lix k’utb’esinb’il matk’ laj Lehi chirix li che’ re li yu’am

Lix matk’ laj Lehi, xb’aan laj Steven Lloyd Neal

13–19 enero

1 Nefi 8–10

“Kim ut yal li ru li che’ ”

Naq nakawil ru 1 Nefi 8–10, k’oxlaheb’ li na’leb’ sa’ lix k’utb’esinb’il matk’ laj Lehi li wankeb’ rilom aawik’in. Tz’iib’aheb’ li musiq’anb’il na’leb’ nakak’ul sa’eb’ laa loq’laj hu, sa’ junaq ch’ina hu, malaj sa’ li hu a’in.

Xtz’iib’ankil li nakak’oxla

Lix matk’ laj Lehi—rik’in li b’arb’ookil ch’iich’, li aak’ab’il choql, li kab’l paapo xsa’, ut li che’ rik’in li ru “q’axal ki’ ”—a’an jun choxahil b’oqom re xk’ulb’aleb’ li osob’tesink re lix rahom li Kristo ut lix mayej aj tojol-ix. A’b’anan, choq’ re laj Lehi, li k’utb’esinb’il matk’ a’an wan ajwi’ rilom rik’in lix junkab’al a’an: “Rik’in li k’a’ru xwil, wan rajb’al naq taasaho’q inch’ool rik’in li Qaawa’ xb’aan laj Nefi ut jo’kan ajwi’ xb’aan laj Sam. … A’b’an k’ehomaq reetal at Laman ut at Lemuel, ninxuwak chi numtajenaq eeb’aan laa’ex” (1 Nefi 8:3–4). Naq laj Lehi kixchoy xch’olob’ankil lix k’utb’esinb’il matk’, a’an kirelaji ru laj Laman jo’ ajwi’ laj Lemuel naq “te’rab’i li raatin, re naq maare li Qaawa’ taaruxtaanaheb’ ru” (1 Nefi 8:37). Us ta maare k’iila sut ak xatz’il rix lix k’utb’esinb’il matk’ laj Lehi, sa’ li sut a’in k’oxla jo’ chanru naq kixb’aanu laj Lehi—k’oxla anihaq li nakara. Naq taab’anu chi jo’kan, k’a’jo’ wi’chik naq taataw ru li kole’k natawman sa’ li b’arb’ookil ch’iich’, lix rahilal li kab’l paapo xsa’, ut lix ki’il li ru li che’. Ut k’a’jo’ wi’chik naq taataw ru lix “anchalil xch’ool li chaab’il yuwa’b’ej” li kik’uluk re li chaq’al ru k’utb’esinb’il matk’ a’an.

reetalil li tzolok aajunes

Li na’leb’ re xtzolb’aleb’ li loq’laj hu aajunes

1 Nefi 8

Li raatin li Dios naxk’am inb’e rik’in li Kolonel ut nikinixtenq’a chireek’ankil lix rahom.

Lix k’utb’esinb’il matk’ laj Lehi naxk’e jun aab’oqb’al chixtz’ilb’al rix b’ar wankat—ut b’ar yookat chi xik—sa’ laa b’eenik re xnawb’al ru li Kolonel ut reek’ankil lix rahom. Li Awa’b’ej Boyd K. Packer kixk’ut: “Taak’oxla tana’ naq maak’a’ xwankil lix k’utb’esinb’il matk’ laj Lehi choq’ aawe, a’b’an wan chi yaal. Laa’at wankat chi sa’; chiqajunil wanko chi sa’ (chi’ilmanq 1 Nefi 19:23). Sa’ lix k’utb’esinb’il matk’ laj Lehi wan chixjunil … li naraj ru jun aj Santil Paab’anel sa’ Roso’jikeb’ li Kutan re xtawb’al ru li yale’k-ix re li yu’am” (“El sueño de Lehi nos incluye a nosotros,” Liahona, agosto 2010, 28).

Jun na’leb’ re xtzolb’al 1 Nefi 8, a’an naq taanujob’resi jun kaaxukuut jo’ li k’utb’il arin. Re xtawb’al ru k’a’ru naraj naxye li junjunq eetalil, naru taawil ru lix k’utb’esinb’il matk’ laj Nefi li kixk’ul naq kitijok re xtawb’al ru lix k’utb’esinb’il matk’ lix yuwa’—chi’ilmanq 1 Nefi 11:4–25, 32–36; 12:16–18; ut 15:21–33, 36. Naq nakawil ru lix k’utb’esinb’il matk’ laj Lehi, k’oxla li k’a’ru naraj li Qaawa’ naq taatzol.

Eb’ li eetalil sa’ lix k’utb’esinb’il matk’ laj Lehi	Lix ch’olob’ankil	Eb’ li patz’om re xk’oxlankil
Eb’ li eetalil sa’ lix k’utb’esinb’il matk’ laj Lehi Li che’ ut li ru (1 Nefi 8:10–12)	Lix ch’olob’ankil	Eb’ li patz’om re xk’oxlankil K’a’ru yookin chixb’aanunkil re xb’oqb’aleb’ li was wiitz’in chixyalb’al lix rahom li Dios?
Eb’ li eetalil sa’ lix k’utb’esinb’il matk’ laj Lehi Li nima’ (1 Nefi 8:13)	Lix ch’olob’ankil	Eb’ li patz’om re xk’oxlankil
Eb’ li eetalil sa’ lix k’utb’esinb’il matk’ laj Lehi Li b’arb’ookil ch’iich’ (1 Nefi 8:19–20, 30)	Lix ch’olob’ankil	Eb’ li patz’om re xk’oxlankil
Eb’ li eetalil sa’ lix k’utb’esinb’il matk’ laj Lehi Li aak’ab’il ru choql (1 Nefi 8:23)	Lix ch’olob’ankil	Eb’ li patz’om re xk’oxlankil
Eb’ li eetalil sa’ lix k’utb’esinb’il matk’ laj Lehi Li kab’l nim ut paapo xsa’ (1 Nefi 8:26–27, 33)	Lix ch’olob’ankil	Eb’ li patz’om re xk’oxlankil
Eb’ li eetalil sa’ lix k’utb’esinb’il matk’ laj Lehi	Lix ch’olob’ankil	Eb’ li patz’om re xk’oxlankil

Chi’ilmanq ajwi’ David A. Bednar, “ El sueño de Lehi: Asidos constantemente a la barra ,” Liahona, octubre 2011, 32–37.

laj Lehi yoo chixtzekankil li ru li che’ re li yu’am

Laj Lehi yoo chixtzekankil li ru li che’ re li yu’am. Li che’ re li yu’am, xb’aan laj Marcus Alan Vincent

1 Nefi 9

K’a’ut naq laj Nefi kixyiib’ wiib’ paay chi perel ch’iich’?

Kik’utb’esiman chi saqen ru lix “chaab’il ajom” li Qaawa’ sa’ xtaqlankil laj Nefi chixyiib’ankil wiib’ paay chi esil k’iila cient chihab’ chirix a’an. Chirix naq laj Jose Smith kixjaltesi ru li xb’een 116 perel re lix Hu laj Mormon, a’an kixk’eheb’ li perel re laj Martin Harris, ut ke’sach’ chiru (chi’ilmanq Tzol’leb’ ut Sumwank 10:1–23). A’ut li xkab’ perel ch’iich’ kixyiib’ laj Nefi, juntaq’eet li hoonal ki’aatinak wi’, ut li Qaawa’ kixtaqla laj Jose Smith chixjaltesinkileb’ ru li perel ch’iich’ a’in ruuchil xjaltesinkil wi’chik ru li k’a’ru xsachman (chi’ilmanq Tzol’leb’ ut Sumwank 10:38–45).

Re xtawb’al xkomon chik li na’leb’ chirix li perel ch’iich’ nayeeman resil sa’ 1 Nefi 9, chi’ilmanq “Jun Ch’ina Ch’olob’anb’il Aatin chirix lix Hu laj Mormon“; 1 Nefi 19:1–5; 2 Nefi 5:29–32; ut Li Raatin laj Mormon 1:3–9.

1 Nefi 10:2–16

Eb’ li najteril profeet ke’wan xna’leb’ chirix lix k’anjel li Jesukristo ut ke’xch’olob’ xyaalal a’an.

Li esil chirix lix k’utb’esinb’il matk’ laj Lehi kixtoch’ chi yaal xch’ool lix junkab’al, a’b’an toj ke’wan li junelikil yaalil na’leb’ li kiraj xk’utb’al chiruheb’ chirix lix k’anjel li Kolonel. Naq nakawil ru 1 Nefi 10:2–16, k’oxla k’a’ut naq li Qaawa’ kiraj naq lix junkab’al laj Lehi—jo’kan ajwi’ chiqajunilo—te’xnaweb’ li yaalil na’leb’ a’an. K’oxla li k’a’ru taaruuq taaye reheb’ li ani raaro aab’aan re xb’oqb’aleb’ chixq’ajsinkileb’ rib’ rik’in li Kolonel. Chirix xtzolb’al lix k’utb’esinb’il matk’ ut lix k’utum laj Lehi, k’a’ru musiq’anb’ilat chixtzolb’al, jo’ laj Nefi, “rik’in xwankil li Santil Musiq’ej”? (1 Nefi 10:17).

1 Nefi 10:17–19

Li Dios tixk’utb’esi li yaal chiwu wi tinsik’ chi yalb’il inq’e.

K’a’ru nakab’aanu naq nakataw jun na’leb’ re li evangelio li ink’a’ nakataw ru? K’e reetal chan ru naq jalan wi’ li kixb’aanu laj Nefi chirix lix k’utb’esinb’il matk’ laj Lehi (chi’ilmanq 1 Nefi 10:17–19; 11:1) rik’in li ke’xb’aanu laj Laman ut laj Lemuel (chi’ilmanq 1 Nefi 15:1–10). K’a’ut naq ke’xb’aanu chi jo’kan, ut k’a’ru kik’ulman xb’aan lix b’aanuhomeb’?

K’oxla xtz’iib’ankil resil jun hoonal naq xawaj xnawb’al ma yaal jun li k’utum re li evangelio. Chan ru najuntaq’eetiman li k’a’ru xab’aanu rik’in li kixb’aanu laj Nefi?

Chi’ilmanq ajwi’ 1 Nefi 2:11–19; Tzol’leb’ ut Sumwank 8:1–3.

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Naq nakawileb’ xsa’ li loq’laj hu rik’in laa junkab’al, li Musiq’ej naru nakatxtenq’a chixnawb’al k’a’ru li na’leb’ taak’e xwankil ut tex’aatinaq wi’ re taak’anjelaq choq’ re laa junkab’al. Aʼin junjunq li naʼlebʼ naru taabʼaanu.

1 Nefi 8

Eb’ li komon sa’ laa junkab’al maare taawulaq chiruheb’ xk’utb’esinkil lix k’utb’esinb’il matk’ laj Lehi malaj xyiib’ankileb’ li jalam-uuch ut roksinkileb’ lix jalam-uuch re xseraq’inkil. Malaj maare naru taak’ut lix jalam-uuch lix k’utb’esinb’il matk’ laj Lehi li wan sa’ li tzolok a’in ut taakanab’eb’ li komon re laa junkab’al chixyeeb’al k’a’ru nak’utman sa’ li jalam-uuch ut chixsik’b’aleb’ li raqal sa’eb’ li loq’laj hu li neke’xch’olob’ xyaalal k’a’ru xyaalalil li junjunq. Jwal chaab’il li b’ich “Li b’arb’ookil ch’iich’ “ (Eb’ li B’ich, 176) choq’ re li ch’ol a’in. Naru ajwi’ teeril jun li video chirix lix k’utb’esinb’il matk’ laj Lehi (che’ilmanq li video chirix lix Hu laj Mormon sa’ ChurchofJesusChrist.org malaj li aplicación Biblioteca del Evangelio).

1 Nefi 8:10–16

Ani naru taqab’oq chi nach’ok rik’in li Jesukristo ut chireek’ankil xki’il lix rahom? K’a’ru naru taqab’aanu re “xb’oqb’aleb’ chi quq’ ”?

1 Nefi 9:5–6

Jo’q’e xqapaab’ jun li taqlahom us ta maji’ xqataw ru chi tz’aqal k’a’ut naq tento taqapaab’? Chan ru naq xoo’osob’tesiik?

1 Nefi 10:20–22

Chan ru naq juntaq’eet li wank chi tz’aj sa’ tib’elej rik’in li wank chi tz’aj sa’ musiq’ej? K’a’ru naru taqab’aanu re naq toowanq chi saq qu sa’ musiq’ej?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Xchaab’ilob’resinkil li qak’utum

Chan ru naq wankeb’ rilom li loq’laj hu sa’ li qayu’am? Chirix rilb’al ru jun raqal reheb’ li loq’laj hu, kanab’eb’ li komon sa’ laa junkab’al chixwotzb’al chan ru naq wan rilom li raqal rik’ineb’. Qayehaq, naq eb’ li komon sa’ laa junkab’al te’ril ru 1 Nefi 8:33, maare te’aatinaq chirix chan ru naq ink’a’ too’ab’inq chiruheb’ li ani nokohe’xk’ut chi ru’uj ruq’ re qeetz’unkil.

Lix k’utb’esinb’il matk’ laj Lehi

Li che’ re li yu’am, xb’aan xAvon Oakeson