laj Lehi yoo chirilb’al li Liahona

Laj Lehi ut li Liahona, xb’aan laj Joseph Brickey

27 enero–2 febrero

1 Nefi 16–22

“Tinkawresi li b’e cheru”

Eb’ li musiq’anb’il esil wankeb’ sa’ 1 Nefi 16─22 neke’xk’ut li yaalil na’leb’ naru neke’osob’tesink reheb’ li kok’al re laa tzoleb’aal. Ileb’ ru li ch’ol a’an ut tz’iib’aheb’ li na’leb’ nakak’ul.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Tz’iib’aheb’ li aatin a’in chiru li pizarron, malaj k’uteb’ jalam-uuch neke’eetalin reheb’: li Liahona, li roq li tzimaj, ut li jukub’. Kanab’eb’ oxib’ li kok’al chixsik’b’al ru junaq reheb’ li aatin malaj jalam-uuch ut chixwotzb’al xcha’alil li esil chirix laj Nefi li wan rilom rik’in li k’a’aq re ru a’an. Wi na’ajman ru, tenq’aheb’.

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

1 Nefi 16:10, 28–29; 18:8–13, 20–22

Li Qaawa’ naru naxk’am inb’e ut nikinixb’eresi.

K’ut chiruheb’ li kok’al naq us ta neke’xnumsi li ch’a’ajkilal, li Qaawa’ naru naxb’eresiheb’ (chi’ilmanq 1 Nefi 16─29).

Kok’ k’anjel naru chi b’aanumank

• K’ut chiruheb’ li kok’al jun li brújula, jun reetalil ch’och’, malaj junaq chik k’a’aq re ru li nokoxtenq’a chixtawb’al li na’ajej b’ar naqaj xik, ut ch’olob’ chan ru roksinkileb’ li k’anjeleb’aal a’an. Juntaq’eetaheb’ li k’anjeleb’aal a’an rik’in li Liahona naq yooqat chixk’osb’al ru li esil wan sa’ 1 Nefi 16:10, 28─29 ut 18:9─13, 20─22. Ch’olob’ naq xb’aan naq lix junkab’al laj Lehi ink’a’ ke’paab’an, li Liahona ink’a’ kik’anjelak (chi’ilmanq ajwi’ 1 Nefi 18:9─12, 20─22). K’a’ru natenq’ank qe sa’eb’ li kutan a’in chixtawb’al li b’e re q’ajk rik’in li qaChoxahil Yuwa’?

• K’am jun li kaxon li tixk’am naab’al xch’olob’ankil junaq na’ajej sa’ li kapiiy malaj rix li kapiiy. Oksi li kaxon ut eb’ lix ch’olob’ankil li na’ajej re reetalinkil li Liahona, ut kanab’eb’ li kok’al chixk’eeb’aleb’ xhoonal re xsik’b’al ru lix ch’olob’ankil ut xq’ehinkil k’a’ru na’ajejil a’an. Chirix a’an ayuqex chejunilex sa’ li na’ajej a’an. Ch’olob’ naq rik’in naq naqak’ut li qapaab’aal ut naqataaqe li b’e naxk’e qe li Qaawa’, a’an tooxtenq’a chi q’ajk rik’in a’an (chi’ilmanq Alma 37:38─42). Chan ru naq nokoxb’eresi li qaChoxahil Yuwa’ sa’ li b’e re q’ajk rik’in a’an?

1 Nefi 16:14–32

Naru ninwan jo’ jun chaab’il eetalil choq’ re lin junkab’al.

Lix wanjik laj Nefi rik’in lix junkab’al chiru jun li hoonal ch’a’aj ru naru naxtenq’aheb’ li kok’al chirilb’al naq us ta toj kok’eb’, naru neke’wan jo’ jun eetalil choq’ reheb’ lix junkab’al.

Kok’ k’anjel naru chi b’aanumank

• Kanab’eb’ li kok’al chixyiib’ankil xjalam-uuch k’a’ruhaq sa’ li resilal li roq xtzimaj laj Nefi li kitoqe’ (chi’ilmanq 1 Nefi 16:14─32), jo’ laj Nefi, jun li roq tzimaj, malaj li Liahona. Chirix a’an oksiheb’ li jalam-uuch re xseraq’inkil li esil sa’ li tzoleb’aal ut kanab’eb’ naq li kok’al te’xk’e xhoonaleb’ re xb’aanunkil ajwi’ a’an. Chan ru naru nokowan jo’ laj Nefi naq li qajunkab’al yoo chi nume’k sa’ junaq hoonal ch’a’aj ru?

• Kanab’eb’ li kok’al chixsetb’al jun sirso chiru hu ut chixyiib’ankil jun li xnaq’ uhej ra xch’ool chiru ut jun sa xch’ool junpak’al. Naq laa’at yooqat chixseraq’inkil li resil li roq’ xtzimaj laj Nefi li kitoqe’, kanab’eb’ chiroksinkileb’ li xnaq’ u re xk’utb’al k’a’ru ke’reek’a lix junkab’al laj Lehi sa’ jalan jalanq xcha’al li esil. Chan ru naq laj Nefi kixtenq’a lix junkab’al re naq sahaq xch’ool? K’a’ru naru naqab’aanu laa’o re naq li qajunkab’al sahaq xch’ool?

1 Nefi 17:7–19; 18:1–4

Li qaChoxahil Yuwa’ naru nikinixtenq’a chixb’aanunkil li k’a’ru ch’a’aj.

Jo’ laj Nefi, eb’ li kok’al nakatzoleb’ yookeb’ chixtzolb’al xb’aanunkil li k’a’ru chanchan naq ch’a’aj. Lix numsihom laj Nefi naru naxtenq’aheb’ chixnawb’al naq li qaChoxahil Yuwa’ tixtenq’aheb’ naq te’patz’oq re.

Kok’ k’anjel naru chi b’aanumank

• Rik’in roksinkil 1 Nefi 17:7─19 ut 18:1─4, seraq’i reheb’ li kok’al li esil chirix naq kitaqlaak laj Nefi chixyiib’ankil jun li jukub’. Naru ajwi’ nakawoksi “Ch’ol 7: Xyiib’ankil li jukub’ ” (Eb’ li Esilal sa’ lix Hu laj Mormon, 21─22) malaj li video sa’ xch’uutil li video re lix Hu laj Mormon sa’ ChurchofJesusChrist.org. Li perel re kok’ k’anjel re li xamaan a’in naru natenq’an chixkawob’resinkil li na’leb’ naq li qaChoxahil Yuwa’ kixtenq’a laj Nefi, ut naq tooxtenq’a ajwi’ laa’o.

• B’ichahomaq sa’ komonil li xkab’ raqal re li b’ich “Kaw lix ch’ool laj Nefi” (B’ichleb’aal choq’ reheb’ li Kok’al, 64). K’a’ru kik’ehok xkawil xch’ool laj Nefi naq eb’ li ras ke’reetz’u naq kixyal xyiib’ankil jun li jukub’?

reetalil li k‘utuk

Xk’utb’al li tzol’leb’: Kok’al ak ninqeb’

1 Nefi 16:10, 28–29; 17:13–15; 18:8–13, 20–22

Naq ninpaab’eb’ li taqlahom, li Qaawa’ nikinixb’eresi.

Oksi li seraq’ naq lix junkab’al laj Lehi kib’eresiik xb’aan li Liahona re xk’utb’al chiruheb’ li kok’al chan ru naq li Dios tixb’eresiheb’ naq te’xyal xq’e chixb’aanunkil li rajom a’an.

Kok’ k’anjel naru chi b’aanumank

• Sik’ ru junaq malaj naab’al reheb’ li raqal a’in sa’eb’ li loq’laj hu re rilb’al ru rik’ineb’ li kok’al: 1 Nefi 16:10, 28─29; 17:13─15 ut 18:8─13, 20─22. K’e xb’oqb’aleb’ chixk’eeb’al reetal k’a’ru tento taqab’aanu re toob’eresiiq ut taak’ame’q li qab’e xb’aan li Dios, ut chi aatinak chirix li k’a’ru xe’xtzol.

• Chirix xyaab’asinkileb’ li esil wankeb’ sa’ 1 Nefi 16─18, aatinan rik’ineb’ naab’aleb’ li kok’al chanchan ta wi’ naq ke’b’eek chaq rik’in lix junkab’al laj Lehi. Naru nakayeheb’ li patz’om jo’eb’ a’in: K’a’ut naq kexb’antioxin chirix li Liahona? K’a’ru tento kexb’aanu re naq kik’anjelak li Liahona? (chi’ilmanq 1 Nefi 16:28–29). Kanab’eb’ chi aatinak chirix li k’a’ru xk’ehom li Qaawa’ re qab’eresinkil sa’eb’ li kutan a’in.

• Kanab’eb’ li kok’al chixk’eeb’al reetal chan ru naru neke’roksi li resilal li Liahona re xtenq’ankil junaq li ramiiweb’ li naraj ru xsik’b’al ru k’a’ruhaq aajel ru. Ye reheb’ naq jo’ xtz’aqob’ 1 Nefi 16:10, 26─31 ut 18:9─22, naru ajwi’ neke’ril ru Alma 37:38─44. Wotz junaq aanumsihom b’ar wi’ naq li qaChoxahil Yuwa’ xatxtenq’a chiru junaq hoonal ch’a’aj ru, malaj, kanab’eb’ li kok’al chixwotzb’al lix numsihomeb’ a’an. K’a’ru tento taqab’aanu re naq taqak’ul lix tenq’?

1 Nefi 16:14–39; 18:1–5

Lin na’leb’ ut li k’a’ru ninsik’ ru naru naxtenq’aheb’ lin junkab’al.

Lix paab’aal laj Nefi kiwan jo’ jun nimla osob’tesihom naq lix junkab’al kixnumsi li yale’k. Chan ru naru nakatenq’aheb’ li kok’al chi tzolok rik’in lix b’aanuhom laj Nefi?

Kok’ k’anjel naru chi b’aanumank

• Kanab’eb’ li kok’al chixyiib’ankileb’ jalam-uuch li te’reetali li resilal li roq xtzimaj laj Nefi li kitoqe’ (chi’ilmanq 1 Nefi 16:14─39). Wi aajel ru, jultika li esil rik’ineb’ a’an. Naq yooqeb’ chixwotzb’al lix jalam-uucheb’, tenq’aheb’ chixk’eeb’al reetal chan ru naq lix tiikilal laj Nefi kirosob’tesi lix junkab’al. Kanab’eb’ li kok’al chixk’oxlankileb’ li ch’a’ajkilal li yookeb’ chixnumsinkil a’an malaj lix junkab’aleb’. K’a’ru naru neke’xb’aanu re xtaaqenkil lix b’aanuhom laj Nefi?

• Ilomaq ruheb’ sa’ komonil junjunqeb’ li raqal sa’ 1 Nefi 16:21─32. Aatinanqex chirix junjunqeb’ lix jayalihomeb’ lix junkab’aleb’ li kok’al, jo’ xb’aanunkil li q’ojyin re junkab’al malaj li tijok jo’ junkab’al rajlal. Chan ru naq eb’ li kok’al naru neke’xtenq’aheb’ lix junkab’al chixb’aanunkileb’ li jayalihom a’an? Kanab’eb’ chixk’uub’ankil xb’aanunkil k’a’ruhaq li taatenq’anq reheb’ lix junkab’al chixb’aanunkil lix jayalihomeb’ chiru li xamaan a’in.

1 Nefi 19:22–24

Naru ninjuntaq’eetaheb’ li loq’laj hu rik’in lin yu’am.

Tenq’aheb’ li kok’al chixk’eeb’al reetal naq eb’ li seraq’ wankeb’ sa’ li loq’laj hu moko yal esileb’ ta, xb’aan naq aran wankeb’ li na’leb’ naru narosob’tesiheb’ lix yu’am.

Kok’ k’anjel naru chi b’aanumank

• Kanab’ jun li ch’ina al chirilb’al ru 1 Nefi 19:22─24 chi kaw xyaab’ xkux, ut patz’ reheb’ li kok’al k’a’ru naraj naxye choq’ reheb’ “xjuntaq’eetankil chixjunileb’ li loq’laj hu” qik’in laa’o. Tenq’aheb’ chixtawb’al ru chan ru naq laj Nefi kixjuntaq’eeta jun li seraq’ sa’eb’ li loq’laj hu rik’in lix numsihom naq kixk’ul li perel ch’iich’ bronce (chi’ilmanq 1 Nefi 4:1─4; chi’ilmanq ajwi’ Exodo 14). Chan ru naq li xjultikankil li seraq’ a’an kixtenq’a laj Nefi ut eb’ li ras?

• Jultika junjunqeb’ li esil xe’xtzol li kok’al chirix laj Lehi ut lix junkab’al sa’ 1 Nefi, ut kanab’eb’ chixwotzb’al li k’a’ru xe’xtzol rik’ineb’ a’an. Tenq’aheb’ chixk’oxlankil hoonal sa’eb’ lix yu’am li naru neke’juntaq’eetaman rik’ineb’ li esil a’an. Qayehaq, b’ar wi’ li Qaawa’ kixpatz’ re laj Nefi naq tixyiib’ jun li jukub’ naru naxjultika reheb’ li hoonal b’ar wi’ tento ke’xb’aanu k’a’ruhaq jwal ch’a’aj ut ke’xsik’ lix tenq’ li Qaawa’.

reetalil li tzolok

Xb’oqb’aleb’ chi tzolok sa‘ kab’l

Kanab’eb’ li kok’al chixsik’b’al ru junaq li esil sa’ 1 Nefi 16─22 ut chixwotzb’al rik’ineb’ lix junkab’al chan ru naru “neke’xjuntaq’eeta” li esil a’an rik’ineb’ lix yu’am.

Xchaab’ilob’resinkil li qak’utum

Oksiheb’ li seraq’. Eb’ li seraq’ neke’xtenq’aheb’ li kok’al chixtawb’aleb’ ru li na’leb’ re li evangelio xb’aan naq neke’xk’ut chan ru naq eb’ li kristiaan neke’xyu’ami li na’leb’ a’an.

perel re kok’ k’anjel: li Dios nikinixtenq’a chi ab’ink chiruheb’ lix taqlahom