laj Adan ut li xEva naq ke’el chaq sa’ li Awimq Eden

Laj Adan ut li xEva, xb’aan laj Douglas Fryer

3–9 febrero

2 Nefi 1–5

“Koowan jo’ chanru li sahil ch’oolejil”

Laj Lehi kixtzoleb’ li ralal xk’ajol a’ yaal chan ru li rajomeb’ ru ut chan ru ke’wan chaq. Taaqe lix b’aanuhom naq nakakawresi aawib’ re xtzolb’aleb’ li kok’al re laa tzoleb’aal.

Xtz’iib’ankil li nakak’oxla

reetalil li wotzok

Xkanab’ankileb’ chi wotzok

Naq ak xach’olob’ naq laj Lehi kik’utuk chiru lix junkab’al chirix li qa’ach’ab’ankil re sik’ok-u, kanab’eb’ li kok’al chixwotzb’al xnumsihomeb’ rik’in xsik’b’al ru li k’a’ru us. K’a’ru xe’reek’a chirix naq xe’xsik’ ru li us? Chan ru naru neke’xjultika xsik’b’al ru li us?

reetalil li k‘utuk

Xk’utb’al li tzol’leb’: Kok’al toj ka’ch’ineb’ xyu’am

2 Nefi 1:20

Osob’tesinb’ilin naq ninpaab’an.

Li na’leb’ li nak’utman sa’ li raqal a’in—naq li paab’ank naxk’e li osob’tesihom—nak’utman chi kok’ aj xsa’ sa’ chixjunil lix Hu laj Mormon. K’oxla chan ru naru nakatenq’aheb’ li kok’al chixk’eeb’al reetal a’an sa’ lix yu’ameb’.

Kok’ k’anjel naru chi b’aanumank

• Kanab’eb’ li kok’al chatenq’ankil chixch’olob’ankil li aatin taqlahom ut chixyiib’ankil jun xtusulaleb’ li taqlahom. Il ru 2 Nefi 1:20, ut jultika naq “too’usaaq,” malaj too’osob’tesiiq, naq naqapaab’eb’ li taqlahom. K’a’ru naqeek’a naq naqapaab’eb’ li taqlahom a’an?

• K’ut chiruheb’ li kok’al k’a’aq re ru neke’xk’e li kolb’a-ix, jo’eb’ li xaab’, li punit, ut li ramleb’ uq’. Kanab’eb’ chiroksinkileb’. Chan ru neke’xk’e xkolb’al qix li k’a’aq re ru a’an? Ye reheb’ naq eb’ lix taqlahom li qaChoxahil Yuwa’ naru neke’xkol qix chiruheb’ li xiw xiw sa’ musiq’ej. Wotz junaq aanumsihom b’ar wi’ xkole’ aawix xb’aaneb’ li taqlahom.

2 Nefi 2:11, 16, 27

Li Dios kixk’e in’ach’ab’ankil re sik’ok-u.

Xb’aan li k’a’ru ke’xsik’ ru, laj Adan ut xEva tento naq ke’el chaq sa’ li Awimq Eden. Chan ru naru nakak’ut chiruheb’ li kok’al naq li k’a’ru ke’xsik’ ru laj Adan ut xEva nokoxk’e chiroksinkil lix taql qach’ool re xsik’b’al ru li qaChoxahil Yuwa’ sa’eb’ li kutan a’in?

Kok’ k’anjel naru chi b’aanumank

• Yiib’ xjalam-uuch jun li kristiaan ach’ab’anb’il ut jun chik wan chi preexil (maare junaq li kristiaan wan sa’ tz’alam), ut kanab’eb’ li kok’al chixk’utb’al li jalam-uuch naq laa’at taawileb’ ru li aatin ach’ab’anb’il ut preexil sa’ 2 Nefi 2:27. Jultika chi us li ch’ol aatin “kanab’anb’ileb’ chi sik’ok-u,” ut kanab’eb’ li junjunq chi kok’al chixka’sutinkil.

• Jultika rik’ineb’ li kok’al li esil chirix laj Adan ut xEva (chi’ilmanq 2 Nefi 2:17─19; chi’ilmanq ajwi’ “Ch’ol 3: Laj Adan ut xEva,” Eb’ li Esilal sa’ li Najter Chaq’rab’, 15─18, malaj li video sa’ ChurchofJesusChrist.org) ut li k’a’ru ke’xsik’ ru sa’ li Awimq Eden. Tenq’aheb’ li kok’al chixyiib’ankil jun xtusulal li k’a’ru neke’xsik’ ru rajlal kutan. Ch’olob’ xyaalal naq li qaChoxahil Yuwa’ kixk’e qa’ach’ab’ankil re xsik’b’al ru li us malaj li ink’a’ us, ut kanab’eb’ li kok’al chi pisk’ok malaj chixpoq’poq’inkil xsa’eb’ li ruq’ re saho’k rik’in li ach’ab’aak re sik’ok-u.

• B’aanuhomaq jun li b’atz’unk b’ar wi’ laa’at taaye jun li aatin (jo’ saqen) ut eb’ li kok’al te’xye lix ka’pak’alil (q’ojyin). B’aanu a’an naab’al sut. Re xtenq’ankileb’ li kok’al chixtawb’al ru chan ru lix ka’pak’alileb’ li k’a’aq re ru nokoxtenq’a chi sik’ok-u, il ru li xb’een jachal re 2 Nefi 2:11 ut 2 Nefi 2:16. Seraq’i reheb’ li kok’al esil chirix jun ch’ina al li na’aaleek chixsik’b’al ru li ink’a’ us. Tenq’aheb’ chixk’oxlankil lix ka’pak’alil li sik’ok-u a’an; chirix a’an kanab’eb’ chixk’utb’esinkil. Ch’olob’ xyaalal naq li qaChoxahil Yuwa’ nokorosob’tesi naq naqasik’ ru li k’a’ru us.

• B’ichahomaq sa’ komonil jun li b’ich chirix li sik’ok-u, jo’ “Chinwanq raj jo’ li Jesus” malaj “Tinsik’ ru li us” (B’ichleb’aal choq’ reheb’ li Kok’al, 40─41, 82─83), ut patz’ reheb’ li kok’al k’a’ru neke’xtzol sa’ li b’ich chirix li sik’ok-u.

reetalil li k‘utuk

Xk’utb’al li tzol’leb’: Kok’al ak ninqeb’

2 Nefi 1:20

Osob’tesinb’ilin naq ninpaab’an.

Naq eb’ li kok’al wankeb’ xpaab’aal naq li Dios taarosob’tesiheb’ xb’aan xpaab’ankileb’ li taqlahom—us ta ink’a’ te’xk’ul li osob’tesiik a’an sa’ junpaat—moko ch’a’ajaq ta choq’ reheb’ a’an xsik’b’al ru li k’a’ru us.

Kok’ k’anjel naru chi b’aanumank

• Tenq’aheb’ li kok’al chixjultikankil junjunqeb’ re li k’a’ru ke’xsik’ ru laj Nefi ut eb’ li ras. Che’ilmanq junjunqeb’ li eetalil sa’ 1 Nefi 2:11─16; 3:5─7; ut 18:9─11. Kanab’eb’ chirilb’al ru sa’ komonil 2 Nefi 1:20 ut chixwotzb’al k’a’ut naq laj Lehi kixk’e li esil a’an reheb’ li ralal naq neke’xk’oxla.

• Tz’iib’aheb’ ch’ol aatin re 2 Nefi 1:20 chiruheb’ kok’ setb’il hu ut aatinanqex chirix k’a’ru naraj neke’xye li ch’ol aatin. Kanab’eb’ li kok’al chirilb’al ru li raqal re xtusub’ankileb’ li setb’il hu sa’ xtusulaleb’ ru. Re xk’utb’al xjalanil li chaab’ilo’k ut li tz’eqtaanaak, k’ut chiruheb’ li kok’al jun li che’ chaab’il xk’iijik ut jun lix xaq malaj ruq’ li che’ setb’il chaq. K’a’ru xjalanil lix xaq li che’ moko setb’il ta rik’in junaq ak setb’il? Chan ru naq chanchano lix xaq li che’ naq naqapaab’eb’ lix taqlahom li Dios? Kanab’eb’ li junjunq chi kok’al chixtz’iib’ankil sa’ lix huheb’ chan ru naq li Dios narosob’tesiheb’ naq neke’xsik’ ru li us.

2 Nefi 2:22–28

Li Dios kixk’e in’ach’ab’ankil re sik’ok-u.

Li Jesukristo kooxkol chiru li kamk sa’ tib’elej ut li kamk sa’ musiq’ej (lix jachb’al qib’ rik’in li Dios xb’aan li maak) rik’in lix tojb’al rix li maak kixb’aanu ut lix waklijik chi yo’yo. Re wank wi’chik rik’in li qaChoxahil Yuwa’, tento taqoksi lix taql qach’ool re xjalb’al qak’a’uxl rajlal ut xyalb’al qaq’e chi wank chi tiik qach’ool.

Kok’ k’anjel naru chi b’aanumank

• Chap chi kutankil jun xjalam-uuch laj Adan ut xEva (chi’ilmanq Libro de obras de arte del Evangelio, ajl 4), ut kanab’eb’ li kok’al chixwotzb’al li neke’xnaw chirix k’a’ru ke’xk’ul laj Adan ut xEva sa’ li Awinq Eden. Tenq’aheb’ li kok’al chixtawb’aleb’ xsumenkil a’an sa’ 2 Nefi 2:22─27. Ch’olob’ naq xb’aan li k’a’ru ke’xsik’ ru laj Adan ut xEva, osob’tesinb’ilo chi chalk sa’ li ruchich’och’ ut chiroksinkil lix taql qach’ool re xsik’b’al ru li k’a’ru us ut xjalb’al qak’a’uxl rik’in lix tojb’al rix li maak xb’aan li Kristo naq xqasik’ ru li ink’a’ us.

• Tz’iib’aheb’ li aatin re 2 Nefi 2:27 chiru li pizarron. Tenq’aheb’ li kok’al chixkanab’ankil sa’ xk’a’uxleb’ li raqal rik’in li ka’sutink ut rik’in xk’eeb’aleb’ xhoonal re xsachb’al junjunq li aatin naq yooqeb’ chixka’sutinkil. Tenq’aheb’ li kok’al chixk’oxlankil chan raj ru li yu’am wi ta maak’a’ k’a’ru naqasik’ ru. K’a’ut naq neke’xb’antioxi li xtaql ch’oolej?

• Kanab’eb’ li kok’al chixwotzb’al jun numsihom b’ar wi’ xe’xsik’ ru li us. K’a’ru xe’reek’a chirix naq xe’xsik’ ru li us? K’a’ru naru naqab’aanu re xtenq’ankil qib’ chiqib’il qib’ re xsik’b’al ru li us naq noko’aaleek re xb’aanunkil k’a’ruhaq ink’a’ us? K’oxla xb’ichankil junaq li b’ich chirix li sik’ok-u, jo’ “Sik’ li us” (Eb’ li B’ich, 151), ut kanab’eb’ li kok’al chixwotzb’al li neke’xtzol sa’ li b’ich.

2 Nefi 3:6–24

Laj Jose Smith kiwan jo’ jun “aj ilol na’leb’ sik’b’il ru.”

Sa’ 2 Nefi 3 laj Lehi ki’aatinak chirix jun profeetil aatin chirix li profeet aj Jose Smith. Laa’at naru nakawoksi li hoonal a’in re xk’utb’al chiruheb’ li kok’al chirix lix k’anjel a’an sa’ roso’jikeb’ li kutan.

Kok’ k’anjel naru chi b’aanumank

• Kanab’eb’ li kok’al chixsik’b’aleb’ sa’ 2 Nefi 3:6─24 eetalil chirix ani li profeet na’aatinak wi’. Yiib’ jun xtusulal li eetalil chiru li pizarron. K’a’ut naq kik’ab’a’iman laj Jose Smith jo’ jun “aj ilol na’leb’ sik’b’il ru”? K’a’ru kixb’aanu laj Jose Smith li “nim xloq’al choq’ reheb’ li ras riitz’in”? (raqal 7).

• B’ichahomaq jun li b’ich chirix laj Jose Smith, jo’ “Nimanb’ilaq li ki’ilok re Jehova” (Eb’ li B’ich, 16), malaj ilomaq junaq video li nareetali li jalan jalanq xcha’al lix k’anjel, jo’ li neke’tawman sa’ https://history.ChurchofJesusChrist.org/article/joseph-smith-video-downloads?lang=spa. Patz’ reheb’ li kok’al k’a’ut naq neke’b’antioxin chirix li profeet aj Jose Smith.

reetalil li tzolok

Xb’oqb’aleb’ chi tzolok sa’ kab’l

Waklesiheb’ xch’ool li kok’al chixk’eeb’al reetal lix hoonaleb’ re xsik’b’al ru li us chiru li xamaan a’in. K’e xb’oqb’aleb’ chixkawresinkileb’ rib’ re xwotzb’al sa’ li xamaan chal re li k’a’ru us xe’xsik’ ru ut li k’a’ru xe’xk’ul rik’in a’an.

Xchaab’ilob’resinkil li qak’utum

Eb’ li kok’al naru neke’xk’e reetal lix musiq’ahom li Musiq’ej. K’ut chiruheb’ li kok’al naq li eek’ahom re tuqtuukilal, li rahok ut li q’ixnal neke’reek’a naq neke’aatinak malaj neke’b’ichan chirix li Jesukristo ut lix evangelio neke’chal rik’in li Santil Musiq’ej. Eb’ li eek’ahom a’an naru neke’xwaklesi lix nawom xch’ooleb’.

perel re kok’ k’anjel: jo’ laj Adan ut xEva, wan xtaql inch’ool laa’in