lix k’utb’esinb’il matk’ laj Lehi chirix li che’ re li yu’am

Lix matk’ laj Lehi, xb’aan laj Steven Lloyd Neal

13–19 enero

1 Nefi 8–10

“Kim ut yal li ru li che’ ”

Naq taawil ajwi’ aawib’ sa’ lix k’utb’esinb’il matk’ laj Lehi, yal ajwi’ rilb’aleb’ li kok’al nakatzoleb’. Chan ru naru na’oksiman li k’utb’esinb’il matk’ a’an sa’ xyu’ameb’?

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Aatinaheb’ junjunqeb’ li kok’al chi rub’elaj ut kanab’eb’ chixk’oxlankil numsihom malaj raqaleb’ sa’eb li loq’laj hu li xtenq’ank reheb’ chireek’ankil lix rahom li Dios li naru neke’xwotz.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

1 Nefi 8:2, 5–34

Li raatin li Dios nikinixk’am rik’in li Dios ut nikinixtenq’a chireek’ankil lix rahom.

Sa’ lix k’utb’esinb’il matk’ laj Lehi, nokob’oqe’ chi tz’aqonk sa’ lix rahom li Dios, eetalinb’il rik’in li che’ ut li ru li che’. Chan ru naru nakatenq’aheb’ li kok’al chixk’ulub’ankil li b’oqom a’an?

Kok’ k’anjel naru chi b’aanumank

• Kanab’eb’ li kok’al chatenq’ankil chixseraq’inkil li esil chirix lix k’utb’esinb’il matk’ laj Lehi, li natawman sa’ 1 Nefi 8:10–34. Re xtenq’ankileb’ chixk’oxlankil chan ru li esil a’an, naru nakak’ut chiruheb’ jun xjalam-uuch lix k’utb’esinb’il matk’ laj Lehi (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al) malaj eb’ li jalam-uuch sa’ li “Ch’ol 6: Lix matk’ laj Lehi” (Eb’ li Esilal sa’ lix Hu laj Mormon, 18─20, malaj li video sa’ ChurchofJesusChrist.org). K’e reetal chi us naq eb’ li kok’al te’xnaw naq li b’arb’ookil ch’iich’ nareetali li raatin li Dios, li naqileb’ ru sa’eb’ li loq’laj hu ut neke’qab’i sa’ xtz’uumal reheb’ li yo’yookil profeet. Tenq’aheb’ chixtawb’al ru naq li che’ nareetali lix rahom li Dios choq’ qe.

• K’am jun li k’aam re reetalinkil li b’arb’ookil ch’iich’ sa’ lix k’utb’esinb’il matk’ laj Lehi. Kanab’eb’ li kok’al chixchapb’al li k’aam ut laa’at taak’ameb’ xb’e sa’ li tzoleb’aal toj chiru xjalam-uuch jun li che’. Tenq’aheb’ chixtawb’al ru naq li raatin li Dios nokoxnach’ob’resi chi us rik’in a’an, jo’ naq li k’aam li nareetali li b’arb’ookil ch’iich’ xooxk’am toj chiru xjalam-uuch li che’. Re xk’utb’esinkil naq li che’ nareetali lix rahom li Dios, laa’at naru nakak’e chi kutankil jalam-uuch reheb’ li k’a’aq re ru xk’ehom qe li Dios re xk’utb’esinkil lix rahom choq’ qe, jo’ li Kolonel, li qajunkab’al ut li xchaq’al ru ruchich’och’.

• K’am junaq li ru li che’ latzb’ilaq jun aamej chiru. K’e reheb’ li kok’al jun setel li ru li che’ re naq te’xyal ut patz’ reheb’ b’ar wan ru ki’il q’een jwal nawulak chiruheb’. Ch’olob’ naq li ru li che’ sa’ lix k’utb’esinb’il matk’ laj Lehi a’an tz’aqal li jwal ki’ jo’ maajun wa yalb’il, ut naq kixnujob’resi li raam rik’in sahil ch’oolejil. Jo’ naq li ru li che’ naxk’e xsahil qach’ool, taqeek’a xsahil qach’ool naq taqataaqe li Jesus ut toowanq wi’chik rik’in li qaChoxahil Yuwa’.

• Il ru 1 Nefi 8:12 ut kanab’eb’ li kok’al chi ab’ink chi us re xk’eeb’al reetal li k’a’ru kiraj xb’aanunkil laj Lehi chirix naq kixyal li ru li che’. Kanab’eb’ li kok’al chixk’eeb’aleb’ xhoonal re xk’oxlankil naq a’aneb’ laj Lehi ut te’xb’oqeb’ lix komon chi chalk chixyalb’al li ru li che’. K’a’ru naru naqab’aanu re xb’oqb’aleb’ li qas qiitz’in chi chalk ut chixyalb’al xsahil li rosob’tesihom li evangelio qik’in laa’o?

1 Nefi 10:17, 19

Li Dios tixk’utb’esi chiwu li yaal rik’in lix wankil li Santil Musiq’ej.

Chirix naq kirab’i chirix lix k’utb’esinb’il matk’ lix yuwa’, laj Nefi kirataw li k’a’raj ru taqataw ajwi’ laa’o: li atawom re xnawb’al li yaal qajunes qib’.

Kok’ k’anjel naru chi b’aanumank

• Il ru 1 Nefi 10:19 ut kanab’eb’ li kok’al chixtaqsinkileb’ li ruq’ naq te’rab’i li aatin “taateeliiq” ut “Santil Musiq’ej.” Tenq’aheb’ li kok’al chixtawb’al ru li raqal a’an sa’eb’ li loq’laj hu, li naxk’ut naq li Santil Musiq’ej tooxtenq’a chixnawb’al xsumenkileb’ li qapatz’om. Re xtenq’ankileb’ li kok’al chirilb’al li k’a’ru naraj naxye naq li yaal “taateeliiq,” k’am jun li t’ikr ut hel ru chiru li meex re naq tixram ru jun xjalam-uuch li Kolonel, ut kanab’eb’ li kok’al chixteeb’al ru li jalam-uuch.

• B’icha rik’ineb’ li kok’al jun li b’ich chirix xsik’b’al li yaal, jo’ “Tintzol, tink’oxla, tintijoq” (B’ichleb’aal choq’ reheb’ li Kok’al, 66). K’uteb’ jalam-uuch li te’reetali li aatin wankeb’ sa’ li b’ich re xtenq’ankileb’ li kok’al chixjultikankil chan ru naq li Santil Musiq’ej nokoxtzol.

• K’oxla xwotzb’al junaq aanumsihom b’ar wi’ naq li Santil Musiq’ej xatxtenq’a chixnawb’al naq yaal k’a’ruhaq. Ye reheb’ li kok’al chan ru naq xatraatina li Santil Musiq’ej.

reetalil li k’utuk

Xk’utb’al li tzol’leb’: Kok’al ak ninqeb’

1 Nefi 8:2, 5–34

Li raatin li Dios nikinixk’am rik’in li Dios ut nikinixtenq’a chireek’ankil lix rahom.

Naq eb’ li kok’al sa’ laa tzoleb’aal yooqeb’ chi tzolok chirix lix k’utb’esinb’il matk’ laj Lehi, waklesiheb’ xch’ool chixtzolb’al li raatin li Dios ut chixwotzb’al lix rahom li Dios rik’ineb’ li ras riitz’in.

Kok’ k’anjel naru chi b’aanumank

• Naq eb’ li kok’al yooqeb’ chirilb’aleb’ ru li raqal sik’b’ileb’ ru sa’ 1 Nefi 8, k’e xb’oqb’aleb’ chixtawb’al li k’a’ru ch’olob’anb’ileb’ sa’eb’ li raqal a’an sa’ jun li jalam-uuch re lix k’utb’esinb’il matk’ laj Lehi (jo’ li natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Malaj, kanab’eb’ chixyiib’ankil jun jalam-uuch chiru li pizarron chirix li neke’ril ru. Chirix a’an tenq’aheb’ li kok’al chixtawb’al k’a’ru naraj neke’xye li eetalil sa’ li matk’ (chi’ilmanq 1 Nefi 11:21─22; 12:16─18; 15:23─33, 36).

• Wi naru, k’am jun setel b’arb’ookil ch’iich’ malaj jalan chik li ch’iich’ sa’ li tzoleb’aal ut kanab’eb’ li kok’al chixch’olob’ankil junjunqeb’ li yiib’anb’ileb’ wi’ ut chixyeeb’al k’a’ru naru neke’oksiman wi’. Chan ru naq li raatin li Dios chanchan chik jun li b’arb’ookil ch’iich’? B’ar naqataw li raatin li Dios? K’a’ut naq li b’arb’ookil ch’iich’ jwal aajel ru sa’ lix k’utb’esinb’il matk’ laj Lehi?

  laj Lehi naxk’ux li ru li che’ re li yu’am

  Laj Lehi naxk’ux li ru li che’ re li yu’am. Li che’ re li yu’am, xb’aan laj Marcus Alan Vincent

• Kanab’eb’ li kok’al chixtz’iib’ankil chiru jun perel li hu jun xnumsihomeb’ b’ar wi’ naq li raatin li Dios xtenq’aheb’ chixnawb’al li k’a’ru tento te’xb’aanu malaj chireek’ankil naq nach’ wankeb’ chi us rik’in li qaChoxahil Yuwa’. Naq te’xwotz li xe’xtz’iib’a, kanab’eb’ chixb’otob’ankil lix perel huheb’ jo’ jun li b’arb’ookil ch’iich’. Wi nakawaj, naru ajwi’ nakalatzeb’ sa’ junajil rik’in li cinta re reetalinkil li b’arb’ookil ch’iich’ re lix k’utb’esinb’il matk’ laj Lehi.

• Kanab’ junjunqeb’ li kok’al chirilb’al ru 1 Nefi 8:10─12 ut chixk’eeb’al reetal li k’a’ru kiril laj Lehi. Kanab’eb’ lix komoneb’ chirilb’al ru 1 Nefi 11:20─23 ut chixch’olob’ankil li k’a’ru kiril laj Nefi. K’a’ut naq li anjel kixk’ut chiru laj Nefi li k’uula’al Jesus re xk’utb’al chiru chirix lix rahom li Dios? Re xtenq’ankileb’ chixsumenkil li patz’om a’an, ilomaq ru sa’ komonil Jwan 3:16 malaj b’ichahomaq jun li b’ich chirix li Kolonel, jo’ “Kixtaqla li Ralal” (B’ichleb’aal choq’ reheb’ li Kok’al, 20─21). Ye reheb’ li kok’al chan ru nakaweek’a lix rahom li qaChoxahil Yuwa’ ut lix rahom li Alalb’ej li Jesukristo sa’ laa yu’am.

• Tz’iib’a chiru li pizarron: K’a’ru naqatzol rik’in lix b’aanuhom laj Lehi? Kanab’eb’ li kok’al chixk’oxlankil lix k’utb’esinb’il matk’ laj Lehi ut chixtz’iib’ankil k’iila sumenk a’ yaal chan ru neke’ru. Kanab’eb’ chixwotzb’al lix sumehomeb’ sa’ li tzoleb’aal. Chirix a’an, patz’ reheb’ li kok’al naq te’xk’oxla anihaq li naru neke’xwotz re li sahil ch’oolejil naxk’e li evangelio.

1 Nefi 10:17–19; 11:1

Li Dios tixk’utb’esi chiwu li yaal rik’in lix wankil li Santil Musiq’ej.

Wi naqapatz’ re li qaChoxahil Yuwa’ rik’in paab’aal, li yaal “taateeliiq chiqu rik’in lix wankil li Santil Musiq’ej” (1 Nefi 10:19). Chan ru naru nakatenq’aheb’ li kok’al nakatzoleb’ chixtawb’al ru li yaal a’an?

Kok’ k’anjel naru chi b’aanumank

• Kanab’eb’ li kok’al chi aatinak chirix chan ru naru neke’xtaw xsumenkil jun li patz’om. Waklesiheb’ xch’ool li kok’al chirilb’al ru 1 Nefi 10:17─19 ut 11:1. K’a’ raj ru tixye laj Nefi wi junaq tixpatz’ raj re chan ru xtawb’al xsumenkil jun li patz’om chirix li evangelio? Chan ru naq li Dios nokoxtzol rik’in li Santil Musiq’ej? (chi’ilmanq Tzol’leb’ ut Sumwank 8:2).

• Kanab’eb’ li kok’al chi aatinak chirix junaq hoonal b’ar wi’ naq li Santil Musiq’ej xtenq’aheb’ chixnawb’al naq tz’aqal yaal k’a’ruhaq. K’e xb’oqb’aleb’ chixk’oxlankil naq wan jun ramiiweb’ li naxk’oxla naq ink’a’ naru naxk’ul xsumenkil xpatz’om rik’in li Santil Musiq’ej. K’a’ru naru nekewotz sa’ 1 Nefi 10:17─19 ut 11:1 re xtenq’ankil li amiiw a’an?

reetalil li tzolok

Xb’oqb’aleb’ chi tzolok sa’ kab’l

Waklesiheb’ xch’ool li kok’al chiroksinkil li perel re kok’ k’anjel re li xamaan a’in re xwotzb’al rik’ineb’ lix junkab’al li k’a’ru xe’xtzol sa’ lix k’utb’esinb’il matk’ laj Lehi chirix li che’ re li yu’am.

Xchaab’ilob’resinkil li qak’utum

Eb’ li kok’al neke’tzolok chi jalan jalanq ru. Eb’ li kok’al neke’xyal xsahil li tzolok rik’in jalan jalanq numsihom. Oksiheb’ kok’ k’anjel li te’tenq’anq reheb’ chireek’asinkileb’ rib’, chiroksinkileb’ chixjunil lix seeb’aleb’, ut chixyalb’al ak’il k’a’aq re ru. (Chi’ilmanq Li k’utuk jo’ li Kolonel, 25─26).

perel re kok’ k’anjel: li raatin li Dios nikinixtenq’a chireek’ankil lix rahom a’an