“20–26 enero. 1 Nefi 11–15: “Kawresinb’il rik’in tiikilal, ut rik’in lix wankil li Dios,” ” Kim, Taaqehin—Choq’ re li Tzoleb’aal reheb’ li Kok’al: Lix Hu laj Mormon 2020 (2020)
“20–26 enero. 1 Nefi 11–15,” Kim, Taaqehin—Choq’ re li Tzoleb’aal reheb’ li Kok’al: 2020
Q’axal wi’chik ki’ chiru chixjunil, xb’aan laj Miguel Angel González Romero
20–26 enero
1 Nefi 11–15
“Kawresinb’il rik’in tiikilal, ut rik’in lix wankil li Dios”
Il ru 1 Nefi 11─15 rik’ineb’ li kok’al nakatzoleb’ sa’ laa k’a’uxl, ut tz’iib’a a’ yaal li na’leb’ nachal sa’ laa k’a’uxl.
Xtz’iib’ankil li nakak’oxla
Xkanab’ankileb’ chi wotzok
K’ut jun xjalam-uuch lix k’utb’esinb’il matk’ laj Lehi chirix li che’ re li yu’am ut kanab’eb’ li kok’al chixwotzb’al li k’a’ru najultiko’ reheb’ naq xe’xtzol chirix li k’utb’esinb’il matk’ sa’ li xamaan xnume’. Patz’ reheb’ ma xe’xtzol k’a’ruhaq chik ak’ chirix a’an chalen chaq li hoonal a’an.
Xk’utb’al li tzol’leb’: Kok’al toj ka’ch’ineb’ xyu’am
Li qaChoxahil Yuwa’ kixtaqla chaq li Jesukristo sa’ li ruchich’och’ xb’aan naq nikinixra.
Laj Nefi kiril lix yu’am ut lix k’anjel li Jesukristo sa’ jun li k’utb’esinb’il matk’. K’oxla li k’a’ru naru neke’xtzol li kok’al sa’ laa tzoleb’aal chirix li Kolonel sa’ 1 Nefi 11.
Kok’ k’anjel naru chi b’aanumank
-
K’e reheb’ li junjunq chi kok’al jun jalam-uuch li tixk’utb’esi li kik’ulman sa’ xyu’am li Kolonel jo’ nayeeman sa’ 1 Nefi 11:20, 24, 27, 31 ut 33 (chi’ilmanq Libro de obras de arte del Evangelio, ajl 30, 35, 39, 42, 57). Naq yooqat chirilb’al ruheb’ li raqal a’an, kanab’eb’ li kok’al chixtaqsinkil li jalam-uuch chi kutankil naq te’rab’i li raqal wan rilom rik’in a’an.
-
Seraq’i reheb’ li kok’al junjunq reheb’ li k’a’aq re ru kixtzol laj Nefi naq li Jesukristo tixb’aanu sa’ li ruchich’och’ chiru lix yu’am (chi’ilmanq 1 Nefi 11:16─33), ut k’uteb’ jalam-uuch chiruheb’ re junjunqeb’ li k’a’ru ke’k’ulman (chi’ilmanq, jo’ eetalil, Libro de obras de arte del Evangelio, ajl 41, 46, 47, 49, 56, 57, 58, 59). Wotz rik’ineb’ a’an li k’a’ru xb’aanuhom li Kolonel choq’ aawe. K’uteb’ jalam-uuch re xtenq’ankileb’ li kok’al chixk’oxlankil chan ru naru naqawotz lix rahom li Dios (chi’ilmanq Libro de obras de arte del Evangelio, ajl 109, 110, 115).
Lix Hu laj Mormon naxk’uteb’ xchaq’al ruhil yaal.
K’a’ut naq nakatb’antioxin chirix lix Hu laj Mormon? K’e reetal chan raj ru naru nakawotz lix nawom aach’ool chirix lix Hu laj Mormon rik’ineb’ li kok’al.
Kok’ k’anjel naru chi b’aanumank
-
Yiib’ jun li jalam-uuch chiru li pizarron ut kanab’eb’ li kok’al chixjalb’al malaj chixsachb’al xcha’alil li jalam-uuch re naq jalan taak’utunq. Tenq’aheb’ chixtawb’al ru naq, jo’ li jalam-uuch a’an, junjunqeb’ li k’a’aq re ru sa’ li Santil Hu ke’jalman ut ke’isiman rik’in xnumik li hoonal. Il ru yal ka’ajwi’ xcha’alil 1 Nefi 13:40 li neke’xk’ut chan ru naq lix Hu laj Mormon (li naxk’ab’a’in laj Nefi “eb’ li tz’iib’anb’il esil li kawil sa’ roso’jik”) nokoxtenq’a chixtawb’aleb’ ru “li saqen ru ut loq’il na’leb’ ” ke’sachman chaq sa’ li Santil Hu.
-
Muqeb’ sa’ li tzoleb’aal jalam-uuch neke’reetali li yaalil na’leb’ re li evangelio li neke’ch’olob’aak ru sa’ lix Hu laj Mormon, jo’ li kub’iha’, li loq’laj wa’ak, ut li wakliik chi yo’yo. Kanab’eb’ li kok’al chixtawb’aleb’ li jalam-uuch. Ch’olob’ naq lix Hu laj Mormon kixk’ojob’eb’ wi’chik li yaalil na’leb’ re li evangelio li ke’sach.
Li raatin li Dios naxk’e inwankilal.
Chan ru naru nakawoksi lix jalam-uuch li b’arb’ookil ch’iich’ re xk’utb’al chiruheb’ li kok’al chirix li kawilal, li kawil ch’oolej, ut li wankilal naxk’e li raatin li Dios?
Kok’ k’anjel naru chi b’aanumank
-
K’e chi kutankil jun xjalam-uuch lix matk’ laj Lehi, jo’ li natawman sa’ li tusleb’ aatin re li xamaan xnume’ sa’ Kim, Taaqehin—Choq’ reheb’ li komon ut li junkab’al. Kanab’eb’ li kok’al chixtawb’al li b’arb’ookil ch’iich’ sa’ li jalam-uuch ut tenq’aheb’ chixtawb’al ru chan ru naq li raatin li Dios naru naxkol qix (chi’ilmanq 1 Nefi 15:23─24). Naq yooqat chirilb’al ru li raqal 24, k’e reheb’ li kok’al junaq k’a’aq re ru chanchan li b’arb’ookil ch’iich’ li te’xchap wi’ rib’, jo’ jun li b’olb’ookil ch’iich’ malaj jun li che’. B’ar naqataw li raatin li Dios? K’a’ru naru naqab’aanu re naq li raatin li Dios taawanq jo’ xcha’alil li qayu’am rajlal kutan?
-
Tenq’aheb’ li kok’al chixb’onb’al ut chixtz’aqob’resinkil ru li perel re kok’ k’anjel re li xamaan a’in. Chan ru naq “naqachap qib’ chi kaw” rik’in li raatin li Dios? (1 Nefi 15:24).
Xk’utb’al li tzol’leb’: Kok’al ak ninqeb’
Li qaChoxahil Yuwa’ kixtaqla chaq li Jesukristo sa’ li ruchich’och’ xb’aan naq nikinixra.
Laj Nefi kiril jun li k’utb’esinb’il matk’ kiril wi’ lix k’uub’anb’il na’leb’ li qaChoxahil Yuwa’ choq’ qe, ut li Jesukristo k’a’jo’ x’aajelil ru sa’ li k’utb’esinb’il matk’ a’an.
Kok’ k’anjel naru chi b’aanumank
-
Kanab’eb’ li kok’al chixk’ulinkileb’ li raqal re 1 Nefi 11:16─33 rik’ineb’ jalam-uuch neke’reetali li k’a’ru neke’xch’olob’ li raqal (jo’ li 1 Nefi 11:20, 24, 27, 29, 31, 33; chi’ilmanq Libro de obras de arte del Evangelio, ajl 30, 35, 38, 39, 42, 57). K’a’ru neke’xtzol li kok’al chirix li Kristo sa’eb’ li raqal a’an ut sa’eb’ li jalam-uuch?
-
Patz’ reheb’ li kok’al k’a’ut naq li Jesukristo aajel ru choq’ reheb’ a’an. B’ichahomaq jun li b’ich chirix li Kolonel, jo’ “Kixtaqla li Ralal” (B’ichleb’aal choq’ reheb’ li Kok’al, 20), ut patz’ reheb’ li kok’al k’a’ru naxk’ut li b’ich chirix li Jesus. Kanab’eb’ li kok’al chixk’eeb’aleb’ xhoonal chiru li xamaan chixk’oxlankil li Jesukristo ut chixwotzb’al lix numsihomeb’ sa’ li tzoleb’aal sa’ li xamaan chal re.
Sa’ lix Hu laj Mormon wan lix evangelio li Jesukristo.
Lix Hu laj Mormon naxk’uteb’ xchaq’al ruhil yaal.
K’a’ru neke’xnaw li kok’al chirix li Q’etok Paab’aank? Chan ru naru nakatenq’aheb’ chixtawb’al ru lix aajelil ru lix Hu laj Mormon sa’ lix k’ojlajikeb’ wi’chik li yaalil na’leb’ re li evangelio li ke’sach sa’ li Q’etok Paab’ank?
Kok’ k’anjel naru chi b’aanumank
-
Ilomaq ru 1 Nefi 13:26─29 sa’ komonil ut k’e xb’oqb’aleb’ li kok’al chi ab’ink chi us re xk’eeb’al reetal k’a’ru nak’ulman naq eb’ li kristiaan maak’a’ lix yaalil li evangelio li “saqen ru ut wan xloq’al” rik’ineb’. Chan ru naq li Qaawa’ kixk’ojob’eb’ wi’chik li yaal li ke’sach? (che’ilmanq eb’ li raqal 35─36, 40). Kanab’eb’ li kok’al chixwotzb’al lix nawom xch’ooleb’ chirixeb’ li yaalil na’leb’ xtzolomeb’ sa’ lix Hu laj Mormon, malaj wotz lix nawom aach’ool laa’at.
-
K’ut li video “El Libro de Mormón: un libro proveniente de Dios” (ChurchofJesusChrist.org) re xk’utb’al chan ru naq li Santil Hu ut lix Hu laj Mormon neke’k’anjelak sa’ junajil re xk’utb’al li yaal. K’a’ut naq jwal chaab’il naq wanqeb’ wiib’ aj yehol nawom? Yiib’ jun li tz’uq chiru li pizarron ut k’e jo’ xk’ab’a’ Santil Hu, ut kanab’eb’ li kok’al chixyiib’ankil jun li juch’ a’ yaal b’ar li taanume’q chiru li tz’uq re xk’utb’al naq eb’ lix k’utum li Santil Hu naru neke’tawman ru chi naab’al paay ru naq xjunes nawan. Sachb’esiheb’ li juch’ ut yiib’ jun chik li tz’uq sa’ junpak’al li taak’e choq’ xk’ab’a’ Lix Hu laj Mormon. Kanab’ jun li ch’ina al chixyiib’ankil jun li tiikil juch’ li tixk’ul rib’ rik’ineb’ li wiib’ chi tz’uq re xk’utb’al naq jun ajwi’ xtawb’al ru li evangelio naq li Santil Hu ut lix Hu laj Mormon neke’oksiman sa’ wiib’al.
-
Tenq’aheb’ li kok’al chixkanab’ankil sa’ xk’a’uxleb’ lix waqxaq raqalil li paab’aal.
Li raatin li Dios nikinixtenq’a chixq’axb’al ru li aaleek.
Chan ru naru nakatenq’aheb’ li kok’al nakatzoleb’ chixkawob’resinkil lix nawom xch’ooleb’ chirixeb’ li loq’laj hu? K’oxlan chirix li patz’om a’an naq yooqat chirilb’al ru 1 Nefi 15:23–25, ut oksiheb’ li kok’ k’anjel wankeb’ arin taq’a re xtz’aqob’resinkil ru laa na’leb’ laa’at.
Kok’ k’anjel naru chi b’aanumank
-
Kanab’eb’ li kok’al chixk’osb’al ru li k’utb’esinb’il matk’ chirix li che’ re li yu’am (chi’ilmanq 1 Nefi 8; 11). K’a’ru kiramok reheb’ li kristiaan re naq ink’a’ ke’wulak wan wi’ li che’? K’a’ru kitenq’an reheb’ chi wulak wan wi’ li che’? Kanab’eb’ li kok’al chirilb’al ru 1 Nefi 15:23─25. Chan ru naq li b’arb’ookil ch’iich’ kitenq’an re naq eb’ li kristiaan ke’xq’ax ru li q’ojyinal choql? Chan ru naq li rilb’al ru li raatin li Dios nokoxtenq’a chixq’axb’al ru li aaleek ut li aak’ab’ sa’eb’ li kutan a’in?
-
Tz’aqob’resi ru li perel re kok’ k’anjel rik’ineb’ li kok’al. Naq yooqex chixb’aanunkil a’an, kanab’eb’ chi aatinak chirix junjunqeb’ li aaleek neke’xk’ul li kok’al. Chan ru naru neke’xjultika xchapb’aleb’ rib’ rik’in li b’arb’ookil ch’iich’ rajlal kutan? B’ichahomaq “Li b’arb’ookil ch’iich’ ” (Eb’ li B’ich, 176) jo’ xkomon li ch’ina k’anjel.
Xb’oqb’aleb’ chi tzolok sa’ kab’l
Waklesiheb’ xch’ool li kok’al chixk’utb’al chiruheb’ lix junkab’al li “b’arb’ookil ch’iich’ ” xe’xyiib’ sa’ li perel re kok’ k’anjel ut chixwotzb’al chan ru naru neke’xchap rib’ rik’in li b’arb’ookil ch’iich’ naq neke’ril ruheb’ li loq’laj hu.
Xchaab’ilob’resinkil li qak’utum
Oksiheb’ li jalam-uuch re naq eb’ li kok’al te’xk’e xxik chi ab’ink. Naq taak’ut chiruheb’ li kok’al jun esil sa’eb’ li loq’laj hu, sik’ chan ru taatenq’aheb’ chirilb’al sa’ xk’a’uxleb’. Naru nakawoksiheb’ li jalam-uuch, video, kok’ muñeek, disfraz, ut wankeb’ chik xkomon.