yal jo’q’ehaq” (“Sé lo mejor que puedas ser,” Liahona, mayo 2009, 68).
Kin’ab’in chiru lix yaab’ xkux li Musiq’ej xb’aan laj Walter Rane